«KʼALAL te kamigotak ya yalik te kʼax tseʼel yoʼtanik te yakik ta abatinel te banti maʼyuk bayal precursoretik, koʼtanuk te jichnix ya kaʼiy jba-euke», jich ya yal te Sylviana jtul precursora te 25 yaʼbilal. Jich ya yalxan: «Pero jich jkuyoj te ma xjuʼ kuʼun te ya xboon ta yan lugar te banti ya skʼanik koltayel ta scholel skʼop Dios».

¿Aybal jich awaʼiyoj aba bitʼil te Sylviana? ¿Awoʼtanukbal ya xbaat te banti ya skʼanik koltayel ta scholel skʼop Dios, pero ya akuy te maniwan ya xjuʼ awuʼune? Teme jiche, mame xchebaj awoʼtan. Te Jehová skoltayoj bayal ta mil hermanoetik ta stsalel te bin ya xmakotik yuʼun ta smukʼubtesel te yaʼtelik ta stojole. ¿Bin-utʼil skoltayoj? Yame kiltik cheʼoxebuk ejemplo, jaʼ yuʼun kiltik bin kʼoem ta pasel ta Madagascar, jaʼ te schanebal isla te kʼax mukʼxane.

Ta lajuneb jaʼbil kʼaxeltoe kʼaxem ta 70 precursoretik sok yantik jcholkʼopetik te talemik ta 11 ta pam nasionetik * te yakʼoj sbaik ta abatinel ta Madagascar ta skʼinal África te banti bayal machʼatik ya smulanik te skʼop Dios sok ay skʼoplal ta yoʼtanik. Jaʼnix jich bayal jcholkʼopetik baemik ta yantik lugar teynix ta Madagascar yuʼun ya xkoltaywanik ta spukel ta alel te skʼop Dios ta slumalik. ¿Yabal akʼan ya anaʼbey sba chaʼoxtuluk?

Te Louis te nujpunem sok te Perrine te kʼaxemix ta treinta yaʼbilalik lokʼik bael ta Francia, bajtʼik ta abatinel ta Madagascar. Ta bayal jaʼbil la snopilanik te ya skʼan ya xbajtʼik ta abatinel ta yan nasion, pero te Perrine maba ya sta ta nopel ta lek. Jich ya yal stukel: «Ya jxiʼ te bin maʼyuk jpasoj sok maʼyuk kiloj. Jaʼ wokol ya kaʼiy yijkʼitayel te familia, te kongregasion, te jnakotik, te bin yilel jlumalkotik sok te bin kʼayemotik ta spasel-a. Ta melel, jaʼ ya skʼan ya jtsal te jxiwele, melel jaʼ ya smakonxan ya kaʼiy». Pero ta jaʼbil 2012 te Perrine la slokʼes sba ta yoʼtan, jaʼ yuʼun bajtʼ sok te Louis ta Madagascar. ¿Bin-utʼil ya yaʼiy sbaik ta ora ini? Jich yal yalxan: «Kʼalal ya jnopilan te bin kʼaxem kuʼuntik liʼi, ya jta ta ilel te yichʼojxan yip te schʼuunel koʼtan, melel kilojtik ta lek bin-utʼil skoltayojotik te Jehová». Te Louis jich ya yal: «Lajuntul te machʼatik ya kakʼbeytik nojptesel ta Biblia talik ta sbabial Snaʼojibal  slajel te Jesús te kʼax kuʼunkotik liʼ ta Madagascar. ¡Nopanax awaʼiyik-a!».

Kʼalal te Louis sok te Perrine la sitintayik tulan wokol, ¿banti la sta yip yoʼtanik swenta maba ya sujtik bael? La skʼoponik Jehová sok la skʼanbeyik te yakuk x-akʼbotik yip yoʼtanik yuʼun swenta ya xkujch yuʼunik-a (Filipenses 4:13). Te Louis jich ya yal: «La jtakotik ta ilel te ya yaʼiy jkʼoptik te Jehová sok te ya yakʼbotik te lamalkʼinal yuʼune. Jich jaʼ bajtʼ ta koʼtantik te bin tʼujbil yak jtabelkotik ta scholel skʼop Diose. Jaʼnix jich te kamigotak-kotik ta Francia la stikunbotik correo electrónico sok karta yuʼun ya yakʼbotik smukʼul koʼtantik, mero la skoltayotik yuʼun maba ya jkom jbatik ta spasel te aʼtelile» (Filipenses 4:6, 7; 2 Corintios 4:7).

Te Jehová la smajtʼantes te Louis sok te Perrine ta skaj te kujch yuʼunike. Te Louis jich ya yal: «Ta octubre ta 2014 bootik ta Pʼijubtesel yuʼun sKʼop Dios ta swenta te Jnopojeletik te Nujpunemikixe te la yichʼ pasel ta Francia. * Te pʼijubtesel-abi, jaʼ majtʼanil te la yakʼbotik te Jehová te maʼyuk bin-ora ya xchʼay ta koʼtantik». Te hermano Louis sok te yiname akʼbot bayal stseʼelil yoʼtanik te chaʼtikunotik sujtel ta Madagascar te kʼalal laj yoʼtanik ta yichʼel pʼijubtesel.

Te Didier te nujpunem sok te Nadine, jaʼ slumalik te Francia, kʼaxem ta 50 yaʼbilalik-a te kʼalal bajtʼik ta Madagascar ta 2010. Te Didier jich ya yal: «Te kʼalal achʼix keremotik-ae aʼtejotik ta precursor, ta patil la jchʼitestik oxtul kal jnichʼnabtik. Te kʼalal chʼiik baele, la jnoptik teme ya xjuʼ xbootik ta abatinel ta yan nasion». Te Nadine jich ya yal ta jamal: «Jaʼ ya skomon te namal ya x-ayinon ta stojol te kalatak, jaʼukmeto jich la yalbotik: “Teme ya xbaex ta yan lum ta scholel skʼop Dios, ¡kʼaxme tseʼel koʼtantik awuʼunik!”. Te bitʼil jich la yalbotike, la stij koʼtantik yuʼun ya xbootik. Manchukme namal ayotik ta stojolik, ya xjuʼ te spisil-ora ya xkʼopojotik, tseʼel koʼtantik yuʼun».

Kʼax wokol la yaʼiy te Didier sok te Nadine snopel te kʼopil malgache. Te Nadine jich ya yal ta tseʼej: «Ma achʼix keremotikix». Pero, ¿bin la spasik yuʼun ya xjuʼ snopbelik? Ta sjajchibal kʼotik ta tsoblej ta kongregasion ta kʼopil francés. Ta patil, kʼalal chapal la yaʼiy sbaik kʼaxik ta kongregasion ta kʼopil malgache. Te Nadine jich ya yal: «Kʼalal ya xlokʼotik ta scholel skʼop Dios ya jtatik bayal ants winiketik te mero ya smulanik snopel te Biblia sok te ya yalik wokol te ya kulaʼtaytik ta snaike. Ta sjajchibal ma jchʼuun yaʼiyel. Ta melel, mero ya jmulan aʼtel ta precursora liʼi. Te kʼalal ya xjajchon ta sab, jich ya kal: “¡Kʼax lek, ya xlokʼon ta scholel skʼop Dios yoʼtik!”».

Te Didier oranax ya xtal stseʼej kʼalal ya xjul ta yoʼtan te bin-ora jajch snop te kʼopil malgache. Jich ya yal: «Jun buelta te kʼalal yakon ta skʼasesel jun tsoblej ma jnaʼ bin yak sutbelik te hermanoetike. Jaʼnax ya kalbeyik wokol yuʼun te sujtibike. Kʼalal jtul hermana la yakʼ skomentario sok te la kalbey wokol yuʼune, la yakʼbonik kil skʼabik te machʼatik jukulik ta spate. Yoʼtan ya yakʼbonik jnaʼ te ma lek te sujtib la yakʼ te hermanae. Ta oranax la kakʼbey komentario yan  hermano, lek la sut stukel. Bueno, lek sujtib la yakʼ ya kal».

Ta jun mukʼul tsoblej ta 2005 te Thierry sok te yinam te Nadia sbiil la yilik te drama te yichʼoj sbiil Otʼaniname sleel te bina anopoj spasel te ya smukʼubtesbey skʼoplal te Diose, jaʼ la yalbey skʼoplal skuxlejal te Timoteo. Tijbot yoʼtanik yuʼun te bin la yilik sok la skʼanxan yoʼtanik te ya xbajtʼik ta scholel skʼop Dios banti ya skʼanik koltayel. Te Thierry jich ya yal: «Kʼalal laj te drama sok yakotik ta smajel jkʼabtik-a, jich la kalbey te kiname: “Jaxan te joʼotike, ¿banti ya xbootik?”. Te kiname la yalbon te jichnix yak ta snopel-a». Ta patil bael, jajch schajpan sbaik swenta ya xjuʼ xbajtʼik ta abatinel ta yan lugar. Te Nadia jich ya yal: «Kʼunkʼun jtebxanix la kijkʼitaykotik te jbiluktike. ¡Ta slajibal, ta chanebnax maleta och spisil te jbiluk-kotike!».

Bajtʼik ta Madagascar ta 2006, ta sjajchibalto talel la smulanik scholel skʼop Dios tey-a. Te Nadia jich ya yal: «Kʼax tseʼel koʼtantik yuʼun te ya smulanik te skʼop Dios te ants winiketike».

Pero wakeb jaʼbil ta patil la sitintayik tulan wokol. Te smeʼ te Nadia te ay ta Francia te Marie-Madeleine sbiil, yal, la smaj sjol sok wakʼ jchʼix skʼab. Te Thierry sok te Nadia la sjojkʼoybeyik te doktor teme ya xjuʼ ya yikʼik bael ta Madagascar, ta patil la yalbeyik te Marie-Madeleine teme ya skʼan ya xbajtʼe. Manchukme ayix 80 yaʼbilal-a, jun yoʼtan la skʼan bajtʼ. ¿Bin yilel ya yil te baem ta yan nasione? Jichme ya yal: «Ay bin wokol ya kaʼiy, pero jich ya kaʼiy te mero ya xtuunon ta kongregasion manchukme ay bin ma xjuʼ ya jpasix. Te bin ya yakʼbonxan stseʼelil koʼtan jaʼ te maʼyuk bin ya xmakot yuʼun te kachʼix sok te smamlal ta scholel skʼop Dios te banti bayalto aʼtelil ya skʼan pasele».

Te Riana jaʼ jtul hermano te kʼaxem ta veinte yaʼbilal. Chʼiʼ ta Alaotra Mangoro te ay ta este yuʼun Madagascar. Yoʼtanuk te ya sta jun carrera, melel kʼax lek te skalifikasione. Pero jelon te bin ya skʼan kʼalal la snop te Biblia. Jich ya yal: «La jta ta nopel te ya jkʼan te oranax ya xlokʼ kuʼun te secundaria sok jich la kalbey ta jamal te Jehová te ya jpase: “Teme ya xkʼax kuʼun te slajibal examen yame x-ochon ta precursor”». Ta patil te laj yuʼun te secundaria la skʼotes ta pasel te skʼope. Bajtʼ sjokin ta nainel jtul precursor, la sle yaʼtel te ma xmakot ta jkʼaxel yuʼun, jich och ta precursor. Te Riana jich ya yal: «Jaʼ te bin lekxan jtaoj ta nopel spasel ta jkuxlejale».

Pero te sfamilia ma xkʼot ta yoʼtan bin yuʼun maba la skʼan la snopxan te june. Jich ya yal: «Te jtat, te jtajun sok te jmeʼjun yoʼtanik te ya xboon ta universidad. Pero jtaoj ta nopel te mananix ya kijkʼitay te aʼtel ta precursor». Ta patil bael, te Riana la sta ta nopel te ya skʼan ya xbajtʼ ta jun lugar te banti ya skʼanikxan koltayel ta scholel skʼop Dios. ¿Bin tijbot yoʼtan yuʼun? Jichme ya yal: «Och j-elekʼetik ta jna sok bayal bin la yichʼbonik bael. Tal ta koʼtan yuʼun te tsitsel la yakʼ te Jesús te akʼa jtsobtik kʼulejaliletik ta chʼulchan. Jich yuʼun la jta ta nopel te ya jpasxan tulan ta stael kʼulejaliletik ta stojol Dios» (Mateo 6:19, 20). Te Riana bajtʼ ta kʼixin kʼinal ta sur yuʼun Madagascar te banti nainemik te machʼatik antandroy stsʼumbalik te 1,300 kilometro snamalil ta sna. ¿Bin yuʼun te kʼax namal bajtʼe?

Jun u te mato x-ochik ta elekʼ ta sna, te Riana jajch yakʼbey nojptesel ta Biblia chaʼtul winiketik te antandroy stsʼumbalik. La snop chaʼoxpʼal kʼop ta skʼopik sok och snaʼulan te jaytul machʼatik antandroy stsʼumbalik maba yaʼiyojik te lek yachʼil kʼop yuʼun te Wentainel yuʼun te Diose. Jich ya yal: «La jkʼanbey te Jehová te yakuk skoltayon yuʼun ya xboon ta nainel te banti ya xkʼopojik ta tandroy».

Mato jaluk skʼoel-a te Riana te la sitintay wokolil, ma sta yaʼtel. Jich albot yuʼun jtul winik: «¿Bin yuʼun talat? Te machʼatik liʼ slumalik ya xbajtʼik ta alumal ta sleel aʼtel». Cheb semana ta patil bajtʼ ta mukʼul tsoblej yuʼun oxeb kʼajkʼal. Te bitʼil jtebxanix te stakʼine och snopilan bin ya xjuʼ ya spas. Ta slajibal kʼajkʼal yuʼun te mukʼul tsoblej ay bin otsesbot ta sbolsa skʼuʼ yuʼun jtul hermano. Sok te takʼin akʼbote tikʼ ya sujt bael ta slumal te ants winiketik te antandroy stsʼumbalik sok yato xlokʼ yuʼun ya sjach schonel yogur. Te Riana jich ya yal yuʼun: «Jich la kaʼiy te jaʼ la skoltayon te Jehová ta mero yorail. Jich ya xjuʼ te ya jkoltayxan spisil te machʼatik antandroy stsʼumbalik te mato snaʼbeyojik sba te Jehová». Jaʼnix jich ay bayal aʼtel ta kongregasion. Jich ya yalxan: «Ya yakʼbonik te ya jkʼases discurso ta cheʼcheb semana. Jaʼ yak schajpanbelon-a  te Jehová ta swenta te organisasion yuʼune». Ta ora ini, te Riana yakto ta yakʼbeyel snop te machʼatik antandroy stsʼumbalik te yoʼtan ya snaʼbeyik sba te Jehová te bin smelelil ta swenta te Wentainel yuʼun te Diose.

Te Jehová ya yal ta jamal te ya yakʼbey bendision te machʼatik ya spasik tulan ta abatinel ta stojol (Isaías 65:16). Ta melel, kʼalal ya jpastik te bantito kʼalal ya xjuʼ kuʼuntik ta stsalel te wokoliletike sok ta smukʼubtesel te kaʼteltik ta scholel skʼop Dios, ya kichʼtik bendisionetik. Jich bitʼil, te Sylviana, te la yichʼ albeyel skʼoplal ta sjajchibal te articuloe, skuyoj te ma xjuʼ yuʼun te ya xbajtʼ ta abatinel ta yan lugar. ¿Bin yuʼun te jich la yaʼiy sbae? Jaʼnix ya schol kaʼiytik: «Jich bitʼil jaʼ 9 centimetro komxan te jkʼexen koke, xkoxkinajon ta beel yuʼun sok ora ya xlujbon».

Manchukme ay staoj falta te Sylviana bajtʼ sok te Sylvie Ann ta 2014 ta abatinel ta tut lum te 85 kilometro snamalil ta sna, te Sylvie Ann jaʼ jtul achʼix precursora te jun skongregasion sok. Manchukme ay wokoliletik la sitintay, juʼ la skʼotes ta pasel te bin ya skʼane. Ma jaʼuknax-abi, la sta tʼujbil bendision tey-a, jichme ya yal: «Te kʼalal juntonax jaʼbil jkʼoel tey-a, jtul te machʼa ya kakʼbey nojptesel ta Biblia te Doratine sbiil la yichʼ jaʼ ta mukʼul tsoblej yuʼun jun kʼajkʼal».

Ayme bin ya yakʼ jnoptik te bintik la schol kaʼiytik te hermanoetike, teme ya jpastik tulan ta stsalel biluk wokolil swenta ya jmukʼubtestik te kaʼteltik ta stojol te Dios, yame kiltik ta jkuxlejaltik te bin jamal ya yalbotik te Jehová: «Ya caʼbat awip, ya jcoltayat» (Isaías 41:10). Jich ya kamigointikxan ta lek te Jehová. Jaʼnix jich kʼalal ya jap jbatik ta yakʼel koltayel chikan teme ta jnasiontiknix o ta yan nasion chapal ya xkʼootik ta spasel te aʼteliletik yuʼun Dios ta achʼ balumilal. Jich bitʼil ya yal te Didier te la kalbeytikix skʼoplale, «te abatinel ta stojol Dios te banti ya skʼanik koltayele, jaʼ jchajp bitʼil ya xjuʼ ya jchajpan jbatik ta swenta te pajel chaʼbeje». Yame jkʼantik te bayalxan machʼatik jun yoʼtan ya yakʼ sbaik ta chajpanel-euk yuʼun te Jehová.