TE Josué la yichʼ mukʼ yaʼtel te ay wokoliletik ya sitintay yuʼun, jaʼ te ya yikʼ ochel te israeletik ta Kʼinal te albil skʼoplal ya yichʼike. Swenta ya xjuʼ ta pasel yuʼun ya skʼan ya stsal wokoliletik. Pero te Jehová la yalbey ta jamal te lek ya xkʼot ta lokʼel te bin ya spas sok la stijbey yoʼtan te yakuk yakʼ fuersa sok te ayuk yip yoʼtane. Jaʼnix jich la yalbey te akʼa schʼuun spasel te Ley yuʼun sok te akʼa skʼopon ta kʼajkʼal ajkʼabal yuʼun ya xjuʼ ya spas ta lek spisil te bin tsʼibaybil tey-ae. La yalbey ta jamal teme jich ya spase, lek ya xkʼot ta lokʼel bayuk ya xbeen sok te lek ya xkʼot ta lokʼel spisil bintik ya spas (Jos. 1:7, 8).

Ta ora ini kuxulotik ta «yorahil wocol», jaʼ yuʼun jaʼnix jich ya jsitintaytik wokoliletik (2 Tim. 3:1). Pero jichnixme lek ya xkʼootik ta lokʼel bitʼil te Josué teme ya jpastik te bin albot yuʼun Jehová te akʼa spase. Teme jujun kʼajkʼal ya jkʼopontik te Biblia yame xjuʼ ya jtʼuntik te tojobteseletik ya yakʼbotik kʼalal ya jsitintaytik wokolil.

Jaʼukmeto, bayalotik ta tul ma jnaʼtik bitʼil ta snopel jun sok ay machʼaotik-a te ma jmulantike. Pero kʼax tulan skʼoplal te ya jnoptik te Biblia, jaʼ yuʼun lek te ya kiltik bin ya yal te recuadro « Pasa awil ini». Tey ya yal kaʼiytik bin ya xjuʼ ya jpastik yuʼun ayuk swentail ta lek te bitʼil ya jnoptik te sKʼop Dios sok te yakuk jmulantik snopele.

Jtul salmista jich la yal ta kʼayoj: «Tojobtesawon bahel ta sbehlal te mandariletic awuʼun, yuʼun ha ya jmulan» (Sal. 119:35). Jaʼnixme jich ya xjuʼ te bayal ya amulan snopel te sKʼop Diose. Bayalme kʼulejaliletik ya ata bael tey-a kʼalal ya awichʼbeyxan swentail.

Manchukme maba ya awentain jun nasion bitʼil te Josué, ayme wokoliletik te ya asitintay-euke. Jaʼ yuʼun, jich bitʼil te Josué kʼopona te bin tsʼibaybil ta atojol te mero ya skoltayat sok pasame ta akuxlejal. Teme jiche, lekme ya xkʼoat ta lokʼel bayuk ya xbeenat sok lek ya xkʼot ta lokʼel spisil bintik ya apas.