TE Jesús la yalbey jilel skʼoplal ta swenta te jnopojeletik yuʼun te ya stsobeyik bayal sit yaʼtelik ta slajibal kʼajkʼal (Mateo 9:37; 24:14). Te bin ya yal te textoetik-abi, chajpnax te bitʼil yak ta kʼoel ta pasel ta jun lugar te Transcarpatia sbiil te ay ta Ucrania. Ta oxpam lumetik te nopol yiloj sbaik soke, ay 50 kongregasionetik sok kʼaxem ta 5,400 jcholkʼopetik. * Ta melel, teme ta jun-nax ya kajtaytik te yajwal te oxpam lumetik-abi, ta chantul ants winiketik aye, jtul jaʼ testigo yuʼun Jehová.

¿Bin yilel stalel te ants winiketik ta lumetik-abi? Te hermano te Vasile sbiil jich ya yal: «Te ants winiketik liʼ ini ya yichʼik ta mukʼ te Biblia, bayal skʼoplal ta yoʼtanik te bin toj ta pasel, jun-nax ayik sok te sfamiliaike sok ya spasik tulan yuʼun ya sjech skoltay sbaik». Jich ya yalxan: «Ma spisiluk-ora akuerdo ayik sok te bintik jchʼuunejtike, jaʼukmeto te kʼalal ya kakʼbeytik yil jun texto ta Biblia, lek ya schʼam yaʼiyik».

Te scholel skʼop Dios ta jun lugar te banti ay bayal jcholkʼopetik, yanix yakʼ sitintayik te hermanoetik chaʼoxchajp wokolil te ma jichuk ya xkʼax ta stojol yantik. Jich bitʼil, ta jun kongregasion ay 134 jcholkʼopetik tey-a, jaʼukmeto jaʼnax ay 50 wol naetik te ya yichʼ cholbeyel skʼop Dios yaʼiyik. ¿Bin ya spasik ta swenta ini?

Bayal hermanoetik ya spasik tulan yuʼun ya xbajtʼik ta scholel skʼop Dios te banti maʼyuk bayal jcholkʼopetik. Jtul hermano te Ionash sbiil te 90 yaʼbilal jich ya yal: «Ta jkongregasiontik jtul jcholkʼop ay ta swenta scholbeyel yaʼiy skʼop Dios chaʼwol naetik ta jterritoriotik. Ta ora ini, liʼnix ya jchol skʼop Dios, pero te kʼalal mato batsʼejemon-ae, ya xboon ta scholel skʼop Dios ta kʼopil húngaro ta jun territorio te maʼyuk machʼa ya swentain te 160 kilometro snamalil». Bayal bintik ya spasik te hermanoetik swenta ya xjuʼ xbajtʼik ta lugaretik-abi. Te hermano Ionash jich ya yal: «Swenta jaʼ ya jtsak bael te trene, ta las cuatro ta sab ya xjajchon. Tey-abi, jaʼto las seis ta mal kʼajkʼal ya xlaj koʼtan ta scholel skʼop Dios te jaʼ yorail-a te ya sujt tal te trene. Ta cheb o oxeb buelta jich ya jpas ta jujun semana». ¿Jichbal ya yaʼiy te hermano te ma tojoluk te bin la spase? Jaʼnix te hermano ya yal: «Te bitʼil jich ya jchol skʼop Dios, bayal la yakʼbon stseʼelil koʼtan. Sok la jta te tʼujbil majtʼanil te juʼ kuʼun snojptesel ta skʼop Dios jun familia te namalto te banti ayik ta nainele».

Ya xkʼot ta oʼtanil te bitʼil chaʼoxtul hermanoetik te ayik ta kongregasionetik-abi ma xjuʼ te namal ya xbajtʼike, pero spisilik soknix te machʼatik ayix yaʼbilalike ya spasik tulan ta scholbeyel yaʼiy skʼop Dios te ants winiketik te ayik ta sterritorioik. Te bin lokʼem yuʼun, jaʼ te bayal machʼatik kʼotik ta Snaʼojibal slajel te Jesús ta 2017, te jayeb kʼotik ta spisil te oxpam lumetik-abi chebto buelta lokʼ yajtalul te bitʼil yajtalul te jcholkʼopetike, ya skʼan ya yal-abi te olil kʼot yajwal te lumetik. Ta melel, chikan te banti ya x-abatinotik, ayto bayal aʼtelil ta pasel ta swenta te Kajwaltike (1 Corintios 15:58).