STALELNANIX-A te ya jkʼantik te lek koʼtantik sok te tojotik ya kichʼtik ilele. Pero ta kʼajkʼal ini wokol ta pasel. Bayal ants winiketik «ihlaybil yuʼunic te bintic lec» (2 Tim. 3:3). Ya spʼajik te mantaliletik yuʼun Jehová, «ya yalic te lec te bin ma lecuc soc te ma lecuc te bin leque» (Is. 5:20). Jpisiltik ya jpastik tulan ta swenta te bintik kʼaxem ta jkuxlejaltik sok te bitʼil ma tojotike. Jaʼ yuʼun, jichniwan ya kaʼiy jbatik bitʼil jtul ermana te abatinem bayal jaʼbil ta stojol Jehová, te jich ya yal: «Ma jchʼuun ya kaʼiy te lek koʼtan ya xkʼoone».

Ta melel, jpisiltik ya xjuʼ ya kakʼtik ta ilel lekil oʼtanil. Te talelil-abi lokʼem tal ta sit te ya yakʼ te chʼul espiritu yuʼun Dios, te jaʼ bayalxan yuʼel-a te bin ya xjuʼ ya smakotik ta balumilal, te ants winiketik o te joʼotiknix ay bin tulan ya kaʼiytik. Kilbeytik skʼoplal bin-a te lekil oʼtanil sok bin-utʼil ya kakʼtikxan ta ilel ta lek ta jkuxlejaltik.

Te lekil oʼtanil jaʼ te talelil ya yakʼ ta ilel jtul lekil ants winik te maʼyuk bin chopol ya spase, te toj yaʼtel sok te lek ya yakʼ ta ilel stalel. Te machʼa ya yakʼ ta ilel slekil yoʼtan, spisil-ora ya sle bin-utʼil ya skoltay te yantik sok ay bin ya spas ta stojolik.

Ayniwan ya jnaʼbeytik sba chaʼoxtul ants winiketik te ay bin lek ya spasik ta stojol te sfamiliaik sok yamigotakik. Pero te machʼa lek yoʼtan ilbil yuʼun te Diose ma jaʼuknax ya spas-abi. Ta melel, maʼyuk machʼa jkʼaxel lek ya yakʼ ta ilel te talelil ini, melel te Biblia ya yal te «mayuc ni jtuhluc ta bahlumilal te toj yoʼtan, te ya spas te bin lec, te ma ba ya sta smul» (Ecl. 7:20). Jaʼnix jich, te jpuk-kʼop Pablo la yal: «Ya jnaʼ te mayuc bin lec ta jtojol» (Rom. 7:18). Jaʼ yuʼun teme ya jkʼan ya kakʼtik ta ilel te talelil ini ya skʼan ya kilbeytik skʼoplal te ejemplo yuʼun Jehová, te jaʼ talem ta stojol te lekil oʼtanile.

Te Jehová jaʼ ya yakʼ te mantalil ta swenta te bin leke. Jtul te machʼa la stsʼibay jun salmo jich la yalbey: «Mero lecat atuquel, soc lec te bin yac apas; aʼbon jnop te mandariletic awuʼune» (Sal. 119:68). Kilbeytik skʼoplal cheb swentail te slekil yoʼtan Dios la yal te bersikuloe.

Te Jehová lek yoʼtan. Te lekil oʼtanil ya xchiknaj ta ilel ta spisil stalel te Jehová. Kiltik bin kʼot ta pasel kʼalal jich la yalbey te Moisés: «Ya kakʼ te ya xkʼax ta atojol spisil te slekil koʼtan» (Éx. 33:19, TNM). Kʼalal yak ta kʼaxel-a te yutsilal Dios soknix te slekil yoʼtane te Moisés jich la yaʼiy stojol: «¡Jehová! ¡Jehová! te ay bayel scʼuxul yoʼtan soc te ay yutsil yoʼtan, ma orahuc ya xʼilin, mero mucʼ scʼuxul yoʼtan soc stalel jun yoʼtan, ay scʼuxul yoʼtan ta stojol bayel ta mil, ya spas perdón yuʼun te bin chopol, te toybahil, soc te mulile; pero ma ba ya yal te mayuc smul te machʼa ay smul, ha ya yaʼbe stoj smul» (Éx. 34:6, 7). Jaʼ yuʼun ya xjuʼ ya kaltik te ya xchiknaj ta ilel te slekil yoʼtan te Jehová ta jujun chajp te stalele. Kʼalal kuxin ta Balumilal te Jesús, kʼax lek la yakʼ ta ilel te lekil oʼtanile. Manchukme kʼax lek te ejemplo la yakʼ ta ilel, jich la yal: «Mayuc machʼa lec ta winiquil, ha nax lec stuquel te Diose» (Luc. 18:19).

Te Jehová ya spas te bin lek. Te slekil yoʼtan te Dios ya xchiknaj ta ilel ta spisil te bin ya spase.  Te Biblia jich ya yal: «Te Jehová lec bin ya spas ta stojol spisil, soc ya scʼuxultay spisil te bintic spasoje» (Sal. 145:9). Te Jehová ya yakʼ ta ilel te slekil yoʼtan kʼalal maʼyuk machʼanax ya stsa, kʼalal ya yakʼbey skuxlejal te ants winiketik sok spisil te bin ya xtuun yuʼunike (Hech. 14:17). Jaʼnix jich ya yakʼ ta ilel kʼalal ya spasbotik perdon te jmultike. Jtul te machʼa la stsʼibay jun salmo jich la yalbey te Jehová: «Como haʼat, Cajwal, lec awoʼtan soc jpas-perdonat» (Sal. 86:5). Ya xjuʼ ya jchʼuuntik ta spisil koʼtantik te Jehová «ma ba ya sloqʼuesbe te bin lec te machʼatic mayuc bin smulinejic» (Sal. 84:11).

Jich bitʼil ta slokʼomba la spasotik te Jehová, ya xjuʼ ya kakʼtik ta ilel slekil koʼtantik sok te ya jpastik te bin leke (Gén. 1:27). Jaʼukmeto, te Biblia jich ya yalbey te j-abatetik yuʼun Dios: «Nopahic spasel te bin lec» (Is. 1:17). Kiltik oxchajp te bin ya xjuʼ ya jpastik swenta ya kakʼtikxan ta ilel te tʼujbil talelil ini, te lekil oʼtanil.

Sbabial, jkʼopontik Dios ta skʼanel chʼul espiritu, jaʼ ya skoltayotik swenta lek koʼtantik ta sit te Diose (Gál. 5:22). Te schʼul espiritu te Dios ya skoltayotik swenta kʼux ya kaʼiy ta koʼtantik te bin leke sok ta spʼajel te bin chopole (Rom. 12:9). Te Biblia ya yal ta stojol te Jehová te ya skoltayotik «ta spasel soc ta yalel spisil bintic lec» (2 Tes. 2:16, 17).

Schebal, ya skʼan ya jkʼopontik te sKʼop Dios. Kʼalal jich ya jpastik, te Jehová ya yakʼ kiltik «spisil lequil behetic» sok ya schajpanotik ta spasel «spisil lequil aʼteliletic» (Prov. 2:9; 2 Tim. 3:17). Kʼalal ya jkʼopontik te Biblia sok ya jnopilan ta koʼtantik, ya xnoj te koʼtantik ta bintik mukʼ skʼoplal yuʼun Dios sok te skʼanojel yoʼtane. Spisil ini jich ya xkʼot bitʼil kʼulejalil te ya skoltayotik kʼalal ya xtuun kuʼuntike (Luc. 6:45; Efes. 5:9).

Yoxebal, ya skʼan ya jpastik tulan ta skʼayinel «te bin leque» (3 Juan 11). Ta Biblia ay lekil ejemploetik yuʼun lekil oʼtanil te ya xjuʼ ya jkʼayintik. Pero te kʼax lekil ejemplo jaʼ te Jehová sok Jesús. Jaʼnix jich ayxan yantik lekil ejemploetik. Yaniwan xtal ta koʼtantik te ejemplo yuʼun Tabita sok Bernabé (Hech. 9:36; 11:22-24). ¿Bin yuʼun ma jkʼopontik ta Biblia ta swenta te bin la spasik yuʼun la skoltay yantik? Jnop kaʼiytik bin ya xjuʼ ya jpastik ta skoltayel jfamiliatik o ermanoetik ta kongregasion. Kiltik te bendisionetik la staik te chaʼtul j-abatetik ini yuʼun te la spasik te bin leke. Jaʼnix jich ya xjuʼ ya jtatik bendision-euk.

Jaʼnix jich ya xjuʼ ya jnoptik ta swenta te machʼatik ya spasik te bin lek ta stojol yantik. Jich bitʼil te ansianoetik ta kongregasion te tulan ya  x-aʼtejik sok mukʼ skʼoplal ya yilik spasel te bin leke. Sok mame xchʼay ta koʼtantik te kermanataktik te jun yoʼtanike, te «ha ya yaqʼuic ta nopel te bin leque» ta swenta te bin ya yalik sok ya spasik (Tito 1:8; 2:3). Jtul ermana te Roslyn sbiil jich ya yal: «Ay jtul kamiga te ya slajin sba ta skoltayel sok yakʼbeyel smukʼul yoʼtan te ermanoetik ta kongregasion. Ya snop bin yilel skuxlejalik sok kʼayem ta yakʼel majtʼanil o yantikxan bitʼil ya xkoltaywan. Kʼax lek yoʼtan ya kil».

Te Jehová jich ya yalbey te j-abatetik yuʼun: «Lehahic te bin lec» (Amós 5:14). Teme ya jchʼuuntike, ma jaʼuknax kʼux ya kaʼiy ta koʼtantik te mantaliletik yuʼune jaʼnixme jich ya stijxan koʼtantik ta spasel te bin lek ya yile.

Pero mame jnoptik te ya skʼan chajpnax ta ilel-a te bin ya jpastik ta yakʼel ta ilel slekil koʼtantik. Kaltik jun ejemplo, swenta ya xchʼi jpejt nichim, ma junuknax buelta bayal yaʼlel ya kakʼbeytik, te bin ya jpastike jaʼ te bayal buelta jtebnax yaʼlel ya kakʼbeytik. Jaʼnix jich te joʼotike ya xjuʼ ya kakʼtik ta ilel slekil koʼtantik kʼalal bayal buelta ay bin ya jpastik ta stojol yantik manchukme jtebnax.

Te Biblia ya yal te ya skʼan jpisiltik chapalotik ta spasel te bin leke (2 Tim. 2:21; Tito 3:1). Teme ya jpastik tulan ta snaʼel te bin ya xkʼax ta stojolik te jpatxujktike, ya jnaʼtik yakʼbeyel «te bin lec ya xtuhun yuʼune, yuʼun hich ya yichʼ yipic a» (Rom. 15:2). Swenta jich ya jpastik yaniwan skʼan te ay bin ya kakʼbeytike (Prov. 3:27). Yaniwan xjuʼ ya kikʼtik ta weʼel o te ya jokin jbatik jtsʼinuke. ¿Aybal machʼa ya jnaʼtik ay ta chamel? Teme aye ya xjuʼ ya jtikunbeytik bael jun karta o jun mensaje, ya kulaʼtaytik o ya jkʼopontik bael ta telefono. Ta melel, bayal buelta ya xjuʼ ya kaltik «lequil cʼop te ya xtuhun scuenta yaʼbeyel yipic te yantic, scuenta yutsil slequil» (Efes. 4:29).

Jich bitʼil te Jehová, ya jpastik tulan ta spasel te bin lek ta stojol spisil te ants winiketik. Jaʼ yuʼun ma chaʼoxtulnax machʼa lek ya kiltik. Jun te bitʼil ya jpastik-abi jaʼ te ya kakʼbeytik snaʼik te lek yachʼil kʼop yuʼun te Wentainel. Jich bitʼil la yal ta mantal te Jesús ya jpastik tulan ta spasel te bin lek ta stojol te machʼatik ya spʼajotike (Luc. 6:27). Maʼyuk bin-ora ya xchʼayotik teme lek koʼtantik sok lek jtaleltik ta stojol yantik, melel «mayuc ley te ya scontrahinlan ini» (Gál. 5:22, 23). Teme ya jpastik te bin lek manchukme bayal kontrainel o wokolil, yaniwan jtijbeytik yoʼtan te ants winiketik ta snopel te smelelil kʼop sok ya kakʼbeytik yutsil skʼoplal te Diose (1 Ped. 3:16, 17).

Te Biblia ya yal «te machʼa lec stalel, ya me yichʼ smahtan yuʼun te yaʼtele» (Prov. 14:14). ¿Bintik cheʼoxeb te majtʼanil-abi? Jaʼniwan lekxan ya yilotik-a te yantike (Prov. 14:22). Manchukme ma jichuk ya spasik, pero teme ma jkom jbatik ta yakʼel ta ilel slekil koʼtantik yaniwan xlamaj yilinbaik sok ya xkʼunub yoʼtanik yuʼun (Rom. 12:20).

Bayal machʼatik ya yalik te bayal lekilal staojik yuʼun te la yijkʼitayik spasel te bin chopol te jaʼ ya spasik te bin leke. Kiltik te bin kʼax ta stojol te Nancy. Jich ya yal: «Ma jpas-a te bin ay ta jwenta spasele, ya jpas muliletik sok ma x-ichʼawanon ta wenta-a. Pero kʼalal la jnop te mantaliletik yuʼun Dios ta swenta te bin leke sok te kʼalal la jpas ta jkuxlejale la jtaxan stseʼelil koʼtan. Ta ora ini lekubenix te jtalele sok kʼux ya kaʼiyix jba».

Te bin yuʼun mukʼxan skʼoplal ya skʼan ya kakʼtik ta ilel slekil koʼtantike jaʼ te jich ya kakʼbeytik stseʼelil yoʼtan te Jehová. Ya yil te bin ya jpastike manchukme bayal machʼatik ma xyilik. Ya yakʼ ta yoʼtan yilel te bin lek ya jnoptik sok ya jpastike (Efes. 6:7, 8). ¿Bin ya xlokʼ-a? «Te machʼa lec yoʼtan, ya sta lec scʼoblal yuʼun Jehová» (Prov. 12:2). Jaʼ yuʼun mame jkom jbatik ta yakʼel ta ilel lekil oʼtanil. Te Jehová ya yal ta jamal te ya sta «utsilal, ichʼel ta mucʼ soc lamal qʼuinal yuʼun te machʼatic lec bin ya spasic» (Rom. 2:10).