1, 2. ¿Bin ya yichʼ pasel ta 2018 te jun-nax ya x-ayinik yuʼun bayal ants winiketik, sok bin yuʼun kʼax tulan skʼoplal? (Ilawil te lokʼomba ta sjajchibal te articulo).

TA YAJTALUL 31 YUʼUN MARZO TA 2018 te kʼalal yak ta malel-a te Kʼajkʼale, bayal miyon ta tul j-abatetik yuʼun Dios sok yantikxan ya stsob sbaik ta spasel te Snaʼojibal Weʼel Uchʼel yuʼun te Kajwaltike. Ta yorail Snaʼojibal slajel te Jesús te jun-nax buelta ya yichʼ pasel ta jujun jaʼbile bayal machʼatik jun-nax ya x-ayinik yuʼun, maʼyuk yan tsoblej o biluk bin ya yichʼ pasel ta Balumilal te jich ya yakʼ te ya xkʼot ta pasele.

² Ya jnaʼtik te kʼax tseʼel yoʼtan te Jehová sok te Jesús kʼalal ya yilik te bayal ta miyon ta tul ta swolol Balumilal ya xkʼotik ta tsoblej te kʼax mukʼ skʼoplale. Te Biblia yalojix ta namey te ay machʼatik te «cʼax tsobolic» te ma xjuʼ ta ajtayel te «talemic ta spisil ta chahp nacionetic, tsʼumbaliletic, pueblohetic soc cʼopiletic» jich ya yalik: «Ay colel ta scuenta te Dios cuʼuntic te hucul ta mucʼul-huctajibal, soc ta scuenta te Jcolel Tuminchij» (Apocalipsis 7:9, 10). Kʼax bayal yutsil te tsobol machʼatik ya yichʼik  ta mukʼ te Jehová sok te Jesús ta yorail Snaʼojibal slajel te Jesús ta jujun jaʼbile.

3. ¿Bin jojkʼoyeletik ya kakʼbeytik sujtib ta articulo ini?

³ Ta articulo ini yame kakʼbeytik sujtib chaneb jojkʼoyeletik. Sbabial, ¿bin-utʼil ya xjuʼ ya jchajpan jbatik yuʼun ya jpastik te Snaʼojibal slajel te Jesús swenta ya jta jlekilaltik-a? Schebal, ¿bin yuʼun ya skoltayotik te Snaʼojibal slajel te Jesús te junuk ayukotike? Yoxebal, ¿bin ya xjuʼ ya jpastik yuʼun jun ya x-ayinotik sok te yantike? Schanebal, ¿yabal xkʼot skʼajkʼalel te maba ya jpastikix te Snaʼojibal slajel te Jesuse? Teme jiche, ¿bin-ora jich ya xkʼot ta pasel?

4. ¿Bin yuʼun ya skʼan te ya jpastik tulan yuʼun ya xkʼootik ta Snaʼojibal slajel te Jesús?

⁴ ¿Bin yuʼun kʼax tulan skʼoplal te ya xkʼootik ta Snaʼojibal slajel te Jesuse? Mame xchʼay ta koʼtantik, te tsoblejetike jaʼme jchajp bitʼil ya kichʼtik ta mukʼ te Diose. Ta melel, te Jehová sok te Jesús ay skʼoplal ta yoʼtanik spisil te bin ya jpastik yuʼun ya xkʼootik ta tsoblej ini te jaʼ tulanxan skʼoplal ta sjunal te jaʼbile. Koʼtantik ya kakʼbeytik yilik te ya jpastik tulan yuʼun ya xkʼootik, te jaʼnax maba ya xbootik teme ay bin kʼax tulan ya smakotik jich bitʼil tulan chamel o yan bin-a. Kʼalal ya kakʼtik ta ilel te bayal skʼoplal kuʼuntik te tsoblejetike, jich ya jtijbeytikxan yoʼtan te Jehová yuʼun maba ya stupʼ jbiiltik ta «libro yuʼun snaʼojibal». Ta libro ini te jaʼnix jich ya yichʼ albeyel «libro scuenta cuxlejal» tsʼibaybil sbiil te machʼatik yoʼtan ya x-akʼbot skuxlejalik ta sbajtʼelkʼinal yuʼun te Jehová (Malaquías 3:16; Apocalipsis 20:15).

5. Te kʼalal nopolix yorail-a te Snaʼojibal slajel te Jesuse, ¿bin-utʼil ya xjuʼ ya jtsajtay kiltik teme ay schʼuunel koʼtantike?

⁵ Te kʼalal nopol ya staix yorail-a te Snaʼojibal slajel te Jesuse ya xjuʼ ya jlokʼestik tiempo ta skʼoponel Dios sok ta stsajtayel bin yilel ay te bitʼil kamigoinej jbatik sok te Jehová (kʼopona te 2 Corintios 13:5). ¿Bin-utʼil ya xjuʼ ya jpastik? Te Pablo la yal te ya skʼan ya jtsajtay kiltik teme ay schʼuunel koʼtantike. Swenta ya jtatik ta ilel, lek te ya jojkʼoybey jbatike: «¿Yabal jchʼuun sok spisil koʼtan te ayon ta organisasion te ya stuuntes Jehová ta spasel te skʼanojel yoʼtane? ¿Yabal jpas tulan ta scholel sok ta yakʼel ta nopel te lek yachʼil kʼop yuʼun te Wentainel yuʼun te Diose? ¿Yabal kakʼ ta ilel te ya jchʼuun te ayotik ta slajibal kʼajkʼal sok te nopolix ya xlaj te wentainel yuʼun te Satanase? Te kʼalal la kakʼ jba ta stojol te Diose mero smukʼulinej koʼtan te Jehová sok te Jesús, pero ¿jichnixbal smukʼul koʼtan ta stojolik ta ora ini?» (Mateo 24:14; 2 Timoteo 3:1; Hebreos 3:14). Te snopilanel ta koʼtantik te sujtib ya kakʼbeytik te jojkʼoyeletike ya skoltayotik yuʼun ya kakʼtikxan ta ilel bin yilel te kaʼteltike.

6. 1) ¿Bin-utʼilnax ya xjuʼ ya jtatik kuxlejalil ta sbajtʼelkʼinal? 2) ¿Bin-utʼil ya schajpan sba ta jujun jaʼbil jtul anciano ta snaʼulanel te slajel te Jesús? 3) ¿Bin-utʼil ya xjuʼ ya jtʼuntik te ejemplo yuʼune?

⁶ Jchajp te bin-utʼil ya xjuʼ ya jchajpan jbatik ta swenta Snaʼojibal slajel te Jesuse, jaʼ te ya jkʼopontik sok te ya jnopilan ta koʼtantik articuloetik te ya yalbeyik skʼoplal bin yuʼun kʼax tulan skʼoplale (kʼopona te sjun Juan 3:16; 17:3). Jaʼnaxme ya xjuʼ ya jtatik kuxlejalil ta sbajtʼelkʼinal teme ya jnaʼbeytik sba te Jehová sok teme ya kakʼ schʼuunel koʼtantik ta stojol te Jesús, te jip jtul sNichʼane. Yuʼun ya jchajpan jbatik ta swenta te Snaʼojibal slajel te Jesuse yame xjuʼ ya jkʼopontik temaetik te ya skoltayotik yuʼun nopolxan ya xkʼootik ta stojol te Jehová sok te Jesús. Kiltik bin ya spas jtul anciano te pʼijuben ta leke. Ta bayalix tal jaʼbil kʼayem ta skʼejel articuloetik yuʼun Te J-ilkʼinal ta toyol te ya yalbeyik skʼoplal te Snaʼojibal slajel te Jesús sok te skʼuxul yoʼtan yakʼoj ta ilel te Jehová sok te Jesús ta jtojoltike. Ta jujun jaʼbil, cheʼoxeb semana ta nail ya skʼopon te articuloetik te stsaoj ta lek sok ya snopilan bin yuʼun kʼax tulan skʼoplal te tsoblej ini. Te hermano baeltik ya sle yantik articuloetik yuʼun jun-nax ya skʼej sok te yantike. Staoj ta ilel te ay bin yachʼil ya snop ta jujun jaʼbil ta swenta te ya skʼopon te junetik skʼejoje, ya skʼopon te textoetik ya skʼan kʼoponel ta yorail te Snaʼojibal slajel te Jesuse sok te ya snopilan ta yoʼtan te bin ya skʼopone.  Pero te bin tulanxan skʼoplal jaʼ te kʼux-xan ya yaʼiy ta yoʼtan te Jehová sok te Jesús. Teme jich ya jpastik-euk, kʼux-xan ya kaʼiytik ta koʼtantik te Jehová sok te Jesús, jich bayalxan bin lek ya jtatik ta swenta te Snaʼojibal slajel te Jesuse.

7. 1) Ta ajkʼabal te sbabial buelta la yichʼ pasel te snaʼojibal Weʼel Uchʼel yuʼun te Kajwaltike, ¿bin la skʼanbey Jehová te Jesuse? 2) ¿Bin-utʼil ya jnaʼtik te la sutbeyix skʼop Jesús te Jehovae?

⁷ Ta ajkʼabal te sbabial buelta la yichʼ pasel te snaʼojibal Weʼel Uchʼel yuʼun te Kajwaltike, te Jesús la skʼanbey wokol te Jehová te jichuknix jun ya x-ayinik te jnopojeletik yuʼun jich bitʼil jun ayik ta schebalike (kʼopona te sjun Juan 17:20, 21). Chikan ta ilel te la sutbeyix skʼop sNichʼan te Jehová te kʼux ta yoʼtane. Te Snaʼojibal slajel te Jesús jaʼ te tsoblej te ya yakʼxan ta ilel ta jamal te jun ayotik te testigoetik yuʼun Jehová. Te kʼalal ya yichʼ pasele, bayal miyon ta tul ants winiketik ta bayal nasionetik te yanyantik stsʼumbalik ya stsob sbaik ta swolol Balumilal, jich ya yakʼik ta ilel te schʼuunejik te jaʼ tikunot tal yuʼun Jehová te Jesuse. Ay lugaretik te ma jichuk kʼayemik ta spasel sok teme ya yichʼ pasele, maba lek ilbil. Yan stukel te Jehová sok te Jesús kʼax tʼujbil ya yilik te bayal machʼatik jun-nax yoʼtanik te kʼalal ya stsob sbaike.

8. ¿Bin la yakʼbey snaʼ Ezequiel te Jehovae?

⁸ Te j-abatotik yuʼun Jehová maba yan ya kiltik te ya jmulanbeytik yutsil te jun ayotike. ¿Bin yuʼun? Melel te Jehová jich la yakʼbey snaʼ te j-alwanej Ezequiel te ya xkʼot ta pasele. Te Jehová la yakʼbey snaʼ te ay chaʼchʼix teʼ te ya yichʼ tsobel te jun-nax ya xkʼotike, jchʼix teʼ jaʼ «yuʼun Judá», te yane jaʼ «yuʼun José» (kʼopona te sjun Ezequiel 37:15-17). Te La Atalaya yuʼun julio 2016 ta seccion «Preguntas de los lectores» jich la yal: «Te Jehová ay bin la yakʼbey snaʼ te j-alwanej Ezequiel te ya yakʼ mukʼul oʼtanile, la yal ta jamal te ya yakʼ te jun-nax ya xkʼot te nasion Israel kʼalal ya xlokʼ tal ta mosoinel sok te ya sujt talel ta Kʼinal te albil skʼoplal ya yichʼike. Ta swenta te albilkʼope, te Jehová la yakʼ ta naʼel te jun ya x-ayin te lum yuʼun ta slajibal kʼajkʼal».

9. ¿Bin-utʼil ya yakʼ kiltik ta jamal ta jujun jaʼbil te Snaʼojibal slajel te Jesús te yak ta kʼoel ta pasel te albilkʼop yuʼun te Ezequiele?

⁹ Te bin nail la spas te Jehová jaʼto talel ta 1919, jaʼ te kʼunkʼun la schaʼchajpan sok jun-nax la schaʼyakʼ te j-abatetik yuʼun te ya xbajtʼik ta chʼulchan te jich kʼoemik bitʼil te teʼ «yuʼun Judá». Ta patil, te machʼatik jaʼ smukʼulinej yoʼtanik te ya xkuxinik ta Balumilal te jich kʼoemik bitʼil te teʼ «yuʼun José» jajch stsob sbaik sok te machʼatik tsabilik te ya xbajtʼik ta chʼulchan. Te Jehová la yal ta jamal te jun ya yakʼ te chaʼchʼix teʼ sok te «junax teʼ ya xcʼoht» ta skʼab (Ezequiel 37:19). Te Jehová la yakʼ te «jtsohb nax ya xcʼohtic» te machʼatik tsabilik te ya xbajtʼik ta chʼulchan sok te «yantic tuminchijetic» (Juan 10:16; Zacarías 8:23). Ta ora ini te chaʼtsojb j-abatetik yuʼun Dios jun-nax ya x-abatinik sok ya yakʼ sbaik ta wentainel yuʼun jtulnax Ajwalil, jaʼ te Jesucristo te jich albot yuʼun Dios ta albilkʼop yuʼun te Ezequiel: «Te caʼbat David» (Ezequiel 37:24, 25). Jujun jaʼbil ya kiltik ta jamal te jun ayotik jich bitʼil akʼbot snaʼ te Ezequiel, melel ya stsob sbaik ta snaʼulanel slajel te Cristo te machʼatik tsabilik te ya xbajtʼik ta chʼulchan sok te yantik tuminchijetike. Pero, ¿bin ya xjuʼ ya jpastik ta tulutul yuʼun maba ya jintik te jun ayotik sok te junukxan ya x-ayinotike?

10. ¿Bin ya xjuʼ ya jpastik swenta junukxan ya x-ayinotik ta lum yuʼun te Diose?

¹⁰ Jchajp te bin ya xjuʼ ya jpastik swenta junukxan ya x-ayinotik ta lum yuʼun te Diose, jaʼ te ya kakʼtik ta ilel pekʼel-oʼtanil. Kʼalal kʼax ta Balumilal te Jesús la yalbey te jnopojeletik yuʼun te ya skʼan te pekʼeluk yoʼtanike (Mateo 23:12). Te ants winiketik yuʼun te balumilal jteb ma spisil-ora ya skuyik te jaʼ mukʼxan skʼoplalik ta stojol te yantike. Yan stukel te joʼotike, teme ay spekʼelil koʼtantik ya kichʼtik ta mukʼ te hermanoetik te ya swentainik te kongregasion. Teme ya jkʼantik te jun ya x-ayin te  kongregasion yame skʼan te ya jchʼuuntik spasel te bin ya kichʼtik albeyele. Te bin mukʼxan skʼoplal jaʼ te tseʼel yoʼtan kuʼuntik te Jehová yuʼun te spekʼelil koʼtantike, melel «ya scontrahin te jtoybahetic, pero ya scʼuxultay te machʼatic peqʼuel yoʼtanic» (1 Pedro 5:5).

11. Te snopilanel ta koʼtantik bin señail te pan sok te vino ta Snaʼojibal slajel te Jesús, ¿bin yuʼun ya skoltayotik swenta junukxan ya x-ayinotik?

¹¹ Te schaʼchajpal te bin ya xjuʼ ya jpastik swenta junukxan ya x-ayinotik, jaʼ te ya jnopilan ta koʼtantik bin señail te pan sok te vino te ya yichʼ tuuntesel ta Snaʼojibal slajel te Jesús. Yame skʼan te jich ya jpastik te kʼalal mato sta yorail te ajkʼabal te kʼax tulan skʼoplale, jaʼtoxan-a ta ajkʼabal-abi (1 Corintios 11:23-25). Te pan te ma yichʼojuk levadura jaʼ señail te sbakʼetal te Jesús te maʼyuk smul la yakʼ ta jtojoltike. Te vino jaʼ señail te schʼichʼel la smale. Pero mame tikʼuknax-a te ya xkʼot ta koʼtantik bin swentail ini. Julukme ta koʼtantik te ay bin la yakʼ ta ilel ta jamal te slajel te Jesuse, jaʼ te skʼuxul yoʼtan ya yaʼiy ta jtojoltik te Jehová te la stikun tal te sNichʼan sok te skʼuxul yoʼtan te Jesús ta jtojoltik, melel tal yakʼ sba ta lajel, maʼyuk machʼa jich kʼuxotikxan ta yoʼtanik. Te snopilanel te kʼuxotik ta yoʼtanike ya skʼan ya stij koʼtantik yuʼun jichnix kʼux ya kaʼiytik ta koʼtantik-euk. Ta swenta te skʼuxul koʼtantik ta stojol te Jehová sok te hermanoetik junxan ya xkʼootik.

12. Kʼalal te Jesús la yalbey skʼoplal jtul ajwalil sok te j-abatetik yuʼune, ¿bin-utʼil la yakʼ ta ilel ta jamal te ya skʼan Jehová te ya jpasbeytik perdon te hermanoetike?

¹² Te yoxchajpal te bin ya xjuʼ ya jpastik swenta junukxan ya x-ayinotik, jaʼ te ya jpasbeytik perdon sok yutsil koʼtantik te yantike. Kʼalal ya jpasbeytik perdon te machʼatik ya sta smulik ta jtojoltik ya kakʼtik ta ilel te ya kaltik wokol te ya xjuʼ ya spasbotik perdon te Jehová ta swenta te skuxlejal la yakʼ ta jtojoltik te Cristo. Jnop kaʼiytik te ejemplo la yakʼ te Jesús te ya jtatik ta Mateo 18:23-34 sok akʼa jojkʼoybey jbatik: «¿Yabal stijbon koʼtan te ejemplo ini ta spasel te bin la yakʼ ta nopel te Jesuse? ¿Yabal xkujch kuʼun te bin ya spasbonik te hermanoetike sok yabal kakʼ ta ilel te maba ya x-ilinon ta stojolike? ¿Junbal koʼtan ya jpasbey perdon te machʼatik ya sta smulik ta jtojole?». Melelnix-a te ay muliletik te tulanikxane. Soknix te bitʼil jmulawilotike ay bintik wokol ya kaʼiytik spasel perdon. Pero te bin la yal te Jesuse ya yakʼ ta naʼel bin ya skʼan te Jehová te ya jpastike (kʼopona te sjun Mateo 18:35). Te Jesús la yakʼ ta ilel ta jamal te maba ya spasbotik perdon te Jehová teme maba ya  jpasbeytik perdon te hermanoetik teme jich ya skʼan pasele. Yame skʼan te ya jnopilantik ta lek. Kʼalal ya jchʼuunbeytik skʼop te Jesús sok te ya jpasbeytik perdon te yantike, jich maba ya kutsʼintik te bitʼil jun ayotik sok junxan ya x-ayinotik sok te hermanoetike.

13. Kʼalal lamal koʼtantik ta stojol te hermanoetike, ¿bin-utʼil ya kakʼtik ta ilel te ya jkʼantik te junuk ya x-ayinotike?

¹³ Kʼalal ya jpasbeytik perdon te hermanoetik lamal koʼtantik ta stojolik. Juluk ta koʼtantik te jich la yal te Pablo te ya skʼan ya jpastike: «Acʼahic fuersa te junuc awoʼtan abahic ta scuenta te Espíritu, ta scuenta te lamal qʼuinal te ya yacʼ junajuc awoʼtanique» (Efesios 4:3). Te kʼalal nopolix yorail-a te Snaʼojibal slajel te Jesús sok jaʼtoxan ta ajkʼabal te mero yoraile, akʼame jnop kaʼiytik bin-utʼil ya kiltik te hermanoetike. Jojkʼoybey jbatik: «¿Yabal kakʼ ta ilel ta jamal te maba ya jkʼej ilinba ta koʼtan? ¿Yabal staik ta ilel yantik te ya jpas tulan swenta ayuk lamalkʼinal sok te junuk koʼtan ta stojolike?». Te kʼalal nopol ya sta yorail te ya jnaʼulantik slajel te Jesuse jnopilantik te jojkʼoyeletik te kʼax tulanik skʼoplale.

14. ¿Bin-utʼil ya xjuʼ ya kakʼtik ta ilel te talel kʼaxel ya xkujch kuʼuntik ta swenta kʼuxul oʼtanil?

¹⁴ Te schanchajpal te bin ya xjuʼ ya jpastik swenta junukxan ya x-ayinotik, jaʼ te ya kakʼtik ta ilel kʼuxul oʼtanil jich bitʼil te Jehová, jaʼ te jkʼuxul oʼtanil Diose (1 Juan 4:8). Mame ayuk bin-ora jich ya kaltik: «Ya jnaʼ te ya skʼan ya xkujch kuʼun te bin ya spasik te hermanoetike, pero ma puersauk te lek ya kiltiklane». Teme jich ya jnoptik, maba yakotik ta schʼuunel te tsitsel la yakʼ te Pablo te jich ya yale: «Talel cʼaxel cuhchuc awuʼunic ta scuenta scʼuxul awoʼtanic» (Efesios 4:2). Te Pablo mame jaʼuknax la yal te ya skʼan ya xkujch kuʼuntik, la yal te jichuk ya jpastik ta swenta te skʼuxul koʼtantike. ¿Mabal jichuk te ma pajaluke? Te Jehová yikʼoj tal ta stojol spisil ta chajp ants winiketik (Juan 6:44). Ya xkʼot ta koʼtantik te yuʼun-nix ay skʼuxul yoʼtan Jehová ta stojolik. Jich yuʼun, ¿yabal xjuʼ ya kaltik te ma snujpʼuk te kʼux ya kaʼiytik jtul hermanoe? Yame skʼan te kʼux ta koʼtantik spisil te hermanoetik jich bitʼil kʼuxotik ta yoʼtan te Jehová (1 Juan 4:20, 21).

15. ¿Bin yuʼun ya jnaʼtik te ya xkʼot skʼajkʼalel te ya jpastik te slajibal buelta te Snaʼojibal slajel te Jesuse?

¹⁵ Yame xkʼot skʼajkʼalel te ya jpastik ta slajibal buelta te Snaʼojibal slajel te Jesuse. ¿Bin-utʼil ya jnaʼtik? Te Pablo la yalbey te machʼatik tsabilik te ya xbajtʼik ta chʼulchan te jujun jaʼbil te ya snaʼulanik slajel te Jesús ya spukik «ta halel te cham te Cajwaltic, ha to cʼalal ya xchaʼtal xan» (1 Corintios 11:26). Kʼalal te Jesús la yal bintik ya xkʼot ta pasel ta slajibal kʼajkʼal, jaʼnix jich la yalbey skʼoplal bin ya xkʼot ta pasel kʼalal ya xtale. Jichme la yal te ya xkʼot ta pasel ta yorail te tulan wokolile: «Tey ora ya xchicnaj tal ta chʼulchan a te seña yuʼun te Nichʼanil ay ta scuenta winic, hich ya xhahch smel yoʼtanic spisil te jaychahp machʼatic ayic ta bahlumilal, ya me yilic te Nichʼanil ay ta scuenta winic te yac ta talel ta stocalil chʼulchan soc yuʼel soc bayel yutsilal. Soc ya me sticonlan bahel te chʼul aʼbatetic yuʼun soc tulan yoqʼuel corneta, ya stsobic tal ta schanebal icʼ te machʼatic tsahticlambil yuʼun, cʼalal ta jehch ta jehch stiʼil te chʼulchane» (Mateo 24:29-31). Te Jesús yame stsob te machʼatik «tsahbilic» kʼalal ya yikʼtiklan bael ta chʼulchan te machʼatik ayikto ta Balumilal. Jichme ya xkʼot ta pasel ta yorail te tulan wokolile, pero kʼalal mato xtal-a te Armagedón. Ta guerra-abi te Jesús sok te 144,000 yame slajinik te ajwaliletik ta Balumilal (Apocalipsis 17:12-14). Te Snaʼojibal slajel te Jesús te ya yichʼ pasel te kʼalal jtebxanix ya skʼan ya yikʼ bael te Jesús te machʼatik tsabilike, jaʼme te slajibal buelta ya yichʼ pasele.

16. ¿Bin yuʼun ya apas tulan te ma xchʼay awuʼun te Snaʼojibal slajel te Jesús ta jaʼbil ini?

¹⁶ Jpastikme tulan yuʼun ma xchʼay kuʼuntik te Snaʼojibal slajel te Jesús ta 31 yuʼun marzo ta 2018. Jkʼanbeytik Jehová te yakuk skoltayotik yuʼun ya jpastik tulan swenta junukxan ya x-ayinotik ta lum yuʼune (kʼopona te sjun Salmo 133:1). Mame xchʼay ta koʼtantik te ya xkʼot skʼajkʼalel te ya jpastik ta slajibal buelta te Snaʼojibal slajel te Jesús. Te bitʼil yato yichʼ pasele, kakʼtik ta ilel te bayal skʼoplal kuʼuntik te jun ayotik ta yorail te Snaʼojibal slajel te Jesús.