AYWANIX 2 mil jaʼbil te jich la yal te Jesuse: «Bayel te sit awal-tsʼunubil, pero mayuc tsobol te jʼaʼteletique. Ha yuʼun cʼambeyahic te Yajwal awal-tsʼunubil te yacuc sticonlan jʼaʼteletic ta stsobel» (Luc. 10:2). Te bin la yale, jich yak ta kʼoel ta pasel ta Myanmar ta ora ini. ¿Bin yuʼun jich ya kaltik? Melel ta Myanmar jaʼnax ay 4,200 jcholkʼopetik te ya scholik te lek yachʼil kʼop yuʼun te Wentainel yuʼun Dios ta stojol 55 miyon ta tul ants winiketik.

Pero te Jehová, jaʼ te «Yajwal awal-tsʼunubil», stijbeyoj yoʼtan bayal ta cien hermanoetik te yanyantik slumalik yuʼun ya xbajtʼik ta Myanmar te ay ta sureste yuʼun Asia ta stsobel te awal tsʼunubil ta swenta skʼop Dios. ¿Bin tijbot yoʼtanik ta yijkʼitayel te snasionike? ¿Bin la spasik yuʼun ya xbajtʼik? ¿Bin bendisionetik yakik ta smulanel? Yame kiltik.

Ta Japón jtul precursor te Kazuhiro sbiil ayix tal cheʼoxeb jaʼbil akʼbot tupul ikʼ, chʼay yoʼtan, toj bael ta hospital yuʼun. Te doktor la yalbey te ma xjuʼ ya stij karro cheb jaʼbil. Te Kazuhiro ma schʼuun ya yaʼiy, jich la snop yuʼun: «¿Bin ya jpasix-abi? Te bin ya jmulanxane jaʼ te precursorone, ma jkʼan ya kijkʼitay». La skʼanbey Jehová sok spisil yoʼtan te yakuk xjambot sbe yuʼun ma skejchan te abatinel ta precursor.

Te Kazuhiro ya yal kaʼiytik: «Jun u ta patil, jtul kamigo te baem ta abatinel ta Myanmar la yaʼiy te bin kʼot ta jtojole. La skʼoponon tal, jich la yalbon: “Ta Myanmar jaʼ mero ya stuuntesik ta beel te autobus. Teme ya xtalat, ya xjuʼ x-abatinat ta precursor, ma puersauk ay akarro”. Jaʼ yuʼun la jojkʼoybey te doktor teme ya xjuʼ xboon ta nainel ta Myanmar jich bitʼil ayon ta chamele. Jich la sutbon: “Ay jtul doktor neurólogo te jaʼ slumal Myanmar te talem ta paxial liʼ ta Japón. Ya kakʼbat anaʼbey sba. Teme ya schaʼtsakat tupul ikʼ, jaʼme ya xjuʼ ya yilat”. Ma jichuk jmaliyoj-a te bin la yalbone. Jich la sutbon jkʼop la kaʼiy te Jehová».

Ta oranax te Kazuhiro la stikun jun correo electrónico ta Betel yuʼun Myanmar te banti la yakʼ ta naʼel te yoʼtan ya xbajtʼ ta abatinel ta precursor tey-a sok te yinam te Mari sbiile. Joʼebnax kʼajkʼal ta patil akʼbotik sujtib yuʼun Betel, jich la yal talel: «Laʼik, ya jkʼantikxan precursoretik». Te Kazuhiro sok te yinam la schonik te karroetik yuʼunik, la schajpan sjunik sok la sman sboletoik yuʼun abion. Ta ora ini ayik ta abatinel ta grupo yuʼun kʼopil seña ta Mandalay, tseʼel yoʼtanik tey-a. Te Kazuhiro ya yal: «Ta swenta spisil te bin kilojtik ta jkuxlejaltike, ya schʼuunxan koʼtantik te bin ya yal te Salmo 37:5: “Acʼa ta stojol Jehová te be awuʼun, ha acʼa smucʼulin awoʼtan, hich ya spas te bin ya scʼan pasele”».

Ta 2014, te testigoetik yuʼun Jehová ta Myanmar ay bin kʼax tʼujbil la staik, tey la yichʼ pasel jun mukʼul tsoblej espesial. Bayal hermanoetik te talemik ta yantik nasion kʼotik ta mukʼul tsoblej. Te Monique te jaʼ jtul hermana te 34 yaʼbilal te Estados Unidos slumal kʼot-euk. Jich ya yal: «Kʼalal sujton ta mukʼul tsobleje la jkʼopon te Jehová ta swenta te bin ya xjuʼ ya jpas ta jkuxlejal. Jaʼnix jich la kalbey yaʼiy te jmeʼ jtat te bin koʼtanuk ya jpase. Koxebalkotik lek ya kiltik te ya xboon ta abatinel ta Myanmar. Pero swenta ya jta ta nopel te ya xboone, nail bayal la jkʼopon Dios yuʼun sok la jmaliy kʼaxuk jtebuk tiempo». ¿Bin yuʼun jich la spas? Jaʼnix ya yalbotik.

Te Monique jich ya yal kaʼiytik: «Te Jesús la yalbey te jnopojeletik yuʼun te kʼalal ay bin ya spasike te nailuk akʼa yilik teme tikʼ ya xlokʼik-a sok te stakʼinike. Jaʼ yuʼun, jich la jojkʼoybey jba: “Swenta ya xjuʼ xboon tey-a, ¿tikʼbal-a te takʼin ay kuʼune? ¿Yabal xjuʼ jtabel te bin ya xtuun kuʼun tey-a te ma jaʼuk ya xkʼax-xan jtiempo ta aʼtele?”». Te Monique jich ya yal ta jamal: «Ta oranax la jta ta ilel te mato ayuk kuʼun te takʼin ya skʼan yuʼun ya xjuʼ jbael ta yan sjejchelul te Balumilale». ¿Bin la spasix-abi yuʼun ya xbajtʼ? (Luc. 14:28).

Jich ya yalxan kaʼiytik: «Jun buelta te jpatrona la yalbon te bajtʼuk jkʼopone. Mero la jxiʼ, la jkuy te ya slokʼeson ta kaʼtele. Pero, ma jichuk la spas, la yalbon wokol yuʼun te lek aʼtejemone sok la yalbon te ya kichʼ akʼbeyel jtebuk takʼin ta majtʼan. Tikʼ la jtoj jbet-a sok te takʼin la yakʼbonike».

Te Monique jaʼto tal ta diciembre yuʼun 2014 nainem ta Myanmar. ¿Bin-utʼil ya yaʼiy sba te ay ta jun lugar te banti maʼyuk tsobol jcholkʼopetike? Jich ya yal kaʼiytik: «Kʼax tseʼel koʼtan te liʼ ayone. Ay oxtul machʼa ya kakʼbey nojptesel yuʼun Biblia, jtul jaʼ ants te ayix 67 yaʼbilal te mero tseʼel yoʼtan te jujun buelta ya xkʼoon ta sna sok te ya spetone. Kʼalal la snaʼ te jaʼ Jehová sbiil te Diose jajch ta lokʼel yalel sit yuʼun. Jich la yalbon: “Jaʼ sbabial buelta te ya kaʼiy sbiil te Diose. Te jaʼate pekʼelxan awaʼbilal te bitʼil te joʼone, pero la awakʼbon jnop te bin bayalxan skʼoplal jnopoj ta jkuxlejale”. Te joʼone jaʼnix jich okʼon. Te bin kʼax lek ya xkʼax kuʼun liʼi jich bitʼil ini ya yakʼ te kʼax tseʼel koʼtan yuʼun te ayon ta abatinel ta jun lugar te banti bayalto aʼtelil ya skʼan pasel». Mato jaluk te Monique kʼot ta Pʼijubtesel ta swenta te Machʼatik yaʼtelinejik scholel skʼop Dios.

Jaʼnix jich ta swenta te bin la yichʼ alel yuʼun Myanmar ta Anuario de los testigos de Jehová 2013 ay machʼatik tijbot yoʼtanik yuʼun ya xbajtʼik tey-a. Jtul hermana te treintaniwan yaʼbilal te Li sbiil nainem-a ta sureste yuʼun Asia sok maba jochol yuʼun te yaʼtele, pero kʼalal la skʼopon te Anuario tijbot yoʼtan yuʼun ya xbajtʼ ta Myanmar. Jich ya yal kaʼiytik: «Kʼalal kʼoon ta mukʼul tsoblej espesial ta Yangón ta 2014, la jnaʼbey sba jtul hermano sok yinam te ayik ta abatinel ta kʼopil chino ta Myanmar. Te joʼone ya jnaʼ chino, jaʼ yuʼun la jnop te ya xboon ta Myanmar yuʼun ya x-abatinon ta kʼopil-abi. Joʼon sok te Monique la jnoptik te ya xjilotik ta abatinel ta Mandalay. Te Jehová la yakʼbotik bendision, melel la jtatik aʼtel ta maestra ta jun eskuela, te aʼtelile maba schʼixil kʼajkʼal sok la jta jnatik nopolnax tey-a. Manchukme mero kʼux kʼajkʼal sok ay yantik wokolil, mero ya jmulan te yakon ta abatinel liʼi. Te ants winiketik ta Myanmar maʼyuk lek sbilukik, lek yoʼtanik sok ya smulanik yaʼiyel te skʼop Diose. Kʼax bayal yutsil ta ilel bin-utʼil lek ya xkʼot ta lokʼel yuʼun Jehová te scholel skʼop Diose. Jchʼuunej sok spisil koʼtan te jich ya skʼan te Jehová te liʼ ayon ta abatinel ta stojol ta Mandalay».

Bayal hermanoetik te ayik ta abatinel te banti bayalto aʼtelil ya skʼan pasel, yiloj ta skuxlejalik te ay yuʼel te skʼoponel te Diose. Te Jumpei sok te yinam te Nao sbiil kʼaxemix ta 30 yaʼbilalik, ta nail tal ya x-abatinik ta jun kongregasion ta kʼopil seña ta Japón. ¿Bin yuʼun bajtʼik ta Myanmar? Te Jumpei ya yal kaʼiytik: «Jchebaltik jichnanix ya skʼan koʼtantik te ya xbootik ta abatinel ta yan nasion. Jtul hermano ta jkongregasiontik  ta kʼopil seña bajtʼ ta abatinel ta Myanmar. Jaʼnix jich te joʼotik bootik ta mayo ta jaʼbil 2010, manchukme maʼyuk lek jtakʼintik jkʼejojtik-a. Tseʼelnax yoʼtanik te hermanoetik yuʼun Myanmar kʼalal kʼootike». ¿Bin staoj ta ilel te Jumpei ta swenta te scholel skʼop Dios tey-a? Jich ya yal: «Mero ya smulanik te ants winiketik te bin ya jcholbeytik yaʼiyike. Kʼalal te jkojkʼchikinetik ya yilik te videoetik te ayik ta kʼopil seña, xchamnax yoʼtanik yuʼun. Mero lek ya kaʼiy jbatik yuʼun te talotike».

¿Bin spasojik te Jumpei sok te Nao yuʼun ya xjuʼ xnainik tey-a? Te Jumpei jich ya yal: «Ta yoxebal jaʼbil tey ayotik-a, laj te takʼin jkʼejojtike, jich maʼyukix bin ya jtojtik-a te renta ta yan jaʼbile. Mero la jkʼopontik Jehová yuʼun. Ay bin la jtatik te ma jmaliyojtike, la kichʼtik ikʼel yuʼun te Betel swenta ya x-ochotik ta precursor espesial jun tiempo. La kakʼtik schʼuunel koʼtantik ta stojol te Jehová, maba la yijkʼitayotik. Spisil-ora skanantayejotik». Mato jaluk te Jumpei sok te Nao kʼotik ta Pʼijubtesel ta swenta te Machʼatik yaʼtelinejik scholel skʼop Dios.

Te Simone te 43 yaʼbilal te jaʼ slumal Italia sok te yinam te Anna sbiil te 37 yaʼbilal te jaʼ slumal Nueva Zelanda, bajtʼik ta Myanmar. ¿Bin yuʼun te bajtʼike? Te Anna ya yalbotik: «Jaʼ la stijbotik koʼtantik te Anuario yuʼun 2013 te la yalbey skʼoplal Myanmar». Te Simone jich ya yal kaʼiytik-euk: «Kʼax bayal yutsil te ayotik ta Myanmar. Ma puersauk te ay bayal jbiluktik liʼi, jich bayalxan tiempo ya jtuuntes ta stojol te Jehová. Mero yan ta ilel bin-utʼil ya skanantayotik te Jehová te kʼalal ayotik ta abatinel ta jun lugar te banti maʼyuk bayal jcholkʼopetike» (Sal. 121:5). Te Anna jich ya yalxan: «Maʼyuk bin-ora jich tseʼel koʼtan bitʼil ta ora ini. Maʼyuk bayal jbiluk sok jteb ma spisil-ora jokinej te jmamlale, mero jun kʼoemotik yuʼun. Jaʼnix jich jtaojtik bayal kamigotik. Te ants winiketik maʼyuk bin chopol ya yalik ta stojol te Testigoetik, kʼax chikan ta ilel te bayal skʼoplal ta yoʼtanik snaʼbeyel skʼoplal te smelelil kʼope». Yame kiltik bin yuʼun te jich ya yale.

Te Anna ya schol kaʼiytik: «Jun buelta ta merkado la jcholbey skʼop Dios jtul achʼix te ochem ta universidad, la kalbey te ya xbajtʼ kulaʼtaye. Kʼalal kʼot kile, la yikʼ tal jtul yamiga ta sna. Ta schebal buelta kʼoone la yikʼ tal yantikxan. Ta patil, jich la schaʼpas. Ta ora ini, joʼtulik yakon ta yakʼbeyel nojptesel yuʼun skʼop Dios». Te Simone ya yal: «Ya schʼam yaʼiyik ta lek te bin ya kalbeytike sok bayal bin ya sjojkʼoyik. Bayal skʼoplal ta yoʼtanik te skʼop Diose. Ta melel, maba ya xlokʼotik ta tiempo ta yilel spisil te ants winiketike».

Kiltik bin la spasik chaʼoxtul hermanoetik te kʼalal mato xbajtʼik ta Myanmar. Te Mizuho te Japón slumal ya yal: «Joʼon sok te jmamlal te Sachio sbiil jichnanix koʼtantik te ya jkʼan ya xbootik ta jun nasion te banti maʼyuk bayal jcholkʼopetik, pero ma jnaʼkotik banti ya xjuʼ xbootik. Te tʼujbil experienciaetik lokʼ ta Anuario yuʼun 2013 la stijbotik koʼtantik. Jaʼ yuʼun och jnoptik te ya xbootik ta abatinel ta Myanmar». Te Sachio ya yalxan: «Te bin la jpastike, jaʼ te bootik jun semana ta  Yangón, te jaʼ jpam lum te naʼbilxan sba ta Myanmar. Jich kʼoem te ya jkʼan ya jtsajtay kiltik nailuk te kʼinale. Te bin la kiltik ta jun-nax semana la yakʼ kiltik te ya skʼan ya xtalotik ta Myanmar».

Te Rodney sok te yinam te Jane sbiil te cincuentaniwan yaʼbilalik jaʼ slumalik Australia, yakik ta abatinel sok te chaʼtul yal snichʼnabik te Jordan sok Danica sbiilik ta Myanmar jaʼto tal ta 2010. Te Rodney ya yal: «La stij koʼtantik kʼalal la kiltik te yoʼtan ya snaʼbeyik sba Dios te ants winiketik. Ya jtijbey yoʼtan te familiaetik te yakuk spasik tulan te ya xbajtʼik ta abatinel ta jun nasion jich bitʼil te Myanmar». ¿Bin yuʼun jich ya yal? Jaʼnix ya yal kaʼiytik: «Ta melel, maʼyuk bin ya spaj te bendisionetik jtaojtik liʼi. Bayal achʼix keremetik baem yoʼtanik ta snaʼulanel selularik, skarroik, yaʼtelik o yan bin-a. Yan stukel te kal jnichʼnabtik baem yoʼtanik ta snopel yachʼil kʼopetik yuʼun ya xjuʼ ya scholik skʼop Dios. Yoʼtan ya skoltayik te ants winiketik yuʼun ya xkʼot ta yoʼtanik te skʼop Dios, jaʼnix jich yoʼtan ya yakʼik komentario ta tsoblejetik. Jaʼ baem yoʼtanik-a soknix ta spasel yantik tʼujbil aʼteliletik ta stojol Jehová».

Te Oliver jaʼ jtul hermano te 37 yaʼbilal te Estados Unidos slumal. Te hermano ya yalbotik bin yuʼun ya stijbey yoʼtan yantik yuʼun ya xbajtʼik ta abatinel ta yan nasion. Jich ya yal: «Ta jna maʼyuk bin ya spasbon falta ya kaʼiy, pero te bitʼil lokʼon baele, mero skoltayejon. Ta skaj te ayon ta nainel ta yan lugar yichʼoj yip te schʼuunel koʼtan sok skoltayejon yuʼun ya smukʼulin koʼtan Jehová ta spisil te bin ya xkʼax ta jkuxlejale. Yakon ta abatinel sok hermanoetik te ma jnaʼbeyoj sba-ae, pero kʼalal ya kil te pajal schʼuunel koʼtan soke, yakʼojbon kil te maʼyuk yan bin kʼax mukʼ skʼoplal bitʼil te Wentainel yuʼun te Diose». Ta ora ini te Oliver sok te yinam te Anna sbiil yakikto ta scholel skʼop Dios sok sbujtsʼ yoʼtanik ta stojol te ants winiketik te ya xkʼopojik ta chino.

Te Trazel jaʼ jtul hermana te 52 yaʼbilal te Australia slumal, jaʼto tal ta 2004 ay ta abatinel ta Myanmar, jich ya yal: «Spisil te machʼatik ya xjuʼ yuʼunike, ya kalbey yaʼiyik te yakuk xbajtʼik ta abatinel ta jun lugar te banti maʼyuk lek jcholkʼopetike. Jtaojix ta ilel te ya yakʼbey bendision Jehová te machʼa ya spas tulan ta abatinel ta stojole. Ma jichuk jnopoj-a te ya xkʼot te jkuxlejale. Ta melel, maʼyuk yan bin-utʼil ta mulanelxan te kuxlejalile».

Ayme bin ya jkʼantik te ya stijbat awoʼtan ta spasel te bin la yalik te hermanoetike, jaʼ te ya awil teme ya xjuʼ xbaat ta skoltayel te ants winiketik te yoʼtan ya snaʼbeyik sba Jehová ta lugaretik banti maba cholbil te skʼop Diose. Jich kʼoem te jich yak yalbelat te hermanoetik te yakik ta abatinel ta lugaretik te banti maʼyuk bayal jchol kʼopetik: «¡Laʼ ta Myanmar, koltayawonkotik!».