1, 2. ¿Bin-utʼil ya stuuntes sok yutsil yoʼtan Jehová te bintik ay yuʼune?

TE Jehová jaʼ Dios te sok yutsil yoʼtan ya yakʼ. Spisil te bin ay kuʼuntik jaʼme talem ta stojol. Jaʼme yuʼun spisil te oro, te plata sok spisil te bin ay ta Balumilal sok ya yakʼbotik spisil te bin ya xtuun swenta ay kuxlejalil-a (Salmo 104:13-15; Hageo 2:8). Spisil-abi, te Biblia ya yal te ay bayal buelta la stuuntes Jehová ta yakʼbeyel te bin ya xtuun yuʼun te j-abatetik yuʼune.

² Jich bitʼil, te Jehová la yakʼbey jaʼ sok maná te israeletik te cuarenta jaʼbil ayinik ta jochol takʼin kʼinal (Éxodo 16:35). Jich «mayuc bin pasotic falta yuʼun» (Nehemías 9:20, 21). Te Jehová la spas jun milagro ta swenta te j-alwanej Eliseo, la yakʼ pʼoluk aceite te jtebxanix ay yuʼun jtul meʼba ants. Te bitʼil jich kʼot ta pasel, te ants la stoj spisil te sbet sok ayto jil stakʼin yuʼun ya sman te bin ya xtuun yuʼun sok te yalatake (2 Reyes 4:1-7). Jaʼnix jich te Jehová la yakʼbey yuʼel te Jesús ta spasel milagro ta yakʼel weʼelil sok takʼin te kʼalal jich ya skʼan pasele (Mateo 15:35-38; 17:27).

3. ¿Bin ya kiltik ta articulo ini?

³ Te Jehová ya xjuʼ biluk bin ya stuuntes ta swentainel spisil te bin spasoj ta Balumilale. Manchukme jich-abi, ya stijbey yoʼtan te  j-abatetik yuʼun te yakuk stuuntesik te bin ay yuʼunik ta skoltayel te organisasion yuʼune (Éxodo 36:3-7; kʼopona te sjun Proverbios 3:9). Ta articulo ini yame kiltik ta lek te sujtib yuʼun te jojkʼoyeletik ini: «¿Bin yuʼun ya skʼan Jehová te ya jtuuntestik te bin ay kuʼuntik yuʼun ya kakʼbeytik sujtel jtebuk te bin yakʼojbotike? Te j-abatetik yuʼun Dios ta namey kʼinal, ¿bin-utʼil la yakʼik koltayel ta takʼin ta stojol te smelelil yichʼel ta mukʼ te Diose? ¿Bin-utʼil ya stuuntes te organisasion kuʼuntik te majtʼan takʼin ya yichʼ akʼbeyele?».

4. ¿Bin ya kakʼbeytik yil te Jehová kʼalal ya jkoltaytik te aʼtelil yuʼune?

⁴ ¿Bin yuʼun ya kakʼbeytik Jehová te bin ay kuʼuntike? Jaʼ ta skaj te kʼux ta koʼtantik sok ya kalbeytik wokol ta swenta spisil te bin spasoj ta jtojoltike. Ta melel, ya stij koʼtantik kʼalal jich ya jnoptike. Jich ya kaʼiy jbatik bitʼil te ajwalil David kʼalal la yal bin ya yichʼ tuuntesel ta spasel-a te templo. La yal te spisil te bin ay kuʼuntik talem ta stojol Jehová, jich yuʼun spisil te bin ya kakʼbeytike jaʼnix yakʼojbotik (kʼopona te 1 Crónicas 29:11-14).

5. ¿Bin-utʼil ya yakʼ ta ilel te Biblia te ya kichʼtik ta mukʼ te Jehová kʼalal ay bin ya kakʼbeytik te maʼyuk bin ya jmaliytik sujtel yuʼune?

⁵ Yan swentail te bin yuʼun ay bin ya kakʼbeytik te Jehová jaʼ te jich ya kichʼtik ta mukʼ-a. Te jpuk-kʼop Juan la yaʼiy te jich yakik ta yalel te j-abatetik yuʼun Dios ta chʼulchan ta jun najalsitil: «Cajwaltic Dios, hich ya scʼan te yac awichʼ awutsilal, ichʼel ta mucʼ, soc awuʼel, como haʼat la apas spisil bintic ay, soc ta scuenta scʼanojel awoʼtan cuxajtic soc la yichʼticlan pasel» (Apocalipsis 4:11). Ta melel, snujpʼ te ya yichʼ albeyel yutsilal te Jehová sok ichʼel ta mukʼ, jaʼ yuʼun ya skʼan te ya kakʼbeytik te bin lekxan ay kuʼuntike. Ta skʼajkʼalel Israel te Jehová la spas ta mantal te nasion-abi ta swenta te Moisés te akʼa spasik oxchajp kʼinetik ta jujun jaʼbil. Jichme ya yal te Ley: «Ma me ayuc jtuhluc te jochol scʼab ya xtal stehcʼan sba ta stojol te Jehová» (Deuteronomio 16:16). Jich bitʼil ya kiltik, ay bin ya yakʼbeyik Jehová te israeletik kʼalal ya yichʼik ta mukʼ. Jaʼnixme jich ta ora ini, swenta ya kichʼtik ta mukʼ te Jehová, ay bin ya kakʼtik ta stojol te maʼyuk bin ya jmaliytik sujtel yuʼune. Te kʼalal jich ya jpastike, yame kakʼtik ta ilel te ay skʼoplal kuʼuntik sok te ya jkoltaytik te organisasion yuʼun te Jehová liʼ ta Balumilal.

6. ¿Bin yuʼun lek te ya kakʼtik te bintik ay kuʼuntike? (Ilawil te lokʼomba ta sjajchibal te articulo).

⁶ Lek te ay bin ya kakʼtik sok yutsil koʼtantik ma jaʼuknax te ay bin ya kichʼtik akʼbeyele (kʼopona te sjun Hechos 20:35). Nopa awaʼiy te ay jtul tut kerem te ay bin ya skʼebanbey te smeʼ stat te jaʼ smanoj sok te takʼin te jaʼnix akʼbil yuʼunike. ¿Mabal jichuk te bayal ya yalik wokol yuʼune? O jnop kaʼiytik te ay jtul jchʼiel precursor te sjokinej ta nainel te smeʼ stat te ya yakʼbey takʼin swenta ya yichʼ manel te bintik ya xtuun ta na. Te smeʼ state maniwan smaliyojik te ya x-akʼbotik takʼin yuʼun, pero ya stsakik, melel ya snaʼik te jich ya yakʼ ta ilel te ya yal wokol yuʼun spisil te bin spasojik ta stojole. Jaʼnixme jich, te Jehová ya snaʼ te lek te ya kakʼbeytik te bin ay kuʼuntike.

7, 8. 1) Kʼalal ay la yichʼ pasel aʼtelil ta namey kʼinal, ¿bin-utʼil koltaywanik te j-abatetik yuʼun Dios? 2) ¿Bin-utʼil la yakʼik majtʼanil te j-abatetik yuʼun Jehová ta yichʼel ta mukʼ Dios?

⁷ Ta namey kʼinal te j-abatetik yuʼun Jehová kʼayemik ta yakʼel te bin ay yuʼunike, jich ya yakʼ kiltik te Biblia. Ay jaʼ la yakʼ sbilukik kʼalal ya yichʼ pasel jun aʼtelil. Jich bitʼil, kʼalal la yichʼ pasel-a te nailpakʼ templo, te Moisés la stijbey yoʼtan te israeletik ta yakʼel sbilukik. Te ajwalil David jaʼnixme jich la spas yuʼun ya yichʼ pasel-a te temploe (Éxodo 35:5; 1 Crónicas 29:5-9). Ta skʼajkʼalel te ajwalil Joás (Jehoás)  te sacerdoteetik la yachʼubtesik te sna Jehová ta swenta te majtʼan takʼin la yakʼ te lume (2 Reyes 12:4, 5). Ta sbabial siglo kʼalal te jchʼuunjeletik la yaʼiyik stojol te yakik ta kʼaxel ta wokol te hermanoetik yuʼun Judea ta skaj wiʼnal, te Biblia ya yal te jujuntul la yakʼik chikan te bin ay yuʼunike (Hechos 11:27-30).

⁸ Jaʼnix jich te j-abatetik yuʼun Dios ta namey la yakʼik majtʼan takʼin ta skoltayel te machʼatik ay yaʼtelik ta stojol Jehová. Ta Ley yuʼun Moisés ya yal te ma xyichʼik akʼbeyel kʼinal te levitaetik jich bitʼil te yantik chajpalchajp tsʼumbalile. Jaʼ yuʼun te yantik tsʼumbaliletik ya yakʼbeyik diezmo te jaʼ jun ta slajunebal yuʼun te bin ya xlokʼ yuʼunike. Jich te levitaetik jaʼ ya xbajtʼ yoʼtanik ta aʼtel ta nailpakʼ templo (Números 18:21). Bayal jaʼbil ta patil, te Jesús sok te jpuk-kʼopetik yuʼun koltayotik yuʼun antsetik sok «te bintic ay yuʼunique» (Lucas 8:1-3).

9. ¿Banti la staik te bin la yakʼik ta majtʼanil te j-abatetik yuʼun Dios ta namey kʼinal?

⁹ Spisil te majtʼanil, yanyantik banti la yichʼ tael. Jich bitʼil, kʼalal ay bin la yakʼik te israeletik yuʼun ya yichʼ pasel te nailpakʼ templo ta jochol takin kʼinal, ayniwan la yakʼik biluketik te yichʼojik lokʼel tal ta Egipto (Éxodo 3:21, 22; 35:22-24). Ta sbabial siglo ay chaʼoxtul jchʼuunjeletik la schonik te bin ay yuʼunik jich bitʼil skʼinalik sok snaik, te stojole jaʼ la yakʼbeyik te jpuk-kʼopetike. Ta patil te jpuk-kʼopetik jaʼ la spukik te takʼin ta stojol te machʼatik ayik ta wokole (Hechos 4:34, 35). Ay yantik te ya skʼej stakʼinik yuʼun spisil-ora ya yakʼik majtʼanil ta stojol te Diose (1 Corintios 16:2). Chikan ta ilel te spisil te j-abatetik yuʼun Dios ya yakʼik te bin ay yuʼunik chikan teme jkʼulejik o pobreik (Lucas 21:1-4).

10, 11. 1) ¿Bin-utʼil ya xjuʼ ya kakʼtik ta ilel yutsil koʼtantik jich bitʼil te j-abatetik yuʼun Jehová ta nameye? 2) ¿Bin-utʼil ya awaʼiy aba te ya xjuʼ ya akoltay te aʼtelil yuʼun te Wentainel yuʼun Dios?

¹⁰ Ta jkʼajkʼaleltik ayniwan ya yichʼ kʼanel majtʼan takʼin yuʼun ya yichʼ pasel jun aʼtelil. Repente te jkongregasiontik yak ta schapel te ya slekubtes te sNail Tsoblej kuʼuntik o te ya spas yachʼile. O ayniwan ya kichʼtik albeyel te ya xtuun takʼin ta slekubtesel te Betel, ta spasel mukʼul tsoblej o yuʼun ya jkoltaytik te hermanoetik te la staik wokol ta tulan yikʼal jaʼal o yan wokolil. Te majtʼan takʼin ya kakʼtike, jaʼnix jich ya xtuun ta skoltayel te misioneroetik, precursoretik espesial, superintendenteetik yuʼun circuito sok hermanoetik te ya x-aʼtejik te banti ya yichʼ wentainel te kaʼteltik ta swolol Balumilal soknix ta spisil te Beteletik. Jaʼnix jich te jkongregasiontik jichniwan schapoj te ya stikun bael takʼin ta stojol te aʼtelil chajpanbil yuʼun ya yichʼ pasel sNail Tsoblejetik sok sNail mukʼul tsoblejetik te ya xtuun yuʼun te hermanoetik ta swolol Balumilal.

¹¹ Jpisiltik ay bin ya xjuʼ ya kakʼtik yuʼun ya jkoltaytik te aʼtelil yuʼun Jehová te yak ta pasel ta slajibal kʼajkʼal ini. Jteb ma spisiluk te takʼin ya yichʼ akʼel ma xnaʼbaj machʼa ya yakʼ, melel maʼyuk machʼa ya kakʼbeytik snaʼ te ya kakʼtik takʼin ta kajaetik ta sNail Tsoblej sok ay ya jtikuntik bael ta jw.org. Ayniwan jich ya kaʼiytik te maʼyuk yipal te takʼin ya kakʼtik te maʼyuk bin ya xlokʼ-a. Pero ta melel jteb ma spisiluk te majtʼan takʼine ma ta skajuk chaʼoxtulnax te bayal ya yakʼike, ya stsob sba te bitʼil tsobol machʼatik ya yakʼik manchukme jtebnax ya yakʼik. Spisil te hermanoetik, manchukme ay machʼatik maʼyuk lek sbilukik jich stalelik bitʼil te jchʼuunjeletik yuʼun Macedonia ta sbabial siglo. «Aunque pobrehic» la yalik bayal wokol ta yakuk x-akʼotik ta yakʼel koltayel, jich la spasik sok yutsil yoʼtanik (2 Corintios 8:1-4).

12. ¿Bin ya spas te organisasion kuʼuntik yuʼun lekxan ya yichʼ tuuntesel te majtʼan takʼine?

¹² Te Jtsojb Jwolwanejetik ya spasik tulan yuʼun ma biluknax bin-utʼil ya stuuntesik te takʼine sok te ayuk swentaile (Mateo 24:45). Ya skʼoponik Dios sok ya schapik ta lek  bin-utʼil ya yichʼ tuuntesel (Lucas 14:28). Ta namey kʼinal, te takʼin te akʼbil ta stojol Dios, wentainbil yuʼun winiketik te jun yoʼtan yakʼoj sbaike. Ya yilik ta lek te jaʼnax ya yichʼ tuuntesel te takʼin ta spasel te yaʼtel te Jehová. Jich bitʼil, ta jun buelta te Esdras sujt talel ta Jerusalén, yichʼoj talel oro, plata sok yantik kʼulejalil te la yakʼ ta majtʼanil te ajwalil yuʼun Persia, ta ora ini kʼaxem ta 100 miyon dolar ya xlokʼ stojol. Te Esdras jich la yil te jaʼ majtʼanil ta stojol Jehová te kʼulejaliletike, jaʼ yuʼun la yal ta jamal bintik ya skʼan pasel yuʼun ya yichʼ kanantayel ta be te banti ya xjuʼ ya staik utsʼinele (Esdras 8:24-34). Bayal jaʼbil ta patil, te jpuk-kʼop Pablo la stsob takʼin yuʼun ya yichʼ koltayel te hermanoetik yuʼun Judea sok la yil ta lek te stojiluk ya spukik, «ma haʼuc nax ta stojol Cajwaltic, ha nix hich ta stojol te ants-winiquetique» (kʼopona te 2 Corintios 8:18-21). Ta ora ini te organisasion kuʼuntik ya stʼun te ejemplo yuʼun te Esdras sok te Pablo. Jaʼ yuʼun ya yal ta jamal bin-utʼil ya skʼan ya yichʼ tuuntesel te majtʼan takʼine.

13. ¿Bin yuʼun ay bin achʼtonax la sjel te organisasione?

¹³ Ay familiaetik ya schapik bin-utʼil lekxan ya stuuntesik stakʼinik yuʼun ma jaʼuk bayalxan ya slajinik te bitʼil ya spasik ganare. O ay familiaetik ya sleik bin-utʼil maba bayal ya x-aʼtejik swenta ya x-abatinikxan ta stojol Jehová. Aynix jich ya xkʼot ta stojol-euk te organisasion yuʼun Jehová. Achʼtonax ay bayal bin yachʼil la yichʼ nopel te ya yichʼ pasele. Te kʼalal jich la yichʼ pasele, ay jaʼ bayalxan takʼin la yichʼ lajinel te bitʼil te majtʼan takʼin ya yichʼ akʼele. Jaʼ yuʼun te organisasion ya sle bin-utʼil maba bayal takʼin ya yichʼ lajinel sok te ya xtsʼuj te aʼtelile. Jich ya xjuʼ ta tuuntesel ta lek te majtʼan takʼin ya kakʼtike.

14-16. 1) ¿Bin yak ta pasel sok te majtʼan takʼin ya kakʼtike? 2) ¿Bin lekilal ataoj ta swenta te majtʼaniletik ya yakʼbotik te organisasione?

¹⁴ Bayal hermanoetik te ayix jaʼbil yakik ta abatinel ta stojol Jehová ya yalik te maʼyuk jich yichʼojik bayal majtʼaniletik ta stojol te organisasion te bitʼil ta ora ini. Melel te bin ya yalike. Ta ora ini ay kuʼuntik te pajina ta Internet jw.org sok te canal JW Broadcasting. Jaʼnix jich te Traducción del Nuevo Mundo de las Santas Escrituras yichʼoj kʼasesel ta bayalxan chajp kʼopil te bitʼil ta namey talel. Soknix ta jaʼbil 2014 sok 2015 la yichʼ pasel te mukʼul tsoblejetik internacional te yichʼoj sbiil «Jaʼ nail akʼa jletik te Ajwalinel yuʼun te Diose», la yichʼ pasel ta estadio te kʼax mukʼik ta 14 mukʼul lumetik ta swolol te Balumilale. Bayal la smulanik te machʼatik kʼotike.

 ¹⁵ Bayal machʼatik ya yalik wokol ta swenta spisil te tʼujbil majtʼaniletik yakʼojbotik te organisasion yuʼun te Jehová. Jtul hermano sok yinam te yakik ta abatinel ta tut lum yuʼun Asia jich la yal: «Ay namal ya kaʼiy jbakotik sok ya xchʼay ta koʼtantik bantito kʼalal kʼoem te yaʼtel te Jehová. Pero kʼalal ya kiltik te programaetik te ya xlokʼ ta JW Broadcasting oranax ya xtal ta koʼtantik te ay kermanotaktik ta swolol Balumilal te jun ayotik ta jpisiltike. Te banti ayotike mero ya smulanik te hermanoetik te bin ya xkʼax ta JW Broadcasting. Bayal buelta ya kaʼiytik stojol te nopolxan ya yaʼiy sbaik ta stojol te Jtsojb Jwolwanejetik ta swenta te programa ya xlokʼ ta jujun u. Kʼax lek ya yaʼiyik te ayik ta organisasion yuʼun te Jehová».

¹⁶ Ta swolol Balumilal jteb ma sta 2,500 sNail Tsoblej yak ta pasel sok yak ta lekubtesel. Te hermanoetik ta jun kongregasion ta Honduras jich la stsʼibayik kʼalal jajch stuuntesik te yachʼil snail tsoblej yuʼunike: «Ta melel kʼax tseʼel koʼtantik te ayotik ta sfamilia te Jehová sok te ya jmulantik te jun ayotik sok te kermanotaktik ta swolol Balumilal. Jaʼnax ta swentaik juʼ ta pasel ta jlumalkotik te sNail Tsoblej te ya jkʼankotike». Bayal hermanoetik jaʼnix jich ya yalik wokol kʼalal ya yichʼik te Biblia sok yantik junetik ta skʼopik, kʼalal ya yichʼik koltayel ta yorail wokolil ta skaj tulan yikʼal jaʼal o yan wokolil, jaʼnix jich te kʼalal ya yilik te bayal bin lek yak ta lokʼel ta slumalik yuʼun te scholel skʼop Dios ta komonsitil sok te banti ya xkʼax bayal ants winiketik.

17. ¿Bin-utʼil ya xchiknaj ta ilel te yak ta skoltayel Jehová te organisasion yuʼune?

¹⁷ Bayal machʼatik te maba testigoik yuʼun Jehová wokol ya schʼuunik te bayal bin ya xjuʼ jpasbeltik ta swentanax te majtʼan takʼine. Jtul gerente te ya swentain jun mukʼul empresa la yulaʼtay jun imprenta kuʼuntik, chajpnax la yil te ma xyichʼik tojel te machʼatik ya x-aʼtejik tey-a sok te jaʼnax ya yichʼ tuuntesel te majtʼan takʼin ta spasel te aʼtelil soknix te ma jpastik kampaña yuʼun ya jtsobtik takʼin. La yal te ma xjuʼ ta pasel ta jichnax te aʼtelil ya jpastike. Yuʼun-nix jich-a te bin la yale, melel ya jnaʼtik te jaʼnax ya xjuʼ ta pasel ta swentanax te koltayel yuʼun te Jehová (Job 42:2).

18. 1) ¿Bin bendisionetik ya jtatik ta swenta te ya jkoltaytik te aʼtelil yuʼun te Wentainel yuʼun te Diose? 2) ¿Bin-utʼil ya xjuʼ ya kakʼbeytik snop te kal jnichʼnabtik sok te machʼatik yachʼilikto te ya yakʼik majtʼanil ta stojol Jehová?

¹⁸ Te Jehová ya yakʼbotik te tʼujbil majtʼanil ta skoltayel te mukʼul aʼtelil yuʼun te Wentainel yuʼun Dios ta slajibal kʼajkʼal ini. Ya yalbotik ta jamal te ya yakʼbotik bendision teme jich ya jpastike (Malaquías 3:10). Jaʼnix jich ya yal ta jamal te lek ya xkʼot ta lokʼel te machʼa sok yutsil yoʼtan ay bin ya yakʼe (kʼopona te sjun Proverbios 11:24, 25). Soknix ya jtatik stseʼelil koʼtantik, melel «ha bayel xan yutsil te machʼa ay bin ya yacʼ te bin utʼil ay bin ya yichʼ» (Hechos 20:35). Jaʼnixme jich yame xjuʼ ya kakʼbeytik yil ta jkʼoptik sok ta kaʼteltik te kal jnichʼnabtik sok te machʼatik yachʼilikto bin-utʼil ya xjuʼ ya yakʼik majtʼanil ta stojol Jehová te ya yichʼik bayal bendision yuʼun.

19. ¿Bin-utʼil la stijbat awoʼtan te articulo ini?

¹⁹ Spisil te bin ay kuʼuntike talem ta stojol Jehová. Te kʼalal ay bin ya kakʼbeytik ta majtʼanil ya kakʼtik ta ilel te kʼux ta koʼtantik sok te ya kalbeytik wokol yuʼun spisil te bin spasoj ta jtojoltike (1 Crónicas 29:17). Kʼalal te israeletik ay bin la yakʼik ta majtʼanil yuʼun ya yichʼ pasel-a te templo «tseʼel yoʼtanic te pueblo yuʼun te la yaqʼuic bayel mahtaniletic ta scʼanojel yoʼtanic, como ta spisil yoʼtanic la yaʼbeyic te Jehová» (1 Crónicas 29:9). Jichuknixme te joʼotike, jmulantikxan te sbujtsʼ oʼtanil sok te lek ya kaʼiy jbatik yuʼun te ya kakʼbeytik Jehová te bin jaʼnix yakʼojbotike.