TA BALUMILAL ini te nojel ta wokolil maba kʼun ta tael lamalkʼinal. Manchukme ya kaʼiytik jtebuk lamalkʼinal, manix ya xjuʼ te spisiluk-ora ya kaʼiytik lamalkʼinal. ¿Bintik smelelil te ya xtojobteswanik te ayik ta Biblia ya xjuʼ ya skoltayotik yuʼun lamaluk kʼinal ya kaʼiytik ta smelelil sok te jichuk spisil-orae? Sok, ¿bin-utʼil ya xjuʼ ya jkoltaytik yantik yuʼun ya staik-euk?

Swenta lamaluk kʼinal ya kaʼiytik ta smelelil, ya skʼan te kanantaybil sok te lek ya kaʼiy jbatike. Jaʼnix jich tulan skʼoplal te ayuk lekil kamigotaktike. Pero te bin bayalxan skʼoplale, jaʼ te ya kamigointik te Dios swenta spisiluk-ora ya kaʼiytik lamalkʼinal-a. Kiltik bin-utʼil ya xjuʼ ya jpastik.

Teme ya jchʼuuntik spasel te tojil mantaliletik yuʼun te Jehová sok te bintik smelelil te ya xtojobteswanik te ayik ta Biblia, ya kakʼtik ta ilel te ya smukʼulin koʼtantik sok te ya jkʼantik te lamaluk koʼtantik soke (Jeremías 17:7, 8; Santiago 2:22, 23). Kʼalal jich ya jpastik ya xnoptsaj ta jtojoltik te Dios sok ya yakʼbotik bendision, jaʼ te lamaluk koʼtantike. Te Isaías 32:17 jich ya yal: «Te bin ya yacʼ te bin stojil ta pasele, ha te lamal qʼuinal, soc te bin ya xlocʼ yuʼun te yaʼtel te bin stojil ta pasel, ha te cʼux-oʼtanil soc te jun yoʼtan spisil ora». Yuʼun-nix jich-a, teme sok spisil koʼtantik ya jchʼuunbeytik skʼop te Jehová, lamal koʼtantik yuʼun (Isaías 48:18, 19).

Swenta spisil-ora ya kaʼiytik lamalkʼinal, te Jehová jaʼnix jich ya yakʼbotik jun tʼujbil majtʼanil, jaʼ te chʼul espiritu (Hechos 9:31).

Kʼalal te Pablo la yalbey skʼoplal «te sit ya yacʼ te Espíritu», te lamalkʼinal la yakʼ ta yoxebal ta lista (Gálatas 5:22, 23). Jaʼ yuʼun, teme ya jkʼan ya kaʼiytik te smelelil lamalkʼinale, yame skʼan ya kakʼtik x-aʼtej ta jtojoltik te chʼul espiritue. Kiltik cheb bin ya xjuʼ ya jpastik swenta ya skoltayotik.

 Ta sbabial, ya skʼan ya xkʼayotik ta skʼoponel te sKʼop Dios (Salmo 1:2, 3). Kʼalal ya jnopilan ta koʼtantik bin ya yal te Bibliae, ya skoltayotik te chʼul espiritu yuʼun ya xkʼot ta koʼtantik bin yilel ya yil Jehová te bintik ya xkʼot ta pasel. Jich bitʼil, ya jnoptik bin ya spas yuʼun spisiluk-ora ya yakʼ ta ilel lamalkʼinal sok bin yuʼun kʼax tulan skʼoplal ta yoʼtan. Teme ya jpas ta jkuxlejaltik te bin ya jnoptik ta sKʼop, yame kaʼiytikxan lamalkʼinal (Proverbios 3:1, 2).

Ta schebal, ya skʼan ya jkʼopontik te Jehová sok te ya jkʼanbeytik te schʼul espiritu (Lucas 11:13). Te Jehová jich ya yalbey te machʼatik ya skʼanbeyik koltayel: «Te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel, ya me scanantaybeyex awoʼtanic soc apensaric ta scuenta te Cristo Jesús» (Filipenses 4:6, 7). Teme spisil-ora ya jkʼanbeytik schʼul espiritu te Jehová ayme bin ya yakʼbotik te jaʼnax ya yakʼbey te machʼatik yamigoinej sba sok ta leke, jaʼ te lamaluk koʼtantike (Romanos 15:13).

Te Biblia tsobol machʼa skoltayoj ta sjeltayel skuxlejalik sok te ayukik ta lamalkʼinal sok te Jehová, ta stojoliknix sok te spatxujkik. Kilbeytik skʼoplal chaʼtul te jich kʼax ta stojolike.

Ta kongregasionetik, ay machʼatik wojeychaʼjey tal oranax ya x-ilinik, jaʼukmeto ta ora ini ayxan skʼoplal ta yoʼtanik te yantike, ma x-ilinikix ta ora, lamalxan yoʼtanik sok ayxan yutsil yoʼtanik * (Proverbios 29:22). Kiltik te bin kʼot ta pasel ta swenta chaʼtul Testigoetik te la yichʼik koltayel swenta ya snaʼ skomel sbaik, jich lekub stalelik ta stojol yantik.

Ta skaj te ma lek stalel te David maba lek te skʼope. Te kʼalal mato ochem ta testigo yuʼun Jehová, ya smulan yalbeyel sfalta te yantik sok maba ya yichʼ ta mukʼ te sfamilia. Pero la sta skʼajkʼalel la yil te ya skʼan ya sjel te stalele. ¿Bin koltayot swenta lamaluk yoʼtan ta stojol yantik? Jich ya yal kaʼiytik: «Jajch jpas ta jkuxlejal te bintik smelelil ya xtojobteswanik te ayik ta Biblia. Jich jajch kichʼ jbakotik ta mukʼ sok te jfamilia».

Ta skaj te bin yilel la yichʼ chʼitesel te Rachel ma lek stalel la yakʼ ta ilel. Jich ya yal: «Ta ora ini wokolto  ya kaʼiy te ya jkom kilinbae, melel chʼion ta jun familia te spisil-ora ya stsak sbaik ta kʼop». ¿Bin koltayot swenta lamal yoʼtan ta ora ini? Jaʼnix ya yal kaʼiytik: «Spisil-ora ya jkʼanbey koltayel te Jehová».

Te bin kʼax ta stojol te David sok te Rachel, jaʼnax cheb ejemplo te ya yakʼ ta ilel te lek ya xkʼootik kʼalal ya jpas ta jkuxlejaltik te bintik smelelil ya xtojobteswanik te ayik ta Biblia sok te ya kakʼtik aʼtejuk ta jkuxlejaltik te chʼul espiritu. Manchukme kuxulotik ta chopol balumilal, chikan ta ilel te ya xjuʼ ya jmulanbeytik yutsil te lamal koʼtantik, te jun ayukotik sok jfamiliatik sok te kongregasion. Pero te Jehová jich ya yalbotikxan: «Lamaluc me awoʼtanic soc spisil ants-winiquetic» (Romanos 12:18). ¿Bin-utʼil ya xjuʼ kuʼuntik? Sok, ¿bin lekilal ya jtatik kʼalal ya jpastik tulan te lamaluk koʼtantik ta stojol yantik?

Te kʼalal ya jcholtik skʼop Dios, ya kikʼtik te ants winiketik ta yaʼiyel stojol te lek yachʼil kʼop yuʼun te Wentainel yuʼun Dios (Isaías 9:6, 7; Mateo 24:14). Ya yakʼbotik bayal stseʼelil koʼtantik te ay tsobol ya schʼuunik te lekil kʼop ini yuʼun lamalkʼinal. Ta swenta-abi, ma jichukix ya yaʼiy sbaik te ma snaʼik bin ya spasik o te ilinemik ta skaj spisil bin ya xkʼot ta pasel ta sjoyobalik. Ta ora ini, ay bin yakik ta smaliyel ta smelelil sok ya schʼuunik te tsitsel ini: «Jaʼ xale te lamal qʼuinale; atʼelina spasel» (Salmo 34:14, XCD).

Ta melel, ma spisilik ya smulanik te ya jcholbeytik yaʼiyik te skʼop Dios, manchukme ay jaʼnax jich ya spasik ta sjajchibal (Juan 3:19). Pero ya skoltayotik te chʼul espiritu yuʼun Dios swenta lamal koʼtantik ya juktik ta kʼop te ants winiketik sok te ya kichʼtik ta mukʼe. Jich ya jtʼuntik spasel te bin la yal te Jesuse: «Cʼalal ya xcʼohex tey ta na, patbeyahic yoʼtan. Teme lec yoʼtan te yajwal na, ya me xcʼoht ta stojol te lamal qʼuinal awuʼunique; yan teme ma ba lec yoʼtan, ya me suht tal ta atojolic te lamal qʼuinal awuʼunique» (Mateo 10:11-13). Kʼalal ya jpastik te bin la yale, lamal koʼtantik ya xlokʼotik bael ta na, jichniwan ya xjuʼ ya jkoltaytik ta patil te yajwal nae.

Te j-abatotik yuʼun Dios jaʼnix jich ya jletik lamalkʼinal kʼalal leknax ya jkʼopontik te machʼatik yichʼojik mukʼ yaʼtelik ta stojol ajwalil, manchukme ay ya skontrainik te kaʼteltik. Kiltik junuk ejemplo. Ta nail tal te ajwalil ta jpam nasion ta África maba lek ya yilotik sok maba ya yakʼbotik permiso yuʼun ya jpastik sNail Tsoblejetik tey-a. Swenta ya xchajpaj-a te kʼope, jtul hermano te kʼax ta misionero tey-a la yichʼ tikunel ta Londres (Inglaterra). Ta lum-abi, tey ay-a te machʼa yichʼoj mukʼ yaʼtel ta stojol te nasion yuʼun te África. Te hermano bajtʼ skʼopon yuʼun ya yalbey yaʼiy te maba ya jachtik kʼop te Testigootik yuʼun Jehová. ¿Bin kʼot ta pasel?

Te hermano jich ya yal: «Te kʼalal kʼoon la jta ta ilel bin yilel skʼuʼ spakʼ te ants ay ta yochibal ofisina, la jnaʼ bin tsʼumbalil talem, melel jnopojbey te skʼope. Jaʼ yuʼun la jpatbey yoʼtan ta skʼop. Chajp la yaʼiy sok la sjojkʼoybon bin kokel. Sok slekil koʼtan la kalbey te ya jkʼan ya jkʼopon te machʼa yichʼoj mukʼ yaʼtel. La skʼopon ta telefono, kʼalal lokʼ tal te winik la spatbon koʼtan ta skʼop. Ta patil la schʼam yaʼiy ta lek kʼalal la kalbey bin yilel te kaʼteltik te testigootik yuʼun Jehová».

Ta skaj te lamal yoʼtan kʼopoj te hermano sok te winik, lekubxan stalel ta jtojoltik. Ta patil bael, te ajwalil yuʼun te nasion ta África jajch yakʼ permiso ta spasel sNail Tsoblejetik. ¡Tseʼelnax yoʼtanik yuʼun te hermanoetike! Chikan ta ilel te bayal bin lek ya xlokʼ sok te ya jtatik lamalkʼinal kʼalal ya kichʼtik ta mukʼ te yantike.

Ta ora ini, te j-abatotik yuʼun Dios ayotik te banti ay lamalkʼinal. Ya xjuʼ te ya yaʼiyik lamalkʼinal te yantik teme ya jpastik tulan ta yakʼel ta ilel te talelil-abi te jaʼ jchajp sit yuʼun te chʼul espiritu. Pero te bin tulanxan skʼoplale, jaʼ te ya yakʼbotik bendision te Jehová sok ya jmulanbeytik yutsil te lamalkʼinal ta yachʼil balumilal ta sbajtʼelkʼinal (2 Pedro 3:13, 14).