ARTIKULO YUʼUN ESTUDIO 24
Jlajinbeytik skʼoplal nopojibaletik te ya skontrainbey te spʼijil Diose
«Ya jlajinbeytic scʼoplal a te bila nopjibal yuʼun te yantique, spisil jtoybaetic te ya scontroinic te bila ay ta naʼel yuʼun te Diose» (2 COR. 10:5, XCD).
KʼAYOJIL 124 Jun koʼtan ya kakʼ jba
¿BIN YA KILBEYTIK SKʼOPLAL? *
1. ¿Bin tsitsel la yakʼ te jpuk-kʼop Pablo ta stojol te machʼatik tsabilik te ya xbajtʼik ta chʼulchan?
TE JPUK-KʼOP Pablo jich la yalbey te jchʼuunjeletik ta sbabial siglo: «Ma me xapajbeyic stalel te bahlumilal» (Rom. 12:2). ¿Bin yuʼun la yakʼbey tsitsel te j-abatetik yuʼun Dios te yichʼojikix tsael ta swenta te chʼul espiritue? (Rom. 1:7).
2, 3. 1) ¿Bin ya spas te Satanás swenta ya yakʼ jkontraintik te Jehovae? 2) ¿Bin-utʼil ya xjuʼ ya jlokʼes ta jpensartik «te bintic ay yip»?
2 Te Pablo la smel yoʼtan yuʼun te ay chaʼoxtul jchʼuunjeletik la yichʼik loʼlayel yilel yuʼun te pʼijil kʼop yuʼun ants winiketik sok te snopojibal te balumilal yuʼun Satanás (Efes. 4:17-19). Ya xjuʼ te jichnix ya xkʼot ta jtojoltik te joʼotike. Te Satanás te dios yuʼun te balumilal ini, bayal bintik ya stuuntes swenta ya spitotik lokʼel ta stojol Jehová. Jun te bin ya spase, jaʼ te ya yakʼ ta koʼtantik te yakuk jmulantik te mukʼ jkʼoplaltik ya xkʼootik ta balumilal. Swenta jich ya xkʼot jpensartik te bitʼil ya skʼane, ya xjuʼ ya stuuntes te bintik kʼaxem ta jkuxlejaltik, te jtsʼumbaltik o te pʼijubtesel kichʼojtike.
3 ¿Bin-utʼil ya xjuʼ ya jlokʼestik «te bintic ay yip» ta jpensartike? (2 Cor. 10:4). Kiltik te bin sujtib la yakʼ te Pablo: «Ya jlajinbeytic scʼoplal a te bila nopjibal yuʼun te yantique, spisil jtoybaetic te ya scontroinic te bila ay ta naʼel yuʼun te Diose. Spisil nopjibal yuʼun te chʼichʼ-baqʼuete, ya me cacʼbeytic xchʼuunic te Cristoe» (2 Cor. 10:5, XCD). Jich yuʼun, ta swenta te koltayel ya yakʼbotik te Jehovae, ya xjuʼ kuʼuntik slokʼesel ta jpensartik te snopojibal yuʼun te yantike. Jich bitʼil te pox ya skombey yip jun beneno, te sKʼop Diose ya skoltayotik swenta maba ya yutsʼin jpensartik te chopol balumilal ini, te jich kʼoem bitʼil benenoe.
KACHʼUBTESTIK TE JPENSARTIKE
4. ¿Bintik la skʼan la jeltaytik ta jkuxlejaltik kʼalal la jnoptik te smelelil kʼope?
4 Juluk ta koʼtantik bintik la jeltay ta jkuxlejaltik kʼalal la jnoptik te smelelil ta swenta te sKʼop Diose sok te la jtatik ta nopel te ya x-abatinotik ta stojole. La kijkʼitaytik spasel te bintik chopol ya jpastik-ae (1 Cor. 6:9-11). Ya kalbeytik bayal wokol te Dios te la skoltayotik ta yijkʼitayele.
5. ¿Bin cheb mantalil ya yal Romanos 12:2 te ya skʼan jpastike?
5 Pero mame skʼan ya smukʼulin jba koʼtantik. Manchukme jilix kuʼuntik te tulan muliletik la jpastik te kʼalal mato kichʼojtik jaʼ-ae, yato skʼan ya jpastik tulan ta skanantayel jbatik swenta manchuk ya jchaʼpastik te bin chopole. ¿Bin-utʼil ya jpastik? Te Pablo la yal: «Ma me xapajbeyic stalel te bahlumilal, yanuc awilelic ta scuenta yachʼubtesel te snopojibal awuʼunic» (Rom. 12:2). Jich yuʼun ay cheb bin ya skʼan ya jpastik. Sbabial, ma skʼan ya jpajbeytikix stalel te balumilale. Schebal, ya skʼan ya kachʼubtestik te jpensartike.
6. ¿Bin ya jnoptik ta swenta te ejemplo la yakʼ te Jesús ta Mateo 12:43-45?
6 Kʼalal te Pablo la yal te yanuk kileltike, ma jaʼuknax skʼoplal te ya jeltik jtebuk te bin kileltike. Jaʼ te spisil ya jeltaytike (ilawil te rekuadro « ¿Ya xjelon ta jkʼaxel o jaʼnax ya spʼis sba?»). Ya skʼan ya kachʼubtestik te jpensartike, jaʼ-abi smakoj te bintik ya skʼan koʼtantike, te bin yilel jtaleltik sok te bintik ya kaʼiy ta skʼubulil koʼtantike. Jaʼ yuʼun jpisiltik ya skʼan ya jojkʼoybey jbatik: «¿Bin yilel te bin yakon ta sjeltayel ta jkuxlejal swenta ya jnopbey stalel te Cristoe? ¿Ta sbanaxbal yakon ta sjeltayel? ¿O yakonbal ta kʼoel ta jun lekil j-abat yuʼun Dios ta skʼubulil koʼtan?». Jich yuʼun, maba pajal te ay bin ya jeltaytik ta sbanax sok te ya jeltaytik ta skʼubulil koʼtantike. Ta Mateo 12:43-45, ya jtatik jun ejemplo te la stuuntes te Jesús te ya yakʼ ta ilel te bin ya skʼan ya jpastike (kʼopona). Te ejemplo ini ay bin mukʼ skʼoplal ya yakʼ ta naʼel: ma tikʼuk-a te ya jlokʼestik te chopol pensare, ya skʼan ya jnojes ta jpensartik te bin ya smulan te Diose.
KACHʼUBTESTIK TE BIN YA STIJ JPENSARTIKE
7. ¿Bin-utʼil ya xjuʼ ya jeltaytik te bin ay ta skʼubulil koʼtantike?
7 ¿Yabal xjuʼ ta jeltayel te bin yilel koʼtantik ta smelelile? Te sKʼop Dios ya yal: «Achʼubenuc me apensaric, soc lapahic me te yachʼil cuxlejal, te hich pasbil te bin utʼil ay te Diose, te toj bin ya spas soc te chʼultesbil ta smelelil» (Efes. 4:23, 24). Jich bitʼil ya yal te teksto, ya xjuʼ ya jeltaytik te bin ay ta skʼubulil koʼtantik sok ta jpensartik, pero maba kʼun ta pasel. Ma tikʼuk-a te ya jkomtik te bin ya smulan koʼtantike soknix te bin ya jpastike. Ya skʼan ya kachʼubtestik te bin ya stij jpensartike. Jaʼ-abi ya skʼan ya yal te ya jeltik te bin ya smulan koʼtantik, te bin ya skʼan koʼtantik sok te bin ya stij koʼtantik. Swenta ya xjuʼ kuʼuntik ya skʼan te spisiluk-ora ya jpastik tulan.
8, 9. ¿Bin-utʼil ya yakʼ ta ilel te bin kʼax ta skuxlejal jtul ermano te ya skʼan ya jeltaytik te bin ay ta skʼubulil koʼtantike?
8 Kiltik te ejemplo yuʼun jtul ermano te kʼax chopol stalel-ae, ya xyakub-a sok ya yaʼiy majtamba. Kʼalal la sjeltay skuxlejal sok ya xjuʼ ya yichʼix jaʼ-ae, lek skʼoplal la yichʼ alel ta lum banti kuxinem-ae. Pero ta jun tibiltik, kʼalal mato jaluk yichʼbel jaʼ-ae, te kermanotik ini la sta jun prueba te ma smaliyoj-ae: jtul yakubel kʼot ta sna te ya skʼan ya xmajawane. Ta sjajchibal, te ermano juʼ yuʼun skomel sba. Pero ma juʼix yuʼun-a kʼalal te winik la sbolkʼoptaybey sbiil te Jehovae. Jich yuʼun lokʼ smaj. ¿Bin yuʼun te jich la spase? Manchukme koltayot ta skomel te schopol stalel te bin snopoj ta Biblia, mato juʼem yuʼun yachʼubtesel te bin ya xtijbot spensare o maba sjeltayoj te bin-nix ay ta skʼubulil yoʼtan-ae.
9 Manchukme jich kʼot ta stojol, ma chebaj yoʼtan yuʼun (Prov. 24:16). Ta swenta te koltayel akʼbot yuʼun te ansianoetik lekubxan bael te stalele, ta patil la yichʼ akʼbeyel yaʼtel ta ansiano. Pero ta jun ajkʼabal, kʼalal ay ta yochibal-a te sNail Tsoblej, ay bin kʼot ta stojol te jteb ma pajal sok te bin kʼax yuʼun ta nailale: jtul yakubel kʼan smaj jtul ansiano. ¿Bin la spas te kermanotike? Ta slamalil sok spekʼelil yoʼtan la skʼopon te jyakubel, la slamantesbey yoʼtan sok bajtʼ yijkʼitay ta sna te jyakubele. ¿Bin yuʼun jich la spas te ermanoe? Jaʼ yuʼun te yachʼubtesojix-a te bin ya xtijbot spensare. Ta skʼubulil yoʼtan ayix slamalil sok spekʼelil yoʼtan, te bin la spase la yalbey yutsil skʼoplal te Jehová.
10. ¿Bintik smakoj te ya jeltaytik te bin ay ta skʼubulil koʼtantike?
10 Maba ta junchebnax kʼajkʼal ya xjuʼ ta achʼubtesel te jpensartike, sok maba stukelnax ya x-achʼub. Yaniwan skʼan bayal jaʼbil ya jpastik tulan ta sjeltayel (2 Ped. 1:5). Ma tikʼuk-a teme bayalix tiempo yakotik ta abatinel ta stojol te Jehovae. Ya skʼan ya jpastik tulan ta sjeltayel te bin ay ta skʼubulil koʼtantik chikan bantito kʼalal ya xjuʼ kuʼuntik. ¿Bin ya skoltayotik? Kiltik cheʼoxeb te bin mukʼ skʼoplal ya skʼan ya jpastike.
¿BIN-UTʼIL YA JELTAYTIK TE BIN YA STIJ JPENSARTIKE?
11. ¿Bin-utʼil ya skoltayotik te skʼoponel Dios ta sjeltayel te bin ya stij jpensartike?
11 Te sbabial bin ya skʼan ya jpastike, jaʼ te ya jkʼopontik Dios. Ya skʼan ya jkʼantik-euk te bin la skʼan te salmista te jich la stsʼibay: «¡Dios cuʼun, pasbon ta sac te coʼtane, achʼubtesbon coʼtan te stalel toj ay!» (Sal. 51:10). Ya skʼan ayuk ta koʼtantik te ya skʼan jeltayel te bin ya stij te jpensartike sok te ya jkʼanbeytik koltayel te Jehová. ¿Bin yuʼun jnaʼojtik te ya skoltayotike? Kiltik te bin la yal ta jamal te Jehová ta stojol te jkʼaxunkʼop israeletik ta skʼajkʼalel te Ezequiel: «Ya caʼbe yachʼil yoʼtanic soc yachʼil espíritu ta yoʼtanic; [...] ya caʼbe oʼtanil yuʼun baqʼuet», jaʼ-abi ya skʼan ya yal te ya yakʼbey schʼuunik te tojobtesel yuʼune (Ezeq. 11:19). Te kʼopetik ini ya yakʼ smukʼul koʼtantik. Te Jehová la skʼan la skoltay te israeletike, jaʼnix jich ta ora ini ya skʼan ya skoltayotik.
12, 13. 1) Jich bitʼil ya yal te Salmo 119:59, ¿bin ya skʼan ya jnopilan ta koʼtantik? 2) ¿Bin ya skʼan ya jojkʼoybey jbatik?
12 Te schebal bin kʼax mukʼ skʼoplal ya skʼan ya jpastike, jaʼ te ya jnopilan ta koʼtantik. Jujun kʼajkʼal ya skʼan ya jkʼopontik ta lek te Biblia sok te ya jlokʼestik tiempo ta snopilanel ta koʼtantik te bintik nopojibal ya skʼan ya jeltaytik (kʼopona Salmo 119:59; Heb. 4:12; Sant. 1:25). Akʼa jtatik ta ilel teme yichʼojbey te pʼijil kʼop yuʼun ants winiketik te bintik ya jpastik pensar. Ya skʼan ayuk ta koʼtantik te aynanix banti ya xchʼayotik-ae sok akʼa jpastik tulan ta stsalel.
13 Swenta ya jnaʼtik-a, ya skʼan ya jojkʼoybey jbatik ini: «¿Aybal jtebuk sbikʼtal koʼtan?» (1 Ped. 2:1). «¿Yabal jtoy jba yuʼun te bin kʼaxem ta jkuxlejal, te pʼijubtesel kichʼoj sok teme ay jtakʼine?» (Prov. 16:5). «¿Pekʼelbal skʼoplal ya kil te machʼatik ma jichuk ay yuʼunik te bin ay kuʼun o te yan stsʼumbalike?» (Sant. 2:2-4). «¿Yabal smulan koʼtan te bin ay ta balumilal yuʼun te Satanase?» (1 Juan 2:15-17). «¿Yabal jmulan skʼasesel kʼajkʼal-a te bin ya yakʼ ta ilel mulwej sok utsʼinele?» (Sal. 97:10; 101:3; Amós 5:15). Te bin sujtib ya kakʼbeytik te jojkʼoyeletik ini, ya yakʼ ta ilel banti ya skʼan ya jeltay te jpensartik soknix te bin ay ta koʼtantike. Teme ya jlajintik te nopojibaletik te «ay yip», ya kakʼbeytik stseʼelil yoʼtan te jTatik ay ta chʼulchan (Sal. 19:14).
14. ¿Bin yuʼun kʼax mukʼ skʼoplal te ya jtsatik lekil kamigotike?
14 Te yoxebale, jaʼ te ya skʼan ya jtsatik lekil kamigotaktik. Chikan teme ya jtatik ta ilel o maʼuke, te machʼa ya jokintike ya jnopbeytik te stalele (Prov. 13:20). Ta eskuela o ta kaʼteltik joytaybilotik ta ants winiketik te ma skoltayotik ta spasel pensar bitʼil te Jehovae. Ta tsoblejetike ma jichuk stukel, tey-a ya xjuʼ ya jtatik lekil amigoetik te ya stij koʼtantik ta yakʼel ta ilel kʼuxul oʼtanil sok spasel lekil aʼteliletik (Heb. 10:24, 25).
YICHʼOJUK YIP TE SCHʼUUNEL KOʼTANTIKE
15, 16. ¿Bin-utʼil ya skʼan ya sjeltay jpensartik te Satanase?
15 Juluk ta koʼtantik te yakʼoj ta yoʼtan Satanás sjeltayel te bitʼil ya jpastik pensare. Bayal ta chajp pensaril ya stuuntes swenta ya spejkʼanbey yip ta jpensartik te bin smelelil ya schol te sKʼop Diose.
16 Te Satanás jaʼnix jich ya spas jojkʼoyeletik bitʼil la spasbey te Eva ta tsʼunbil kʼinal Edén te jich la yal: «¿Hich bal la yalbat te Diose...?» (Gén. 3:1). Ta balumilal te jaʼ swentainoje, bayal buelta ya kichʼtik pasbeyel jojkʼoyeletik te ya xjuʼ ya yakʼ xchebaj koʼtantik, jich bitʼil ini: «¿Melelbal te maba lek ya yil Dios te pajal ta winikil o antsil ya xnujpunike? ¿Melelbal te ma xyakʼbeyex apasik te Navidad sok kumpleaño te Diose? ¿Melelbal te Dios awuʼunik ma skʼan te ya awichʼik chʼichʼe? Teme kʼuxul oʼtanil te Diose ¿bin yuʼun ma xyakʼ akʼopon abaik sok te machʼa kʼux ta awoʼtanik te la yichʼ lokʼesel ta kongregasion?».
17. 1) ¿Bin ya skʼan ya jpastik kʼalal ay machʼa ya spasbotik jojkʼoyeletik swenta ya yakʼ chebajuk koʼtantik? 2) ¿Bin ya xlokʼ kuʼuntik-a teme ya jpastik te bin ya yal Colosenses 2:6, 7?
17 Ya skʼan kʼoemuk lek ta koʼtantik te bin jchʼuunejtike. Te jojkʼoyeletik te ma jnaʼojbeytik sujtibe ya xjuʼ ya yakʼ chebajuk koʼtantik, ya xjuʼ yutsʼin te bitʼil ya jpastik pensar sok ya slajin te schʼuunel koʼtantike. Jich yuʼun, ¿bin ya skʼan ya jpastik? Te sKʼop Diose ya yalbotik te yakuk kachʼubtestik te jpensartik swenta joʼotiknix ya jtatik ta ilel «te bin ya scʼan yoʼtan te Dios, te ha ay yutsil soc te cʼax leque» (Rom. 12:2). Kʼalal ya jpastik estudiar ta jujun kʼajkʼal, ya skoltayotik swenta jchʼuunejtik ta lek te jaʼ smelelil te bin jnopojtikix ta Bibliae. Jaʼnix jich ya yakʼ jnaʼtik te jaʼ stojil te mantaliletik yuʼun te Jehová. Teme jich ya jpastike jich ya xkʼootik bitʼil jtejkʼ teʼ te tulan sok kʼuben ta lek yisim, jaʼ te yichʼoj yip te schʼuunel koʼtantike (kʼopona Colosenses 2:6, 7).
18. ¿Bin ya skoltayotik ta slajinel te bin ya yutsʼin jpensartik liʼ ta balumilal yuʼun Satanás?
18 Ma yanuk machʼa ya yakʼbey yichʼ yip te schʼuunel koʼtantike, joʼotiknix ya skʼan ya kakʼbeytik yichʼ yip. Jaʼ yuʼun akʼa kachʼubtestikxan bael te bin ya stij jpensartik. Spisiluk-ora jkʼopontik te Jehovae sok jkʼanbeytik te akʼa yakʼbotik te schʼul espiritue. Jnopilan ta skʼubulil koʼtantik te bin jnopojtik ta Biblia, jtsajtay kiltik bin-utʼil ya jpastik pensar sok te bin ya stij koʼtantike. Jletik lekil amigoetik, jokintik ants winiketik te ya skoltayotik ta yachʼubtesel te bin-utʼil ya jpastik pensare. Teme jich ya jpastike, ya xjuʼ kuʼuntik slajinel te bin ya yutsʼin jpensartik ta balumilal yuʼun Satanás sok «ya jlajinbeytic scʼoplal a te bila nopjibal yuʼun te yantique, spisil jtoybaetic te ya scontroinic te bila ay ta naʼel yuʼun te Diose» (2 Cor. 10:5, XCD).
KʼAYOJIL sjj-S 50 Mi oración de dedicación
^ parr. 5 Te bin kʼaxem ta jkuxlejaltik, te jtsʼumbaltik soknix te pʼijubtesel kichʼojtik, ay bin lek o ma lek ya yakʼ jpastik pensar. Yaniwan jtatik ta ilel te ay cheʼoxeb chopol taleliletik te kʼuben ta koʼtantik. Te artikulo ini ya yakʼ kiltik bin-utʼil ya xjuʼ ya jlajinbeytik skʼoplal te bintik chopol ya skʼan koʼtantike.