ARTIKULO YUʼUN ESTUDIO 5
Taleliletik te ya kakʼtik ta ilel te kʼalal ya xbootik ta tsoblejetik
«Ha yac apuquic ta halel te cham te Cajwaltic, ha to cʼalal ya xchaʼtal xan» (1 COR. 11:26).
KʼAYOJIL 18 Wokolawal yuʼun te stojol kolel
¿BIN YA XBAJTʼ KILBEYTIK SKʼOPLAL? *
1, 2. 1) ¿Bin ya yil Jehová kʼalal bayal millón ta tul ants winiketik ya stsob sbaik ta spasel te Weʼel Uchʼel yuʼun Kajwaltik? (Ilawil te foto ta yelaw te rebista). 2) ¿Bin ya xbajtʼ kilbeytik skʼoplal ta artikulo ini?
¿BIN ya yil Jehová kʼalal bayal millón ta tul ants winiketik ta swolol Balumilal ya stsob sbaik ta spasel te Weʼel Uchʼel yuʼun Kajwaltik? Ma jaʼuknax ya yil bayal ta jtsojb ants winiketik, ya yil ta jujuntul te machʼatik ya xkʼotike, jich bitʼil te machʼatik ya xkʼotik ta jujun jaʼbile. Ay machʼatik ya xbajtʼik manchukme ya staik kontrainel yuʼun. Ay yantik ma xbajtʼik ta jujun semana ta tsoblejetik, pero jich ya yilik te yananix skʼan ya xbajtʼik stukel ta Snaʼojibal slajel te Jesuse. Jaʼnix jich ya yil Jehová te machʼatik sbabial buelta ya xkʼotike, jaʼniwan yuʼun te ya skʼan ya yilik te bin-utʼil ya yichʼ pasele.
2 Ta melel, ya x-akʼbot bayal stseʼelil yoʼtan Jehová kʼalal bayal ta tul ants winiketik ya xkʼotik ta Snaʼojibal slajel te Jesuse (Luc. 22:19). Jaʼukmeto te bin ya smulanxane ma jaʼuk te jaytul ya xkʼotike, jaʼ te bin yuʼun ya xkʼotike. Ta artikulo ini yame kilbeytik skʼoplal jun jojkʼoyel te kʼax mukʼ skʼoplale: ¿Bin yuʼun ma jaʼuknax ya xkʼootik ta Weʼel Uchʼel yuʼun Kajwaltik ta jujun jaʼbil te jaʼnix jich ya xkʼootik-euk ta tsoblejetik te ya schajpan te Jehová ta jujun semana ta stojol te machʼatik kʼux ya yaʼiy ta yoʼtanike? Akʼa kiltik bin talelil ya stij koʼtantik swenta ya xbootik ta tsoblejetik.
Ta swolol Balumilal leknax ya yichʼik ikʼel ochel bayal millón ta tul te ya xkʼotik ta Snaʼojibal slajel te Jesús (ilawil te parrafo 1 sok 2). *
TE PEKʼEL-OʼTANIL YA STIJ KOʼTANTIK YUʼUN YA XBOOTIK TA TSOBLEJETIK
3, 4. 1) ¿Bin yuʼun te ya xbootik ta tsoblejetike? 2) ¿Bin talelil ya kakʼtik ta ilel kʼalal ya xbootik ta tsoblejetike? 3) Jich bitʼil ya yal te 1 Corintios 11:23-26, ¿bin yuʼun maba ya skʼan ya jchʼaytik te Snaʼojibal slajel te Jesuse?
3 Ya xbootik ta tsoblejetik yuʼun tey ochem skʼoplal-a te yichʼel ta mukʼ te Jehová. Jaʼnix jich ya xbootik melel tey ya 3 Juan 9). Yan te joʼotike ya jkʼantik te ya snojptesotik te Jehová sok te organisasion yuʼune (Is. 30:20; Juan 6:45).
snojptesotik-a te Jehovae. Te machʼatik ya stoy sbaike ya snopik te maʼyuk machʼa yan ya xjuʼ xnojptesotik yuʼune (4 Kʼalal ya xkʼootik ta tsoblejetik ya kakʼtik ta ilel te pekʼel koʼtantik sok te jun koʼtantik ya kakʼ snojptesotik te Diose. Ya xbootik ta Snaʼojibal slajel te Jesús ma yuʼunuk sujbil ya kaʼiy jbatik, jaʼ yuʼun te pekʼel koʼtantik sok ya jkʼan ya jchʼuuntik te mantalil yuʼun Jesús te jich la yale: «Pasahic ini scuenta jnaʼojibal» (kʼopona 1 Corintios 11:23-26). Te tsoblej ini ya yakʼbeyxan yip te smukʼul koʼtantik sok ya sjultes ta koʼtantik te bayal kʼuxotik ta yoʼtan te Jehová. Jaʼukmeto, te Jehová ya snaʼ te ma tikʼuk ya jtatik yip koʼtantik sok smukʼul kʼinal kaʼiytik-a te jun buelta ta jaʼbil ya xkʼootike. Jaʼ yuʼun ya schajpan tsoblejetik ta jujun semana sok ya yalbotik ta mantal te yakuk xbootike. Te pekʼel-oʼtanil ya stij koʼtantik ta schʼuunbeyel te smantale. Bayal ora ya xkʼax kuʼuntik ta schajpanel jbatik ta jujun semana ta swenta te tsoblejetik soknix te xkʼootik tey-ae.
5. ¿Bin yuʼun ya schʼuunik te ya x-ikʼotik yuʼun Jehová te ants winiketik te pekʼel yoʼtanike?
5 Ta jujun jaʼbil bayal ants winiketik sok spekʼelil yoʼtan ya schʼuunik te ya x-ikʼotik yuʼun Jehová swenta ya snaʼbeyik sba (Is. 50:4). Jaʼ sbabial ya xkʼotik ta Snaʼojibal slajel te Jesús, ta patil ya xkajik ta kʼoel ta yantik tsoblejetik (Zac. 8:20-23). Te joʼotik sok te yachʼil jnopojeletik ya jmulantik te tojobtesel sok te pʼijubtesel ya yakʼbotik te Diose, melel jaʼ Jkoltaywanej sok J-akʼaw ta libre kuʼuntik (Sal. 40:17). Ta melel, maʼyuk bin kʼax mukʼxan skʼoplal-a te bitʼil ya jchʼuuntik te ya xbootik ta tsoblejetik swenta ya snojptesotik te Jehová sok te Jesús te sNichʼan te kʼax kʼux ta yoʼtane (Mat. 17:5; 18:20; 28:20).
6. ¿Bin-utʼil koltayot te spekʼelil yoʼtan jtul winik swenta ya xkʼot ta Snaʼojibal slajel te Jesús?
6 Ta jujun jaʼbil ya jpastik tulan ta yikʼel te ants winiketik te bantito kʼalal ya xjuʼ kuʼuntik swenta ya xkʼotik ta Snaʼojibal slajel te Jesuse. Bayal ants winiketik te pekʼel yoʼtanik staojik lekilal yuʼun te ya xkʼotike. Kiltik jun ejemplo. Ayix tal cheʼoxeb jaʼbil, jtul ermano la yakʼbey jun inbitasion jtul winik te la yal te ma xjuʼ xbajtʼe. Ta yorail te Snaʼojibal slajel te Jesús, chajpnax la yil-a te ermano te kʼalal kʼot ta sNail Tsoblej te winike. Kʼax lek ilot yuʼun te ermanoetik sok kaj ta kʼoel ta spisil te tsoblejetike. Ta jun jaʼbil, jaʼnax la schʼay oxeb tsoblejetik. ¿Bin koltayot yuʼun ta smulanel te ya xbajtʼ ta tsoblejetike? Te ermano te la yakʼbey te inbitasion jich la yal ta patil: «Jaʼ jtul winik te kʼax pekʼel yoʼtane». Ta melel chikan ta ilel te jaʼ Jehová te la yikʼ bael swenta ya x-och ta lum yuʼun. Ta ora ini, jaʼix jtul testigo yuʼun Jehová (2 Sam. 22:28; Juan 6:44).
7. ¿Bin-utʼil ya skoltayotik te bin ya jnoptik ta tsoblejetik sok te bin ya jkʼopontik ta Biblia swenta pekʼeluk koʼtantik?
7 Te bin ya jnoptik ta tsoblejetik sok te bin ya jkʼopontik ta Biblia ya skoltayotik swenta pekʼeluk koʼtantik. Cheʼoxeb semana te kʼalal mato xkʼot skʼajkʼalel-a te Snaʼojibal slajel te Jesuse, ta tsoblejetik ya jnopbeytik skʼoplal te ejemplo yuʼun te Jesús sok te spekʼelil yoʼtan la yakʼ ta ilel kʼalal la yakʼ sba ta lajel ta jtojoltike. Te kʼalal mato xkʼot skʼajkʼalel-ae, ya kichʼtik albeyel te yakuk jkʼopontik te bersikuloetik ta Biblia te ya scholbey skʼoplal te slajel sok te chaʼkuxajel yuʼun te Jesús. Teme jich ya jpastike ya kakʼtik ta ilel te ya kaltik wokol te bitʼil la yakʼ sba ta lajel te jtojoltike. Ta swenta-abi yame stijbotik koʼtantik ta skʼayinbeyel te spekʼelil yoʼtan sok spasbeyel skʼanojel yoʼtan te Diose, manchukme ay wokol ya kaʼiytik (Luc. 22:41, 42).
TE MA XIW KOʼTANTIK YA SKOLTAYOTIK YUʼUN YA XBOOTIK TA TSOBLEJETIK
8. ¿Bin-utʼil la yakʼ ta ilel Jesús te maba xiwe?
8 Yan talelil yuʼun Jesús te ya jkʼan ya jkʼayintike, jaʼ te maba xiwe. Jnop kaʼiytik te bitʼil la yakʼ ta ilel kʼalal nopol ya yichʼix milel-ae. Snaʼoj-a te nopol ya yichʼix labanel yuʼun te skontratak, te ya yichʼ majel sok te ya yichʼ milele (Mat. 20:17-19). Manchukme jich-abi, jun yoʼtan la yakʼ sba ta lajel. Te kʼalal kʼot yorail-a, jich la yalbey te jpuk-kʼopetik yuʼun te jun yoʼtanik ta stojole te kʼalal ayik ta jun lugar te Getsemaní sbiile: «Hahchanic, ya xbohotiquix. Ilawilic, talix te machʼa ya yacʼon ta cʼabal» (Mat. 26:36, 46). Kʼalal tal ipal ants winiketik ta tsakel bael yuʼune, bajtʼ sta sok la yalbey yaʼiyik te jaʼ machʼa yak slebelik sok la yalbey te soldadoetik te akʼa yakʼik bael te jpuk-kʼopetik yuʼune (Juan 18:3-8). ¿Mabal jichuk te la yakʼ ta ilel te maba xiwe? Ta kʼajkʼal ini, te machʼatik ya xbajtʼik ta chʼulchan sok te yantik tuminchijetike ya spasik tulan ta skʼayinel te ma xiw yoʼtan te Jesuse. ¿Bin-utʼil?
Kʼalal ya kakʼtik ta ilel te ma xiwotik te ya xbootik ta tsoblejetike ya x-akʼbot yip yoʼtanik yuʼun te kermanotaktike. (Ilawil te parrafo 9). *
9. 1) ¿Bin yuʼun ma skʼan ya xiwotik swenta ya xbootik spisil-ora ta tsoblejetik? 2) ¿Bin-utʼil ya skoltay te ejemplo kuʼuntik te ermanoetik te chukulik ta skaj te schʼuunel yoʼtanike?
9 Ayniwan bin ya smakotik te wokol ya kaʼiytik yuʼun te spisil-ora ya xbootik ta tsoblejetik. Teme jiche, ya skʼan te manchuk ya xiwotike. Ay chaʼoxtul ermanoetik te ayik ta chamel, tulan mel-oʼtan o chebajem yoʼtanik. Ay yantik te ya yichʼik tulan kontrainel yuʼun sfamiliaik o ajwaliletik. Jnop kaʼiytik ta stojol te ermanoetik te ayik ta chukel ta skaj te schʼuunel yoʼtanike. ¿Yabal xjuʼ xkoltayotik yuʼun te ejemplo kuʼuntike? (Heb. 13:3). Kʼalal ya yaʼiyik stojol te jun koʼtantik yakotik ta abatinel ta stojol Jehová manchukme ay jwokoltik, ya x-akʼbot yip yoʼtanik swenta maba ya xpejkʼaj schʼuunel yoʼtanik, te manchuk ya xiwik sok te jun yoʼtan ya yakʼ sbaike. Jich kʼot ta stojol te jpuk-kʼop Pablo. Kʼalal la yichʼ chukel ta Roma, akʼbot stseʼelil yoʼtan kʼalal la yaʼiy te jun yoʼtan yakik ta abatinel ta stojol Jehová te yermanotake (Filip. 1:3-5, 12-14). Te kʼalal jtebxanix ya skʼan te ya yichʼ lokʼesel ta chukel o te kʼalal lokʼelto-ae, la stsʼibay jun karta ta stojol te ebreoetik. La yalbey ta mantal te manchuk ya skom sbaik ta stsobilanel sbaik sok la yalbey: «Spisiluc me ora talel cʼaxel cʼux yac awaʼiy abahic» (Heb. 10:24, 25; 13:1).
10, 11. 1) ¿Machʼatik ya skʼan ya jpastik inbitar ta Snaʼojibal slajel te Jesuse? 2) Jich bitʼil ya yal te Efesios 1:7, ¿bin swentail te jich ya jpastike?
10 Jaʼnix jich ya kakʼtik ta ilel te ma xiwotik kʼalal ya jpastik inbitar te jfamiliatik, joʼtaktik ta aʼtel sok jpatxujktik ta Snaʼojibal slajel te Jesuse. ¿Bin yuʼun te jich ya jpastike? Jaʼ yuʼun te ya kaltik bayal wokol ta swenta te bin spasoj ta jtojoltik te Jehová sok te Jesuse. Jaʼnix jich ya jkʼantik te yakuk staik lekilal te ants winiketik yuʼun te «yutsil yoʼtan» Jehová ta swenta te stojol kolele (kʼopona Efesios 1:7; Apoc. 22:17).
11 Jaʼnix jich te kʼalal ya xbootik ta tsoblejetik ya kakʼtik ta ilel yan talelil te mukʼ skʼoplale.
Te Jehová sok te Jesús kʼax lek yakʼojik ta ilel te talelil-abi.TE KʼUXUL OʼTANIL YA STIJ KOʼTANTIK YUʼUN YA XBOOTIK TA TSOBLEJETIK
12. 1) ¿Bin yuʼun te kʼalal ya xbootik ta tsoblejetik ya xmukʼubxan te skʼuxul koʼtantik ta stojol Jehová sok te Jesuse? 2) Jich bitʼil ya yal ta 2 Corintios 5:14, 15, ¿bin-utʼil ya xjuʼ ya jkʼayinbeytik stalel te Jesuse?
12 Te skʼuxul koʼtantik ta stojol Jehová sok te Jesús ya stij koʼtantik yuʼun ya xbootik ta tsoblejetik sok ya xmukʼubxan te skʼuxul koʼtantike. ¿Bin yuʼun? Melel te tsoblejetik spisil-ora ya sjultes ta koʼtantik te bintik spasojik ta jtojoltike (Rom. 5:8). Te Snaʼojibal slajel te Jesús ya sjultes ta koʼtantik te kʼax kʼuxotik ta yoʼtan soknix te machʼatik maʼyuk skʼoplal ta yoʼtanik te stojol kolele. Te joʼotike ya kaltik bayal wokol, jaʼ yuʼun ya jpastik tulan ta skʼayinbeyel stalel te Jesús ta jujun kʼajkʼal (kʼopona 2 Corintios 5:14, 15). Jaʼnix jich ya stij koʼtantik ta yalbeyel yutsil skʼoplal te Jehová ta swenta te la yakʼ ta lajel ta jtojoltik te sNichʼane. Te bitʼil ya xjuʼ ya jpastik-abi, jaʼ te spisil koʼtantik ya kakʼ jkomentariotik ta tsoblejetik.
13. Cholbeya skʼoplal bin-utʼil ya xjuʼ ya kakʼtik ta ilel te kʼux ta koʼtantik te Jehová sok te sNichʼane.
13 Ya kakʼtik ta ilel te bayal kʼux ta koʼtantik te Jehová sok te sNichʼan kʼalal ay bin lek ya jpastik ta stojolik te ma jaʼuk ya jle kutsil jlekiltik. Ta melel ay wokol ya kaʼiytik te ya xbootik ta tsoblejetike. Bayal kongregasionetik ya spasik te tsoblej yuʼun olil semana ta mal kʼajkʼal te kʼalal lujbenotikniwan ta aʼtel-a. Te tsoblej ta slajibal semana ya yichʼ pasel te kʼalal yorail ya skux yoʼtanik-a te yantik ants winiketike. ¿Yabal yil Jehová kʼalal ya xbootik ta tsoblejetik manchukme lujbenotikix-a? Yak. Kʼalal ya yil te bayalxan ya jpastik tulan te ya xbootik ta tsobleje, kʼaxtoxan ay skʼoplal ta yoʼtan te skʼuxul koʼtantik ta stojole (Mar. 12:41-44).
14. ¿Bin lekil ejemplo la yakʼ ta ilel te Jesuse?
14 Te Jesús la yakʼ ta ilel lekil ejemplo te bitʼil ya skʼan ya jkoltaytik te yantik yuʼun te kʼux ta koʼtantike. Ma jaʼuknax jun yoʼtan la yakʼ sba ta lajel ta stojol te jnopojeletik yuʼune, jaʼnix jich la yakʼ ta ilel ta jujun kʼajkʼal te jaʼ bajtʼ ta yoʼtan skoltayele. La stsob sba sok te jnopojeletik yuʼun manchukme lujbenix-a sok jkʼaxel smeloj yoʼtan-a (Luc. 22:39-46). Jaʼ bajtʼ ta yoʼtan yakʼbeyel te bin ya xtuun yuʼunike, ma jaʼuk te bin ya xjuʼ x-akʼbote (Mat. 20:28). Teme kʼux ta koʼtantik te Jehová sok te kermanotaktike, yame jpastik tulan te ya xbootik ta Snaʼojibal slajel te Jesús sok ta yantik tsoblejetik.
15. ¿Machʼatik-a te ya skʼan ya jkoltaytikxane?
15 Joʼotiknax te ayotik ta smelelil relijione, jaʼ yuʼun sok spisil koʼtantik ya jlokʼes jtiempotik ta yikʼel tal te ants winiketik te yakuk x-ochik ta lum yuʼun Jehová. Jaʼukmeto jaʼ ya skʼan ya jkoltaytikxan te machʼatik yijkʼitayojik scholel skʼop Dios te «pajal ay schʼuhunel coʼtantic soque» (Gál. 6:10). Yame kakʼbeytik yil te skʼuxul koʼtantik kʼalal ya jtijbeytik yoʼtan te yakuk xbajtʼik ta tsoblejetike, kʼaxemtoxan-a ta Snaʼojibal slajel te Jesuse. Jich bitʼil te Jehová sok te Jesús, ya yakʼbotik bayal stseʼelil koʼtantik kʼalal ya sujt ta stojol te jTatik Jehová te machʼa yijkʼitayojik scholel te skʼop Diose (Mat. 18:14).
16. 1) ¿Bin-a te ya skʼan ya jtijbey jba koʼtantik ta spasel sok bin ya skoltayotik ta yakʼel ta ilel te tsoblejetike? 2) ¿Bin yuʼun te jaʼ yorail te ya jultes ta koʼtantik te bin la yal te Jesús ta Juan 3:16?
16 Te semanaetik ya xtale, yame skʼan ya jpastik inbitar spisil ants winiketik swenta ya xkʼotik ta Snaʼojibal slajel te Jesús ta mal kʼajkʼal biernes 19 yuʼun abril 2019 (ilawil te rekuadro « ¿Yabal jpastik inbitar yantik ants winiketik?»). Ta sjunal bael jaʼbil akʼa jtijbey jba koʼtantik swenta ya xbootik spisil-ora ta tsoblejetik. Ta jujun kʼajkʼal yakme ta noptsajel tal te slajibal kʼajkʼale. Jaʼ yuʼun bayal skʼoplal te ya xbootik ta tsoblejetike, melel jaʼ ya skoltayotik ta yakʼel ta ilel te spekʼelil oʼtanil, te maba ya xiwotik sok te kʼuxul oʼtanil (1 Tes. 5:8-11). Akʼa kakʼbeytik yil te Jehová sok te Jesús te ya kaltik bayal wokol yuʼun te skʼuxul yoʼtan yakʼojik ta ilel ta jtojoltike (kʼopona Juan 3:16).
KʼAYOJIL 126 Wikʼilukme jsitik
^ parr. 5 Te Snaʼojibal slajel te Jesús yame yichʼ pasel ta biernes 19 yuʼun abril 2019, jaʼme te tsoblej te kʼax mukʼ skʼoplale. ¿Bin yuʼun ya skʼan ya xbootik ta tsoblej ini te kʼax mukʼ skʼoplale? Jaʼ ta swenta te ya jkʼantik te tseʼeluk yoʼtan kuʼuntik te Jehová. Ta artikulo ini yame xbajtʼ kilbeytik skʼoplal bintik talelil ya kakʼtik ta ilel kʼalal ya xbootik ta Snaʼojibal slajel te Jesús sok ta tsoblejetik ta jujun semana.
^ parr. 50 TE FOTO TA YELAW TE REBISTA: Ta swolol Balumilal leknax ya yichʼik ikʼel ochel bayal millón ta tul te ya xkʼotik ta Snaʼojibal slajel te Jesús
^ parr. 52 TE BIN YA XCHIKNAJ TA ILEL TA LOKʼOMBAETIK: Jtul ermano te chukul ta skaj schʼuunel yoʼtan ya sta yip yoʼtan kʼalal ya skʼopon jun karta te tikunbot tal yuʼun sfamilia. Tseʼel yoʼtan yuʼun te ma chʼaybil ta oʼtanil yuʼun te sfamilia sok te jun yoʼtan yakʼoj sbaik-euk ta stojol Jehová manchukme ay bayal kʼop ta slumalik.