1. ¿Bin yuʼun ya kaltik te jaʼ yuʼun Jehová spisil te bin aye? (Ilawil te lokʼomba ta sjajchibal te articulo).

JAʼ YUʼUN Jehová spisil te bin aye, «te chʼulchan soc te mero toyol chʼulchan, te bahlumilal soc spisil te bintic ay tey a» (Deut. 10:14; Apoc. 4:11). Jich bitʼil te jaʼ la spas te ants winiketike, jaʼnix jich yuʼunotik (Sal. 100:3). Ta spisil te jayeb jaʼbil kʼaxemixe, te Jehová ay machʼatik stsaoj yuʼun jaʼ mero yuʼun ya xkʼot.

2. ¿Machʼatik ya yal te Biblia te jaʼ mero yuʼun ya yil te Jehová?

² Kiltik junuk ejemplo, ta Salmo 135 ya yichʼ alel te machʼatik jun yoʼtanik ta stojol Dios ta namey Israel «ha scʼulejal» kʼot (Sal. 135:4). Jaʼnix jich te j-alwanej Oseas la yal te ay machʼatik te ma israeletik ya x-ochik ta lum yuʼun te Diose (Os. 2:23). Te bin la yal te Oseas kʼot ta pasel kʼalal te Jehová jajch stsa machʼatik ma judioik yuʼun ya yichʼ yaʼtelik ta ajwalil ta chʼulchan sok te Jesuse (Hech. 10:45; Rom. 9:23-26). Te machʼatik la yichʼik tsael la yichʼik biiltesel chʼul nasion sok pueblo yuʼun Dios (1 Ped. 2:9, 10). ¿Jaxan te j-abatetik yuʼun Dios te smukʼulinej yoʼtanik te ya xnainik ta Balumilal? Jaʼnix jich te Jehová ya yal te jaʼ pueblo yuʼun sok «te machʼatic tsahbilic» yuʼun (Is. 65:22).

3. 1) ¿Machʼatik-a te kʼax lek yiloj sbaik sok te Jehová ta ora ini? 2) ¿Bin ya kiltik ta articulo ini?

³ Ta ora ini te «tut jtsohb» tuminchijetik te jaʼ smukʼulinej yoʼtanik te ya xbajtʼik ta chʼulchan sok te «yantic tuminchijetic» te smukʼulinej  yoʼtanik te ya xkuxinik ta Balumilal, «ha jtsohb nax» kʼoemik te jun yakik ta abatinel ta stojol te Jehová (Luc. 12:32; Juan 10:16). Ta melel, ta spisil koʼtantik ya jkʼan ya kalbeytik wokol te Jehová yuʼun te yakʼoj te kʼax lek kiloj jbatik soke. Ta articulo ini yame kiltik chaʼoxchajp bin-utʼil ya xjuʼ ya kalbeytik wokol te Jehová yuʼun te mukʼul majtʼanil-abi.

4. 1) ¿Bin-utʼil ya xjuʼ ya kalbeytik wokol te Jehová ta swenta te ya yakʼ te ya kamigointike? 2) ¿Bin-a te jteb ma pajal sok la spas te Jesuse?

⁴ Jchajp bin-utʼil ya kalbeytik wokol te Jehová, jaʼ te ya kakʼbeytik ta jkʼaxel te jkuxlejaltike. Kʼalal ya kichʼtik jaʼ ya kakʼtik ta ilel ta jamal ta komonsitil te jaʼ yuʼunotikix te Jehová sok te jich jnopoj ta koʼtantik te ya jchʼuunbeytik skʼope (Heb. 12:9). Jteb ma pajal sok te bin la spas te Jesús kʼalal la yichʼ jaʼ, melel jich kʼoem te la yalbey te Jehová: «Ya jmulan spasel te bin ya scʼan awoʼtan, Dios cuʼun» (Sal. 40:7, 8). Manchukme ayin ta nasion te yakʼoj sba ta stojol Jehová, la yichʼ jaʼ swenta ya yakʼ ta ilel te chapal ay ta spasel te skʼanojel yoʼtan te Diose.

5, 6. 1) ¿Bin-utʼil la yaʼiy sba te Jehová kʼalal la yichʼ jaʼ te Jesuse? 2) Ala junuk ejemplo te ya yakʼ ta ilel bin-utʼil ya yaʼiy sba te Jehová kʼalal ya kakʼ jbatik ta stojole.

⁵ ¿Bin-utʼil la yaʼiy sba te Jehová kʼalal la yichʼ jaʼ te Jesuse? Te Biblia jich ya yal: «Laj nax yichʼbel haʼ a te Jesús, locʼ tal ta haʼ, jahm te chʼulchan, soc la yil te Espíritu yuʼun Dios yac ta cohel tal hich te bin utʼil stsuhmut soc luhtsaj ta stojol. Ay cʼop chicnaj ta chʼulchan te hich la yal: Ha Jnichʼan ini te cʼux ta coʼtan, te bayel yutsil coʼtan ta stojol» (Mat. 3:16, 17). Te Jehovae jaʼnanix yuʼun-a te Jesuse, pero kʼalal la yil te stukel yoʼtan la skʼan te jaʼnax ya yakʼ sba ta abatinel ta stojole, kʼax tseʼel yoʼtan la yaʼiy sba yuʼun te Jehová. Jaʼnix jich sok stseʼelil yoʼtan ya yichʼ ta wenta te ya kakʼ jbatik ta stojol, sok yame yakʼbotik bendision yuʼun (Sal. 149:4).

⁶ Kiltik jun ejemplo te ya skoltayotik yuʼun ya xkʼot ta koʼtantik bin-utʼil ya yaʼiy sba te Jehová kʼalal ya kakʼ jbatik ta stojole. Nopa awaʼiy te jtul winik stsʼunoj yixim. Jun buelta te stut yantsil nichʼan ya sjep tal jchʼix ajan sok ya x-akʼbot ta smajtʼan yuʼun. Te ajane jaʼnanix yuʼun-a te tatile. ¿Bin-utʼil-abi te ya yakʼbey ta majtʼan te stat te bin jaʼnix yuʼune? Ta melel, manchukme jaʼnix yuʼun-a te ajan akʼbot yuʼun te stut yantsil nichʼane, ta spisil te ajane, jaʼ lekxan ya yil te ajan kʼebanbote. Jaʼnixme jich te Jehová, kʼax tseʼel yoʼtan ya yaʼiy sba kʼalal ya jtatik ta nopel te jaʼnax ya kakʼ jbatik ta stojole (Éx. 34:14).

7. ¿Bin-utʼil ya skoltayotik te Malaquías ta snaʼel bin ya yaʼiy te Jehová ta stojol te machʼatik sok spisil yoʼtanik ya x-abatinik ta stojol?

⁷ (Kʼopona Malaquías 3:16). Te machʼatik mato yakʼoj sbaik ta stojol Jehová sok mato yichʼojik jaʼ, yame skʼan te ya staik ta nopel te kʼax tulan skʼoplal te jich ya spasike. Ta melel, yuʼunotiknanix-a te Jehová jaʼto tal te la swolotik te jmamatik, jichnix bitʼil te yantikxan ants winiketik ta Balumilale. Jaʼukmeto, te Jehová kʼax tseʼel yoʼtan ya yaʼiy sba kʼalal ya yil te ya kakʼtik ta ilel ta jamal te jich ya kiltik bitʼil Ajwalil kuʼuntik, te jaʼ yuʼun ya kakʼ jbatik ta stojol sok te ya jpasbeytik te skʼanojel yoʼtane (Prov. 23:15). Te Jehová jich kʼoem te ay slibro yuʼun snaʼojibal banti ya stsʼibaybey sbiil te machʼatik sok spisil yoʼtanik ya x-abatinik ta stojol, melel ya yichʼtiklan ta wenta.

8, 9. ¿Bin ya skʼanbey Jehová te machʼatik tsʼibaybil sbiilik ta «libro yuʼun snaʼojibal» te ay yuʼune?

⁸ Teme ya jkʼantik te tsʼibaybil jbiiltik ta «libro yuʼun snaʼojibal» te ay yuʼun te Jehová, yame skʼan te ay bintik ya jpastik. Te Malaquías la yal te ya skʼan ichʼbiluk ta mukʼ kuʼuntik te Jehová sok te ya jnopilan ta koʼtantik te sbiile. Teme yan machʼa ya kichʼtik ta mukʼ o ay bin ya kichʼtik ta mukʼ, te Jehová yame stupʼ jbiiltik ta slibro swenta kuxlejalil (Éx. 32:33; Apoc. 3:5).

 ⁹ Jich yuʼun te yakʼel jbatik ta stojol Jehová, ma jaʼuknax ya skʼan ya yal te ya kalbeytik ta jamal te ya jpasbeytik te skʼanojel yoʼtan sok te ya kichʼtik jaʼ. Jun-nax buelta ya kakʼ jbatik ta stojol Jehová sok jun-nax buelta ya kichʼtik jaʼ, jaʼukmeto jtsʼin-nax stukel te jich ya jpastike. ¿Bin ya skʼan ya yal-abi te kakʼoj jbatik ta stojol te Jehová sok te jaʼ j-abatotik yuʼune? Jaʼ te ya kakʼtik ta ilel sok yaʼtelul te jayeb kʼajkʼal kuxulotik te ya jchʼuunbeytik te skʼope (1 Ped. 4:1, 2).

10. ¿Bin-utʼil ya skʼan ya xchiknaj ta ilel ta jamal te ma pajalik te machʼatik ya x-abatinik ta stojol Jehová sok te machʼatik maʼuke?

¹⁰ Ta yan articulo la kiltik bin la spasik te Caín, Salomón sok te israeletik. Spisil yichʼojik ta mukʼ te Jehová ta skʼopik, pero ma jun yoʼtanik la yakʼ sbaik ta stojol. Te ejemploetik-abi ya yakʼik ta ilel ta jamal te ya skʼan ya spasik tulan ta spasel bin stojil ta pasel te machʼatik jaʼ yuʼun te Jehová soknix ya skʼan ya spʼajik te bin chopole (Rom. 12:9). Ta patil te la yalbey skʼoplal te Malaquías te «libro yuʼun snaʼojibal», te Jehová la yal te «yan yilel te machʼa lec yoʼtan soc te machʼa chopol yoʼtan, te machʼa ya yacʼ sba ta aʼbatinel yuʼun Dios soc te machʼa ma ba ya yacʼ sba ta aʼbatinel yuʼune» (Mal. 3:18).

11. ¿Bin yuʼun ya skʼan te mero chikan ya yil yantik te jaʼnax kakʼoj jbatik ta abatinel ta stojol te Jehová?

¹¹ Te yan bin-utʼil ya kalbeytik wokol te Jehová yuʼun te la stsaotik ta j-abatetik yuʼun, jaʼ te chikanuk ta ilel ta stojol yantik te yakotik ta yakʼbeyel yipal ta spasel te yaʼtel Dios (1 Tim. 4:15; Mat. 5:16). Jaʼ yuʼun jojkʼoybey jbatik: «¿Yabal staik ta ilel te yantik te jkʼaxel jun koʼtan ta stojol te Diose? ¿Yabal jpas tulan yuʼun ya kakʼbey snaʼ te yantik te testigoon yuʼun Jehová?». Te Dios la stsaotik yuʼun ya x-ochotik ta lum yuʼun, jaʼ yuʼun yame smel yoʼtan teme xchebet koʼtantik ta yalbeyel yaʼiy yantik te jaʼ yuʼunotike (Sal. 119:46; kʼopona Marcos 8:38).

12, 13. ¿Bin yuʼun te ay wokol ta tael ta ilel te jaʼik j-abatetik yuʼun Dios chaʼoxtul Testigoetik?

¹² Mel-oʼtantik sba ta alel te ay testigoetik yuʼun Jehová te ya skʼayinik «te espíritu yuʼun bahlumilal», jaʼ yuʼun jteb ma pajalik yilel sok te machʼatik ma x-abatinik ta stojol te Diose (1 Cor. 2:12). Te machʼatik yichʼojik «te espíritu  yuʼun bahlumilal», jaʼ ya xbajtʼ ta yoʼtanik spasel te bin ya skʼan te mulawil bakʼete (Efes. 2:3). Jun ejemplo, manchukme kichʼojtik akʼbeyel bayal tsitsel, ay machʼatik ma lekuk ta ilel te skʼuʼ spakʼ ya slapik sok ma stojiluk te bitʼil ya schajpan sbaike. Ya slapik kʼuʼul pakʼal te kʼax pitsʼil sok te ya yakʼ ta ilel te sbakʼetalike, ay jich ya xkʼotik ta tsoblejetik. Ay yantik te yan-nax ta ilel te bitʼil yakʼojik ta lokʼesel sjolik o chajp ta ilel te bitʼil ya stes sjolike (1 Tim. 2:9, 10). Jaʼ yuʼun, kʼalal ayik ta yolil yantik ants winiketik, wokol ta tael ta ilel te jaʼ j-abatetik yuʼun Dios, melel pajalik yilel sok te machʼatik ayik ta swenta balumilale (Sant. 4:4).

¹³ Ay yantik Testigoetik te ya yakʼik ta ilel te ma jilem yuʼunik ta jkʼaxel taleliletik yuʼun te balumilale. Jich bitʼil, kʼalal ya xbajtʼik ta convivio, ma stalel j-abatetik yuʼun Dios ya yakʼik ta ilel sok jkʼaxel ma lekukix ta ilel te bitʼil ya x-ajkʼotajike. Ya smoesik ta Internet sfotoik, sok yan-nax te bin ya stsʼibayik tey-a te ma snujpʼuk jich ya spas te machʼa lek ay te schʼuunel yoʼtane. Maniwan spasojik tulan mulil yuʼun ya yichʼik akʼbeyel tulan tojobtesel, pero ya yutsʼinbey yoʼtanik te machʼatik yakik ta spasel tulan ta yakʼel ta ilel lekil talelil (kʼopona 1 Pedro 2:11, 12).

14. ¿Bin ya xjuʼ ya jpastik yuʼun ya jkanantaytik te bitʼil kamigoinej jbatik sok te Jehová te ma biluknaxe?

¹⁴ Te balumilal ya stijbey yoʼtan te ants winiketik te jaʼuk ya xbajtʼ ta yoʼtanik «te bin ya smulan te baqʼuet scuenta mulil, te bin ya smulan yilel te jsitic, soc te toybahil» (1 Juan 2:16). Pero te joʼotik yuʼunotik te Jehová, jaʼ yuʼun ya spasotik ta mantal te «yacuc xhil cuʼuntic spisil bintic chopol soc bintic mulantic sba ta pasel ta bahlumilal, te tsahtaybiluc coʼtantic ya xʼayinotic ta ora ini» (Tito 2:12). Ta swenta jkʼoptik, jtaleltik ta swenta te weʼel uchʼel, jkʼuʼ jpakʼtik, bin yilel ya jchajpan jbatik sok bin yilel ya x-aʼtejotik ya skʼan chikanuk ta ilel te jaʼnax kakʼoj jbatik ta abatinel ta stojol Jehová, ta melel ya skʼan te jichuknix ta spisil te bin ya jpastik ta jkuxlejaltik (kʼopona 1 Corintios 10:31, 32).

15. ¿Bin yuʼun ya skʼan te ya kakʼtik ta ilel slekil sok skʼuxul koʼtantik ta stojol te hermanoetike?

¹⁵ Jaʼnix jich ya xchiknaj ta ilel te ya kaltik wokol yuʼun te kamigoinej jbatik sok te  Jehová ta swenta te jtaleltik ta stojol te hermanoetike te jaʼnix jich yuʼun te Diose. Teme maʼyuk bin-ora ya xchʼay ta koʼtantik-abi, spisil-ora ya kakʼbeytik yil te slekil sok skʼuxul koʼtantik (1 Tes. 5:15). Te Jesús jich la yalbey te machʼatik ya xtʼunot yuʼune: «Hich ya snaʼic spisil ants-winiquetic te haʼex jnopojelex cuʼun teme talel cʼaxel cʼux yac awaʼiy aba ta awoʼtanique» (Juan 13:35).

16. ¿Bin ejemplo ta Ley yuʼun Moisés ya skoltayotik ta snaʼel te mero ya skʼuxultayotik te Jehová?

¹⁶ Kiltik jun ejemplo ta Ley yuʼun Moisés te ya skoltayotik ta snaʼel bin-utʼil ya skʼan ya kil jbatik sok te hermanoetike. Spisil te aʼtejibaletik te ayik ta templo parte akʼbilik o jaʼnax ya yichʼik tuuntesel ta yichʼel ta mukʼ te Jehová. Te Ley yuʼun Moisés ya yal ta jamal bin-utʼil ya skʼan kʼuxultayel, teme ay machʼa ma jichuk ya spas bitʼil ya yal te ley ya yichʼ milel (Núm. 1:50, 51). Teme jich la yakʼ ta kʼuxultayel te Jehová te biluketik te ya yichʼ tuuntesel ta yichʼel ta mukʼ, ¿mabal jichuk te kʼaxtoxan ya skʼuxultay te j-abatetik yuʼun te yakʼoj sbaik ta stojol sok te jun yoʼtanike? Ta melel, bayal jkʼoplaltik ta yoʼtan Jehová, jich la yakʼ jnaʼtik kʼalal la yal: «Te machʼa ya spiquex, hich cʼohem te ya spicbe schʼuhlel jsit» (Zac. 2:8).

17. ¿Bintik-a te ya yichʼ ta wenta Jehová o te ay skʼoplal ta yoʼtane?

¹⁷ Te Malaquías la yal te ichʼbil ta wenta yuʼun Jehová kʼalal ya sjokin sbaik te j-abatetik yuʼun sok ya schʼam yaʼiy bin ya yalbey sbaik (Mal. 3:16). Ta melel, te Jehová «ya snaʼbe sba te machʼatic yuʼune» (2 Tim. 2:19). Bayal skʼoplal ta yoʼtan snaʼel sok yilel spisil te bin ya jpastik sok ya kaltik (Heb. 4:13). Kʼalal ma lekuk koʼtantik ta stojol te hermanoetik, yame yil te Jehová. Pero jaʼnixme jich ya xjuʼ ya jchʼuuntik sok spisil koʼtantik te ay skʼoplal ta yoʼtan kʼalal talel kʼaxel ya jpasbey jbatik perdon sok ya kikʼ jbatik ochel ta jnatik, ya kakʼbey jba kiltik yutsil koʼtantik sok slekil koʼtantik (Heb. 13:16; 1 Ped. 4:8, 9).

18. ¿Bin-utʼil ya kalbeytik wokol Jehová yuʼun te la yakʼ ochukotik ta lum yuʼun te jaʼ mukʼul majtʼanile?

¹⁸ Ta melel jich koʼtantik te ya jkʼan ya kakʼbeytik yil Jehová te ya kalbeytik wokol yuʼun te la yakʼ ochukotik ta lum yuʼune te jaʼ mukʼul majtʼanile. Jnaʼojtik te jaʼ te bin lekxan la jtatik ta nopel spasel te la kakʼ jbatik ta stojole. Manchukme kuxulotik «ta yohlil te caj tsʼumbalil ini te chopol soc bohl» ma jkʼantik te ay bin ya sutotik ta kʼop yuʼun te ants winiketik sok te ay jmultike, jaʼ ya jkʼantik te jich ya kakʼtik ta ilel sakal kʼinal «ta bahlumilal te bin utʼil eqʼuetic ta yohlilic» (Filip. 2:15). Ya skʼan ya jpastik tulan ta spʼajel spisil te bin chopol ya yil te Jehová (Sant. 4:7). Kʼux ta koʼtantik sok ichʼbil ta mukʼ kuʼuntik te kermanotaktik, melel kʼoem ta koʼtantik te jaʼ yuʼun-euk te Jehová (Rom. 12:10).

19. ¿Bin-utʼil ya smajtʼantes Jehová te machʼatik jaʼ yuʼune?

¹⁹ Te Biblia jich ya yalbotik ta jamal: «Te Jehová ma ba ya spihtes te pueblo yuʼun» (Sal. 94:14). Chikan bin ya xkʼot ta pasel mananix ya spijtesotik-a te Jehová. Manchukme ya xlajotik, ma jaʼuk yuʼun ma kʼuxotikix ta yoʼtan te Diose (Rom. 8:38, 39). «Teme cuxulotic, ha ta scuenta Cajwaltic [Jehová] te cuxulotic; teme ya xchamotic, ha ta scuenta Cajwaltic te ya xchamotique. Ha yuʼun teme cuxulotic o teme ya xchamotic, ha yuʼunotic te Cajwaltique» (Rom. 14:8). Koʼtantik te ya staix yorail te ya schaʼkuxajtes Jehová spisil te yamigotak te jun yoʼtan yakʼoj sbaik ta stojol te kʼalal lajik baele (Mat. 22:32). Ta ora ini, yakotikix ta smulanel bayal bendisionetik. Yuʼun-nix jich-a te bin ya yal te Biblia: «Bayel me yutsil te nación te ha Dios yuʼun te Jehová, ha te pueblo te la stsa te ha yuʼun ya xcʼoht» (Sal. 33:12).