1, 2. 1) Jich bitʼil la yal ta mantal te Jesús ta Mateo 28:18-20, ¿bin aʼtelil kʼax tulan skʼoplal ay ta swenta spasel te kongregasion? 2) ¿Bintik jojkʼoyel ya kakʼbeytik sujtib ta artikulo ini?

TE JPUK-KʼOPETIK kʼax tseʼelniwan yoʼtanik kʼalal la stsob sbaik ta yeʼtal wits. Kʼalal chaʼkuxajemix-a te Jesús la yaltiklanbey te yakuk yil sbaik tey-ae (Mat. 28:16). Jaʼniwan-abi te kʼalal «la yacʼ sba ta ilel yuʼun cʼaxem ta hoʼwinic schaʼbahcʼ (500) ta tuhl quermanotactic ta junax buelta» (1 Cor. 15:6). ¿Bin yuʼun la stsobtiklan Jesús te jnopojeletik yuʼune? Yuʼun ya yakʼbey te tʼujbil aʼtelil ini: «Bahanic, otsesahic ta jnopojel spisil te nacionetic» (kʼopona Mateo 28:18-20).

² Te machʼatik la yaʼiyik te bin la yal te Jesús ochik ta kongregasion ta sbabial siglo. Te aʼtel te kʼax tulan skʼoplal ya spasike, jaʼ te ya yotsesikxan jnopojeletik yuʼun Cristo. * Ta kʼajkʼal ini, ta swolol Balumilal ay bayal kongregasionetik yuʼun te smelelil jchʼuunjeletike. Sok yakal spasbelik-euk te aʼtel te kʼax mukʼ skʼoplale. Ta artikulo ini ya kakʼbeytik sujtib te chaneb jojkʼoyeletik ini: ¿Bin yuʼun kʼax mukʼ skʼoplal te ya kotsestik jnopojeletike? ¿Bin smakoj te aʼtelil ini? ¿Aybal bitʼil ya xkoltaywanik te jchʼuunjeletik ta spasel te aʼtelil ini? ¿Bin yuʼun ma skʼan ya xlujbotik ta ora kʼalal ya jpastik te aʼtelil ini?

3. Jich bitʼil ya yal Juan 14:6 sok 17:3, ¿bin yuʼun jaʼ jun aʼtelil te kʼax mukʼ skʼoplal te yotsesel jnopojeletike?

³ ¿Bin yuʼun jaʼ jun aʼtelil te kʼax mukʼ skʼoplal te yotsesel jnopojeletike? Mukʼ skʼoplal, melel jaʼnax te machʼatik ya stʼunik te  Cristo ya xjuʼ ya yamigoinik te Diose. Jaʼnix jich, lek ya xkuxinik ta ora ini sok ya smaliyik te ya xkuxinik sbajtʼelkʼinal ta pajel chaʼbej (kʼopona Juan 14:6; 17:3). Ta melel, kʼax mukʼ te aʼtel yakʼojbotik te Jesuse, pero maba jtukel ayotik. Kʼalal te jpuk-kʼop Pablo la yalbey sba skʼoplal sok la yalbey skʼoplal yantik jchʼuunjeletik, jich la yal: «Te hoʼotcotic joc jbahcotic ta aʼtel soc Dios» (1 Cor. 3:9). Te Jehová sok Cristo yakʼojbotik te jmulawil ants winikotik jun mukʼul majtʼanil.

4. ¿Bin ya jnoptik ta swenta te bin kʼax ta stojol te Iván sok Matilde?

⁴ Te yotsesel jnopojeletik ya xjuʼ ya yakʼbotik bayal stseʼelil koʼtantik. Kiltik te bin kʼax ta stojol te Iván sok te yinam te Matilde sbiil te kuxulik ta Colombia. La scholbeyik skʼop Dios jtul kerem te Davier sbiil, te jich albotike: «Ya jkʼan ya jeltay jkuxlejal, pero ma xjuʼ kuʼun». Te Davier jaʼ jtul boxeador-a te ya stuuntes droga sok bayal ya xyakub. Jaʼnix jich, kuxinem sok-a te Érika te jaʼ slekole. Te Iván jich ya yal: «Jajch kulaʼtaykotik ta namal pueblo banti naineme. Bayal ora ya skʼan ya xbeenotik ta bisikleta ta ajchʼaleltik. Kʼalal te Érika la yil te jelon stalel sok spensar te Davier, jajch snop-euk te Bibliae». Te kʼalal kʼax bael te tiempo, te kerem ini la yijkʼitay te droga, te trago sok te boxe. Jaʼnix jich nujpun sok te slekole. Te Matilde jich ya yal: «Kʼalal la yichʼik jaʼ ta 2016 te Davier sok Érika, jul ta koʼtankotik te jich la yal-ae: “Ya jkʼan ya jeltay jtalel, pero ma xjuʼ kuʼun”. Okʼotik yuʼun». Chikan ta ilel te ya kaʼiytik bayal tseʼel-oʼtanil kʼalal ay machʼa ya jkoltaytik ta stʼunel te Cristoe.

5. ¿Bin-a te nail ya skʼan pasel swenta ya kotsestik jnopojeletik?

⁵ Te bin nail ya skʼan pasele, jaʼ te ya jletik te machʼatik ya skʼan ya snaʼbeyik sba te Jehovae (Mat. 10:11). Ya kakʼtik ta ilel te smelelil testigootik yuʼun Jehová teme ya jkʼopontik spisil te ants winiketik ya jtatike. Sok ya kakʼtik ta ilel te smelelil jchʼuunjelotik yuʼun Cristo teme ya jchʼuuntik te mantal la yakʼ te Jesús te ya jcholtik skʼop Diose.

6. ¿Bin ya skoltayotik swenta ay bin lek ya xlokʼ kuʼuntik kʼalal ya jcholtik skʼop Dios?

⁶ Ay machʼatik ya skʼan ya snopik te smelelil kʼop ay ta Bibliae. Pero ay yantik te maʼyuk skʼoplal ta yoʼtanik ta sjajchibal, jaʼ yuʼun yaniwan skʼan ya jtijbeytik yoʼtanik. Swenta ay bin lek ya xlokʼ-a te kʼalal ya jcholtik skʼop Diose, ya skʼan ya jnaʼtik ta lek te bin ya kaltike. Jtsatik temaetik te yaniwan xtijbot yoʼtan te ants winiketik sok jnoptik bin-utʼil ya jcholbeytik skʼoplal ta lek.

7. 1) ¿Bin-utʼil ya xjuʼ ya jachtik te kaʼiyejtike? 2) ¿Bin yuʼun ya awal te mukʼ skʼoplal te ya jchʼam kaʼiytik te bin ya yal te ants winiketik sok te ya kichʼtik ta mukʼe?

⁷ Yaniwan xjuʼ jich ya kaltik: «Ya jkʼan ya jnaʼ bin ya awal ta swenta te tema ini. Ta kʼajkʼal ini, bayuk banti ya jsitintaytik bayal wokolil. ¿Yabal awal te ya skʼan ayuk jun gobierno te ya swentain swolol Balumilal yuʼun ya schajpan te wokoliletike?». Ta patil ya xjuʼ ya jkʼopontik sok ya jcholbeytik skʼoplal te Daniel 2:44. O yaniwan xjuʼ ya kaltik: «Ay bin ya jkʼan ya jojkʼoybat. ¿Bin ya xkoltaywan ya awal ta spʼijubtesel ta lek te alnichʼanetike?». Ta patil ya xjuʼ ya kilbeytik skʼoplal te Deuteronomio 6:6, 7. Chikan bin tema ya jtsatik, jpastik pensar ta stojol te ants winiketik te ya xbajtʼ jkʼopontike. Jnop kaʼiytik bin-utʼil ya xkoltayotik snopel te bin ya yal ta smelelil te Bibliae. Kʼalal ya xkʼopojotik sok te ants winiketik, mukʼ skʼoplal te ya jchʼam kaʼiytik te bin ya yalik sok te ya kichʼtik ta mukʼ te bin ya snopike. Teme jich ya jpastike, ya xkʼotxan ta koʼtantik sok jichniwan ya schʼam yaʼiyik te bin ya jcholbeytike.

8. ¿Bin yuʼun ma skʼan ya xlujbotik ta spasel rebisitaetik?

⁸ Te kʼalal jtul ants winik mato staoj ta nopel  te ya snop te Bibliae, yaniwan skʼan ya kakʼtik bayal tiempo sok ya jpastik tulan ta yulaʼtayel bayal buelta. ¿Bin yuʼun? Ta sbabial, jaʼ yuʼun te maniwan nakal-a te kʼalal ya xchaʼsujt kiltik o maniwan jochol-a. Jaʼnix jich, bayalniwan buelta ya skʼan ya kulaʼtaytik swenta lek ya yilotik sok te jich ya skʼan te ya kakʼbeytik kurso yuʼun Bibliae. Juluk ta koʼtantik te ya xchʼi jpejt nichim teme ya kakʼbeytik yaʼlel bayal bueltae. Pajal sok te ants winiketike, jaʼ ya xchʼi te skʼuxul yoʼtanik ta stojol te Jehová sok Cristo teme bayal buelta ya jcholbeytik te sKʼop Diose.

9, 10. ¿Bin yuʼun ya kaltik te jpisiltik te jcholkʼopotik ya xkoltaywanotik ta stael te machʼatik lek yoʼtanike?

⁹ Spisil te jcholkʼopotike, ya xkoltaywanotik ta stael te ants winiketik te lek yoʼtanike. Te kaʼteltike jaʼ pajal sok te sleel jtul chʼin kerem te chʼayeme. ¿Bin yuʼun pajal sok? Kiltik jun ejemplo te kʼot ta pasele. Swenta ya sleik jtul chʼin kerem te oxeb yaʼbilale, ayniwan 500 ta tul koltaywanik. Veinte ora schʼayel-a te chʼin kereme, jtul te machʼa yakal ta sleel, la sta ta kʼaltik. Pero ma la skʼan te stukelnax lek ya x-albot skʼoplal yuʼun te la stae, jaʼ yuʼun jich la yal: «La jtatik ta skaj te bayal machʼatik la spasik tulan ta sleele».

¹⁰ Bayal ants winiketik chʼayem ya yaʼiy sbaik jich bitʼil te chʼin kerem ini. Maʼyuk smukʼul yoʼtanik, jaʼ yuʼun ya skʼanik te ya jkoltaytike (Efes. 2:12). Kʼaxem ta ocho millón ta tul testigoetik yuʼun Jehová yakotik ta sleel te ants winiketik-abi. Te joʼotike maniwan ya jtatik machʼa ya skʼan ya snop te Bibliae, pero ay yantik publikadoretik te ya scholik skʼop Dios tey ta territorio-abi ya staik stukel. Kʼalal jtul ermano ya sta te machʼa ya x-och ta jnopojel yuʼun Cristo, jpisiltik ay rason kuʼuntik swenta tseʼel koʼtantik.

11. Manchukme ma xkakʼtik kurso yuʼun Biblia ta ora ini, ¿bintikxan-utʼil ya xjuʼ ya xkoltaywanotik ta yotsesel jnopojeletik?

 ¹¹ Manchukme ma xkakʼtik kurso yuʼun Biblia ta ora ini, bayal bintik-utʼil ya xjuʼ ya xkoltaywanotik ta yotsesel jnopojeletik. Jun ejemplo, kʼalal ay machʼa achʼtonax ya xkʼot ta sNail Tsoblej, ya xjuʼ ya kalbeytik te lek te tale sok ya jkoltaytik te lekuk ya yaʼiy sbae. Jich ya jkoltaytik swenta ya xkʼotxan ta yoʼtan te jaʼnix-a te kʼuxul oʼtanil te ya yakʼ ta ilel te smelelil j-abatotik yuʼun Diose (Juan 13:34, 35). Jaʼnix jich te komentario ya kakʼtik ta tsoblejetike, manchukme komiknax, ya xjuʼ ya x-akʼbot snopik bin-utʼil ya scholbeyik skʼoplal ta lek sok ta spisil yoʼtanik te bin schʼuunejike. Jaʼnix jich ya xjuʼ ya jokintik ta scholel skʼop Dios te machʼa achʼtonax och ta publikador sok ya jkoltaytik ta stuuntesel te Biblia yuʼun ya yakʼbey spas pensar te ants winiketik te bin ya scholbeye. Kʼalal jich ya jpastik, ya jkoltaytik ta stʼunel te ejemplo yuʼun te Cristoe (Luc. 10:25-28).

12. ¿Yabal skʼan bayal jpʼijiltik swenta ya kotsestik jnopojeletik? Ala jun ejemplo.

¹² Mame jnoptik te ya skʼan bayal jpʼijiltik yuʼun ya jnojptestik te ants winik swenta ya x-och ta jnopojel yuʼun te Jesuse. Te ejemplo yuʼun te Faustina te kuxul ta Bolivia, ya yakʼ jnoptik bin yuʼun. Kʼalal la snaʼbey sba te testigoetik yuʼun te Jehovae, ma snaʼ skʼoponel jun-a, pero ta ora ini snopojix jtebuk. Ta ora ini yichʼojix jaʼ sok ya smulan snojptesel te ants winiketik ta swenta te smelelil kʼop. Ayniwan ya yakʼ joʼeb kurso yuʼun Biblia ta jujun semana. Manchukme te Faustina ma snaʼ ta lek skʼoponel jun jich bitʼil te machʼatik ya snojptes ta Bibliae, skoltayoj waktul ants winiketik ta yichʼel jaʼ (Luc. 10:21).

13. Manchukme makalotik, ¿bin bendision ya jtatik teme ya x-aʼtejotik ta yotsesel jnopojeletik?

¹³ Bayal ermanoetik ya skʼan ya spasik bayal aʼtelil te tulanik skʼoplale, jaʼ yuʼun maʼyuk lek stiempoik. Manchukme jich-abi, ya slokʼes stiempoik swenta ya yakʼik kurso yuʼun Biblia, jaʼ jun aʼtelil te bayal ya x-akʼbot stseʼelil yoʼtanik. Kiltik te ejemplo yuʼun te Melanie. Jaʼ jtul ants te stukel ya schʼites yal te ocho yaʼbilale. Ya x-aʼtej ta sjunal kʼajkʼal sok ya xkoltaywan ta skanantayel-a te spapa te yichʼoj kanser-ae. Nainem ta jpam lum-a te namal yiloj te Alaska, te jaʼnax stukel testigo yuʼun Jehová tey-a. Bayal buelta la skʼanbey Dios te akʼa akʼbotuk yip yuʼun ya xlokʼ ta scholel skʼop Dios manchukme bayal sik, melel ya skʼan ya sta te machʼa ya yakʼbey nojptesel yuʼun Biblia. Ta patil la sta te Sara, te bayal akʼbot stseʼelil yoʼtan kʼalal la snaʼ te ay sbiil te Diose. Kʼalal kʼax bael te tiempoe, te Sara la skʼan te ya x-akʼbot kurso yuʼun Biblia. Te Melanie ya yal: «Ta jujun biernes ta tibiltik kʼax lujben ya kaʼiy jba-a. Pero te joʼon sok te kantsil-al ya xboonkotik ta yakʼbeyel te nojptesel yuʼun Biblia, te kʼalal jich ya jpastike bayal ya skoltayotik-a. Bayal ya  jmulankotik sleel informasion swenta ya jsutbeytik te jojkʼoyeletik ya spas te Sarae, jaʼnix jich la yakʼ bayal stseʼelil koʼtankotik yilel bitʼil kaj yamigoin te Jehovae». Te Sara la sitintay sok yip yoʼtan te kontrainel, la yijkʼitay te iglesia sok la yichʼ jaʼ.

14. 1) ¿Banti pajal kʼoem sok te stsakel chay te ya kotsestik jnopojeletike? 2) ¿Bin ya stij koʼtantik spasel te bin la yal te Pablo ta 2 Timoteo 4:1, 2?

¹⁴ Manchukme jich yilel te ma xyakʼ sit te kʼalal ya jcholtik skʼop Diose, ma schʼay smukʼul koʼtantik te ya jtatik te machʼa ya xjuʼ ya x-och ta jnopojele. Juluk ta koʼtantik te la spajbey skʼoplal te Jesús te aʼtelil ini sok te stsakel chay. Te jtsakchayetik ya xjuʼ te bayal ora ya x-aʼtejik sok ay ma stsakik jkojtuk chay. Jteb ma spisiluk-ora ya x-aʼtejik ta ajkʼabal o ta sakubel tal kʼinal sok ay baeltik ya skʼan te bayal ya xnamajik bael ta jaʼ (Luc. 5:5). Jaʼnix jich ya spasik chaʼoxtul Testigoetik, bayal ora ya «stsakik chay» kʼoem sok ya spasik ta yanyantik lugaretik. Jich ya spasik swenta ya xjuʼ ya staikxan bayal ants winiketik. Te machʼatik ya spasik tulan ta spasel ini, jteb ma spisil-ora ya staik ta kʼoponel te ants winiketik te ya smulanik te lek yachʼil kʼope. ¿Yabal xjuʼ ya jcholtik skʼop Dios ta jun ora sok ta jun lugar te bantiwan ya xjuʼ ya jtatik te ants winiketike? (Kʼopona 2 Timoteo 4:1, 2).

15. ¿Bin yuʼun ma skʼan ya xlujbotik ta ora kʼalal ya kakʼtik kurso yuʼun Bibliae?

¹⁵ ¿Bin yuʼun ma skʼan ya xlujbotik ta ora te kʼalal ya kakʼtik kurso yuʼun Biblia? Jun rason, jaʼ te ma jaʼuknax ya jkoltaytik te estudiante ta snopel te Biblia sok te kʼuxuk ya yaʼiy ta yoʼtan  te bin ya yakʼ ta nopele. Jaʼnix jich ya skʼan ya jkoltaytik ta snaʼbeyel sba sok te kʼuxuk ya yaʼiy ta yoʼtan te Jehová, te jaʼ lokʼem tal ta yoʼtan te bin ya yal te Bibliae. Ma jaʼuknax ya skʼan ya kakʼbeytik snop bin ya skʼan Jesús ta stojol te jnopojeletik yuʼune, jaʼnix jich ya skʼan ya jkoltaytik ta snaʼel bin-utʼil ya xkʼotik ta smelelil jchʼuunjeletik. Ya skʼan ya jkoltaytik kʼalal yak ta spasel tulan ta spasel ta skuxlejal te tojobteseletik te ay ta Bibliae. Ay chaʼoxtul estudianteetik ya sjeltay te spensarik sok te bin kʼayemik ta spasel ta cheʼoxebnax u, pero ay yantik te ya xjalajikxane.

16. ¿Bin ya jnoptik ta swenta te ejemplo yuʼun te Raúl?

¹⁶ Te bin kʼot ta stojol jtul misionero ta Perú jamal ya yakʼ ta ilel te bin lek ya xlokʼ-a kʼalal ma xlujbotik ta orae. Jich la yal: «Jtul estudiante yuʼun Biblia te Raúl sbiil, lajix snopbel cheb libro-a. Pero ayto bayal swokol ta skuxlejal-a. Bayal kʼopetik ta nujpunel yuʼun, ya yal bolkʼopetik, jaʼnix jich te yuntikil wokol ya yaʼiyik te ya yichʼik ta mukʼ te spapaike. Pero te bitʼil maba ya xchʼay te tsoblejetik te Raúl lato kulaʼtay sok te sfamiliae. Kʼalal kʼaxemix oxeb jaʼbil te la jnaʼbey sbae, la yichʼ jaʼ».

17. ¿Bin ya kilbeytik skʼoplal ta yan artikulo?

¹⁷ Te Jesús la yalbotik te yakuk kotsestik ta «jnopojel spisil te nacionetic». Yuʼun ya jchʼuuntik spasel te bin la yale, ya skʼan ya xkʼopojotik sok ants winiketik te maba pajal schʼuunel koʼtantik soke, te machʼatik maʼyuk srelijionik o te ma schʼuunejik te ay Diose. Ta yan artikulo ya kilbeytik skʼoplal bin-utʼil ya jcholbeytik yaʼiyik te Wentainel yuʼun Diose.