1. ¿Bin yuʼun jnaʼojtik te ya skʼan ya xnoptsaj ta jtojoltik te Jehová?

 TE Jehová ya skʼan te yakuk xnoptsajotik ta stojol (Sant. 4:8). Ya skʼan te jaʼuk jDiostik, jTatik sok kamigotik. Ya sutbotik te j-oraciontik sok ya skoltayotik te kʼalal ya jsitintaytik wokoliletik. Jaʼnix jich ya snojptesotik sok ya skanantayotik ta swenta te organización yuʼun. Jaʼ yuʼun, ¿bin ya skʼan ya jpastik yuʼun ya xnoptsajotik ta stojol?

2. ¿Bin-utʼil ya xjuʼ ya xnoptsajotik ta stojol te Jehová?

² Ya xjuʼ ya xnoptsajotik ta stojol te Jehová kʼalal ya jpastik oración, ya jkʼopontik te Biblia sok ya jnopilan ta koʼtantik. Teme jich ya jpastik kʼux ya kaʼiy ta koʼtantik sok ya kaltik wokol ta stojol. Spisil-ora ya jchʼuunbeytik skʼop sok ya kalbeytik yutsil skʼoplal jich te bin-utʼil snujpʼ ya yichʼ pasel ta stojole (Apoc. 4:11). Kʼalal ya jnaʼbeytikxan sba ta lek te Jehová, ya kakʼxan smukʼul koʼtantik ta stojol sok te organización te yakʼoj yuʼun ya skanantayotik.

3. 1) ¿Bin-utʼil te Pukuj ya skʼan ya snamajtesotik ta stojol te Jehová? 2) ¿Bin ya skʼan ya jpastik yuʼun maʼyuk bin-ora ya kijkitaytik te Jehová sok te organización yuʼune? (Salmo 31:13, 14).

³ Te Pukuj ya skʼan ya snamajtesotik ta stojol te Jehová, kʼaxtoxan-a teme ay jwokoltik. ¿Bin-utʼil ya spas? Jaʼ te kʼunkʼun ya spejkʼan te smukʼul koʼtantik ta stojol te Jehová sok te organización yuʼun, pero ma xjuʼ ya stsalotik. Teme tulan schʼuunel koʼtantik sok teme jkʼaxel ya smukʼulin koʼtantik te Jehová, jaʼme jich maʼyuk bin-ora ya kijkitaytik te Jehová sok te organización yuʼune (kʼopona Salmo 31:13, 14).

4. ¿Bin ya kalbeytik skʼoplal ta artículo ini?

 ⁴ Ta artículo ini, ya kalbeytik skʼoplal oxchajp te bintik ya xkʼot ta pasel ta jkuxlejaltik te ya xjuʼ ya spejkʼan te smukʼul koʼtantik ta stojol te Jehová sok te organización yuʼune. ¿Bin-utʼil ya xjuʼ ya snamajtesotik ta stojol Jehová te wokoliletik-abi? Sok ¿bin ya xjuʼ ya jpastik yuʼun ya jtsaltik te Pukuje?

5. ¿Bin-utʼil ya xjuʼ xpejkʼaj te smukʼul koʼtantik ta stojol te Jehová sok te organización yuʼun, te kʼalal ya xkʼax jwokoltike?

⁵ Ayniwan baeltik ya kichʼtik kontrainel yuʼun te jfamiliatik o te ya jchʼaytik te kaʼteltike. Te kʼalal jich ya xkʼax ta jtojoltike, yaniwan xpejkʼaj te smukʼul koʼtantik ta stojol te organización yuʼun te Jehová sok ya xnamajotik ta stojol, melel yaniwan xchebaj koʼtantik te kʼalal ya kiltik te ya xjalaj bayal tiempo, te ma xchajpaj te jwokoltike. Te kʼalal jich ya yil te Pukuje ya xjajch yakʼ jnoptik teme yuʼunix kʼuxotik ta yoʼtan-a te Jehovae. Jaʼ ya skʼan te ya jnoptik te jaʼ smul te Jehová sok te organización yuʼun te bitʼil ayotik ta wokole. Jteb ma pajaluk jich kʼot ta pasel ta stojol chaʼoxtul israeletik te ayik ta Egipto. Ta nail la skuyik te Jehová la stsa te Moisés sok te Aarón, yuʼun ya xkoltayotik lokʼel ta mosoinel (Éx. 4:29-31). Pero la yakʼbeyik smulin te Moisés sok te Aarón te kʼalal akʼbotikxan swokolik yuʼun te faraone, jich la yalik : «Jaʼex amulic te bitʼil maʼyuquix jcʼoplaltic ta yoʼtan faraón soc te sjoʼtac ta ajwalile. Jaʼex la awacʼbeyic yatʼejib ta scʼabic cʼoem yuʼun ya smilotic a» (Éx. 5:19-20; 5:21, TZOXCH). ¡Kʼax mel-oʼtantik sba te jich la spasike! Teme ayix tal jaʼbil te ay awokole, ¿bin ya xjuʼ ya apas yuʼun ya smukʼulinxan awoʼtan te Jehová sok te organización yuʼune?

6. ¿Bin ya yakʼ jnoptik te bin kʼax ta stojol te Habacuc? (Habacuc 3:17-19).

⁶ Jambeya awoʼtan te Jehová sok akʼa aba ta koltayel yuʼun. Te j-alwanej Habacuc bayal wokol la sta. Jich yilel te la skuy te maʼyuk skʼoplal ya x-ilot yuʼun te Jehová. Jaʼ yuʼun la yalbey spisil te bin yaʼiyel ya yaʼiy sba. Jich la yal: «Jehová, ¿bin to ora te ma ba yac ajacʼbon caw […]? ¿Bin yuʼun […] te yac awaʼbon quil wocol?» (Hab. 1:2, 3). Te Jehová la yakʼbey sujtib te s-oración te Habacuc (Hab. 2:2, 3). Te Habacuc la schaʼta stseʼelil yoʼtan kʼalal la snopilan ta yoʼtan bin-utʼil te Jehová la skoltay te lum yuʼune. La schʼuun yoʼtan te ay skʼoplal ya x-ilot yuʼun te Jehová sok te ya xkoltayot ta sitintayel biluk wokolil (kʼopona Habacuc 3:17-19). ¿Bin ya yakʼ jnoptik? Kʼalal ya xkʼax awokol, albeya Jehová te bin yaʼiyel ya awaʼiy aba sok akʼa aba ta koltayel yuʼun. Yame xjuʼ ya schʼuun awoʼtan te ya yakʼbat yip awoʼtan te Jehová swenta ya xkujch awuʼun te awokole. Jichme ya stsakxan yip te schʼuunel awoʼtan, kʼalal ya awil te bin-utʼil ya skoltayate.

7. ¿Bin albot yuʼun jtul sfamilia te Shirley sok bin koltayot yuʼun ya smukʼulinxan yoʼtan te Jehová?

⁷ Mame xa akom aba ta spasel te bin ya yakʼbey yip te schʼuunel awoʼtane. Jaʼ te bin koltayot jtul hermana te Shirley sbiil te ay ta Papúa Nueva Guinea te kʼalal kʼax swokole. b Te sfamilia maʼyuk stakʼin sok ay baeltik wokol ya yaʼiyik stael te bin ya sweʼike. Jtul sfamilia kʼan pejkʼanbotuk te smukʼul yoʼtan ta stojol te Jehová kʼalal jich albot: «Ya awal te yak ta skoltaybelat te chʼul espíritu yuʼun Dios. Pero jich ya kil te ma skoltayojate, melel  pobreexto. Yakat ta schʼayel te atiempo ta scholel skʼop Dios». Te Shirley ya yal te ay baeltik tal ta yoʼtan teme yuʼun-nanix yak ta koltayel yuʼun te Jehová soknix teme yak ta koltayel-euk te sfamiliae, jich ya yal: «Oranax la kalbey te Jehová te bin yaʼiyel la kaʼiy jba. La jkʼopon te Biblia sok te publicacionetik, ma la jkom jba ta scholel skʼop Dios sok ta tsoblejetik». Te Shirley oranax la sta ta ilel te yak ta koltayel yuʼun Jehová te sfamilia, melel maba lajemik ta wiʼnal sok tseʼel yoʼtanik. Jich ya yal: «La kil te la sjakʼbon jkʼop te Jehová» (1 Tim. 6:6-8). Teme maba ya akom aba ta spasel te bin ya yakʼbey yip te schʼuunel awoʼtan, maba ya snamajtesat ta stojol Jehová te wokoliletik sok te bintik ya xjuʼ ya schebajtesbat awoʼtane.

8. ¿Bin ya xjuʼ ya yichʼik pasbeyel te hermanoetik te yichʼoj yaʼtelik ta organización?

⁸ Ta swenta te redes sociales, te televisión, te radio o yantikxan, te jkontrataktik spukojik ta alel lotil o ya yakʼik ta naʼel te bin ma stojiluk ta stojol te hermanoetik te yichʼoj yaʼtelik ta organización yuʼun te Jehová (Sal. 31:13). Ay chaʼoxtul hermanoetik akʼbot smulinik spasel te bin chopol sok ay yichʼojik chukel. Jteb ma jichuk kʼot ta pasel ta sbabial siglo. Te jpuk-kʼop Pablo la yichʼ lebeyel smul sok la yichʼ chukel. ¿Bin la spasik te jchʼuunjeletik?

9. ¿Bin la spasik chaʼoxtul jchʼuunjeletik kʼalal la yichʼ chukel te jpuk-kʼop Pabloe?

⁹ Ay chaʼoxtul jchʼuunjeletik la yijkitayik te jpuk-kʼop Pablo te kʼalal la yichʼ chukel ta Roma (2 Tim. 1:8, 15). ¿Jaʼbal kʼexawik yuʼun te la yichʼ naʼbeyel sba te Pablo jich te bin-utʼil machʼa ay bin chopol spasoje? (2 Tim. 2:8, 9). ¿Yuʼunbal la xiʼik te ya yichʼik chukel-euke? Chikan te bin la snopik, kʼax ma lekniwan la yaʼiy sba te Pablo, melel bayal kʼaxem swokol sok yakʼoj skuxlejal ta stojolik (Hech. 20:18-21; 2 Cor. 1:8). Mame ayuk bin-ora jich ya jpastik te bin-utʼil la spasik te jchʼuunjeletik te la yijkitayik jilel te Pablo te kʼalal ya skʼan koltayel-ae. ¿Bin ya skʼan ayuk ta koʼtantik  kʼalal ya yichʼik kontrainel te hermanoetik te yichʼoj yaʼtelike?

10. ¿Bin ya skʼan ayuk ta koʼtantik te kʼalal ya yichʼik kontrainel te hermanoetik te yichʼoj yaʼtelik sok bin yuʼun?

¹⁰ Ayuk ta koʼtantik te bin yuʼun sok machʼa-a te ya skontrainotike. Ta 2 Timoteo 3:12 jich ya yal: «Spisil te machʼatik ya skʼan ya yichʼik ta mukʼ Dios sok spisil yoʼtanik ta skuxlejalik te jun ayik sok te Cristo Jesús jaʼnix jich yame yichʼik kontrainel-euk». Jaʼ yuʼun ma yanuknax ya kiltik-a te jaʼ stʼojanoj sit te Satanás ta stojol te hermanoetik te yichʼoj yaʼtelike. Te bin ya skʼane, jaʼ te manchuk jun yoʼtanik ta stojol te Jehová sok te yakuk x-och xiwel ta koʼtantike (1 Ped. 5:8).

11. ¿Bin ya yakʼ jnoptik te bin kʼax ta stojol te Onesíforo? (2 Timoteo 1:16-18).

¹¹ Junuk koʼtantik ya jkoltaytik te hermanoetik te yichʼoj yaʼtelike (kʼopona 2 Timoteo 1:16-18). Ta sbabial siglo jtul jchʼuunjel te Onesíforo sbiil, ay bin lek la spas te kʼalal chukul-a te Pabloe. Te Pablo jich la yal ta stojol: «Maba kʼexaw ta jtojol te bitʼil chukulon ta cadenae». Te Onesíforo maba la skom sba ta sleel te Pablo sok la yakʼbey koltayel te kʼalal la stae. ¡La yakʼ skuxlejal ta stojol! ¿Bin ya yakʼ jnoptik? Mame xkakʼtik te ya skomotik te xiwel yuʼun ya jkoltaytik te hermanoetik te yakik ta kontrainele. Pasa tulan yuʼun ya akoltaybey skʼoplal sok akʼtiklanbeya koltayel (Prov. 17:17). Jaʼme ya skʼanik te ya kakʼbeytik yil skʼuxul koʼtantik sok te yakuk jkoltaytike.

12. ¿Bin ya yakʼ jnoptik te bin ya spasik te hermanoetik ta Rusia?

¹² ¿Bin ya spasik te hermanoetik ta Rusia kʼalal ya yichʼik chukel te yermanotakike? Kʼalal ay chaʼoxtulik ya yichʼik ikʼel bael ta stojol te juez, bayal hermanoetik ya xkʼotik tey-a yuʼun ya yakʼbeyik te koltayel. ¿Bin ya yakʼ jnoptik? Teme ya yichʼik lebeyel smul te hermanoetik te yichʼoj yaʼtelik, teme ya yichʼik chukel o kontrainel, mame xiwat. Pasa oración ta stojolik, kanantaybeya te sfamiliaik sok lea te bin-utʼil ya akoltaylan (Hech. 12:5; 2 Cor. 1:10, 11).

13. ¿Bin-utʼil ya yakʼ xpejkʼaj te smukʼul koʼtantik ta stojol te Jehová sok te organización yuʼun kʼalal ya kichʼtik labanele?

¹³ Ayniwan chaʼoxtul jfamiliatik te ma Testigouk, te joʼtaktik ta aʼtel o ta escuela ya slabanotik ta swenta te ya jcholtik skʼop Dios o te ya jchʼuuntik spasel te mantaliletik yuʼun te Jehová (1 Ped. 4:4). Ayniwan jich ya yalbotik: «Lek ya kilat te jaʼate, pero ma jmulanbat te areligione». Ayniwan machʼatik ma lek ya yilik te bin-utʼil ya kiltik te machʼatik yichʼojik lokʼesel ta organización, jaʼ yuʼun yaniwan yalbotik te ma kʼux ta koʼtantik te ants winiketike. Yaniwan xjuʼ ya x-och ta koʼtantik te bin ya yalike sok jichniwan ya jnoptik: «Jich ya kil te bayal bin ya skʼanbon te Jehová sok kʼax tulan te mantaliletik ya yakʼ te organización yuʼune». Teme jich yak ta kʼaxel ta atojol, ¿bin ya xjuʼ ya apas yuʼun ma xnamajat ta stojol te Jehová sok te organización yuʼune?

14. ¿Bin ya skʼan ya jpastik teme ay machʼatik ya slabanotik yuʼun te ya jchʼuuntik te mantaliletik yuʼun te Jehová? (Salmo 119:50-52).

¹⁴ Kakʼ ta koʼtantik schʼuunel te mantaliletik yuʼun te Jehová. Te Job spisil-ora la schʼuun te mantaliletik yuʼun te Jehová manchukme la yichʼ labanel. Jtul lotil yamigo kʼan akʼbotuk schʼuun te maʼyuk skʼoplal ta yoʼtan Dios teme ya schʼuun o maʼuk te mantaliletik yuʼune (Job 4:17, 18; 22:3). Te Job ma la schʼuun te lotil-abi,  melel snaʼoj te jaʼ stojil te mantaliletik yuʼun te Jehová ta swenta te bin lek sok te bin ma lek, sok la schʼuun spasel sok spisil yoʼtan. Ma la yakʼ te chebajtesbot yoʼtane (Job 27:5, 6). ¿Bin ya yakʼ jnoptik? Ma xkakʼtik te ya schebajtes koʼtantik ta schʼuunel te mantaliletik yuʼun te Jehová manchukme ya kichʼtik labanel. Ilawil bin yilel te akuxlejal ta swenta te ya achʼuun spasele. ¿Mabal jichuk te ataoj lekilal yuʼune? Koltaybeya skʼoplal te organización, melel jaʼ ya schʼuun te mantaliletik yuʼun te Dios. Teme jich ya apase, mame ayuk bin-ora ya awichʼ xatel ta stojol te Jehová, manchukme ya slabanat te ants winiketik (kʼopona Salmo 119:50-52).

15. ¿Bin yuʼun te Brizit kujch yuʼun te labanot yuʼun te sfamiliae?

¹⁵ Kilbeytik skʼoplal te hermana Brizit, te ay ta India. Ta swenta te jaʼ Testigo, la yichʼ labanel yuʼun te sfamilia. Ta 1997 la yichʼ jaʼ sok jun tiempo ta patil te smamalal te ma Testigouk, la schʼay te yaʼtele. Jich yuʼun te smamalal la yal te ya xbajtik ta kuxinel te banti ay te smeʼ stat, te ayik ta yan lugar. Pero te Brizit batsʼejxan te swokole. Ta skaj te matoba staoj yaʼtel-a te smamalale, jajch ta aʼtel yuʼun ya xjuʼ ya smakʼlin-a te sfamiliae. Te congregación te nopol ay tey-ae ay 350 kilómetro snamalil. Ta swenta te jaʼ Testigoe, jajch ta kontrainel yuʼun te sfamilia te smamalale. Tulan-a te kontrainel, jaʼ yuʼun bajtik ta yan lugar. Ta patil ay bin yan-nax kʼot ta pasel-a, jaʼ te laj te smamalal. Ta patil te yantsil-al te aytonax 12 yaʼbilal laj ta skaj te cancere. Ma jaʼuk nax-abi, te sfamilia te Brizit la yal te jaʼlaj smul spisil te wokoliletik yak ta kʼaxel ta stojolike, sok albot te ma jichuk kʼot ta pasel ta stojolik, te manchuk och ta testigo yuʼun Jehová. Pero la smukʼulin yoʼtan te Jehová sok nopol la yakʼ sba ta stojol te organización.

16. ¿Bintik bendición la sta te Brizit te bitʼil nopol la yakʼ sba ta stojol te Jehová sok te organización yuʼun?

¹⁶ Te bitʼil te Brizit namal yiloj te sNail Tsoblej, albot yuʼun te superintendente yuʼun circuito te yakuk schol skʼop Dios te banti yak ta kuxinel sok te yakuk spas te  tsoblejetik ta sna. Ta nail wokol la yaʼiy spasel, pero la schʼuun, jajch schol skʼop Dios, la spas te tsoblejetik ta sna sok te yichʼel ta mukʼ Dios sok te sfamilia. ¿Bin lek lokʼ yuʼun-a? Te Brizit bayal machʼa jajch snojptes ta Biblia, sok bayal machʼatik la yichʼik jaʼ. Och ta precursora regular ta 2005. Bayal bin lekilal la sta te la smukʼulin yoʼtan te Jehová sok te jun yoʼtan ta stojol te organización. Te achʼixetik yuʼun, jun yoʼtanik ta stojol te Jehová sok ayix cheb congregación te banti yak ta kuxinele. Te Brizit snaʼoj ta lek te jaʼ akʼbot yip yuʼun te Jehová yuʼun ya xkujch yuʼun te swokol sok te labanele.

17. ¿Bin ya skʼan ayuk ta koʼtantik spasel?

¹⁷ Te kʼalal ya jta jwokoltike, te Satanás ya skʼan te ya jkuytik te ya yijkitayotik te Jehová sok te ya jta jwokoltik teme ya jkoltaytik te organización yuʼune. Kʼalal ay bin ya x-akʼbot smulinik, ya yichʼik kontrainel o ya yichʼik chukel te hermanoetik te yichʼoj yaʼtelik, te Satanás jaʼ ya skʼan te ya x-och jxiweltike. Pero ya jnaʼtikix te bintik ya stuuntes te Satanás, jaʼ yuʼun ma xkakʼ jbatik ta loʼlayel (2 Cor. 2:11). Jpʼajtik ta jkʼaxel te bintik lotil ya yal sok junuk koʼtantik ta stojol te Jehová sok te organización yuʼune. Ayuk ta koʼtantik te maʼyuk bin-ora ya yijkitayotik te Jehová (Sal. 28:7). Jaʼ yuʼun, mame xkakʼtik te ay bin ya xatotik ta stojol te Jehová (Rom. 8:35-39).

18. ¿Bin ya kilbeytik skʼoplal ta yan artículo?

¹⁸ Ta artículo ini la kalbeytik skʼoplal te wokoliletik ya xkʼot ta pasel ta jkuxlejaltik, te ya yakʼ ta prueba te smukʼul koʼtantik ta stojol te Jehová sok te organización yuʼun. Pero ta congregación jaʼnix jich ya xjuʼ ya jtatik yantik wokoliletik. ¿Bin-utʼil ya xjuʼ ya jsitintaytik? Ya kilbeytik skʼoplal ta yan artículo.