Te bin-utʼil ya xkʼayotik ta yan kongregasion
«KʼALAL talon ta kongregasion ini, mero yak ta xiwel koʼtan yuʼun. Mato jnaʼoj-a teme ya jta kamigotak o teme lek ya yilonik te hermanoetike». Jich la yal te Allen * te yak ta abatinel ta yan kongregasion te 1,400 kilometro snamalil ta snae.
Teme baemat ta yan kongregasion jichniwan te yakat ta xiwel jtebuk-euke. ¿Bin ya xjuʼ ya skoltayat yuʼun ya xkʼayat-a? ¿Bin ya xjuʼ ya apas teme wokolxan yakat ta yilel te ya xkʼayat te bitʼil akuyoje? Manchukme ma baemat ta yan kongregasion, ¿aybal bin-utʼil ya xjuʼ ya akoltay te machʼatik julelikto ta akongregasione?
¿BIN YA XJUʼ YA APAS YUʼUN YA XKʼAYAT-A?
Kʼalal yan banti ya yichʼ stsʼunel jpejt teʼ wokol ya stsak lum. Swenta ma wokol ta ichʼel bael te banti ya yichʼ tsʼunel, jteb ma spisiluk ya yichʼ bojbeyel lokʼel te yisime. Ta patil ya skʼan ya schaʼtsak lum ta oranax te teʼe. Jaʼnix jich teme ya ajel akongregasion wokolniwan ya awaʼiy. Ta namey akongregasion jich kʼoematix-a bitʼil jpejt teʼ te stsakojix lum, melel bayal awamigotak sok kʼayematix tey-a te bitʼil ya x-abatinat ta stojol te Diose. Ta ora ini ya skʼan ya achaʼtsak lum kʼoem yuʼun ya xkʼayat ta yan kongregasion. ¿Bin ya xjuʼ ya skoltayat? Jaʼ te ya apas te bintik smelelil ya xtojobteswanik te ayik ta Biblia. Kiltik chaʼoxchajpuk.
Te machʼa spisil-ora ya skʼopon te sKʼop te Diose jich kʼoem «te bin utʼil teʼ te tsʼumbil ta tiʼ mucʼul-haʼ, te ya yacʼ sit ta yorahil soc ma xluhbaj te yaʼbinal; soc lec ya xcʼoht spisil bintic ya spas» (Salmo 1:1-3).
Jich bitʼil jpejt teʼ spisil-ora ya skʼan yaʼlel yuʼun yaxnax ta ilel-a, te j-abat yuʼun Dios ya skʼan spisil-ora ya stsak yip ta sKʼop Dios yuʼun jich tulan ya x-ayin te schʼuunel yoʼtane. Jaʼ yuʼun mame xa awijkʼitay skʼoponel te Biblia ta jujun kʼajkʼal, mame xa akom aba ta bael ta tsoblejetik sok ta spasel te yichʼel ta mukʼ Dios ta sjunal na sok te ya anop ta atukel te sKʼop Dios sok te junetik kuʼuntike. Julukme ta awoʼtan te ya skʼan te ma xa awijkʼitay spasel te bin apasoj talel ta yan akongregasion swenta yichʼoj yip-a te schʼuunel awoʼtan ta stojol te Jehová.
«Te machʼa ma pʼisbiluc nax ya yacʼ, ya xpʼohl bintic ay yuʼun; te machʼa ya yaʼbe te yane, ha nix ya xʼaʼbot» (Proverbios 11:25).
Yame yichʼxan yip awoʼtan sok jaʼ oranax ya xkʼayat ta kongregasion teme spisil-ora ya xlokʼat ta scholel te skʼop Diose. Te Kevin te yak ta abatinel ta ancianoil jich ya yal: «Te bin la skoltayon sok te kinam kʼalal kʼootik ta yan kongregasion, jaʼ te oranax ochotik ta precursor auxiliar». Jich la yalxan: «Oranax la jnaʼbeykotik sba te hermanoetik, te precursoretik sok te banti ya schol skʼop Dios te kongregasion». Yan hermano te Roger sbiil te bajtʼ ta yan kongregasion te 1,600 kilometro snamalil ta sna, jich ya yal: «Te bin lekxan ta pasel yuʼun ya xkʼayotik ta yan kongregasion, jaʼ te spisiluk-ora ya xlokʼotik ta scholel skʼop Dios. Jaʼnix jich ya xjuʼ ya awalbey te ancianoetik te ya xjuʼ xkoltaywanat chikan te banti ya skʼane, jich bitʼil skusel te sNail Tsoblej, skʼasesbeyel sdiscurso te machʼa ma juʼ yuʼune sok te ya ajap aba ta yikʼel bael ta tsoblejetik te machʼa ya skʼan koltayele. Teme ya yilik te hermanoetik te ya xkoltaywanate, oranax ya xkʼayik ta atojol».
«Jama awoʼtanic ec» (2 Corintios 6:13).
Kʼax tulan skʼoplal te ma chaʼoxtulnax hermanoetik ya kakʼbeytik yil skʼuxul koʼtantik. Kʼalal te hermana Melissa sok te sfamilia bajtʼik ta yan kongregasion bajtʼ ta yoʼtanik stael yachʼil yamigotakik. Te Melissa jich ya yal: «Ya jkʼopon jbakotik sok te hermanoetik
kʼalal mato xjajch te tsoblej sok te kʼalal ya xlaje. Jich bayal bin ya kalbey jbakotik sok te hermanoetik, ma jaʼuknax te ya kaltik talonme, boonme». Te bitʼil jich la spasik, oranax jil ta yoʼtanik sbiil te hermanoetike. Jaʼnix jich la yakʼik ta ilel slekil yoʼtanik ta stojolik, jich jun kʼotik sok. Te Melissa jich ya yalxan: «La kakʼbey jbakotik jnumerokotik yuʼun telefono sok te hermanoetik, jich ya xjuʼ ya skʼoponotik talel yuʼun ya yikʼotik teme ay bin ya spasik ta yichʼel ta mukʼ Dios o yuʼun sbujtsʼnax kʼinal».Teme wokol ya awil te ya xjajch akʼopon aba sok yantik, ya xjuʼ te ay bin kʼunkʼun ya xjajch apas nailuk. Jich bitʼil, ya xjuʼ xtseʼejinat jtebuk manchukme ta sjajchibal wokol ya awaʼiy. Teme ya xtseʼejinat manchukme jtebuk jich ay machʼatik ya xnoptsajik talel ta atojol. Ta melel te Biblia jich ya yal: «Te stseʼelil sit yelaw, ya yacʼ tseʼel-oʼtanil» (Proverbios 15:30). Te Rachel te namal bajtʼ te banti chʼie jich ya yal: «Jichnanix jtalel-a te ya xkʼexawone». Sok ya yalxan: «Ay wokol ya kaʼiy, jaʼukmeto ya jpas tulan yuʼun ya xkʼopojon sok te hermanoetik yuʼun te kongregasion te banti ayon ta ora ini. Te bin ya jpase, jaʼ te ya jle te machʼa jukul te maʼyuk machʼa yak ta kʼop soke. Jichniwan te jaʼnix jich ya xkʼexawe». ¿Jaxan teme jichnix ya apas-euk te ma jtuluknax machʼa ya akʼopon te kʼalal mato xjajch-a te tsoblej sok te kʼalal ya xlaje?
O jichniwan te kʼalal julelat-to-ae mero awoʼtanuk te bayal machʼa ya akʼan ya anaʼbey sbae. Jaʼukmeto, ya xjuʼ te jich ya xkʼot ta pasel te kʼunkʼun ma xa akʼanix snaʼbeyel sba yantik. Teme jich ya xkʼot ta atojole, yame skʼan ya apas tulan yuʼun ya ataxan awamigotak.
Kʼalal yan banti ya yichʼ tsʼunel jpejt teʼ wokol ya stsak lum, jaʼukmeto ta patil ya xlokʼ yachʼil yisim.
YA YICHʼ TIEMPO YUʼUN YA XKʼAYOTIK
Jich bitʼil ay chaʼoxpejt teʼetik te wokol ya stsakik lum te banti ya yichʼik tsʼunel, yanyantik bitʼil ya xkʼayik te machʼatik ya sjel skongregasionik. Teme jalix te julat ta jun kongregasion sok jich ya awaʼiy te mato kʼayemat yame skoltayat te bintik smelelil ya xtojobteswanik te ayik ta Biblia te ya kalbeytik skʼoplale.
«Ma me xluhbotic ta spasel te bin lec ta pasele, como ya me sta yorahil te ya jtsobetic sit, teme ma ba ya xpehcʼaj coʼtantique» (Gálatas 6:9).
Teme mato kʼayemate pasamexan tulan. Jich ya spasik bayal misioneroetik te baemik ta Pʼijubtesel yuʼun sKʼop Dios ta Galaad te tikunbilik bael ta yan nasion, bayal jaʼbil maba ya sujtik talel ta nasion te bantinix slumalike. Ta swenta-abi, jaʼ ya xkʼot ta yamigoik te hermanoetik ta skongregasionik sok ya spasik tulan yuʼun ya xkʼayik te banti kʼotike.
Te Alejandro bayal buelta baem ta nainel ta yantik lugar, jich yiloj te ma xjuʼ te kʼax oranax ya xkʼayotik ta yan lugar. Jich ya yal: «Te slajibal buelta te bootik ta yan lugar jich la yalbon te kiname: “¡Spisil te kamigotak ayik ta yan kongregasion!”». Tey-abi te hermano la sjultesbey ta yoʼtan te yinam te cheb jaʼbil ta nail jichnix la yal te kʼalal kʼotik ta yan kongregasion. Jaʼukmeto te cheb jaʼbil ayinik ta kongregasione, te yinam la spas tulan ta snaʼbeyel sba ta lek te hermanoetik, jich te machʼatik ma snaʼbey sba ta sjajchibal kʼax lek yamigotak kʼotik ta patil.
«Ma me hichuc xawal: ¿Bin yuʼun te ha lec xan te haʼbiletic cʼaxemiquix te bin utʼil ay ta ora ini? ma me xchihucat, como mayuc pʼijil-oʼtanil ta sjocʼoyel ini» (Eclesiastés 7:10).
Pasame tulan yuʼun ma xa apaj te kongregasion banti ayat ta ora ini sok te banti ayat-ae. Jichniwan te ya xkʼexawik ta kʼop te hermanoetik ta yachʼil akongregasion o jichniwan te jamal ya yalik te bin ya snopike. Chikan bin yilel stalelik, jaʼ bajtʼukme ta awoʼtan yilel te lekil taleliletik yuʼunike, jich te bitʼil ya akʼan te ya spasik-euk ta atojole. Ay hermanoetik te baemik 1 Pedro 2:17).
ta yan kongregasion ya staik ta ilel te puersa ya skʼan jich ya sjojkʼoybey sbaik: «¿Smelelilbal te kʼux ta koʼtan spisil te hermanoetike?» («Cʼanahic, hich me ya xʼaʼbotex» (Lucas 11:9).
Mame xa akom aba ta skʼanbeyel koltayel te Jehová. Jtul anciano te David sbiil jich ya yal: «Mame xa atukeltay aba». Sok ya yalxan: «Ay bintik jaʼnax ya xjuʼ ya jpastik teme jaʼ ya skoltayotik te Jehová. Jaʼ yuʼun kʼopona te Jehová ta swenta-abi». Te Rachel te la kalbeytikix skʼoplal jaʼnix jich kʼoem ta yoʼtan. Jich ya yal: «Teme ya kaʼiytik te mato kʼayemotik sok te hermanoetike, te joʼon sok te jmamlale ya kalbeykotik ta jamal te Jehová sok ya jkʼanbeykotik te yakuk skoltayotik ta yilel teme ay bin yak jpasbeltik te ya yakʼ namajuk ta jtojoltik te hermanoetike. Ta patil ya jpaskotik tulan yuʼun ya jokintikxan te hermanoetike».
Meʼil tatiletik, teme wokol yakik ta kʼayel te awal anichʼnabike lokʼesaik tiempo yuʼun pajal ya akʼoponik Dios yuʼun. Ya xjuʼ ay bin ya achapik yuʼun jich ya sjokin sbaik sok te machʼatik lek stalelik, jich ya akoltayik ta stael yachʼil yamigotakik.
KOLTAYA YANTIK YUʼUN YA XKʼAYIK
¿Bin ya xjuʼ ya apas yuʼun ya akoltay te machʼatik julelikto ta akongregasione? Pasa tulan ta yamigoinel kʼalalto ta sjajchibal. Nopa awaʼiy sok pasa te bintik ya akʼan te ya spasik ta atojol te jaʼukat julelat-to ta kongregasione (Mateo 7:12). Ya xjuʼ ya awikʼtiklan ta ana te kʼalal ya apasik te yichʼel te mukʼ Dios ta sjunal na o te kʼalal ya awilik te programa ta jujun u yuʼun te JW Broadcasting. Jaʼnix jich ya xjuʼ ya ajokinlan ta scholel skʼop Dios. Soknix ya xjuʼ ya awikʼtiklan ta weʼel ta ana, ta melel maniwan xchʼay ta yoʼtanik te slekil awoʼtan ta stojolike. ¿Aybal bin ya xjuʼ ya jpastikxan ta skoltaylanel?
Jtul hermano te Carlos sbiil jich ya yal: «Kʼalal julotik ta yan kongregasion, jtul hermana la yakʼbotik jun lista te ya yal bintik tienda pekʼel stojol ya xchonbajik. Bayal la skoltayotik». Te machʼatik talemik te banti yan yilel te kʼinale, lekniwan ya yilik te ya kakʼbeytik snopik bin kʼuʼul pakʼal ya xjuʼ ya stuuntesik ta kʼixin kʼinal, ta sikil kʼinal o te banti bayal jaʼal ya yakʼe. Teme ya acholbey yaʼiyik bin yilel skuxlejal te ants winiketik ta lugar o bintik ya schʼuunik ta srelijionik, ya xjuʼ ya akoltay yuʼun ya snaʼik scholel ta lek te skʼop Diose.
LEK BIN YA JTATIK KʼALAL YA JPASTIK TULAN
Te Allen te la kalbeytik skʼoplal ta sjajchibal, kʼaxemix jun jaʼbil te ay ta yachʼil skongregasion. Ta ora ini jich ya yal: «Ta sjajchibal bayal la jpas tulan ta snaʼbeyel sba te hermanoetike. Jaʼukmeto ta ora ini jich kʼoemikix bitʼil jfamilia, kʼax tseʼel koʼtan yuʼun». Jich bitʼil bajtʼ ta yan kongregasion ya yal te maba chʼayem yamigotak. Ta melel, bayalxan staoj sok jaʼnix jich bitʼil te yantik yamigotake spisilnanix-ora ya yamigoinlan-euk.
^ parr. 2 Ay yichʼoj jelel te biililetike.