1, 2. 1) ¿Bin yuʼun la snojptesotik te Jesús te maʼyuk bayal bin ya yichʼ pasel ta Snaʼojibal slajele? 2) ¿Bintik talelil yuʼun Jesús ya xbajtʼ kilbeytik skʼoplal?

¿YABAL xjuʼ ya acholbey skʼoplal te bin ya yichʼ pasel ta jujun jaʼbil ta Snaʼojibal slajel te Jesuse? Yakniwan, melel maʼyuk bayal bin ya yichʼ pasel tey-a. Jaʼukmeto ayniwan machʼa ya sjojkʼoybey sba: «¿Bin yuʼun te maʼyuk bayal bin ya yichʼ pasel tey-a te bitʼil jaʼ jun tsoblej te kʼax mukʼ skʼoplale?».

² Te kʼalal ay ta Balumilal-a te Jesuse, maba chujkʼul te bitʼil la yakʼ ta nopel te smelelil kʼope sok oranax ya xkʼot ta oʼtanil (Mat. 7:28, 29). Jaʼnix jich la yakʼ ta nopel bin-utʼil ta pasel te snaʼojibal slajel te maʼyuk bayal bin ya yichʼ pasel tey-a, pero te kʼax tulan skʼoplale. Akʼa kilbeytik swentail te Snaʼojibal slajel te Jesús soknix chaʼoxchajp te bin la spas sok la yal. Jichme ya xkʼotxan ta koʼtantik te spekʼelil yoʼtan, te maba xiw sok te skʼuxul yoʼtane. Jaʼnix jich ya kiltik bin ya skʼan ya jpastik swenta ya jkʼayintik ta lekxan te stalele.

3. Ta swenta te bin ya yal Mateo 26:26-28, ¿bin yuʼun ya kaltik te ma wokoluk ta pasel te Snaʼojibal slajel te Jesús sok bin señail te pan te ma yichʼoj lebadura sok te bino?

³ Te Jesús la yakʼ ta ilel bin-utʼil ya yichʼ pasel te Snaʼojibal slajel kʼalal sjokinej-a te once ta tul jpuk-kʼopetik yuʼun te jun yoʼtanike. Ta swenta-abi, la stuuntes sobrail pan te maba yichʼoj lebadura sok bino yuʼun te kʼin Pascua (kʼopona Mateo 26:26-28). La yalbey te jpuk-kʼopetik yuʼune te jaʼ señail sbakʼetal sok schʼichʼel te nopol ya xbajtʼ yakʼ ta stojolike.  Te jpuk-kʼopetik maba chajpnax la yilik-a te bitʼil maʼyuk bayal bin la yichʼ pasele. ¿Bin yuʼun?

4. ¿Bin-utʼil ya skoltayotik ta snaʼel te maba wokol ta pasel te Snaʼojibal slajel te Jesús te tojobtesel la yakʼbey te Martae?

⁴ Juluk ta koʼtantik te bin kʼot ta pasel cheʼoxeb u ta nailal tal, jaʼix yoxebal jaʼbil yaʼtel-a te Jesuse. Kʼalal ay ta sna-a te Lázaro, Marta sok María te yamigotake, kaj snojpteslan. Manchukme tey ay-a te Martae, jaʼ bajtʼ ta yoʼtan schajpanel lekil weʼelil ta stojol te Jesús te ma machʼauknax-a. Te Jesús sok yutsil yoʼtan la stojobtes te Marta te ma puersauk ya schajpan lekil weʼelile (Luc. 10:40-42). Cheʼoxeb u ta patil te kʼalal cheʼoxebxanix ora ya skʼan te ya yakʼ skuxlejal-a te Jesús, jichnix la spas te bitʼil la yalbey te Martae. Maʼyuk bayal bin la schajpan te kʼalal weʼ uchʼ sok te jnopojeletik yuʼune. ¿Bin ya yakʼ jnoptik-abi ta swenta te Jesuse?

5. ¿Bin ya yakʼ jnoptik ta swenta Jesús te bitʼil maʼyuk bayal bin ya yichʼ pasel ta Snaʼojibal slajele sok bin-utʼil snitojbey sba skʼoplal sok te Filipenses 2:5-8?

⁵ Spisil te bin la spas sok te bin la yal te Jesuse la yakʼ ta ilel te pekʼel yoʼtane. Jaʼ yuʼun ma chajpuknax ya kaʼiytik-a te bitʼil jich la yakʼ ta ilel te kʼalal nopol ya yichʼix milel-ae (Mat. 11:29). Snaʼoj-a te nopol ya yakʼix skuxlejal te maʼyuk jich akʼbil ta stojol te ants winiketik sok te ya xchaʼkuxajtesot yuʼun te Jehová soknix te ya x-och ta Ajwalil ta chʼulchan ta patil bael. Manchukme jich-abi maba la skʼan te ya yichʼ ichʼel ta mukʼ, jaʼ yuʼun maʼyuk bayal bin la schajpan swenta ya yichʼ naʼel te slajele. La yalbey te jnopojeletik yuʼun te yakuk spasik jun buelta ta jaʼbil te Snaʼojibal slajel banti maʼyuk bayal bin ya yichʼ pasel tey-ae (Juan 13:15; 1 Cor. 11:23-25). Jich la yakʼ ta ilel te maba ya stoy sbae. Bayal ya yakʼ stseʼelil koʼtantik te pekʼel yoʼtan te Ajwalil kuʼuntik ta chʼulchane (kʼopona Filipenses 2:5-8).

6. ¿Bin-utʼil ya xjuʼ jkʼayinbeytik te spekʼelil yoʼtan te Jesús kʼalal ya xkʼax jwokoltike?

⁶ Te bin-utʼil ya xjuʼ jkʼayinbeytik te spekʼelil yoʼtan te Jesuse, jaʼ te ya jlebeytik yutsil slekil te yantike (Filip. 2:3, 4). Jnop kaʼiytik te bin la spas te ajkʼabal te kʼalal nopol ya xlajix-ae. Manchukme bayal swokol yuʼun te nopol ya yichʼix milele, jaʼ bajtʼxan ta yoʼtan te mel-oʼtan ya xbajtʼ yaʼiyik te jnopojeletik yuʼune. Jaʼ yuʼun te ajkʼabal-abi, la snojpteslan, la yakʼbey smukʼul yoʼtan sok smukʼul kʼinal yaʼiyik (Juan 14:25-31). La yakʼ ta ilel te jaʼ bayalxan skʼoplal ta yoʼtan te yantike.  La yakʼbotik jilel jun ejemplo ta swenta te pekʼel-oʼtanile.

7. Te kʼalal yichʼojix pasel-a te Weʼel Uchʼel yuʼun Kajwaltik, ¿bin-utʼil la yakʼ ta ilel Jesús te maba xiwe?

⁷ Te kʼalal la yichʼix pasel-a te Weʼel Uchʼel yuʼun Kajwaltik, te Jesús la yakʼ ta ilel te jkʼaxel ma xiwe. ¿Bin-utʼil? Jun yoʼtan la spas te skʼanojel yoʼtan Dios manchukme ya sta kʼexlal ta skaj te la yichʼ lebeyel smul ta bolkʼoptaywanej, sok te ya yichʼ milele (Mat. 26:65, 66; Lucas 22:41, 42). Mero jun yoʼtan la yakʼ sba sok la yichʼbey ta mukʼ sbiil te Dios, la skoltaybey skʼoplal te jaʼnax ya xmantalaj stukele. Ta swenta te bin la spase ya xjuʼ xkuxinik sbajtʼelkʼinal te ants winiketik te ya sujtes yoʼtanike. Jaʼnix jich la schajpan te jnopojeletik yuʼun ta sitintayel te wokolil ya xtal ta stojolik ta patile.

8. 1) ¿Bintik la yaltiklanbey Jesús te jpuk-kʼopetik yuʼune? 2) Te kʼalal lajemix-a te Jesuse, ¿bin-utʼil la yakʼik ta ilel te jnopojeletik te maba xiwike?

⁸ Jaʼnix jich la yakʼ ta ilel te maba xiw kʼalal jaʼ bajtʼ ta yoʼtan skoltayel te jpuk-kʼopetik yuʼun te kʼalal ay ta wokol-ae. Kʼalal la yalbey te yakuk xlokʼ bael te Judase, te Jesús la sjach spasel te Snaʼojibal slajel yuʼun jich te jujun buelta ya spasik te jnopojeletik te tsabilik yuʼun ya xbajtʼik ta chʼulchan ya snaʼik-a bin lekilal ya staik yuʼun te schʼichʼel te Jesús sok te ya x-ochik ta yachʼil chapbilkʼope (1 Cor. 10:16, 17). Swenta ya skoltaylan te jnopojeletik te junuk yoʼtan ya yakʼ sbaik sok te ya xjuʼ xbajtʼik ta chʼulchane, la yaltiklanbey te bin ya xkʼanbotik yuʼun Dios te ya spasike (Juan 15:12-15). Jaʼnix jich la yaltiklanbey te tsajel ya sitintayike. Ta patil la yalbey te manchuk ya xiwik jich bitʼil la spase (Juan 16:1-4a, 33). Bayal jaʼbil ta patil, te jnopojeletik la yakʼik ta ilel te ma xiwik jich bitʼil  te Jesús sok la slokʼes sba ta yoʼtanik kʼalal jun yoʼtan talel kʼaxel ya skoltay sbaik (Heb. 10:33, 34).

9. ¿Bin-utʼil ya xjuʼ jkʼayinbeytik stalel te Jesús te bitʼil maba xiwe?

⁹ Ta kʼajkʼal ini ya jkʼayinbeytik stalel te Jesús te bitʼil maba xiwe, ¿bin-utʼil? Jaʼ te ya jkoltaytik te ermanoetik te kʼalal ya yichʼik utsʼinel ta swenta te schʼuunel yoʼtanike. Ay chaʼoxtul te ya yichʼik chukel manchukme maʼyuk smulik. Te kʼalal jich ya xkʼot ta pasel, ya skʼan ya jpastik tulan ta skoltayel (Filip. 1:14; Heb. 13:19). Yanxan te bitʼil ya kakʼtik ta ilel te ma xiwotike jaʼ te kʼalal ma jkom jbatik ta scholel skʼop Dios sok yip koʼtantik (Hech. 14:3). Jich bitʼil la spas te Jesús, jun koʼtantik ya jcholtik te lek yachʼil kʼop yuʼun te Wentainel manchukme ya kichʼtik utsʼinel sok kontrainel. Pero, ¿bin ya xjuʼ ya jpastik teme ay baeltik ya kaʼiytik te ya xiwotike?

10. ¿Bin ya skʼan ya jpastik te kʼalal nopol ya yichʼix pasel-a te Snaʼojibal slajel te Jesús sok bin yuʼun?

¹⁰ Te bin ya xjuʼ ya skoltayotik yuʼun ayukxan yip koʼtantik, jaʼ te manchuk ya xchʼay ta koʼtantik te bin ya jmaliytik ta pajel chaʼbej ta swenta te la yakʼ sba ta lajel te Jesuse (Juan 3:16; Efes. 1:7). Te kʼalal cheʼoxebxanix semana ya skʼan ya yichʼ pasel-a te Snaʼojibal slajel te Jesuse ya xjuʼ ya jchajpan koʼtantik yuʼun ya kakʼtikxan ta ilel te ya kaltik wokol yuʼun te stojol kolel. Ta yorail-abi, akʼa jkʼopontik te bersikuloetik ta swenta te Snaʼojibal slajel te Jesús sok akʼa jnopilan ta koʼtantik te bintik kʼot ta pasel te akʼot ta lajel yuʼune. Te kʼalal ya jtsob jbatik ta spasel te Weʼel Uchʼel yuʼun Kajwaltik, yame xkʼotxan lek ta koʼtantik te bin swentail te pan sok bino, te jaʼ señail te majtʼanil la yakʼ te Jesús te maʼyuk bin ya spaj. Kʼalal ya xkʼot ta koʼtantik te bintik spasoj ta jtojoltik te Jesús sok te Jehová, te lekilal ya jtatik sok te machʼatik ay kuʼuntik yame yichʼxan  yip te smukʼul koʼtantik sok yame xkujch kuʼuntik kʼalal ta slajibal (Heb. 12:3).

11, 12. ¿Bintik-a te la kilbeytikix skʼoplale?

¹¹ Ta ora ini la kiltikix te Weʼel Uchʼel yuʼun Kajwaltik te ma jaʼuknax ya sjultes ta koʼtantik te mukʼ skʼoplal te stojol kolele, jaʼnix jich ya sjultes ta koʼtantik te spekʼelil yoʼtan sok te maba xiw te Jesuse. Ya kaltik bayal wokol yuʼun te bitʼil yakto ta yakʼel ta ilel te tʼujbil talelil-abi, melel jaʼix Mukʼul Saserdote ta chʼulchan te ya xkʼopoj ta jtojoltike (Heb. 7:24, 25). Swenta ya kakʼtik ta ilel te ya kaltik wokol yuʼune, ya skʼan ya jchʼuuntik te mantalil te ya skʼan pasel te Snaʼojibal slajel te Jesuse (Luc. 22:19, 20). Yame jpastik ta jujun jaʼbil te kʼalal ya sta skʼajkʼalel 14 yuʼun nisán ta kalendario judio, jaʼme jun kʼajkʼal te kʼax mukʼ skʼoplale.

¹² Kʼalal ya jnopilan ta koʼtantik te maʼyuk bin bayal la yichʼ pasel ta Snaʼojibal slajel te Jesús, ya yakʼ kiltik yan talelil yuʼun Jesús te tijbot yoʼtan yuʼun la yakʼ sba ta lajel ta jtojoltik. Te talelil-abi la yakʼ ta ilel kʼalal kuxin ta Balumilal. Kiltik bin-a.

13. 1) ¿Bin-utʼil ya yakʼ kiltik te Juan 15:9 sok 1 Juan 4:8-10 te skʼuxul yoʼtan te Jehová sok Jesús? 2) ¿Machʼatik ya sta slekilik yuʼun te skʼuxul yoʼtanike?

¹³ Ta spisil te bin la spas te Jesuse la yakʼ ta ilel ta lek te skʼuxul yoʼtan Jehová ta jtojoltike (kʼopona Juan 15:9; 1 Juan 4:8-10). Ta spisil jaʼ tijbotxan yoʼtan ta yakʼel skuxlejal ta jwentatik te skʼuxul yoʼtan. Chikan teme ya xbootik ta chʼulchan o teme ochemotik ta yantik tuminchijetike, yame jta jlekilaltik yuʼun te skʼuxul yoʼtan yakʼoj ta ilel te Jehová sok te Jesús ta swenta te stojol kolele (Juan 10:16; 1 Juan 2:2). Kiltik bin-utʼil chiknaj ta ilel te skʼuxul yoʼtan sok te la yichʼ ta mukʼ te jnopojeletik yuʼun kʼalal la spas te Snaʼojibal slajele.

14. ¿Bin-utʼil la yakʼ ta ilel skʼuxul yoʼtan te Jesús ta stojol te jnopojeletik yuʼune?

¹⁴ Jich bitʼil la kiltikixe, te Jesús maba la yakʼbey spas te jnopojeletik yuʼun te bin wokol ta pasel ta swenta Snaʼojibal slajele, jaʼnax jun weʼelil te maba wokol ta pasele. Te j-abatetik yuʼun Dios, ayix tal bayal jaʼbil te spasojik te Snaʼojibal slajel te Jesús ta karsel o ta yantikxan lugar te bitʼil ya xjuʼ yuʼunike (Apoc. 2:10). ¿Juʼembal yuʼunik spasel te mantal yuʼun te Jesuse? Juʼem.

15, 16. ¿Bin-utʼil juʼem yuʼunik spasel chaʼoxtul ermanoetik te Weʼel Uchʼel yuʼun Kajwaltik manchukme ta yorail wokol?

¹⁵ Te smelelil jchʼuunjeletik spasojik tulan ta spasel spisil-ora te Snaʼojibal slajel te Jesús sok yakikto ta spasel ta ora ini. Ya spasik tulan ta spasel jich bitʼil la yakʼ ta ilel te Cristo manchukme ay wokol ta pasel. Kiltik te bin kʼot ta stojol te ermano Harold King. Te kʼalal la yichʼ chukel ta China te ermanoe maʼyuk machʼa ya xjuʼ xkʼopoj sok tey-a, jaʼ yuʼun la sle bin-utʼil la spas te Snaʼojibal slajel te Jesuse. Muken la schajpan te pan sok te bino jaʼ chikan te bintik ay yuʼune. Jaʼnix jich la snaʼ yajtayel te bin-ora ya xkʼot skʼajkʼalele. Te kʼalal ya xkʼot yorail, stukel ya xkʼayojin, ya skʼopon Dios sok ya skʼases jun diskurso tey-a.

¹⁶ Kiltik yan ejemplo. Ta yorail te 2 Guerra Mundial, ay jtsojb ermanaetik te chukulik ta campo de concentración la spasik te Weʼel Uchʼel yuʼun Kajwaltik manchukme ya xjuʼ ya yichʼik milel yuʼun. Te bitʼil maʼyuk bayal bin ya yichʼ pasele, juʼ yuʼunik spasel ta muken. Jich la yalik: «Tekʼelotik ta sjoyobal te juktajibal te mukul ta sakil pakʼ te banti kakʼojtik te pan sok te bino. La jtuuntestik bela, melel te luse ya xjuʼ ya yakʼotik ta ilel. [...] La stsakxan yip ta koʼtantik spasel te bantito ya xjuʼ  kuʼuntik ta stoybeyel skʼoplal te schʼul sbiile». ¡Kʼax mukʼ te schʼuunel yoʼtanike! Te bitʼil ya xjuʼ ya jpastik te Snaʼojibal slajel te Jesús manchukme ta yorail wokol, ya yakʼ ta ilel te skʼuxul yoʼtan te Jesuse.

17. ¿Bintik ya skʼan ya jojkʼoybey jbatik?

¹⁷ Te kʼalal ya xnoptsajix skʼajkʼalel te Snaʼojibal slajel te Jesús, jaʼ lek te ya jojkʼoybey jbatik: «¿Bin-utʼil ya xjuʼ ya jkʼayinbey ta lek skʼuxul yoʼtan te Jesuse? ¿Jaʼbal ay skʼoplal ta koʼtan te bin ya xtuun yuʼunik te kermanotak o jaʼnaxbal te bin ya jkʼane? ¿Jaʼbal ya jkʼan te manchuk ya xchʼayik ta jkʼaxel o yabal xkʼot ta koʼtan te ay bintik ma xjuʼ yuʼunik spasele?». Jnopbeytik spisil-ora stalel te Jesuse sok jichukme ya kaʼiy jbatik te bin yaʼiyel ya yaʼiy sbaik te yantike (1 Ped. 3:8).

18, 19. 1) ¿Bin-a te ya xjul ta koʼtantike? 2) ¿Bin-a te ya skʼan ya apas tulan ta spasele?

¹⁸ Ta pajel chaʼbejxanix, ma puersaukix ya jpastik te Snaʼojibal slajel te Jesuse. Kʼalal ya «xchaʼtal» te Jesús ta yorail te tulan wokolil, yame yikʼ bael ta chʼulchan te machʼatik «tsahticlambil yuʼun» te liʼto ayik ta Balumilale. Kʼalal ya xkʼot yorail-abi, maba ya jpastikix-a te Snaʼojibal slajel te Jesuse (1 Cor. 11:26; Mat. 24:31).

¹⁹ Aytome bin ya sjultes ta koʼtantik te Weʼel Uchʼel yuʼun Kajwaltik te kʼalal ma xyichʼix pasel-ae, jaʼ te la yakʼ ta ilel ta lek spekʼelil yoʼtan te Jesús, te maba xiw sok te skʼuxul yoʼtan te maʼyuk jich yakʼoj ta ilel jtuluk ants winik. Te machʼatik la spasik ini ya scholbeyik yaʼiy te machʼa ya xbajtʼ xkuxinik tey-a. Bayalme ya xkoltayotik yuʼun te kʼalal ya yaʼiyike. Jich yuʼun, swenta ya jtatik lekilal yuʼun te Snaʼojibal slajel te Jesuse, yame skʼan ya jpastik tulan ta snopbeyel te spekʼelil yoʼtan, te maba xiw sok te skʼuxul yoʼtane. Teme jich ya jpastike, te Jehová yananix xbajtʼ yakʼbotik-a te jmajtʼantike (2 Ped. 1:10, 11).