TA MELEL, spisil te ants winiketik ya skʼanik te tseʼeluk yoʼtanik. Jaʼukmeto te slajibal kʼajkʼal ini jaʼ «yorahil wocol» (2 Timoteo 3:1). Ay bayal te bintik ya yakʼ te maʼyuk stseʼelil yoʼtan te ants winiketike, jich bitʼil te bintik ma stojiluk ya yichʼ pasel, chamelil, te maʼyuk aʼtel o te ay machʼa ya xlaj yuʼunike. Jaʼnix jich te j-abatetik yuʼun Dios ya xjuʼ xchebaj yoʼtanik sok te kʼunkʼun ya xchʼay bael te sbujtsʼ yoʼtanike. Teme jich yak ta kʼaxel ta jtojoltike, ¿bin ya xjuʼ ya jpastik swenta ya xchaʼayin kuʼuntik te sbujtsʼ koʼtantike?

Swenta ya kakʼbeytik sujtib te jojkʼoyele, yame skʼan jnaʼtik nailuk bin-a te sbujtsʼ-oʼtanile, sok bin-utʼil ay machʼatik ya yakʼik ta ilel manchukme ay swokolik. Ta patil, ya kiltik bin ya xjuʼ ya jpastik swenta maba ya xchʼay kuʼuntik te sbujtsʼ koʼtantike sok bin-utʼil ya xjuʼ xtoyxan kuʼuntik.

Ma pajaluk te ya kaltik te ay sbujtsʼ koʼtantik sok te tseʼelnax koʼtantike. Kaltik jun ejemplo. Kʼalal ay machʼa ya yuchʼ bayal trago, bayalniwan ya stseʼejin. Jaʼukmeto kʼalal ya xkux kʼinal yaʼiy maba ya stseʼejinix sok ya xjul ta yoʼtan te mananix lajem-a te wokoliletik ay yuʼune. Maba jalaj te stseʼelil yoʼtane. Ta melel, mananix ay sbujtsʼ yoʼtan-a (Proverbios 14:13).

Yan yilel stukel te sbujtsʼ-oʼtanile. Jaʼ te kʼalal ya kaʼiytik smelelil tseʼel-oʼtanil, yuʼun ay bin lek ay kuʼuntik o ay bin lek yakotik ta smaliyel. Te sbujtsʼ-oʼtanile ya skʼan ya yal te ay stseʼelil koʼtantik chikan teme lek o ma lek te bin yak ta kʼaxel ta jkuxlejaltike (1 Tesalonicenses 1:6). Ta melel, te machʼa ma lek ya yaʼiy sba ta skaj te ay bin kʼax ta stojol, yato xjuʼ te ay sbujtsʼ yoʼtan. Jich bitʼil, te jpuk-kʼopetik la yichʼik majel ta swenta te la yalbeyik skʼoplal te Cristo, jaʼukmeto te Biblia ya yal te kʼalal «loqʼuic bahel ta stojol te jchahpanwanejetic, tseʼel yoʼtanic yuʼun te lec scʼoblalic ta stojol Dios te bin utʼil aʼbot cʼaxuc swocolic ta utsʼinel ta scaj te Bihilile» (Hechos 5:41). Ta melel, ma jaʼuk la yaʼiyik sbujtsʼ yoʼtanik yuʼun te majele, jaʼ yuʼun te jun yoʼtan la yakʼ sbaik ta stojol Dios.

Maʼyuk machʼa ya x-ayin ta kʼinal sok te sbujtsʼ-oʼtanile sok ma jichuknax ya yichʼ tael. ¿Bin yuʼun? Melel te smelelil sbujtsʼ-oʼtanile jaʼ jchap talelil yuʼun te sit ya yakʼ te chʼul espiritu yuʼun Dios. Te espiritu ini ya skoltayotik ta yakʼel ta ilel te «yachʼil cuxlejal», tey ochem skʼoplal-a te sbujtsʼ-oʼtanile (Efesios 4:24; Gálatas 5:22). Te kʼalal ay sbujtsʼ koʼtantike ya jnaʼtikxan sitintayel te wokoliletik ay kuʼuntike.

Kʼalal te Jehová la spas te Balumilale, la skʼan te lekuk spisile, ma jaʼuk te ya xkʼot ta pasel te bin chopol ya kiltik ta ora ini. Manchukme ya spasik te bin chopol te ants winiketike, te Jehová maba chʼayem te sbujtsʼ yoʼtan yuʼun. Te sKʼop Dios jich ya yal: «Ay yuʼel soc yutsil qʼuinal ta banti nahinem» (1 Crónicas 16:27). Jaʼnix jich ya yaʼiy sbujtsʼ yoʼtan te kʼalal ya yil te ya spasik te bin lek te j-abatetik yuʼun (Proverbios 27:11).

¿Bin-utʼil ya xjuʼ ya jkʼayintik te ejemplo yuʼun te Jehová? Jaʼ teme ma jkʼaxel ya jmel koʼtantik kʼalal ay bin ma jichuk kʼot ta lokʼel te bitʼil jkuyojtik-ae. Mame xchʼay te sbujtsʼ koʼtantike, jaʼ akʼa bajtʼuk ta koʼtantik te bin lek ay kuʼuntik ta ora ini sok jmaliytik  te ya xlekub bael te bin yak ta kʼoel ta pasele. *

Ta Biblia ya jtatik bayal ejemploetik ta swenta j-abatetik yuʼun Dios te ma chʼay te sbujtsʼ yoʼtanik te kʼalal ayik ta tulan wokolile. Jtul jaʼ te Abraham. La sitintay kʼopetik te la sta ta smul yantik soknix wokoliletik te kʼan lajuk yuʼune (Génesis 12:10-20; 14:8-16; 16:4, 5; 20:1-18; 21:8, 9). Jaʼukmeto maʼyuk bin-ora chʼay te sbujtsʼ yoʼtane. ¿Bin yuʼun? Melel spisil-ora yakʼoj ta yoʼtan smaliyel te ya xkuxin ta yachʼil balumilal te kʼalal yakix ta wentainwanej-a te Mesiase (Génesis 22:15-18; Hebreos 11:10). Te Jesús jich la yal: «Te atatic Abraham tseʼel yoʼtan yuʼun te ya yilbon te yorahil cuʼun» (Juan 8:56). Ya xjuʼ ya jtʼunbeytik stalel te Abraham teme sok sbujtsʼ koʼtantik ya jnopilan ta koʼtantik spisil te bin lek ya xbajtʼ jmulantik ta pajel chaʼbeje (Romanos 8:21).

Jichnix bitʼil te Abraham, te jpuk-kʼop Pablo sok te Silas jaʼ yakʼoj ta yoʼtanik te bintik jamal yaloj Dios te ya spase. Ta swenta te tulan ay te schʼuunel yoʼtanike, ma chʼay yuʼunik te sbujtsʼ yoʼtanik te kʼalal la sitintayik tulan wokoliletik. Ta jun buelta, la yichʼik tulan majel ta xul sok la yichʼik otsesel ta karsel. Te Biblia ya yal: «Ta ohlil ahcʼabal yacalic ta scʼoponel Dios soc ta scʼayojtayel Dios a te Pablo soc Silas» (Hechos 16:23-25). Ma jaʼuknax la sta yip yoʼtanik yuʼun te bin yakik ta smaliyele, jaʼnix jich la yaʼiyik sbujtsʼ yoʼtanik, melel ayik ta wokol ta swenta sbiil te Cristoe. Teme ya jkʼan ya jkʼayinbeytik te ejemplo yuʼunike, yame skʼan te spisil-ora ayuk ta koʼtantik te bin lek ya xkʼot ta lokʼel kʼalal sok schʼuunel koʼtantik ya x-abatinotik ta stojol te Diose (Filipenses 1:12-14).

Ta kʼajkʼal ini jaʼnix jich ay bayal lekil ejemploetik kuʼuntik yuʼun hermanoetik te ma chʼayem te sbujtsʼ yoʼtanik manchukme ay swokolik. Jich bitʼil, ta noviembre yuʼun 2013, te supertifón Haiyan la slajin ta tulan yikʼal jaʼal te centro yuʼun te lum Filipinas. Kʼaxem ta jmil familiaetik te Testigoik jin jilel snaik. Jaʼ jich kʼax ta stojol jtul hermano te George sbiil ta lum Tacloban. Jich la yal: «Manchukme tulan te bin kʼax ta stojol te hermanoetike, tseʼelnax yoʼtan ayik. Ma jta ta alel te jayeb sbujtsʼ koʼtantik ya kaʼiytike». Teme ya jnopilan ta koʼtantik spisil te bin spasoj te Jehová sok teme ya kalbeytik wokol yuʼun, jich ma xchʼay te sbujtsʼ koʼtantik manchukme tulan te bintik ya jsitintaytike. ¿Bintikxan yakʼojbotik te Jehová swenta ya kaʼiytik sbujtsʼ koʼtantik?

Te bin yuʼun mukʼxan skʼoplal ya skʼan ayuk sbujtsʼ koʼtantike, jaʼ te kamigoinej jbatik sok te Jehovae. Ya jnaʼbeytik sba te Mukʼul Ajwalil yuʼun te chʼulchan sok te Balumilal. Jaʼ jTatik, jDiostik sok kamigotik (Salmo 71:17, 18).

Yan te bin yuʼun ya skʼan te ayuk sbujtsʼ koʼtantike, jaʼ te kuxulotik sok te ya xjuʼ ya jmulanbeytik yutsilal te kuxlejalile (Eclesiastés 3:12, 13). Jich bitʼil te Jehová la yikʼotik ta stojol, ya jnaʼtik bin-a te skʼanojel yoʼtan sok bin ya skʼan te ya jpastike (Colosenses 1:9, 10). Ta swenta-abi, ay swentail ta lek te jkuxlejaltik sok ya jnaʼtik bin ya jpastik. Yan stukel te yantik ants winiketik jteb ma spisilik ma snaʼik ta lek bin swentail te kuxlejalile. Te Pablo jich la yakʼ ta naʼel kʼalal la yal: «Mayuc sitil yiloj, mayuc chiquinil yaʼiyej, mayuc machʼa snaʼoj ta yoʼtan te bintic chahpambil yuʼun Dios te ya yaʼbe te machʼatic cʼux ta yoʼtanic te Diose, xchi. Pero Dios la yaʼbotiquix jnaʼtic ta scuenta te Espíritu» (1 Corintios 2:9, 10). Yan te bin yuʼun ya skʼan te ayuk sbujtsʼ koʼtantik, jaʼ te ya xkʼot ta koʼtantik te bin snopoj ya spas te Jehová sok bin-a te skʼanojel yoʼtane.

Kiltik bintikxan spasoj te Jehová ta swenta te lum yuʼune. Ay bin spasoj yuʼun ya kichʼtik pasbeyel perdon yuʼun te jmultike (1 Juan 2:12). Ta skaj te ya snaʼbotik yoʼbolil jbatik yakʼoj te ya jmaliytik te ya xkuxinotik ta achʼ balumilal te nopolixe (Romanos 12:12). Jaʼnix jich ta ora ini, yakʼojbotik kermanotaktik ta swolol Balumilal te pajalnax ya kichʼtik ta mukʼ Dios soke (Salmo 133:1). Jaʼnix jich te Biblia jamal ya yalbotik te ya skanantay Jehová te lum yuʼun ta stojol te Satanás sok te chopol espirituetike (Salmo 91:11). Teme ya jnopilan ta koʼtantik spisil te bendisionetik ini, jichme ya xtoyxan bael te sbujtsʼ koʼtantike (Filipenses 4:4).

¿Yabal xjuʼ xtoyxan te sbujtsʼ koʼtantike? Te Jesús la yal: «Ha la jcalbeyex ini scuenta yuʼun hich yac awichʼbonic te yutsil coʼtan, soc tsʼacal ya xcʼoht a te yutsil awoʼtanic» (Juan 15:11). Te kʼopetik-abi ya yakʼ kiltik te spisil-ora ya xjuʼ xtoyxan te sbujtsʼ koʼtantike. Te sbujtsʼ-oʼtanile jich kʼoem bitʼil kʼajkʼ. Teme ya jkʼantik ya xtilxan te jkʼajkʼtike, yame skʼan ya kakʼbeytikxan siʼul. Jaʼ pajal sok-abi, teme ya jkʼantik te ya xtoyxan te sbujtsʼ koʼtantike, yame skʼan te spisiluk-ora ya skoltayotik te schʼul espiritu te Jehovae. Jaʼ yuʼun mame xkomotik ta skʼanbeyel sok jnopilan ta koʼtantik te bin ya yal te Biblia te la yichʼ tsʼibayel ta swenta te chʼul espiritue (Salmo 1:1, 2; Lucas 11:13).

Yan te bin-utʼil ya xjuʼ xtoy te sbujtsʼ koʼtantike, jaʼ te kʼalal ya xbajtʼ koʼtantik ta spasel te bin ya smulan te Jehová (Salmo 35:27; 112:1). ¿Bin yuʼun te jich ya kaltike? Melel la spasotik yuʼun ya jpasbeytik te skʼanojel yoʼtane. Te Biblia jich ya yalbotik: «Ichʼa ta mucʼ te Diose soc chʼuhumbeya te mandariletic yuʼune, como hich ay spisil te ay ta scuenta spasel te ants-winiquetique» (Eclesiastés 12:13). Jaʼ yuʼun, stalelnanix-a te ya yakʼbotik stseʼelil koʼtantik te ya x-abatinotik ta stojol te Jehová. *

Teme ay sbujtsʼ koʼtantike, ma jaʼuknax lek ya kaʼiy jbatik ta koʼtantik, jaʼnix jich ya jtatik yan lekilaletik. Jich bitʼil, kʼalal sok stseʼelil koʼtantik ya x-abatinotik ta stojol te jTatik manchukme ayotik ta wokol, lek ilbilotik yuʼun (Deuteronomio 16:15; 1 Tesalonicenses 5:16-18). Te smelelil sbujtsʼ-oʼtanile ya yakʼ te ya jpʼajtik te sleel bayal jbiluktik sok jaʼ ya stijbotik koʼtantik te ya x-aʼtejotikxan ta stojol te Wentainel yuʼun te Diose (Mateo 13:44). Te bintik lek ya xlokʼ yuʼune, jaʼ te ya jtatikxan sbujtsʼ koʼtantik, te lekxan ya kaʼiy jbatik sok te jaʼ ya xbajtʼ koʼtantik ta yakʼbeyel stseʼelil yoʼtan te yantike (Hechos 20:35; Filipenses 1:3-5).

Jaʼnix jich teme ya xtoyxan kuʼuntik te sbujtsʼ koʼtantike, maniwan stsakotik bayal chamel yuʼun. Te Biblia jich ya yal: «Ha lequil pox te tseʼel-oʼtanil» (Proverbios 17:22). Jtul doktor yuʼun te Universidad yuʼun Nebraska ta Estados Unidos ay bin la yal te pajal skʼoplal sok te bin ya yal te Bibliae. Jich la yal: «Teme ta ora ini ay stseʼelil awoʼtan sok jun-nax awoʼtan ayat ta akuxlejal, maniwan stsakat bayal chamel ta pajel chaʼbej».

Jich bitʼil la kiltikixe, manchukme yakotik ta kuxinel ta mero yorail wokol, ya xjuʼ ya kaʼiytik te smelelil sbujtsʼ-oʼtanil. Jaʼ yuʼun ya skʼan te ya jkʼopontik Dios, ya jnoptik te Biblia sok te ya jnopilan ta koʼtantik te bin ya yale, jich ya jtatik chʼul espiritu. Jaʼnix jich teme ya jkʼantik te ya xtoyxan te sbujtsʼ koʼtantike yame skʼan ya jnop ta koʼtantik te bendisionetik yakotik ta smulanele, te ya jkʼayinbeytik schʼuunel yoʼtan yantik j-abatetik yuʼun Dios sok te ya jpastik tulan ta spasel te skʼanojel yoʼtan te Jehovae. Jich ya xjuʼ ya jmulantik ta jkuxlejaltik te bin ya yal te Salmo 64:10: «Tseʼel me yoʼtan ta stojol Jehová te machʼa toj yoʼtan soc ha ya smucʼulin yoʼtan».