1. ¿Bin yuʼun ya skʼan ya jchʼuuntik te bin la yal ta jamal te Jesuse?

KʼALAL te Jesús la yal te albilkʼopetik yuʼun te slajibal kʼajkʼale, jich la yal: «Tsajtayame abaik, swenta ma xtonob awoʼtanik [...] ta snaʼulanel te bin-utʼil ya xkuxajex ta jujun kʼajkʼale» (Luc. 21:34, TNM). ¿Bin yuʼun ya skʼan ya jchʼuuntik te bin la yal ta jamale? Melel ta kʼajkʼal ini ya jsitintaytik-euk te wokolil ya sitintayik te yantik ants winiketike.

2. ¿Bintik wokolil ya xkʼax ta stojol te kermanotaktike?

² Ay ma junuknax wokolil ya xkʼax ta jtojoltik te ya yakʼbotik tulan mel-oʼtane. Kiltik te ejemploetik ini. Jtul Testigo te John * sbiil te yichʼoj chamel te esclerosis múltiple sbiil, jkʼaxel lajem la yaʼiy sba kʼalal ijkʼitayot yuʼun yinam te ayix 19 jaʼbil snujpunelike. Ta patil, te chaʼtul yantsil nichʼan la yijkʼitayik te Jehová. Te Bob sok te yinam te Linda sbiile, kʼax yantik wokolil ta stojolik. Maʼyuk yaʼtel jil ta schebalik, ta patil bael maʼyuk sna jilik. Te Linda jaʼnix jich la yichʼ tabeyel chamel ta yoʼtan te ya xjuʼ xlaj yuʼune sok artritis severa.

3. ¿Bin ya yalbotik Filipenses 4:6, 7 ta swenta te Jehovae?

³ Ya xjuʼ ya jchʼuuntik te ya xkʼot ta yoʼtan Jehová bin-utʼil ya yutsʼinotik te wokolile, melel jaʼ la spasotik sok jaʼ jTatik te ay skʼuxul yoʼtane. Ya skʼan ya skoltayotik ta sitintayel te wokoliletike (kʼopona Filipenses 4:6, 7). Ta Biblia ya jtatik bayal ejemploetik ta swenta te j-abatetik yuʼun Dios te kʼax swokolik  sok ya yakʼ kiltik bin-utʼil koltayotik yuʼun Jehová. Kiltik cheʼoxeb ejemploetik.

4. 1) ¿Bintik tulan wokolil kʼax ta stojol te Eliase? 2) ¿Bin snaʼoj ta lek ta swenta te Jehovae?

⁴ Te Elías abatin ta stojol Jehová ta jun tiempo te chujkʼultik sbae sok kʼax ta stojol tulan wokol. Te Acab, te jaʼ jtul ajwalil ta Israel te maba jun yoʼtan ta stojol Jehová, nujpun sok te Jezabel, jtul chopol ants te yichʼoj ta mukʼ te Baal. Ta schebalik la snojesik te lum ta yichʼel ta mukʼ te lotil dios Baal soknix la smilik bayal j-alwanejetik yuʼun Jehová. Pero te Elías kol stukel. Jaʼnix jich kol ta jun tulan wiʼnal, melel jaʼ la smukʼulin yoʼtan te Jehová (1 Rey. 17:2-4, 14-16). Jaʼnix jich la skʼanbey koltayel kʼalal la sitintay te j-alwanejetik sok te machʼatik yichʼojik ta mukʼ te Baal, jaʼnix jich la stijbey yoʼtan te israeletik ta yichʼel ta mukʼ te smelelil Diose (1 Rey. 18:21-24, 36-38). Te Elías bayal bitʼil la yil te yak ta kanantayel sok ta koltayel yuʼun Jehová ta yorail tulan wokol.

5, 6. 1) Jich bitʼil ya yal 1 Reyes 19:1-4, ¿bin yaʼiyel la yaʼiy sba te Eliase? 2) ¿Bin la spas te Jehová swenta ya yakʼbey yil te kʼux ta yoʼtane?

⁵ (Kʼopona 1 Reyes 19:1-4). Jaʼukmeto, kʼalal te ajwalil ants Jezabel la yal te ya smile, te Eliase xiw yoʼtan. Jaʼ yuʼun bajtʼ ta anel ta Beerseba. Kʼax lajem yip yoʼtan-a, jaʼ yuʼun la skʼan te ya xlaje. ¿Bin yuʼun jich la yaʼiy sba? Jaʼ yuʼun te maba tojil winike, jich la yaʼiy sba te bitʼil ya kaʼiy jbatike (Sant. 5:17). Jaʼniwan akʼbot smel yoʼtan te tenbil sok lujben la yaʼiy  sbae. Jich yilel te la snop te maʼyuk skʼoplal kʼot te bin la spas ta swenta te smelelil yichʼel ta mukʼ Diose, te maʼyuk bin lekub ta Israel sok te stukelxanix ya x-abatin ta stojol te Jehovae (1 Rey. 18:3, 4, 13; 19:10, 14). Chajpniwan ya kaʼiytik-a te bitʼil la yaʼiy sba te j-alwanej ini, pero te Jehová kʼot ta yoʼtan stukel.

⁶ Te Dios maba la yut te Elías kʼalal la yal ta jamal te bin yaʼiyel ya yaʼiy sbae, te bin la spase, jaʼ te la skoltay swenta ya yichʼxan yip (1 Rey. 19:5-7). Ta patil, la stojobtes sok skʼuxul yoʼtan, la yakʼbey yil te bayal yuʼele. Jaʼnix jich la yakʼbey snaʼ te ayto 7,000 ta tul israeletik te maba la yichʼik ta mukʼ te Baale (1 Rey. 19:11-18). Te Jehová la yakʼbey yil ta jamal te kʼux ta yoʼtan te Eliase.

7. ¿Bin yuʼun ya yakʼ slamalil koʼtantik snopilanel bin-utʼil te Jehová la skoltay te Eliase?

⁷ ¿Aybal yakal ta kʼaxel jwokoltik te ya yakʼ jmel koʼtantike? Kʼalal ya kiltik te kʼot ta yoʼtan Jehová te bin yaʼiyel la yaʼiy sba te Eliase ya yakʼ yip koʼtantik. Soknix ya yakʼ slamalil koʼtantik snaʼel te jaʼnix jich ya xkʼot ta yoʼtan te bin ya jmel koʼtantik yuʼune. Ya snaʼ te ban kʼalal ya xkujch kuʼuntik, te bin ya jnoptik sok te bin yaʼiyel ya kaʼiy jbatike (Sal. 103:14; 139:3, 4). Teme ya jletik koltayel ta stojol Jehová jich bitʼil la spas te Eliase, jaʼ ya skoltayotik ta sitintayel te bintik ya jmel koʼtantik yuʼune (Sal. 55:22).

8. ¿Bin-utʼil ya skoltayotik te Jehová ta sitintayel te jwokoltike?

⁸ Kʼalal tenbil ya kaʼiy jbatik ya xjuʼ ya jnoptik te maʼyuk bin-ora ya xlaj te jwokoltike sok ya yakʼ xchebaj koʼtantik. Teme ay jich ya kaʼiy jbatike, juluk ta koʼtantik te ya skoltayotik te Jehová. ¿Bin-utʼil ya skoltayotik? Ya yalbotik te yakuk kalbeytik te bin ya jmel koʼtantik yuʼune sok ya yalbotik ta jamal te ya sutbotik te jkʼoptike (Sal. 5:3; 1 Ped. 5:7). Jaʼ yuʼun kalulanbeytik te jwokoltike. Manchukme ma jichuk ya skʼoponotik te bitʼil la skʼopon te Eliase, ya skʼoponotik ta swenta te sKʼop sok te organisasion yuʼune. Te bintik ya jkʼopontik ta Biblia ya yakʼ smukʼul kʼinal kaʼiytik. Jaʼnix jich ya yakʼ yip koʼtantik te kermanotaktike (Rom. 15:4; Heb. 10:24, 25).

9. ¿Bin-utʼil ya xjuʼ ya skoltayotik jtul lekil kamigotik?

⁹ Te Jehová la yalbey te Elías te yakuk yakʼbey te Eliseo jtebuk te yaʼtele. Jich te Jehová, la yakʼbey jtul yamigo te ya xjuʼ ya xkoltayot kʼalal pejkʼajem yip yoʼtane. Jaʼnix jich teme ay jtul lekil kamigotik, ya skoltayotik kʼalal ay jwokoltike (2 Rey. 2:2; Prov. 17:17). ¿Jaxan teme jich ya kaʼiytik te maʼyuk machʼa ya kalbeytik te jwokoltike? Jkʼanbeytik te Jehová te yakuk skoltayotik ta stael jtul ermano te yijuben schʼuunel yoʼtane, te jaʼ ya yakʼbotik yip koʼtantik kʼalal ya xtuun kuʼuntike.

10. 1) ¿Bin mukʼul oʼtanil ya yakʼbotik te bin kʼax ta stojol te Eliase? 2) ¿Bin-utʼil ya skoltayotik te bin ya yal Isaías 40:28, 29?

¹⁰ Te Jehová la skoltay te Elías ta stsʼikel te swokole sok la skoltay yuʼun ya x-abatin ta stojol bayal jaʼbil. Te bin kʼax ta stojol te j-alwanej ini ya yakʼ smukʼul koʼtantik. Ayniwan ya xkʼax kuʼuntik bayal mel-oʼtan te ya slajin kiptik sok sbujtsʼ kʼinal kaʼiytik. Pero teme ya smukʼulin koʼtantik te Jehová, jaʼ ya yakʼbotik kiptik swenta ma jkom jbatik ta abatinel ta stojol (kʼopona Isaías 40:28, 29).

11-13. ¿Bin kʼax ta stojolik oxtul j-abatetik yuʼun Dios ta namey kʼinal?

¹¹ Ta Biblia ya jtabeytik skʼoplal yantik j-abatetik yuʼun Dios te bayal kʼax swokolike. Jun ejemplo jaʼ te Ana la stsʼik kʼexlal ta skaj te ma x-alaje sok te ya xlabanot yuʼun te yan yinam  smamalale (1 Sam. 1:2, 6). Kʼaxto la smel yoʼtan yuʼun, okʼ sok ma weʼix yuʼun (1 Sam. 1:7, 10).

¹² Te ajwalil David jaʼnix jich kʼax tulan wokol ta stojol. Kaltik cheʼoxebuk. Jkʼaxel ma lek la yaʼiy sba ta skaj te bayal mulil la spase (Sal. 40:12). La sta kontrainel yuʼun te Absalón te snichʼan te kʼux ta yoʼtan te laj ta patil ta skaj te kontrainwane (2 Sam. 15:13, 14; 18:33). Jaʼnix jich, jtul yamigo te mero lek yiloj sba soke akʼot ta kʼabal yuʼun (2 Sam. 16:23–17:2; Sal. 55:12-14). Ta salmoetik te la stsʼibaye ya yakʼ ta ilel te chebaj yoʼtan, pero jaʼnix jich ya xchiknaj ta ilel te jkʼaxel jaʼ la smukʼulin yoʼtan te Jehovae (Sal. 38:5-10; 94:17-19).

¹³ Bayal tiempo ta patil, jtul salmista te talemniwan ta stsʼumbal Asaf te jaʼ levita, te ya x-aʼtej ta mukʼul «templo yuʼun Dios», bayal chebaj yoʼtan. Jajch sbikʼtal oʼtantaybey skuxlejal te machʼatik chopolike, te kʼalal jich la yaʼiy sbae chʼay stseʼelil yoʼtan. Jaʼnix jich kaj snop te maʼyuk lek skʼoplal te bendisionetik ya staik te j-abatetik yuʼun Diose (Sal. 73:2-5, 7, 12-14, 16, 17, 21).

14, 15. ¿Bin ya jnoptik ta swenta te oxeb ejemploetik ini te ay ta Biblia?

¹⁴ Te oxtul j-abatetik ini la sleik koltayel ta stojol te Jehová. La sjam yoʼtanik ta stojol. La scholbeyik ta jamal bin yuʼun ya smel yoʼtanik. Jaʼnix jich maba la skom sbaik ta bael te banti ya yichʼ ichʼel ta mukʼ te Jehová (1 Sam. 1:9, 10; Sal. 55:22; 73:17; 122:1).

¹⁵ Te Dios kuʼuntik te ya snaʼ yoʼbolil jbatik, la sutbey te skʼopike. Te Ana lamaj kʼinal la yaʼiy (1 Sam. 1:18). Te David jich la stsʼibay: «Ay bayel swocolic te machʼa toj yoʼtan, pero te Jehová ya scoltay loqʼuel ta spisil» (Sal. 34:19). Te salmista jich la yaʼiy te tsakot ta swaʼel kʼab yuʼun Jehová sok te tojobtesot bael sok te lekil mantaliletik yuʼune. Jich la yal ta kʼayoj:  «Pero te hoʼone, lec te nopol ayon ta stojol Dios. La jcacʼ te ha smucʼul coʼtan te Cajwaltic Jehová» (Sal. 73:23, 24, 28). ¿Bin ya jnoptik ta swenta te ejemploetik ini? Jaʼ te aynanix ya jmel koʼtantik ta skaj te jwokoltike. Pero ya xkujch kuʼuntik teme ya jnoptik bin-utʼil skoltayoj yantik te Jehová, teme ya jkʼopontik Dios sok teme ya jchʼuuntik spisil te smantale (Sal. 143:1, 4-8).

16, 17. 1) ¿Bin yuʼun ma skʼan ya xnamajotik ta stojol te yantike? 2) ¿Bin-utʼil ya stsakxan yip te koʼtantike?

¹⁶ Te oxeb ejemploetik ini ay bin ya yakʼxan jnoptik: jaʼ te ma skʼan ya xnamajotik ta stojol te Jehová ni jaʼuk ta stojol te j-abatetik yuʼune (Prov. 18:1, TNM). Te Nancy bayal kʼax swokol kʼalal ijkʼitayot yuʼun smamalal. Jich ya yal: «Bayal kʼajkʼal maʼyuk machʼa la jkʼan kil sok maʼyuk machʼa la jkʼan jkʼopon. Pero te kʼalal ya jtukeltay jbae jaʼ kʼaxtoxan ya jmel koʼtan-a». Pero ma jichukix la yaʼiy sba kʼalal la sle bin-utʼil ya skoltay te machʼatik ay swokolike. Jich ya yal: «Ya jchʼam kaʼiy kʼalal ya yalbonik bin yaʼiyel ya yaʼiy sbaik. La jta ta ilel te kʼalal ya kaʼiy ta koʼtan te swokolike, ma jaʼukix ya xbajtʼ ta koʼtan-a te jwokole».

¹⁷ Ya jtaxan kiptik kʼalal ya xbootik ta tsoblejetik. Jaʼ jich-abi ya kakʼ skoltayotik sok smukʼubtes koʼtantik te Jehová (Sal. 86:17). Ta  tsoblejetik ya yakʼ kiptik ta swenta te schʼul espiritu, te sKʼop sok te j-abatetik yuʼune. Jaʼnix jich ya xjuʼ ya kakʼtik sok ya kichʼtik mukʼul oʼtanil tey-a (Rom. 1:11, 12). Jtul ermana te Sofía sbiil jich la yal: «Te Jehová sok te ermanoetik la skoltayonik swenta ya xkujch kuʼun te jwokole. Te tsoblejetike, jaʼ te bin kʼax mukʼxan skʼoplal ta koʼtane. La jta ta ilel te maba kʼax tulan ya kaʼiy stsʼikel te jwokol sok te bin ya jmel koʼtan yuʼun kʼalal bayalxan ya jchol skʼop Dios sok ya xkoltaywanon ta kongregasion».

18. ¿Bin ya xjuʼ ya yakʼbotik te Jehová kʼalal pejkʼajem yip koʼtantik?

¹⁸ Kʼalal pejkʼajem yip koʼtantike, juluk ta koʼtantik te ma jaʼuknax yaloj Jehová te ya slajin ta sbajtʼelkʼinal te wokole, jaʼnix jich ya yal te ya skoltayotik ta ora ini. Te Jehová ya yakʼ te ya jkʼantik sok te ayuk kiptik ta stsalel te bin ya snaʼulan sok ya jmel koʼtantik yuʼune (Filip. 2:13).

19. ¿Bin ya yakʼ jnaʼtik te Romanos 8:37-39?

¹⁹ (Kʼopona Romanos 8:37-39). Te jpuk-kʼop Pablo la yal ta jamal te maʼyuk bin ya spijtesotik ta stojol te skʼuxul yoʼtan Diose. Pero, ¿bin-utʼil ya xjuʼ ya jkoltaytik te ermanoetik te yakalik ta spasel tulan ta stsʼikel te swokolike? Ta yan artikulo ya jnoptik bitʼil ya kakʼtik ta ilel te ya jnaʼbeytik yoʼbolil sbaik sok bin-utʼil ya jkoltaytik jich bitʼil ya spas te Jehovae.