1. Jich bitʼil ya yal 1 Pedro 3:8, ¿bin yuʼun ya jmulantik sjokinel te machʼatik ay skʼoplal ta yoʼtanik te bin yaʼiyel ya kaʼiy jbatik soknix te jlekilaltike?

JPISILTIK ya jmulantik sjokinel te machʼatik ay skʼoplal ta yoʼtanik te bin yaʼiyel ya kaʼiy jbatik soknix te jlekilaltike. Te ants winiketik ini ya spasik tulan yuʼun jich ya yaʼiy sbaik te bitʼil ya kaʼiy jbatike sok ya xkʼot ta yoʼtanik te bin ya jnoptik. Ya staik ta ilel te bin ya jkʼantike sok ay ya yakʼbotik koltayel manchukme mato jkʼanojbeytik-a. Ay skʼoplal ta koʼtantik te machʼatik ya yakʼik ta ilel te ya snaʼbeyik yoʼbolil sba te yantike * jich bitʼil ya yal 1 Pedro 3:8 (kʼopona).

2. ¿Bin yuʼun ay tulan ya kaʼiytik snaʼbeyel yoʼbolil sba te yantike?

² Spisil te j-abatotik yuʼun Dios ya jkʼan ya kakʼtik ta ilel te ya jnaʼbeytik yoʼbolil sba te yantike. Jaʼukmeto, yame skʼan ya jnaʼtik te ay tulan ya kaʼiytik spasele. ¿Bin yuʼun? Jun rason jaʼ te maba tojotike sok te jtaleltiknanix-a te joʼotiknax ya kichʼ jbatik ta wentae (Rom. 3:23). Ayniwan tulan ya kaʼiytik ta skaj te bitʼil la kichʼtik chʼitesel sok te bin kʼaxem ta jkuxlejaltike. Sokniwan ta swenta te ya kilbeytik stalel te ants winiketik, melel ta slajibal kʼajkʼal ini bayal machʼatik ma xyichʼik ta wenta te bin yaʼiyel ya yaʼiy sbaik te yantike, jaʼnax kʼux ya yaʼiy sbaik stukelik (2 Tim. 3:1, 2). ¿Bin ya xjuʼ ya skoltayotik ta stsalel te bin ya smakotik yuʼun jich ay skʼoplal ta koʼtantik-a te yantike?

3. 1) ¿Bin ya skoltayotik ta yakʼelxan ta ilel te ya jnaʼbeytik yoʼbolil sba te yantike? 2) ¿Bin ya kiltik ta artikulo ini?

³ Te bin ya skoltayotik ta yakʼel ta ilel te ya jnaʼbeytik yoʼbolil  sba te yantike jaʼ te ya jnopbeytik stalel te Jehová sok te Jesucristo te sNichʼane. Te Jehová jaʼ Dios yuʼun kʼuxul oʼtanil sok ya yakʼ kiltik kʼax lekil ejemplo (1 Juan 4:8). Te Jesús la yakʼ ta ilel ta lek stalel te sTate (Juan 14:9). Kʼalal ay ta Balumilal-a la yakʼ ta ilel te ya xjuʼ yuʼunik te ants winiketik yakʼel ta ilel te ya snaʼbeyik yoʼbolil sba te yantike. Ta artikulo ini nail ya kiltik bin-utʼil yakʼojik ta ilel te Jehová sok Jesús te ay skʼoplal ta yoʼtanik te bin yaʼiyel ya yaʼiy sba te yantike, ta patil ya kiltik bin-utʼil ya jnopbeytik te ejemplo yuʼunike.

4. Jich bitʼil ya yakʼ ta ilel Isaías 63:7-9, ¿bin ya yakʼ ta ilel te ay skʼoplal ta yoʼtan Jehová te bin yaʼiyel ya yaʼiy sbaik te j-abatetik yuʼune?

⁴ Te Biblia ya yal te ay skʼoplal ta yoʼtan Jehová te bin yaʼiyel ya yaʼiy sbaik te machʼatik ya x-abatinik ta stojole. Jun ejemplo jaʼ te bin yaʼiyel la yaʼiy sba kʼalal ayik ta wokol-a te israeletike. Te sKʼop Dios jich ya yal: «Ta spisil te swocolic, ha nix hich la yaʼiy wocol» (kʼopona Isaías 63:7-9). Ta patil bael, te Jehová la yal ta swenta te j-alwanej Zacarías te kʼalal ya yichʼ utsʼinel te lum yuʼune jaʼ yak ta utsʼinel ya yaʼiy sba. Jich la yalbey te j-abatetik yuʼune: «Te machʼa ya spiquex, hich cʼohem te ya spicbe schʼuhlel jsit» (Zac. 2:8). ¡Chikan ta ilel te kʼax bayal skʼoplal ta yoʼtan Jehová te lum yuʼune!

5. Ala jun ejemplo te bin spasoj te Jehová ta skoltayel te j-abatetik yuʼun kʼalal ay swokolik.

⁵ Kʼalal ay swokolik te j-abatetik yuʼune, te Dios ma jaʼuknax te ya snaʼbey yoʼbolil sbaike, jaʼnix jich ay bin ya spas yuʼun ya skoltay. Kiltik jun ejemplo. Kʼalal mosoinbilik ta Egipto-a te israeletike, te Jehová la yaʼiybey te skʼuxul swokolike, jaʼ tijbot yoʼtan yuʼun ta yakʼel ta libre. Jich la yalbey te Moisés: «La jquilbeyix swocol te pueblo cuʼun [...] soc la jcaʼiybeyix yawic [...]. Ya jnaʼbe yoʼbolil sbahic yuʼun te swocolique. Ha yuʼun cohonix tal ta scoltayel loqʼuel ta scʼab te egipciohetic» (Éx. 3:7, 8). Jich bitʼil la snaʼtiklanbey yoʼbolil sbae la skoltay lokʼel ta mosoinel. Bayal jaʼbil ta patil kʼalal ayikix-a ta Kʼinal te albil skʼoplal ya yichʼik, ochintayotik yuʼun te skontratakik. ¿Bin la spas te Diose? Te Biblia ya yal te la «snaʼbe yoʼbolil sbahic» kʼalal la yaʼiybey yajkanik yuʼun te machʼatik utsʼinotik  sok te akʼbotik swokolik yuʼune. Te bitʼil la snaʼtiklanbey yoʼbolil sbaik tijbot yoʼtan ta skoltayel sok la yakʼ juesetik swenta ya xkoltayotik lokʼel ta skʼab te skontratakike (Juec. 2:16, 18).

6. Ala jun ejemplo te banti la yakʼ ta ilel te Jehová te la yichʼ ta wenta te bin yaʼiyel la yaʼiy sba te machʼa ma jichuk-a te bin snopoje.

⁶ Te Jehová ya yichʼ ta wenta te bin yaʼiyel ya yaʼiy sbaik te j-abatetik yuʼun manchukme ma jichuk te bin snopojike. Kiltik te bin kʼax ta stojol te j-alwanej Jonás. Te Dios la stikun ta Nínive ta yalel te ya yichʼik lajinele. Pero te ants winiketik la sujtes yoʼtanik, jaʼ yuʼun pasbotik perdon yuʼun te Diose. Jaʼ-abi ma la smulan te Jonás, «bayel ilin yuʼun» te ma kʼot ta pasel te albilkʼop la yale. Jaʼukmeto te Jehová ma ilin ta stojol te j-alwanej yuʼune, la skoltay ta sjeltayel te spensare (Jon. 3:10–4:11). Ta patil bael te Jonás kʼot ta yoʼtan te bin la spas te Dios sok akʼbot stsʼibay te bin kʼax ta stojol swenta ya skoltayotik ta ora ini (Rom. 15:4). *

7. ¿Bin ya yakʼ jnaʼtik ta jamal te bin spasoj te Jehová ta stojol te j-abatetik yuʼune?

⁷ Te bin la spas te Jehová ta stojolik sok ta stojol yantik j-abatetik ya yakʼ jnaʼtik ta jamal te ya snaʼbey yoʼbolil sba te j-abatetik yuʼune. Ya sta ta ilel te skʼuxul jwokoltik ta jujuntul. Ya snaʼbey sba ta lek «yoʼtan spisil ants-winiquetic» (2 Crón. 6:30). Ya xkʼot ta yoʼtan te bin yaʼiyel ya kaʼiy jbatik, te bin ay ta koʼtantik sok te bin ma xjuʼ kuʼuntik spasele. Sok jamal ya yalbotik ta maba ya yakʼ te ya kichʼtik tsajel te ma xkujch kuʼuntike (1 Cor. 10:13). ¿Mabal jichuk te ya yakʼ smukʼul koʼtantik te ya jnaʼtik ini?

8-10. ¿Bintik tijbot yoʼtan te Jesús swenta ay skʼoplal ta yoʼtan te yantike?

⁸ Kʼalal ay ta Balumilal-a te Jesuse la yakʼ ta ilel te mero ay skʼoplal ta yoʼtan te yantike. Ayniwan oxeb te bin tijbot yoʼtan ta spasele. Sbabial, jich bitʼil la kiltikixe la yakʼ ta ilel ta lek stalel te sTate. Kʼux ta yoʼtan te ants winiketike, jich bitʼil te Jehová. Manchukme bayal akʼbot stseʼelil yoʼtan spisil te bintik la skoltay ta spasel te sTate, jaʼ bayalxan kʼux ta yoʼtan te ants winiketike (Prov. 8:31). Te skʼuxul yoʼtan ta stojol te ants winiketik la yakʼ te ay skʼoplal ta yoʼtan te bin yaʼiyel ya yaʼiy sbaike.

⁹ Schebal, jich bitʼil te Jehová te Jesús ya xjuʼ ya snaʼ te bin ay ta yoʼtan te ants winiketike, jaʼ-abi ya skʼan ya yal te ya snaʼ bin yaʼiyel ya yaʼiy sbaik sok bin ya xtijbot yoʼtanik te bin ya spasike (Mat. 9:4; Juan 13:10, 11). Jaʼ yuʼun, kʼalal la yil te smeloj yoʼtanik sok pichʼil yoʼtanik la snaʼbey yoʼbolil sbaik, jaʼ tijbot yoʼtan ta yakʼbeyel smukʼul yoʼtanik (Is. 61:1, 2; Luc. 4:17-21).

¹⁰ Yoxebal, te Jesús kʼax ta skuxlejal cheʼoxeb wokoliletik te ya xkʼax ta stojolik te ants winiketike. Chʼi ta jun familia te maʼyukniwan bin ay lek yuʼunike. Te bitʼil la sjokin ta aʼtel te José te jaʼ stat-ae, la snop spasel tulan aʼtelil (Mat. 13:55; Mar. 6:3). Sokniwan la yaʼiybey skʼuxul te ay machʼa laj yuʼun, melel lajniwan te José te kʼalal mato xjajch yaʼtel ta scholel skʼop Dios-a te Jesuse. Jaʼnix jich kʼot ta yoʼtan bin yaʼiyel ya kaʼiy jbatik yuʼun kʼalal ay chaʼoxtul jfamiliatik te ma pajal schʼuunel koʼtantik soke (Juan 7:5). Spisil ini sok yantikxan te bin kʼax ta stojol, koltayot swenta ya xkʼot ta yoʼtan te swokolik sok te bin ay ta yoʼtan te ants winiketike.

11. ¿Bintik-utʼil chiknaj ta ilel ta lekxan te ya snaʼbey yoʼbolil sba yantik te Jesuse? (Ilawil te lokʼomba ta yelaw te rebista).

¹¹ Chiknaj ta ilel ta lekxan te ya snaʼbey yoʼbolil  sba yantik te Jesús te kʼalal la spas milagroetik. Maba sujbil la yaʼiy sba ta spasel, la spas ta skaj te ya snaʼbey yoʼbolil sba te machʼatik ay swokolike (Mat. 20:29-34; Mar. 1:40-42). Jnop kaʼiytik bin yaʼiyel la yaʼiy sba kʼalal la yikʼ lokʼel ta yolil ants winiketik jtul jkojkʼchikin swenta ya slekubtes sok te kʼalal la schaʼkuxajtesbey te jip jtul skerem-al jtul meʼba ants (Mar. 7:32-35; Luc. 7:12-15). Te Jesús la yaʼiybey swokol te ants winiketik ini sok la skʼan skoltaylan.

12. Jich bitʼil ya yal Juan 11:32-35, ¿bin-utʼil la yakʼ ta ilel Jesús te la snaʼbey yoʼbolil sba te Marta sok te María?

¹² Kʼalal laj te Lázaro, te Jesús la snaʼbey yoʼbolil sba te Marta sok María. Kʼalal la yil te skʼuxul swokolike «ocʼ» yuʼun (kʼopona Juan 11:32-35). Ma jaʼuknax okʼ yuʼun te ma xyilix te yamigoe, melel snaʼoj te ya schaʼkuxajtese. Jaʼ okʼ yuʼun te kʼux la yaʼiy te swokol te yamigatake.

13. ¿Bin yuʼun ya yakʼ smukʼul koʼtantik snopel te bitʼil la snaʼbey yoʼbolil sba te ants winiketik te Jesuse?

¹³ Ma jichukotik bitʼil te Jesús, melel maba tojotik. Pero bayal ya xtuun kuʼuntik snopel te bitʼil la snaʼbey yoʼbolil sba te ants winiketike. Kʼux ta koʼtantik te Jesuse ta swenta te bin yilel la yil te ants winiketike (1 Ped. 1:8). Ya yakʼ smukʼul koʼtantik te jaʼix Ajwalil yuʼun te Wentainel yuʼun Dios sok te nopol ya xbajtʼ slajin spisil te wokolile. Te bitʼil kuxin jich bitʼil chʼichʼbakʼet ta Balumilal, snujpʼ te jaʼ ya slajin te wokoliletik yakʼoj te wentainel yuʼun te Satanase. Kʼax tseʼel koʼtantik yuʼun te jaʼ Ajwalil kuʼuntik te machʼa ya «snaʼbotic yoʼbolil jbahtic yuʼun te mayuc quiptic» (Heb. 2:17, 18; 4:15, 16).

14. Ta swenta te bin ya yal Efesios 5:1, 2, ¿bin ya jkʼantik spasel?

¹⁴ Kʼalal ya kilbeytik skʼoplal te ejemplo yuʼun Jehová sok Jesús, ya stij koʼtantik ta yakʼel ta ilel te ya jnaʼbeytik yoʼbolil sba te yantike (kʼopona Efesios 5:1, 2). Melelnix-a te ma xjuʼ kuʼuntik snaʼel te bin ay ta yoʼtan te ants winiketike, pero ya xjuʼ ya jpastik tulan yuʼun ya xkʼot ta koʼtantik te bin yaʼiyel ya yaʼiy sbaike sok te bin ya xtuun yuʼunike (2 Cor. 11:29). Ma jichukotik bitʼil te balumilal ini te jaʼnax ya sle yutsil slekilike, jaʼ ya jkʼan ya jchʼuuntik spasel te bin la yal te Pablo: «Ma me atuqueluc nax yac ale awutsil alequil, ha me xalehic te haʼuc nix hich ay yutsil slequilic te yantique» (Filip. 2:4).

15. ¿Machʼatik-a te ya skʼan ya yakʼikxan ta ilel te ya snaʼbeyik yoʼbolil sba te yantike?

¹⁵ Te ansianoetik ta kongregasion jaʼ ya skʼan ya yakʼikxan ta ilel te ya snaʼbeyik yoʼbolil sba te yantike. Snaʼojik te ya yichʼik ichʼel ta kʼop yuʼun Jehová ta swenta te bitʼil ya skanantayik te tuminchijetik te akʼbil ta swentaike (Heb. 13:17). Swenta ya skoltayik te yermanotakike, ya skʼan ya xkʼot ta yoʼtanik te bin yaʼiyel ya yaʼiy sbaike. ¿Bin-utʼil ya yakʼik ta ilel?

16. 1) ¿Bin ya spasik te ansianoetik te ya xkʼot ta yoʼtanik te bin yaʼiyel ya yaʼiy sbaik te yantike? 2) ¿Bin yuʼun tulan skʼoplal te jich ya spasike?

¹⁶ Te ansianoetik te ya xkʼot ta yoʼtanik bin yaʼiyel ya yaʼiy sbaik te yermanotakike ya slokʼesik tiempo ta yilel. Ya spasbeyik jojkʼoyeletik, ya schʼam yaʼiyik sok slamalil yoʼtanik te bin ya yalik. Jaʼ tulanxan skʼoplal te jich ya spasik kʼalal jtul ermano ya skʼan ya slokʼes ta alel te bin ay ta yoʼtane pero ma snaʼ bitʼil ya yal (Prov. 20:5). Kʼalal te ansianoetik ya xlokʼ ta yoʼtanik yakʼbeyel te stiempoik te ermanoetike, talel kʼaxel ya stsak yip te smukʼul yoʼtan ya yaʼiy sbaike, te ya yamigoin sbaik sok te skʼuxul yoʼtanike (Hech. 20:37).

17. ¿Bin-a te kʼaxtoxan ya smulanik bayal ermanoetik ta stojol te ansianoetike? Ala junuk ejemplo.

¹⁷ Bayal ermanoetik ya yalik te bin ya smulanikxan ta stojol te ansianoetik, jaʼ te ay  skʼoplal ta yoʼtanik te bin yaʼiyel ya yaʼiy sbaik te yantike. ¿Bin yuʼun? Te Adelaide jich ya yal: «Maba tulan ya awaʼiy te ya akʼopone, melel anaʼoj te ya xkʼot ta yoʼtan te bin ya awalbeye». Jich ya yalxan: «Ya awil te ya xkʼot ta yoʼtanik te bin yaʼiyel ya awaʼiy aba ta swenta te bin ya yalik kʼalal ya akʼoponlane». Jtul ermano sok stseʼelil yoʼtan jich ya yal: «Te kʼalal yakon ta scholbeyel yaʼiy jwokol jtul ansiano, lokʼ yaʼlel sit yuʼun. Maʼyuk bin-ora ya xchʼay ta koʼtan te bin la spase» (Rom. 12:15).

18. ¿Bin-utʼil ya xjuʼ ya kakʼtik ta ilel te ya jnaʼbeytik yoʼbolil sba te yantike?

¹⁸ Ta melel, jpisiltik ya xjuʼ ya kakʼtik ta ilel te ya jnaʼbeytik yoʼbolil sba te yantike, ma jaʼuknax te ansianoetike. ¿Bintik-utʼil? Jpastik tulan te yakuk xkʼot ta koʼtantik te wokol ya xkʼax ta stojol te jfamiliatik sok te kermanotaktik. Ayuk skʼoplal ta koʼtantik te achʼix keremetik, te jchameletik, te machʼatik ayix yaʼbilalik sok te machʼatik ay machʼa lajem yuʼunike. Jojkʼoybeytik bin yilelik sok jchʼam kaʼiytik ta lek te bin ya yalbotike. Yakuk yaʼiyik te ya xkʼot ta koʼtantik ta smelelil te bin yak ta kʼaxel ta stojolike. Sok jap jbatik ta skoltayel te banti ya xjuʼ kuʼuntik spasele. Kʼalal jich ya jpastik ya kakʼtik ta ilel te smelelil kʼuxul oʼtanile (1 Juan 3:18).

19. ¿Bin yuʼun ma skʼan tulan koʼtantik kʼalal ya jkoltaytik te yantike?

¹⁹ Kʼalal ya jkoltaytik te yantike ma skʼan te tulan koʼtantike, melel yanyantik-a te bitʼil ya yaʼiy sbaik yuʼun te wokolile. Ay machʼatik maba wokol ya yaʼiyik te ya xkʼopojike, pero ay yantik te wokol ya yaʼiyike. Jaʼ yuʼun, manchukme ya jkʼan ya jkoltaytik, ma jojkʼoybeytik te bin ya xjuʼ xkʼexawik yuʼune (1 Tes. 4:11). Te kʼalal ay machʼa ya yalbotik te bin yaʼiyel ya yaʼiy sbae ayniwan ma akuerdo ayotik sok te bin ya yale. Pero ya skʼan ya xkʼot ta koʼtantik te jaʼ jich ya yaʼiy sba stukele. Jaʼ yuʼun, ya skʼan ya jchʼam kaʼiytik te skʼope sok mame orauknax ya xkʼopojotik (Mat. 7:1; Sant. 1:19).

20. ¿Bin ya xbajtʼ kiltik ta yan artikulo?

²⁰ Jich bitʼil ya kakʼtik ta ilel te ya jnaʼbeytik yoʼbolil sbaik te ermanoetik ta kongregasion, jaʼnix jich ya skʼan ya jpastik te kʼalal ya jcholtik skʼop Diose. ¿Bin-utʼil ya kakʼtik ta ilel te tʼujbil talelil ini kʼalal ya jcholtik skʼop Dios sok kʼalal ya kotsestik jnopojeletik? Ya xbajtʼ kiltik ta yan artikulo.