1, 2. 1) ¿Bin aʼtelil bajtʼ ta yoʼtan spasel te Jesuse, sok bin yuʼun? 2) ¿Bin ya skʼan ya jpastik teme ya jkʼan ya jokin jbatik ta aʼtel sok Dios?

TE Jesucristo aʼtej ta karpintero soknix la yaʼtelin scholel te lek yachʼil kʼop (Mar. 6:3; Rom. 15:8). Kʼax lek la spas te cheb aʼteliletik-abi. La snop stuuntesel ta lek te aʼtejibaletik yuʼun karpintero swenta ay bin lek ya snaʼ spasel ta teʼ. Jaʼnix jich la snaʼ stuuntesel te bintik snopoj ta lek ta sJun Dios swenta skoltayel te ants winiketik te yakuk xkʼot ta yoʼtanik te bintik smelelil ta swenta sKʼop Dios (Mat. 7:28; Luc. 24:32, 45). Kʼalal 30 yaʼbilal-a, la yijkʼitay jilel te yaʼtel ta karpintero swenta jaʼ la yakʼ skuxlejal ta spukel ta alel te lek yachʼil kʼop yuʼun te Wentainel yuʼun Dios. Snaʼoj te jaʼ yaʼtel te tulanxan skʼoplale, melel la yal te jaʼ jun swentail te bin yuʼun la yichʼ tikunel yuʼun Dios liʼ ta Balumilal (Mat. 20:28; Luc. 3:23; 4:43). Jaʼ tulanxan skʼoplal kʼot ta skuxlejal te scholel skʼop Diose sok yoʼtan te jichuknix ya spasik te yantike (Mat. 9:35-38).

² Jteb ma jpisiltik ma karpinterootik, pero jpisiltik ay kaʼteltik ta spukel ta alel te lek yachʼil kʼop. Chikan ta ilel te mero tulan skʼoplal te aʼtelil-abi, melel te Dios ya x-aʼtej ta spasel-euk. Te Biblia jichme ya yal ta jtojoltik: «Te hoʼotcotic joc jbahcotic ta aʼtel soc Dios» (1 Cor. 3:9; 2 Cor. 6:4). Jnaʼojtik te jaʼ smelelil spisil te bin ya yal te sKʼop Diose (Sal. 119:159, 160). Jaʼ yuʼun ya jpastik tulan te stojiluk ya jnaʼtik stuuntesel te smelelil kʼop te kʼalal ya jcholtik te skʼop Diose (kʼopona 2 Timoteo 2:15). Swenta ya xjuʼ kuʼuntik-a, ya skʼan ya jpastik tulan yuʼun bejbe ya xpʼijubotikxan ta stuuntesel te Biblia, te jaʼ aʼtejibal te tulanxan skʼoplal ay kuʼuntik ta yakʼel ta nopel te bin smelelil ta swenta te  Jehová, Jesús sok te Wentainel yuʼun te Diose. Swenta lek ya xkʼot ta lokʼel te kaʼteltik, te organisasion yuʼun Jehová stsaoj aʼtejibaletik swentanax yakʼel nojptesel, ta español naʼbil sba bitʼil kit de enseñanza.

3. 1) ¿Bin ya skʼan ya xbajtʼ ta koʼtantik spasel jich bitʼil jtebxanix ya skʼan yuʼun ya yichʼ lajinel te balumilal ini? 2) Ta swenta te bin ya yal te Hechos 13:48, ¿machʼatik ya skʼan ya jletik?

³ Yaniwan jojkʼoybey jbatik bin yuʼun kit de enseñanza sbiil te ma jaʼuk kit de predicación. Te swentail jaʼ ini, te scholel skʼop Dios jaʼ ya skʼan ya yal te ya jpuktik ta alel te skʼop Diose. Yan stukel te yakʼel nojptesel jaʼ ya skʼan ya yal te ya jcholbeytik yaʼiy ta lek te skʼop Dios te ants winiketik yuʼun ya xkʼot ta yoʼtanik sok ya xtijbot yoʼtanik ta spasel te bin ya snopike. Jich bitʼil jtebxanix ya skʼan yuʼun ya yichʼ lajinel te chopol balumilal ini, jaʼ ya skʼan ya xbajtʼ ta koʼtantik yakʼel nojptesel ta sKʼop Dios sok te ya kakʼtik ta nopel te smelelil kʼope. Jich yuʼun, ya skʼan te ya jpastik tulan ta sleel te machʼatik jich yoʼtanik te ya skʼan ya xkuxinik ta sbajtʼelkʼinal yuʼun ya jkoltaytik te ya x-ochik ta j-abatetik yuʼun Jehová (kʼopona Hechos 13:44-48). *

4. ¿Bin ya skʼan ya jpastik yuʼun ya jtatik «te machʼa jich yoʼtanik te ya xkuxinik ta sbajtʼelkʼinal»?

⁴ ¿Bin ya skʼan ya jpastik yuʼun ya jtatik «te machʼa jich yoʼtanik te ya xkuxinik ta sbajtʼelkʼinal»? Jaʼ te ya jcholtik te skʼop Dios jich bitʼil la spasik ta sbabial siglo. Jaʼ yuʼun ya skʼan ya jpastik te bin la yal te Jesuse: «Ta bayuc mucʼul pueblo o tut pueblo banti ya xʼochex, jocʼoya awaʼiyic machʼa lec yoʼtan tey a» (Mat. 10:11). Te machʼatik ma jichuk yoʼtanik te ya skʼan ya snaʼbeyik sba te Diose, jtoybaetik o te machʼatik maʼyuk skʼoplal ta yoʼtanik te bin swenta Dios, mananix ya schʼuunik-a te smelelil kʼope. Jaʼ yuʼun jaʼ ya jletik te machʼatik jich yoʼtanik te ya skʼan ya snaʼbeyik sba te Dios, pekʼel yoʼtanik sok te yoʼtan ya yaʼiyik stojol te smelelil kʼope. Jnop kaʼiytik binwan ya spas te Jesús kʼalal karpintero-a, jichniwan te jaʼ nail ya sle bin teʼ lek ta spasel puerta, yugo teʼ o yantik biluketik. Kʼalal ya sta, ya x-och stuuntes ta lek te yaʼtejib ta spasel te biluketike. Ta melel te joʼotike, ay bin jteb ma pajal sok ya skʼan ya jpastik, nail ya skʼan ya jletik te machʼatik ta smelelil ya skʼan ya snaʼbeyik sba te Jehová, ta patil ya xjuʼ ya jtuuntestik ta lek te aʼtejibaletik ay kuʼuntik yuʼun yotsesel jnopojeletik (Mat. 28:19, 20).

5. Cholbeya skʼoplal sok jun ejemplo bin ya skʼan ya jnaʼtik ta swenta te jujunchajp aʼtejibaletik ayik ta kit de enseñanza kuʼuntik (ilawil te lokʼombaetik ta sjajchibal te articulo).

⁵ Te jujunchajp aʼtejibal yanyantik bitʼil ta tuuntesel. Jnop kaʼiytik bin aʼtejibaletik yuʼun karpintero laniwan stuuntes ta aʼtel te Jesuse. * Ay te ya xtuun ta spʼisel te teʼ, ta yakʼbeyel smarkaul, ta xotʼel, jutel o yuʼun sjuxel, yantik aʼtejibaletik ya xtuun ta spamanel te teʼ, yuʼun toj ya xjil-a o yuʼun ya stsʼakik-a. Jaʼnixme jich te jujunchajp aʼtejibaletik ayik ta kit de enseñanza yanyantik bitʼil ta tuuntesel. Spisil te aʼtejibaletik bayal skʼoplal, jaʼ yuʼun ya kiltik bin-utʼil ya xjuʼ ya jtuuntestik.

6, 7. 1) ¿Bin-utʼil atuuntesoj te tarjetaetik yuʼun jw.org? 2) Ala te cheb bin-utʼil ya yichʼ tuuntesel te inbitasionetik yuʼun te tsoblejetike.

⁶ Te tarjetaetik yuʼun jw.org. Tutik te aʼtejibaletik-abi, pero mero ya skoltayotik ta yakʼbeyel snaʼ te ants winiketik te Testigootik sok ta yakʼbeyel snaʼik te ay pajina kuʼuntik ta Internet. Ta pajina-abi bayal bin ya xjuʼ ya snaʼik ta jtojoltik sok ya xjuʼ ya skʼanik te ya x-akʼbotik nojptesel yuʼun Biblia. Ta ora ini, kʼaxem ta 400 mil machʼatik skʼanojik ta pajina jw.org te ayuk machʼa ya xnojptesotik yuʼun. Ta melel, ta jujun kʼajkʼal mero tsobol machʼatik jich ya spasik. Ta bayuk ya xbootik lek te ya kichʼtik bael spisil-ora cheʼoxeb tarjeta. Jich chapal ayotik-a ta scholbeyel skʼop Dios te ants winiketik chikan bin ya jpastik ta jujun kʼajkʼale.

 ⁷ Te inbitasionetik. Cheb bin-utʼil ya xtuun kuʼuntik te inbitasion yuʼun te tsoblejetike. Jich ya yalbey yaʼiy te ants winiketike: «Ikʼbilatme ta snopel te Biblia sok te stestigotak te Jehová». Ta patil ya yakʼbey snaʼ te ants winiketik te ya xjuʼ ya snopik te Biblia ta tsoblejetik o te ay machʼa ya xjuʼ xnojptesotik yuʼune. Jich yuʼun, te aʼtejibal ini ma jaʼuknax ya xtuun ta yakʼel ta naʼel te Testigootik, jaʼnix jich ya xtuun ta stijbeyel yoʼtan «te machʼatik ya snaʼik te ya skʼan ya snopik te skʼop Diose» te yakuk yichʼik nojptesel sok te joʼotike (Mat. 5:3; TNM). Ta melel, lek ya kiltik chikan machʼa ya xkʼot ta tsoblej, manchukme maba yak ta akʼbeyel nojptesel yuʼun Biblia. Te machʼa ya xkʼot ta tsoblej ya sta ta ilel te bayal bin ya xjuʼ ya snop ta Biblia.

8. ¿Bin yuʼun mero tulan skʼoplal te ya xkʼotik ta tsoblejetik te ants winiketik, manchukme jun-nax buelta? Ala junuk ejemplo.

⁸ Mero tulan skʼoplal te ma jkom jbatik ta yikʼel te ants winiketik ta tsoblejetik, manchukme jun-nax buelta ya xkʼotike. ¿Bin yuʼun? Melel jich ya staik ta ilel-a te ma pajalotik sok te lotil relijionetik, melel te Testigootik ya kakʼtik ta nopel te bin smelelil ay ta Biblia sok ya jkoltaytik te ants winiketik ta snaʼbeyel sba te Diose (Is. 65:13). Kiltik jun ejemplo. Ayix tal cheʼoxeb jaʼbil ay bin kʼot ta pasel ta stojol te Ray sok te yinam te Linda sbiil te jaʼ slumalik Estados Unidos. Ya schʼuunik te ay Dios sok ya skʼan ya x-ochik ta jun iglesia yuʼun ya snaʼbeyik sba ta lek-a. Jaʼ yuʼun la snopik te ya xbajtʼ yulaʼtayik spisil te iglesiaetik te ayik ta mukʼul lum te banti nainemike. Mero tsobol te iglesiaetik sok bayal relijionetik tey-a. La schapik te jaʼnax ya xjilik ta jun iglesia teme ay cheb bin ya yilik tey-a. Sbabial jaʼ teme ay bin ya snopik ta swenta skʼop Dios tey-a. Schebal jaʼ teme lek ta ilel te skʼuʼ spakʼik te machʼatik ayik tey-a jich bitʼil snujpʼ ya schajpan sbaik te j-abatetik yuʼun te Diose. Jalajik bayal jaʼbil ta yulaʼtayel spisil te iglesiaetik ta slumalik pero mero chebaj yoʼtanik, melel maʼyuk bin la snopik ta swenta Dios sok ma lek ta ilel te skʼuʼ spakʼik te machʼatik ya xkʼotik tey-ae. Te kʼalal lokʼik ta slajibal iglesia te yakʼojik ta lista, te Linda bajtʼ ta yaʼtel, yan stukel te Ray sujt bael ta sna. Te kʼalal yak ta sujtel bael-a la sta ta ilel jun sNail Tsoblej, jich yuʼun la snop te ya skʼan ya x-och yil bin ya yichʼ pasel tey-a. Jichnanix bitʼil jnaʼojtik te ya xkʼot ta pasele, mero la smulan. Spisil te machʼatik tey ayik-a la yakʼik ta ilel slekil yoʼtanik ta stojol sok lek ta ilel te skʼuʼ spakʼik slapojik baele. Te Ray la sjujkan sba ta sbabial fila, mero la smulan te bin la snope. Kʼot ta stojol te bin la yal te Pablo ta swenta te machʼa ta sbabial buelta ya xkʼot ta tsoblejetik te jich ya yal: «Ta melel ay ta awohlilic te Diose» (1 Cor. 14:23-25). Jaʼto-a jajch ta kʼoel ta jujun domingo ta tsoblejetik, ta patil jaʼnix jich jajch ta kʼoel ta spisil tsoblejetik ta olil semana. Te Linda jajch sjokin ta tsoblej-euk. Manchukme kʼaxemix ta 70 yaʼbilalik-a, jajch snopik skʼop Dios sok la yichʼik jaʼ.

9, 10. 1) ¿Bin yuʼun te ma chujkʼuluk ta tuuntesel te tratadoetike? 2) Chola bin-utʼil ya xjuʼ ta tuuntesel te tratado ¿Bin-a te Wentainel yuʼun te Diose?

⁹ Te tratadoetik. Ay waxakeb tratadoetik kuʼuntik te ma chujkʼuluk ta tuuntesel sok te mero ya skoltayotik ta sjachel aʼiyej. Kʼalalto ta 2013 jajch ta lokʼel te tratadoetik-abi, ay yichʼoj pasel imprimir 5 mil miyon. Te bin leke jaʼ teme la anop bin-utʼil ta japel te jlejche jich anopojix stuuntesel-a te yantike, melel pajal te bitʼil pasbilik spisilike. ¿Bin-utʼil ya xjuʼ ya jtuuntestik yuʼun ya xjajchotik ta kʼop sok te ants winiketike?

¹⁰ Jnop kaʼiytik te ya jtuuntestik te tratado ¿Bin-a te Wentainel yuʼun te Diose? Ya xjuʼ ya kakʼbeytik yil te ants winik te yelaw te tratado sok te ya jojkʼoybeytik: «¿Aybal ajojkʼoybeyoj aba bin-a te Wentainel yuʼun te Diose? Ya xjuʼ ya kakʼbeytik yil te oxeb sujtib yichʼoj te tratado sok te ya jojkʼoybeytik, ¿banti ya akuy te jaʼ te sujtib ta yoxebale?». Chikan bin sujtib ya yakʼbotike, kakʼbeytik yil te seccion «Te bin ya yal te Bibliae» te ay ta yan pajina sok jkʼopontik Daniel 2:44 soknix Isaías 9:6 te teynix  tsʼibaybilik-a. Teme ya xpas ya kiltike, kʼopojukotikxan sok te ants winike. Ta slajibal kakʼbeytik yil te jojkʼoyel te ay ta spat te tratado te ya jtatik te banti ya yal «Jojkʼoybeya aba»: «¿Binwan yilel te kuxlejalil te kʼalal yakix ta aʼtel-a te Wentainel yuʼun te Diose?». Teme jiche ay bin ya xjuʼ sujt kalbeytik skʼoplal sok te yajwal nae. Kʼalal ya jchaʼulaʼtaytik ya xjuʼ ya kiltik te leccion 7 yuʼun te foyeto Lek yachʼil kʼop te talem ta stojol Dios te chajpanbil yuʼun ya xjajch jnojptestik te ants winiketike.

11. ¿Bin yuʼun ya yichʼ leel ta lek te temaetik yuʼun te revistaetik, sok bin ya skʼan jnaʼojtik?

¹¹ Te revistaetik. Te J-ilkʼinal ta toyol sok te ¡Despertad! jaʼ te revistaetik te kʼasesbilik ta bayalxan ta chajp kʼopiletik sok te ya yichʼikxan pukel ta swolol Balumilal. Jich bitʼil ya yichʼtiklan pukel sok kʼoponel ta bayal nasionetik ya yichʼ leel ta lek te tema ta sjajchibal pajina yuʼun ya x-ikʼbot yoʼtanik-a te ants winiketike. Ta melel ya skʼan ya jtuuntestik te revistaetik ta stijbeyel yoʼtan te ants winiketik ta snopel te bin ay skʼoplal ta jkʼajkʼaleltik. Pero swenta ya jnaʼtik machʼa lek te ya kijkʼitaybeytik jilel te revistaetik ya skʼan ya jnaʼtik ta lek machʼa ta stojol chajpanbil te chaʼchajp revistaetike.

12. ¿Machʼa chajpanbil ta stojol te revista ¡Despertad!, sok bin swentail chajpanbil tal?

¹² Te revista ¡Despertad! chajpanbil ta stojol ants winiketik te jtebnax o maʼyuk bin ya snaʼik yuʼun te Biblia. Maniwan snaʼojik bin ya skʼan ya schʼuunik te j-abatetik yuʼun Dios, xchebetniwan yoʼtanik ta swenta te relijion o maniwan snaʼojik te ya yakʼ lekil tsitsel te Biblia te ya xtuun ta skuxlejalik. Jun swentail te bin yuʼun chajpanbil te revista ini jaʼ te ya yakʼbey schʼuun te machʼa ya skʼopon te aynix-a te Diose (Rom. 1:20; Heb. 11:6). Jaʼnix jich ya skoltay yuʼun ya schʼuun te jaʼnix sKʼop Dios-a te Bibliae (1 Tes. 2:13). Te temaetik yuʼun te oxeb revistaetik yuʼun te jaʼbil 2018 jaʼik ini: «El camino de la felicidad», «12 claves para una familia feliz» sok «Ayuda para quienes están de duelo».

13. 1) ¿Machʼa ta stojolik chajpanbil Te J-ilkʼinal ta toyol te ya yichʼ pukele? 2) Ala bintik mato jaluk lek lokʼem awuʼun ta stuuntesel te revista ini.

¹³ Te revista Te J-ilkʼinal ta toyol te ya yichʼ pukele ya yalbey skʼoplal bintik ya yakʼ ta nopel te Biblia, chajpanbil ta stojol te ants winiketik te yanix yichʼik ta mukʼ-a te Dios sok te sKʼope. Ayniwan ya snaʼik jtebuk ta swenta te Biblia, pero ma xkʼot ta yoʼtanik ta tsʼakal te bin ya yakʼ ta nopele (Rom. 10:2; 1 Tim. 2:3, 4). Te oxeb temaetik yichʼoj te revistaetik ta jaʼbil 2018 jaʼik ini: «¿Yatobal xtuun kuʼuntik te bin ya yal te Bibliae?», «¿Binwan ya xkʼot ta pasel ta pajel chaʼbej?» sok «¿Ayatbal ta yoʼtan te Diose?».

14. 1) ¿Bin-utʼil ya xtuun kuʼuntik te chaneb videoetik ayik ta kit de enseñanza? 2) ¿Bintik tʼujbil lokʼem awuʼun ta stuuntesel te videoetike?

¹⁴ Te videoetik. Ta skʼajkʼalel te Jesús te karpinteroetik jaʼnax ay yaʼtejibik te ya yichʼ tuuntesel ta yip kʼabale, pero ta ora ini ay aʼtejibaletik te ya xtuun ta lus jich bitʼil te sierra mecánica, taladro, lijadora sok te clavadora. Jaʼnixme jich ta ora ini ma jaʼuknax ay kuʼuntik te junetik, jaʼnix jich ay lekil videoetik kuʼuntik. Chaneb videoetik ayik ta kit de enseñanza kuʼuntik, jaʼik ini: ¿Bin yuʼun ya skʼan ya jnoptik te Bibliae?, ¿Bin utʼil ya yichʼ akʼel nojptesel yuʼun te Bibliae?, ¿Bin ya yichʼ pasel ta tsoblejetik kuʼunkotik? sok ¿Machʼatik-a te testigoetik yuʼun Jehová? Te cheb videoetik te ma sta cheb minuto ya xjalajik ya xjuʼ ya jtuuntestik ta sbabial buelta ya xkʼopojotik sok te ants winiketike. Te videoetik te ya xjalajikxane lek te ya jtuuntestik te kʼalal ya jchaʼulaʼtaytik te ants winiketik o te kʼalal ya kiltik te ay machʼa ayxan stiempoe. Te tʼujbil aʼtejibaletik-abi, ya xjuʼ ya stijbey yoʼtan te ants winiketik yuʼun ya yichʼik nojptesel yuʼun skʼop Dios sok te ya xbajtʼik ta tsoblejetik.

15. ¿Bin-utʼil ya xtijbot yoʼtanik te ants winiketik kʼalal ay ta skʼopik te videoetik ya kakʼbeytik yilike? Ala junuk ejemplo.

¹⁵ Kiltik bin-utʼil ya xtijbot yoʼtanik te ants winiketik kʼalal ya yilik te videoetike. Jtul hermana  la sta jtul ants te talem ta Micronesia sok la yakʼbey yil te video ¿Bin yuʼun ya skʼan ya jnoptik te Bibliae? ta yapés te jaʼ mero skʼop te antse. Te ants jich la yal kʼalal jajch te video: «¡Ma jchʼuun ya kaʼiy, ay ta jkʼop! Te winik te ya xkʼopoj ta video jich ya xkʼopoj bitʼil ya xkʼopojotik ta isla te banti talemone. ¡Ya snaʼ te jkʼope!». Ta patil te ants la yal te ya xbajtʼ yil sok ya skʼopon spisil te bin ya sta ta pajina jw.org ta yapés (paja sok Hechos 2:8, 11). Jaʼnix jich jtul hermana ta Estados Unidos la stikunbey te sobrino te banti ya xjuʼ ya sta te video-abi yuʼun ya yil ta skʼopnix. Ta patil te la yil te video jich sutbot tal ta correo electrónico: «Kʼalal la kil te video ay bin chamnax koʼtan yuʼun, jaʼ te ya yal te ay machʼa mero ay yuʼel sok te kʼax chopol te swentainoj te balumilale. Lame jkʼanix te ay machʼa ya snojpteson ta skʼop Dios». Te kereme ay ta jun nasion te banti makal te kaʼteltike.

16. Chola bin swentail te foyetoetik ini: 1) Chʼama awaʼiy te bin ya yal te Diose jichme ya xkuxinat ta sbajtʼelkʼinal. 2) Lek yachʼil kʼop te talem ta stojol Dios. 3) ¿Machʼatik ya spasik te skʼanojel yoʼtan te Jehová ta kʼajkʼal ini?

¹⁶ Te foyetoetik. ¿Bin-utʼil ya xjuʼ ya kakʼbeytik snop te smelelil kʼop te machʼa ma mero snaʼ jun o maʼyuk junetik lokʼem ta skʼop? Ayme aʼtejibal chajpanbil ta stojolik, jaʼ te foyeto Chʼama awaʼiy te bin ya yal te Diose jichme ya xkuxinat ta sbajtʼel kʼinal. * Yan lekil aʼtejibal swenta ay machʼa ya xjajch jnojptestik, jaʼ te foyeto Lek yachʼil kʼop te talem ta stojol Dios. Ya xjuʼ ya kakʼbeytik yil te 14 temaetik ay ta slajibal pajina, ta patil jojkʼoybeytik banti ya smulanxan, jich ya xjajch jnoptik sok te leccion-abi. ¿Aybal jich jpasojtik te kʼalal ay machʼatik baemotik ta schaʼyulaʼtayel? Te yoxebal foyeto te ay ta kit de enseñanza jaʼ ini ¿Machʼatik ya spasik te skʼanojel yoʼtan te Jehová ta kʼajkʼal ini? te chajpanbil ta stojol te machʼatik yakik ta yichʼel nojptesel yuʼun ya snaʼbeyik sba ta lek te organisasion kuʼuntike. Swenta ya jnaʼtik stuuntesel ya xjuʼ ya kiltik te Sjunal kaʼteltik ta swenta tsoblej: Jkuxlejaltik sok Kaʼteltik ta swenta Dios marzo 2017.

17. 1) ¿Bin swentail chajpanbil te cheb libroetik te ya jtuuntestik ta yakʼel nojptesele? 2) ¿Bin ya skʼan ya spas spisil te machʼa ya yichʼ jaʼe, sok bin yuʼun?

¹⁷ Te libroetik. Teme ay machʼa ya xjajch kakʼbeytik nojptesel sok jun foyeto, ya xjuʼ chikan bin-ora ya xjajch jnojptestik sok te libro ¿Bin ya yakʼ ta nopel ta smelelil te Bibliae? Ta swenta te libro ini ya xkʼotxan ta yoʼtan te bin nail ya skʼan nopel ta Biblia. Teme laj yoʼtan ta snopel te libro sok ya kiltik te yak ta yakʼbeyel yipale, ya xjuʼ xjajch jnojptestik sok te libro Ayinanikme ta stojol te skʼuxul yoʼtan te Diose. Te libro ini ya yakʼbey snop bin-utʼil ya xjuʼ ya stʼun ta jujun kʼajkʼal te tojobtesel ya yakʼ te Biblia. Mame xchʼay ta koʼtantik te spisil te machʼa ya kakʼbeytik nojptesel ya skʼan ya xlaj snopbel te cheb libroetike, manchukme mato lajem yuʼun-a te kʼalal ya yichʼ jaʼe. Jich ya yichʼ yip ta lek te schʼuunel yoʼtan ta swenta te smelelil kʼope (kʼopona Colosenses 2:6, 7).

18. 1) ¿Bin ya yal 1 Timoteo 4:16 te ya skʼan ya jpastik, sok bin lek ya xkʼot ta lokʼel-a? 2) ¿Bin yuʼun ya skʼan ya jtuuntestik te kit de enseñanza kuʼuntike?

¹⁸ Te testigootik yuʼun Jehová ya skʼan ya kakʼbeytik snaʼ te ants winiketik te smelelil kʼop, jich ya xjuʼ ya sta skuxlejalik ta sbajtʼelkʼinal-a (Col. 1:5; kʼopona 1 Timoteo 4:16). Swenta ya xjuʼ kuʼuntik-a kichʼojtik akʼbeyel te kit de enseñanza te yichʼoj spisil te aʼtejibaletik ya xtuun kuʼuntike (ilawil te recuadro « Te kit de enseñanza»). Jich yuʼun akʼa jtuuntestik ta lek. Te jcholkʼop jaʼ ya yil bin aʼtejibal ya stuuntes sok bin-ora ya stuuntes. Pero mame xchʼay ta koʼtantik te ma spukel junetik te kaʼteltike. Jaʼnix jich mame skʼan ya kijkʼitaybeytik jilel te machʼatik maʼyuk skʼoplal ta yoʼtanik te lek yachʼil kʼop ya jcholbeytik yaʼiyike. Te bin ya jkʼantike, jaʼ te ya x-ochik ta jnopojel yuʼun Cristo «te machʼa jich yoʼtanik te ya xkuxinik ta sbajtʼelkʼinal», te jaʼik machʼatik ya skʼan ya snaʼbeyik sba te Diose, pekʼel yoʼtanik sok yoʼtan ya yaʼiyik stojol te smelelil kʼope (Hech. 13:48, TNM; Mat. 28:19, 20).