1. ¿Bin-a te jnaʼojtik te j-abatotik yuʼun Dios, sok bin-a te schʼuunoj koʼtantike?

 MA YANUKNAX ya kiltik te ay ants winiketik ya skontrainotik kʼalal ya jcholtik skʼop Dios, sok kʼaxtoniwan jich ya spasik ta pajel chaʼbej (Dan. 11:44; 2 Tim. 3:12; Apoc. 16:21). Pero schʼuunoj koʼtantik te ya skoltayotik te Jehová. ¿Bin-utʼil ya jnaʼtik? Melel spisil-ora skoltayoj te j-abatetik yuʼun swenta ya sjuʼtesik ta pasel te aʼtelil akʼbilik ta swentaike, manchukme kʼax wokol. Yuʼun ya jnaʼtik te jichnix-ae, kiltik te bin kʼax ta skuxlejal te j-alwanej Ezequiel, te la scholbey skʼop Dios te judioetik te ikʼotik bael ta Babilonia.

2. 1) ¿Bin yilel stalel te judioetik la yal te Jehová te la yichʼik cholbeyel skʼop Dios yuʼun te Ezequiel? (Ezequiel 2:3-6). 2) ¿Bin ya kilbeytik skʼoplal ta artículo ini?

² ¿Bin yilel stalel te ants winiketik te la scholbey skʼop Dios te Ezequiel? Te Jehová la yal ta stojol te judioetik te «stoyoj sbahic», te «tulan sit yelawic» sok «tulan yoʼtanic». Kʼax chopolik te jich kʼoemik bitʼil chʼixetik sok kʼax xiʼbantik sbaik te jich kʼoemik bitʼil tseketik o escorpionetik. Jaʼ yuʼun te Jehová jich bayal buelta la yalbey te Ezequiel: «Ma xaxiʼ» (kʼopona Ezequiel 2:3-6). ¿Bin yuʼun juʼ spasbel te Ezequiel te bin akʼbot ta swentae? Sbabial, jaʼ tikunot yuʼun te Jehová. Schebal, akʼbot yip yuʼun te chʼul espíritu. Yoxebal, spisil-ora la skʼopon te skʼop Diose. ¿Bin-utʼil koltayot–abi sok bin-utʼil ya skoltayotik ta ora ini?

3. ¿Binwan tijbot yoʼtan te Ezequiel, sok bin-utʼil akʼbot snaʼ yuʼun Jehová te ya xkoltayote?

³ Te Jehová jich la yalbey te Ezequiel: «Ya jticonat bahel» (Ezeq. 2:3, 4). Jaʼ-abi bayalniwan akʼbot smukʼul yoʼtan. Ya jnaʼtik te jul ta yoʼtan te bin la yalbey te Moisés sok te Isaías kʼalal tsaotik yuʼun ya x-ochik ta j-alwanejetik yuʼun (Éx. 3:10; Is. 6:8). Jaʼnix jich, te Ezequiel snaʼoj te ya skoltay  Jehová te j-alwanejetik yuʼun, swenta ya spasik te bin wokol ya x-akʼbotik ta swentaike. Jaʼ yuʼun te kʼalal albot cheb buelta yuʼun te Dios «ya jticonat bahel», snaʼoj te jaʼ ya xkoltayot yuʼune. Jaʼnix jich ta libro yuʼun Ezequiel bayal buelta jich ya jtatik: «Tal ta jtojol te scʼop Jehová» (Ezeq. 14:2). Sok bayal buelta ya yal «tal ta jtojol te scʼop Jehová» yan buelta (Ezeq. 6:1). Jaʼ yuʼun te j-alwanej snaʼoj ta lek te jaʼ tikunot yuʼun te Jehová. Jaʼnix jich te bitʼil jaʼ sacerdote te stat, akʼbot snop te spisil-ora ya skoltay Jehová te j-alwanejetik yuʼune. Te Jehová jich la yalbey te Isaac, te Jacob sok te Jeremías: «Joquinejat» (Gén. 26:24; 28:15; Jer. 1:8).

4. ¿Bin kʼopetik te akʼbotniwan smukʼul yoʼtan te Ezequiel?

⁴ ¿Bin yilel la yilik te israeletik te bin la yichʼik albeyel? Te Jehová jich la yalbey te Ezequiel: «Te sna Israel ma ba ya scʼan ya yaʼiybat acʼop, como ma scʼan ya yaʼiybonic te jcʼope» (Ezeq. 3:7). Kʼalal la spʼajik te j-alwanej, jaʼ yakik ta spʼajel te Jehová. Te kʼopetik-abi akʼbotniwan slamalil yoʼtan te Ezequiel, melel ma yuʼunuk chopol j-alwanej te kʼalal pʼajot yuʼun te ants winiketik. Jaʼnix jich, te Jehová la yakʼbey snaʼ te kʼalal ya xkʼot ta pasel te bin ya yale, te judioetik ya snaʼik te ayin «jtuhl jalwanej ta yohlilic» (Ezeq. 2:5; 33:33). Ya jnaʼtik ta lek te kʼopetik-abi, akʼbot smukʼul yoʼtan te Ezequiel yuʼun ya sjuʼtes ta pasel te bin akʼbot ta swentae.

5. ¿Bin yuʼun ya yakʼ smukʼul koʼtantik te bin ya yal Isaías 44:8?

⁵ Ya yakʼ smukʼul koʼtantik te jaʼ Jehová te machʼa ya stikunotike. Sok jaʼnix ya yakʼbotik te mukʼul majtanil te ya  x-ochotik ta testigo yuʼune (Is. 43:10). Jich te bin-utʼil te Ezequiel albot yuʼun te Jehová «ma me xiwat», te joʼotik jich ya yalbotik: «Mame xnijk awoʼtanik». ¿Bin yuʼun ma skʼan ya jxiʼtik te machʼatik ya skontrainotik? Melel jich bitʼil kʼax ta stojol te Ezequiel, jaʼ Jehová te machʼa ya stikunotik sok jaʼ te machʼa ya skoltayotik (kʼopona Isaías 44:8).

6. 1) ¿Bin-utʼil ya yakʼ jnaʼtik te ya skoltayotik te Jehová? 2) ¿Bin ya yakʼ smukʼul koʼtantik sok ya stij koʼtantik?

⁶ Te Jehová ya yalbotik te ya skoltayotike. Jich bitʼil te kʼalal mato yaloj: «Haʼex testigohex cuʼun». Jich la yal: «Te cʼalal ya xcʼaxat ta haʼetic, hoʼon ya joquinat; te cʼalal ya xcʼaxat ta mucʼul-haʼetic, ma ba ya smulat. Cʼalal ya xcʼaxat ta cʼahcʼ, ma ba ya xchicʼat; ma ba ya spetat te yat cʼahqʼue» (Is. 43:2). Te kʼalal ya jcholtik skʼop Dios, ay baeltik ya jtatik wokoliletik te jich kʼoemik te bitʼil mukʼul jaʼ sok ya jsitintaytik wokoliletik te jich kʼoemik bitʼil kʼajkʼ. Pero ta swenta te koltayel yuʼun Jehová maba jkomoj jbatik ta scholel skʼop Dios (Is. 41:13). Jaʼnix jich ya xkʼax ta jtojoltik te bin kʼax ta stojol te Ezequiel: jteb ma spisiluk te ants winiketik ya spʼajik te bin ya kalbeytike. Pero te kʼalal ya spʼajotike maba ya skʼan ya yal te chopol testigootik yuʼun Dios. Ya yakʼ smukʼul koʼtantik sok ya stij koʼtantik te ya kakʼbeytik stseʼelil yoʼtan te Jehová teme maba ya jkom jbatik ta scholel te skʼop Diose. Te jpuk-kʼop Pablo jich ya yal: «Ta jujuntul ya yichʼik akʼbeyel smajtanik jaʼ chikan te bin-utʼil aʼtejik» (1 Cor. 3:8; 4:1, 2). Jtul hermana te bayalix jaʼbil yak ta abatinel jich bitʼil precursora jich ya yal: «Ya yakʼbon stseʼelil koʼtan snaʼel te ya smajtantes Jehová teme ya jpastik tulane».

7. ¿Bin yaʼiyel la yaʼiy sba te Ezequiel kʼalal la snopilan ta yoʼtan te najalsitil la yile? (Ilawil te dibujo ta yelaw te revista).

⁷ Te Ezequiel la yil te bayal yip te chʼul espíritu yuʼun Dios. Ta jun najalsitil la yil bin-utʼil te chʼul espíritu yak ta aʼtel ta stojol te chʼul-abatetik sok ya snikik te yok te carro yuʼun Jehová (Ezeq. 1:20, 21). Jaʼnix ya yalbotik te bin yaʼiyel la yaʼiy sba: «Te cʼalal la jquil, la jpahcan jba cʼalal ta lum». Chamnax yoʼtan sok la spajkan sba ta lum yuʼun (Ezeq. 1:28). Kʼalal la snopilan ta yoʼtan te najalsitil-abi, la schʼuunxan yoʼtan te ya xjuʼ yuʼun spasel te aʼtelil akʼbote ta swenta te koltayel yuʼun te chʼul espíritu yuʼun Dios.

8, 9. 1) ¿Bin mantal akʼbot te Ezequiel yuʼun te Jehová? 2) ¿Bin la spasxan te Jehová yuʼun ya yakʼbey yip te Ezequiel?

⁸ Te Jehová jich la yalbey ta mantal te Ezequiel: «Snichʼanat winic, tehcʼana aba, ay bin ya calbat». Te bin albot ta mantal sok te chʼul espritu, jaʼ koltayot swenta ay yip yoʼtan. Jich la stsʼibay: «Och ta coʼtan te espíritu, la yacʼ tehcʼajucon» (Ezeq. 2:1, 2). Ta patil sok te kʼalal la schol skʼop Dios, te «scʼab Jehová» —te jaʼ te schʼul espíritu— tojobtesot yuʼun (Ezeq. 3:22; 8:1; 33:22; 37:1; 40:1). Te chʼul espíritu-abi, akʼbot yip te Ezequiel yuʼun ya scholbey skʼop Dios te judioetik te «tulan sit yelawic soc macal yoʼtanic» (Ezeq. 3:7). Te Jehová jich la yalbey: «La jcacʼ te tulan ya xcʼoht asit awelaw ta stojol te sit yelawique. Hich stulanil la jcaʼbat asit awelaw te bin utʼil stulanil te diamante-ton, te cʼax hich stulanil a te bin utʼil yantic tonetic. Ma xaxiʼ, ma xiwat ta stojolic» (Ezeq. 3:8, 9). Jich kʼoem te yak ta albeyel yuʼun te Jehová: «Ma xchebaj  awoʼtan ta skaj te tulan yoʼtanike. Joʼon ya kakʼ te ayuk awipe».

⁹ Ta yorail-abi, te schʼul espíritu te Dios la yikʼ bael te Ezequiel te banti ya skʼan ya schol skʼop Diose. Jich la stsʼibay: «Tulan stsacojon a te scʼab Jehová». Te j-alwanej jun semana kʼot ta yoʼtan te bin swentail te bin ya xbajt yakʼ ta naʼele (Ezeq. 3:14, 15). Ta patil, te Jehová la yalbey te akʼa bajtuk ta spamlej te banti och ta yoʼtan te espíritu (Ezeq. 3:23, 24). Te Ezequiel chapalix yuʼun ya schol-a te skʼop Diose.

10. ¿Bin ya skoltayotik yuʼun ya xjuʼ kuʼuntik scholel skʼop Dios, sok bin yuʼun?

¹⁰ ¿Bin koltayel ya xtuun kuʼuntik yuʼun ya xjuʼ kuʼuntik scholel skʼop Dios? Yuʼun ya kakʼbeytik sujtib te jojkʼoyel-abi, jnop kaʼiytik te bin kʼax ta stojol te Ezequiel. Te kʼalal mato xjajch ta scholel skʼop Dios-a, jaʼ koltayot yuʼun te chʼul espíritu. Jich bitʼil te Ezequiel, maniwan xjuʼ kuʼuntik scholel skʼop Dios teme ma jaʼuk ya skoltayotik te chʼul espíritu. ¿Bin yuʼun te jich ya kaltike? Melel te Satanás ya skontrainotik yuʼun ma jcholtik te skʼop Diose (Apoc. 12:17). Jich yilel te ma xjuʼ kuʼuntik tsalel te Satanás. Pero te kʼalal ya jcholtik skʼop Dios yakotik ta stsalel kʼoem (Apoc. 12:9-11). Ta jujun buelta te ya jcholtik skʼop Dios ya kakʼtik ta ilel te maba ya jxiʼtik sok te yakotik ta stsalel te Satanás. Te bitʼil ya xjuʼ ya jcholtik skʼop Dios manchukme ya kichʼtik kontrainel, ya yakʼ ta ilel te yak ta skoltaybelotik te chʼul espíritu sok te lek ya yilotik te Jehová (Mat. 5:10-12; 1 Ped. 4:14).

11. ¿Bin-utʼil ya skoltayotik te chʼul espiritue, sok bin ya skʼan ya jpastik yuʼun ya kichʼtik?

¹¹ Te bitʼil koltayot yuʼun Jehová te Ezequiel, jaʼnix jich ya yakʼbotik jnaʼtik te ya skoltayotik te chʼul espíritu kʼalal ya jsitintaytik wokoliletik ta scholel skʼop Dios (2 Cor. 4:7-9). Jaʼ yuʼun, ¿bin ya skʼan ya jpastik yuʼun ya kichʼtik te chʼul  espíritu yuʼun te Diose? Jaʼ te ma jkom jbatik ta spasel te oración sok ya jnaʼtik te yaʼiy jkʼoptik te Jehová. Te Jesús la yalbey te jnopojeletik te akʼa skʼanik, te akʼa sleik sok te akʼa stijik te tiʼ naile. ¿Binwan ya yal te Jehová? «¿Mabal yakuk yakʼbey schʼul espíritu te machʼatik ya xkʼanbot yuʼune?» (Luc. 11:9, 13; Hech. 1:14; 2:4).

12. Jich bitʼil ya yal Ezequiel 2:9-3:3, ¿banti lokʼ tal te balbil june sok bin ya yalbey skʼoplal?

¹² Te Ezequiel maba jaʼuknax la yichʼ koltayel ta swenta te chʼul espiritue, jaʼnix jich la skʼopon te sKʼop Dios. Ta najalsitil, la yil jun kʼabal te yichʼoj balbil jun (kʼopona Ezequiel 2:9–3:3). ¿Banti lokʼ tal te balbil june? ¿Bin ya yalbey skʼoplal? Sok ¿bin-utʼil koltayot yuʼun te Ezequiel? Jaʼ lokʼ tal ta stojol te Jehová. Te Dios jaʼniwan la stuuntes jtul chʼul-abat te la yil te Ezequiel yuʼun ya x-akʼbot te balbil jun (Ezeq. 1:8; 10:7, 20). Ta balbil jun tey tsʼibaybil-a te skʼop Dios, jaʼ te bin ya skʼan ya yal te Ezequiel te ya xkʼot ta stojolik te jtoyba-oʼtanetik (Ezeq. 2:7). Te bin ya yale, tsʼibaybil ta schaʼjejchel te balbil june.

13. ¿Bin albot yuʼun Jehová te Ezequiel te yakuk spas sok te balbil june, sok bin yuʼun te chiʼe?

¹³ Te Jehová jich la yalbey te j-alwanej yuʼune: «Weʼa te balbil hun […] nojesa achʼuht a». La schʼuun mantal te Ezequiel sok la sweʼ. ¿Bin swentail te najalsitil la yile? Jaʼ te ya skʼan ya xkʼot ta yoʼtan ta lek te bin ya xbajt yakʼ ta naʼele. Ya skʼan ya schʼuun yoʼtan sok te jaʼ ya xtijbot yoʼtan ta scholel skʼop Dios. Pero ay bin chajpnax kʼot ta pasel. Te Ezequiel jich la yaʼiy te «mero chiʼ, pajal soc chab» te balbil june (Ezeq. 3:3). ¿Bin yuʼun? Jich la yaʼiy te mero chiʼ, melel jaʼ ya yal te skʼop te Jehová (Sal. 19:8-11). Kʼax tseʼel yoʼtan te jaʼ tsabil yuʼun Jehová yuʼun ya xkʼot ta j-alwanej.

14. ¿Bin koltayot te Ezequiel yuʼun ya skʼotes ta pasel te bin akʼbot spase?

¹⁴ Ta patil, te Jehová jich la yalbey te Ezequiel: «Acʼa ta awoʼtan spisil te bin ya calbat, aʼiya me awaʼiy ta lec» (Ezeq. 3:10). Te bin yak ta yalel te Jehová jaʼ te akʼa juluk ta yoʼtan te bin tsʼibaybil ta balbil jun sok te akʼa snopilan ta yoʼtane. Jaʼ koltayot te Ezequiel yuʼun ya stsakxan yip te schʼuunel yoʼtan sok jich ya snaʼxan ta lek te bin ya yalbey te ants winiketik (Ezeq. 3:11). Te bitʼil ayix ta yoʼtan te bin ya xbajt yale, te j-alwanej chapalix yuʼun ya xjajch schol skʼop Dios sok te ya spas te bin akʼbot spase (paja sok Salmo 19:14).

15. ¿Bin ya skʼan schʼuun koʼtantik yuʼun ma xkijkitaytik te scholel skʼop Dios?

¹⁵ Yuʼun ma xkijkitaytik te scholel skʼop Dios, ya skʼan ya jtulantestik te schʼuunel koʼtantik ta swenta te skʼop Dios. Ya skʼan ya schʼuun koʼtantik spisil te bin ya yalbotik te Jehová. Ta ora ini te Jehová ya skʼoponotik ta swenta te Bibliae. ¿Bin ya skʼan ya jpastik yuʼun jaʼuk ya stojobtes jpensartik te Biblia, te bin yaʼiyel ya kaʼiy jbatik sok te bin ya jpastik?

16. ¿Bin ya skʼan ya jpastik, sok bin ya skoltayotik?

¹⁶ Te kʼalal ya xweʼotik ta lek ya stsakxan yip te jbakʼetaltike. Jaʼnix jich te kʼalal ya jkʼopontik te Biblia sok te ya jnopilan ta koʼtantike, ya stsakxan yip te schʼuunel koʼtantik. Jaʼ-abi te bin ya yakʼ jnoptik te najalsitil ta swenta te balbil june. Te Jehová jaʼ ya skʼan te yakuk stsak yip te  schʼuunel koʼtantik ta swenta te sKʼope. Ya xjuʼ kuʼuntik spasel jaʼnax teme ya jkʼopontik Dios, ya jkʼopontik te Biblia sok teme ya jnopilan ta koʼtantik. Ta nailal, ya jkʼopontik Dios yuʼun ya jchajpantik te koʼtantik yuʼun jich ya xkʼot ta koʼtantik te bin ya yakʼbotik jnoptik te Dios. Ta patil, ya jkʼopontik te Biblia sok ya jnopilan ta koʼtantik te bin la jkʼopontike. ¿Bin ya xlokʼ kuʼuntik-a? Teme ya jnopilan ta koʼtantik te sKʼop Dios, kʼaxtoxan ya xkʼot ta koʼtantik-a.

17. ¿Bin yuʼun kʼax mukʼ skʼoplal te ya jnopilan ta koʼtantik te bin ya jkʼopontik ta Bibliae?

¹⁷ ¿Bin yuʼun kʼax mukʼ skʼoplal te ya jkʼopontik te Biblia sok te ya jnopilan ta koʼtantike? Melel teme jich ya jpastike, ya yakʼbotik yip koʼtantik yuʼun ya jcholtik skʼop Dios ta ora ini sok ta pajel chabe te kʼalal yaniwan kalbeytik te ants winiketik te wokolil ya staik teme maba la schʼuunik te skʼop Diose. Jaʼnix jich te kʼalal ya jnopilan ta koʼtantik te tʼujbil taleliletik yuʼun te Jehová, ya stsakxan yip te bitʼil kamigoinoj jbatik soke. Teme jich ya jpastike, leknax ya kaʼiy jbatik yuʼun, sok tseʼelnax koʼtantik (Sal. 119:103).

18. ¿Bin ya xkʼot ta yoʼtanik te ants winiketik sok bin yuʼun?

¹⁸ Manchukme maba j-alwanejotik jich bitʼil te Ezequiel, pero te Jehová yijkitayoj ta Biblia te bin ya skʼan ya yichʼ alele. Jaʼ yuʼun maba ya jkom jbatik ta scholel skʼop Dios, jaʼto te kʼalal ya yal te Jehová te maʼukix-ae. Te kʼalal ya xkʼot skʼajkʼalel te ya yichʼ lajinel te ants winiketik, maba ya yalik te maba la yichʼik albeyel o te maba ichʼotik ta wenta yuʼun te Diose (Ezeq. 3:19; 18:23). Tey ya xkʼotix ta yoʼtanik-a te talem ta stojol Dios te bin la kalbeytike.

19. ¿Bin ya yakʼbotik yip koʼtantik yuʼun maba ya jkom jbatik ta scholel skʼop Dios?

¹⁹ ¿Bin ya yakʼ yip koʼtantik yuʼun maba ya jkom jbatik ta scholel skʼop Dios? Jaʼnix jich ay kuʼuntik te bin oxchajp koltayot te Ezequiel jaʼ te maba jkomoj jbatik ta scholel skʼop Dios, melel ya jnaʼtik te jich yaloj ta mantal te Jehová, te ya yakʼbotik yip koʼtantik te chʼul espíritu sok te ya jkʼopontik te Biblia. Ta swentanax te koltayel yuʼun te Jehová kakʼoj ta koʼtantik te maba ya jkom jbatik ta scholel skʼop Dios sok te ya xkujch kuʼuntik «kʼalalto ta slajibal kʼajkʼal» (Mat. 24:13).