¿Akʼoponojbal ta lek te articuloetik yuʼun Te J-ilkʼinal ta toyol te mato jaluk slokʼelike? Ilawil teme ya xjuʼ ya awakʼbey sujtib te jojkʼoyeletik ini:

¿Bin chanchajp ya skʼan ya jpastik yuʼun ya xlekub-a te jkʼayojtike?

Jlechtik ta lek te sjunal jkʼayojtik yuʼun toj ya jtejkʼan jbatik, jtoy joltik sok akʼa kʼayojinukotik sok spisil koʼtantik, kichʼtik bayal ikʼ, mukʼuk ya jam ketik sok tulanme kʼayojinukotik. Teme jiche, ayxan yip ya xlokʼ-a te jkʼayojtike (w17.11, pajina 5).

¿Bin ya yakʼ jnoptik te lebil ta lek te banti la yichʼ akʼel te puebloetik yuʼun anibal ta Israel sok te spisil-ora pasbil ta lek sbelale?

Ta spamal te nasion ay wakeb puebloetik yuʼun anibal te spisil-ora pasbil ta lek te sbelale. Jich te jmilaw ora ya xkʼot sok ma wokoluk ya yaʼiy stael koltayel ta junuk pueblo yuʼun anibal (w17.11, pajina 14).

¿Bin yuʼun te stojol jkoleltik jaʼ te lekil majtʼanil yakʼojbotik te Diose?

Ta swenta te stojol kolel ya jtatik te bin ya smulan koʼtantik, jaʼ te ya xkuxinotik ta sbajtʼelkʼinal sok te ya xkolotik lokʼel ta mulil sok ta lajel. Te Dios kʼux ta yoʼtan te yal snichʼnab te Adán, jaʼ yuʼun la yakʼ ta lajel ta jtojoltik te Jesús kʼalal ayotikto ta mulil-a (wp17.6, pajina 6 sok 7).

¿Bin yuʼun ya kaltik te jaʼ skʼoplal te ya xchaʼkuxaj te Jesús te bin ya yal te Salmo 118:22?

La spʼajik te Jesús te jaʼ Mesías sok la smilik. Jaʼnax teme ya yichʼ chaʼkuxajtesel ya xjuʼ xkʼot ta «yichʼo-ip xuhc na» bitʼil ya yal te salmo (w17.12, pajina 9 sok 10).

¿Puersabal ta swenta ba-alal tal stsʼumbal te Mesiase?

Ay baeltik tal ta stojol ba-alal te stsʼumbal te Mesiase, pero ma spisiluk-ora jich kʼot ta pasel. Te judioetik snaʼojik sok schʼuunejik te jiche. Jich bitʼil, snaʼojik-a te ya xtal ta stsʼumbal David te Cristo, te jaʼ ijtsʼinal yuʼun spisil snichʼnab te Isaí (w17.12, pajina 14 sok 15).

¿Bin mantaliletik ya jtatik ta Biblia te ya skoltayotik yuʼun ma stsakotik ta chamel?

Te Ley yuʼun Moisés ya yal te kʼalal ay machʼa yichʼoj tulan chamel ma xjuʼ ya sjokin sba sok te machʼatik lek ayike, te ya skʼan ya spok skʼab te machʼa ya spik te machʼa chamen sok te ya skʼan ya smuk stsaʼik. Jaʼnix jich te ya spasbeyik circuncisión te alal keremetik te kʼalal waxakeb kʼajkʼal yayinel-a, melel jaʼ yorail te ya xmajkix schʼichʼel-a te alale (wp18.1, pajina 7).

¿Bin yuʼun ya jnaʼtik te ma chopoluk te kʼuxuk ya kaʼiy jbatik te bitʼil snujpʼnanix-ae?

Ya skʼan te kʼux ya kaʼiy ta koʼtantik te jpatxujktik jichnix bitʼil kʼux ya kaʼiy jbatik te joʼotike (Marcos 12:31). Jaʼnix jich te Biblia ya yal: «Te winiquetic, cʼux me acʼa yaʼiy ta yoʼtanic te yihnamic hich te bin utʼil cʼux ya yaʼiyic stuquel te sbaqʼuetalique» (Efesios 5:28). Jich yuʼun, lekme te kʼuxuk ya kaʼiy jbatik te bitʼil snujpʼnanix-ae (w18.01, pajina 23).

¿Bin ya xjuʼ ya jpastik swenta ya xmukʼubxan te schʼuunel koʼtantike?

Ya skʼan ya jnoptik ta lek te sKʼop Dios, te ya jnopilan ta koʼtantik te bin ya yal sok te ya jpastik ta jkuxlejaltik te bin ya jnoptike. Jtʼuntik te tojobtesel ya yakʼ te chʼul espiritu sok kaltik wokol soknix jchʼuuntik te koltayel ya yakʼbotik te yantike (w18.02, pajina 26).

¿Bin yuʼun ma lekuk te ya jkʼan jnaʼtik ta swenta te astrología sok te naʼojel te bintik ya xkʼot ta pasel ta pajel chaʼbej?

Ay bayal te bin yuʼun, pero te bin tulanxan skʼoplale, jaʼ te jkʼaxel ma lekuk skʼoplal ya yal te Bibliae (wp18.2, pajina 4 sok 5).

Teme la jchʼuuntikix te ay machʼa la yikʼotik ta sna, ¿bin ya skʼan ya jpastik?

Jaʼ te ya jpastik tulan ta skʼotesel ta pasel te bin la kaltike (Salmo 15:4). Mame skʼan te ya jsut jkʼoptik ta skajnax te bin maʼyuk lek skʼoplale, melel te machʼa yikʼojotik ta sna laniwan spas tulan ta schajpanel te weʼelile (w18.03, pajina 18).

¿Bintik ya xjuʼ ya snopik te hermanoetik te yichʼoj yaʼtelik ta swenta te bin la spas te Timoteo?

Te Timoteo ay skʼoplal ta yoʼtan te yantik sok jaʼ nail la yakʼ ta skuxlejal spasbeyel yaʼtel te Jehová. Tulan aʼtej ta stojol Jehová sok la spas ta skuxlejal te bin akʼbot snope. Ma la skom sba ta aʼtel ta stojol Dios sok la yakʼ sba ta tojobtesel yuʼun te schʼul espiritu te Jehová. Spisil te hermanoetik lek te ya stʼunik te ejemplo yuʼun te Timoteo, ma jaʼuknax te ancianoetik (w18.04, pajina 13 sok 14).