1, 2. 1) ¿Bin-utʼil ya xjuʼ ya yaʼiy sba jtul j-abat yuʼun Dios kʼalal ay bin ya xjelon ta repentenax ta skuxlejal? (Ilawil te lokʼomba ta sjajchibal te articulo). 2) Ta swenta te bin ya yal te Salmo 131, ¿bin ya xjuʼ ya skoltayotik yuʼun ma xchʼay te slamalil koʼtantike?

KʼALAL te Lloyd sok te Alexandra kʼaxemix ta 25 jaʼbil ayik ta Betel, albotik te ma x-aʼtejikix tey a. Jaʼ yuʼun la smel yoʼtanik ta sjajchibal. Te Lloyd jich ya yal: «Mero kʼayemonix ta kaʼtel ta Betel sok mero lek ya kaʼiy jba tey-a. Jnaʼoj te bin yuʼun la kichʼtik jelbeyel kaʼtelkotik, pero ta bayal semana sok u ta patil bayal buelta la kaʼiy te kichʼoj pʼajele. Jujun jtsʼin ya sjel sba bin-utʼil ya kaʼiy jba, ay lek te bin ya jnop pero ta jtsʼin bael jkʼaxel ma lek ya kaʼiyix jba-a».

² Kʼalal ay bin ya xjelon ta repentenax ta jkuxlejaltik ya xjuʼ ya jmel koʼtantik sok te ma jnaʼ bin ya jpastik (Prov. 12:25). Jaʼnix jich ya xjuʼ te wokol ya schʼuun koʼtantik te jelonix te jkuxlejaltike. Jich yuʼun, ¿bin ya skoltayotik yuʼun ma xchʼay kuʼuntik te slamalil koʼtantik sok te lek ya kaʼiy jbatike? (Kʼopona Salmo 131:1-3). Kiltik bin la spasik j-abatetik yuʼun Dios ta namey kʼinal sok ta jkʼajkʼaleltik swenta lamal yoʼtanik-a te kʼalal ay bin jelon ta skuxlejalik.

3. ¿Bin kʼot ta stojol te José?

³ Te José kʼax jich kʼux ta oʼtanil yuʼun te Jacob. Te sbankiltak ma lek yoʼtanik ta stojol, jaʼ yuʼun la schonik bael jich bitʼil mosoil te kʼalal ayniwan 17 yaʼbilal-a (Gén. 37:2-4, 23-28). Ta treceniwan jaʼbil la yichʼ mosoinel sok la yichʼ chukel ta Egipto te banti kʼax namal ay ta stojol te state. ¿Bin koltayot yuʼun swenta ma xchʼay te smukʼul yoʼtan sok te ma xbolob yoʼtane?

4. 1) ¿Bin bajtʼ ta yoʼtan spasel te José kʼalal chukul-a? 2) ¿Bin-utʼil sutbot skʼop yuʼun te Jehová?

⁴ Kʼalal te José yak yilbel wokol ta chukel, jaʼ bajtʼ ta yoʼtan yilel bin-utʼil yak ta kanantayel yuʼun te Jehová (Gén. 39:21; Sal. 105:17-19). Jaʼnix jich laniwan snopilan te wayichiletik akʼbot yil yuʼun Jehová kʼalal keremxan-a, jich la yaʼiy te akʼbot smukʼul yoʼtan yuʼun (Gén. 37:5-11). Jaʼnix jich ya jnaʼtik te ma junuknax buelta la sjam yoʼtan ta stojol Jehová (Sal. 145:18). ¿Bin-utʼil sutbot skʼop yuʼun? Koltayot ta schʼuunel sok spisil yoʼtan te ma x-ijkʼitayot yuʼun chikan bin ya xkʼot ta pasel (Hech. 7:9, 10). *

5. ¿Bin-utʼil ya xjuʼ ya skoltayotik ta stael aʼteliletik ta stojol Dios «te lamal qʼuinal te ya yacʼ te Diose»?

⁵ Ta ora ini ayniwan ya xtal tulan wokoliletik ta jtojoltik. Kʼalal jich ya xkʼot ta pasel ya xjuʼ ya kaʼiytik bin-utʼil ya skanantay jpensartik «te lamal qʼuinal te ya yacʼ te Diose» (kʼopona Filipenses 4:6, 7). Jich yuʼun kʼalal ma jnaʼ bin ya jpastik, akʼa jkʼopontik te Jehová. Jich te lamalkʼinal yuʼun ya skoltayotik yuʼun ya stsakxan yip ta koʼtantik te ay bin ya jkʼan ya jpastik ta stojol sok te ma jkom jbatik ta stael. Ta ora ini kiltik ejemploetik te ya yakʼ ta ilel te jich ya xkʼot ta pasele.

6, 7. ¿Bin-utʼil ya skoltayotik yuʼun ma xchʼay te slamalil koʼtantik te ya kalbeytik ta jamal Jehová te jwokoltike? Ala junuk ejemplo.

⁶ Te Ryan sok te Juliette yan-nax kʼinal la yaʼiyik kʼalal akʼbot snaʼik te laj te tiempo akʼbilik yuʼun ya x-aʼtejik ta precursor espesial. Te Ryan ya yal te la skʼoponik Dios ta oranax. Ya yal kaʼiytik: «Ya jnaʼtik te tey ya xchiknaj ta ilel-a te ya smukʼulin koʼtantik ta melel te Diose. Ta kongregasion ay bayal hermanoetik te mato jaluk yochelike, jaʼ yuʼun la jkʼanbeytik Jehová te yakuk skoltayotik ta yakʼbeyel yil te hermanoetik-abi bin-utʼil ya skʼan ya kakʼtik ta ilel schʼuunel koʼtantik».

⁷ ¿Bin-utʼil koltayotik yuʼun Jehová? Te Ryan jich ya xjul ta yoʼtan: «Kʼalal laj koʼtantik ta skʼoponel Dios chʼay bael te mel-oʼtan sok lamaj bael te koʼtantike. Ta melel, te lamalkʼinal te ya yakʼ te Dios la skanantay jpensartik sok koʼtantik. La jtatik ta ilel te ya xjuʼ ya kichʼtikxan tuuntesel yuʼun Jehová teme lek jtaleltik ya kakʼtik ta ilele».

8-10. 1) ¿Bin-utʼil ya xjuʼ ya skoltayotik te schʼul espiritu te Dios kʼalal ay bin ya snaʼulan koʼtantik? 2) ¿Bin-utʼil ya skoltayotik te Jehová kʼalal ya yil te jaʼ ya xbajtʼ ta koʼtantik spasel te yaʼtele?

⁸ Te schʼul espiritu te Dios ma jaʼuknax ya slamantes koʼtantik, jaʼnix jich ya skoltayotik yuʼun ya jtatik versiculoetik ta Biblia te ya skoltayotik yuʼun jaʼ tulanxan skʼoplal kuʼuntik te bintik swenta Dios (kʼopona Juan 14:26, 27). Kiltik bin kʼot ta stojol te Philip sok te yinam Mary te jteb ma sta 25 jaʼbil aʼtejik ta Betel. Ta chanebnax u, laj smamaik sok ay jtulxan sfamilia te Philip te laj-euk. Jaʼnix jich jajch skanantayik te spapa te Mary, melel tsakbil ta chamel te demencia sbiil te jaʼ te ma snaʼix bin-utʼil ay.

⁹ Te Philip jich ya xjul ta yoʼtan: «Jich yilel te lek bin-utʼil yakon ta sitintayel te wokolile, pero ay bin yak spasbelon falta. Jun buelta kʼalal yakon ta skʼoponel jun articulo yuʼun te Te J-ilkʼinal ta toyol te ya yichʼ nopel, la jkejchan  skʼoponel jtsʼinuk kʼalal la jta te Colosenses 1:11. La jta ta ilel te yak ta kujchel kuʼun te wokole, pero ma jichuk te bitʼil ya skʼane. Te versiculo ini, la skoltayon ta yilel te ya skʼan ya xkujch kuʼun sok slamalil koʼtan soknix sbujtsʼ koʼtan. Te bin la jta ta ilel la sjultesbon ta koʼtan te ma jaʼuk tseʼel koʼtan ta swenta te bin yilel ay te jkuxlejale, jaʼ tseʼel koʼtan teme ya x-aʼtej ta jkuxlejal te schʼul espiritu te Diose».

¹⁰ Te Philip sok te Mary la spasik tulan yuʼun jaʼ bajtʼ ta yoʼtanik spasel yaʼtel te Jehová, ta melel bayal bin-utʼil akʼbotik bendision yuʼun. Te kʼalal mato jaluk slokʼelik ta Betel ay machʼatik la staik te ya skʼan ya snopik skʼop Dios bayal buelta ta semana sok te la yakʼbeyik yipale. Te Mary jich ya yal ta swenta te bin lek la staike: «La yakʼbotik bayal stseʼelil koʼtantik, jich la yakʼ kiltik te Jehová te lek ya xkʼootik ta lokʼele».

11, 12. 1) ¿Bin la spas te José swenta ya xjuʼ x-akʼbot bendision yuʼun te Jehová? 2) ¿Bin-utʼil majtʼantesot yuʼun Jehová te José ta swenta te kujch yuʼune?

¹¹ Kʼalal ay bin ya xkʼot ta jtojoltik te ma maliybil kuʼuntike, ya xjuʼ ya jxiʼtik bin ya xtal ta pajel chaʼbej sok te ma jnaʼ bin ya jpastikix yuʼune. Juʼ te jich la yaʼiy sba te José, pero jaʼ bajtʼ yoʼtan ta spasel te bin ya xjuʼ yuʼune, jich ay bin-utʼil ya xjuʼ x-akʼbot bendision yuʼun te Jehová. Jaʼ yuʼun kʼalal ay ta karsel la yakʼbey yipal ta spasel spisil te bin akʼbot spas yuʼun te jwentainwanej yuʼun te karsel, jichnix bitʼil aʼtej ta nail tal ta sna te Potifar (Gén. 39:21-23).

¹² Jun buelta albot ta mantal te José te akʼa swentain chaʼtul winiketik te yichʼojik mukʼ yaʼtelik-a ta sna te faraón. Te José leknax yoʼtan ta stojolik, jaʼ yuʼun jun buelta te chaʼtul winiketik la yalbeyik yaʼiy bin ya snaʼulan yoʼtanik sok la scholbeyik yaʼiy bin la swayichinik ta ajkʼabale (Gén. 40:5-8). Te José ma snaʼoj te ya xjelon skuxlejal ta repentenax ta skaj te kʼopoj sok te chaʼtul winiketike. Cheb jaʼbil ta patil ay bin kʼot ta pasel, ta skʼajkʼalelnix te lokʼ ta karsel la yichʼ yaʼtel ta schebal ajwalil ta Egipto, jaʼxanix te faraón tulanxan yaʼtel ta stojol (Gén. 41:1, 14-16, 39-41).

13. Chikan bin yak ta kʼaxel ta jkuxlejaltik, ¿bin ya xjuʼ ya jpastik yuʼun ya xjuʼ ya yakʼbotik bendision te Jehová?

¹³ Jich bitʼil kʼax ta stojol te José, ayniwan bin yak ta kʼaxel ta jtojoltik te maʼyuk bayal o jkʼaxel maʼyuk bin ya xjuʼ ya jpastik yuʼun ya xchʼay bael. Jaʼukmeto teme ay slamalil koʼtantik sok ya jpastik tulan ta spasel te bantito kʼalal ya xjuʼ kuʼuntik, jich ay bin ya xjuʼ ya yakʼbey bendision-a te Jehová (Sal. 37:5). Ta melel, yaniwan kaʼiytik te ma jnaʼtik bin ya jpastik pero «ma jcʼaxeluc ya xlajotic ta tenel yuʼun» te wokol jich bitʼil la yal te jpuk-kʼop Pablo (2 Cor. 4:8, XCD). Jaʼme jich ya xkʼotxan ta pasel teme jaʼ baem ta koʼtantik spasel kaʼteltik ta stojol Dios.

14-16. ¿Bin la spas te Felipe te yaʼtelinej spukel skʼop Dios kʼalal ay bin jelon ta skuxlejale?

¹⁴ Kilbeytik skʼoplal te Felipe te yaʼtelinej spukel ta alel skʼop Dios te la yakʼ kiltik ta jamal bin ya skʼan ya yal te jaʼ ya xbajtʼ ta koʼtantik spasel yaʼtel Dios kʼalal ya xjelon jkuxlejaltik. Mato jaluk-a te ay bin akʼbot ta swenta spasel ta kongregasion ta Jerusalén (Hech. 6:1-6). Ta patil te la yichʼ milel te Estebane, jajch ta utsʼinel te jchʼuunjeletike. * Kʼalal te Felipe la yil te ay jchʼuunjeletik lokʼik ta anel ta Jerusalén, ma lajuknax spet skʼab jilel. Bajtʼ schol skʼop Dios ta Samaria te banti ya skʼan albeyel yaʼiyik te lek yachʼil kʼop te ants winiketik (Mat. 10:5; Hech. 8:1, 5).

¹⁵ Te Felipe jich yoʼtan te ya xbajtʼ chikan banti ya x-ikʼot bael yuʼun te chʼul espiritu. Jaʼ yuʼun te Jehová la stuuntes yuʼun ya xjajch schol skʼop Dios ta yachʼil territorioetik. Ta kʼajkʼal-abi, te judioetik ya spʼajik te samaritanoetike. Pero ta skaj te ma la spʼajtiklan stukel te Felipe, ta melel lekniwan la yaʼiy sbaik ta stojol. Jaʼ yuʼun ma yanuk ya kaʼiytik te ya schʼam yaʼiyik ta lek te ipal ants winiketik te bin ya yale (Hech. 8:6-8).

¹⁶ Ta patil ikʼot bael yuʼun te chʼul espiritu ta Azoto (Asdod) sok Cesarea te banti nainemik bayal ants winiketik te ma judioik (Hech. 8:39, 40). Te kʼalal kʼaxemixniwan 20 jaʼbil te jajch schol skʼop Dios ta Samaria chaʼjelon te skuxlejale, melel ayix sfamilia sok yak ta nainel ta territorio banti ya schol skʼop Dios. Ya jtatik ta ilel te manchukme ay bintik jelon ta skuxlejal bajtʼ yoʼtan ta spasel te yaʼtel Diose, jaʼ yuʼun la yichʼik akʼbeyel bayal bendision yuʼun Jehová (Hech. 21:8, 9).

17, 18. ¿Bin-utʼil ya skoltayotik te ya xbajtʼ ta koʼtantik scholel skʼop Dios kʼalal ay bin ya xjelone?

¹⁷ Bayal j-abatetik yuʼun Dios te spisil-ora yakik ta abatinel ta stojol staojik ta ilel te koltayotik yuʼun te scholel skʼop Dios swenta jun yoʼtan ya yaʼiy sbaik te kʼalal jelon banti ya x-abatinike. Kiltik bin kʼot ta stojol te Osborne sok te yinam te Polite sbiil te Sudáfrica slumalik. Kʼalal lokʼik ta Betel la skuyik te ora ya sta yaʼtelik banti ma sjunal semana ya x-aʼtejik sok te ora ya sta banti ya xnainike. Pero ¿jichbal kʼot ta pasel? Te Osborne ya yal kaʼiytik: «La kiltik wokol, melel ma orauk la jta kaʼteltik bitʼil jkuyojtik-ae». Te Polite jich ya xjul ta yoʼtan: «Oxeb u ma la jta kaʼteltik, mero tulan la kaʼiytik, melel ma jkʼejoj jtakʼintik-a».

¹⁸ ¿Bin koltayotik yuʼun te kʼalal la yilik wokole? Te Osborne jich ya yakʼ jnaʼtik: «Te scholel skʼop Dios sok te kongregasion la skoltayotik yuʼun junuk koʼtantik sok te jaʼ ya xbajtʼ koʼtantik ta snopel te bin ya yakʼ yip koʼtantike.  La jtatik ta nopel te ma jichuknax ya xjilotik sok te ma jmel koʼtantik te jaʼ ya kaʼtelintik scholel skʼop Dios. Mero la yakʼbotik sbujtsʼ koʼtantik la kaʼiytik. La jletik aʼtel ta bayuk, ta patil bael la jtatik».

19-21. 1) ¿Bin ya skoltayotik yuʼun ma xchʼay kuʼuntik te slamalil koʼtantik? 2) ¿Bintik lekilal ya jtatik kʼalal ya xkʼayotik ta abatinel ta stojol Dios chikan bin yilel ay te jkuxlejaltike?

¹⁹ Te ejemploetik te la kiltikix ay bin ya yakʼ jnoptik, teme ya x-aʼtejotik chikan bantito kʼalal ya xjuʼ kuʼuntik kʼalal ay bin ya xjelon ta jkuxlejaltik sok ya kakʼ smukʼul koʼtantik ta stojol Jehová, mame xchʼay te slamalil koʼtantike (kʼopona Miqueas 7:7). Kʼalal ya xkʼax te tiempo yaniwan jtatik ta ilel te junxan ayotik sok te Jehová ta swenta te la jpastik tulan yuʼun kʼayotik ta yachʼil jkuxlejaltik. Te Polite ya yal te ay bin la snop ta swenta te bin kʼax ta skuxlejale: «Ta swenta te la kichʼ jelbeyel te kaʼtele la jta ta ilel bin ya skʼan ya yal te jaʼuk smukʼul koʼtan te Jehová manchukme jich yilel te ma xjuʼix kuʼune. Jich ya kaʼiy te kamigoinejxan ta lek te Jehová ta ora ini».

²⁰ Te Mary te la kalbeytik skʼoplal ta parrafo 8 yakto ta skanantayel te spapa soknix yak ta aʼtel ta precursora. Jich ya yal kaʼiytik: «Ay bin jtaojix ta ilel, kʼalal jmeloj koʼtan ya skʼan te ya jujkan jba jtsʼinuk ta snopel bin-utʼil ayon, te ya jkʼopon Dios sok te ya jpas tulan te ya xlamaj koʼtane. Te bin lekxan jnopoj yuʼun te jwokole, jaʼ te ya skʼan ya kakʼ ta skʼab Jehová te bin ya jmel koʼtan yuʼune. Ta melel jichnanix ya skʼan te ya jpastik ta pajel chaʼbeje».

²¹ Kʼalal jelon yaʼtelik te Lloyd sok te Alexandra te la kalbeytik skʼoplal ta sjajchibale, ya yalik te ay bintik la yakʼ ta ilel bin-utʼil ay te schʼuunel yoʼtanike te ma jichuk smaliyojike. Jich ya yalik: «Te bin ya xkʼax ta jkuxlejaltike ya yakʼ ta ilel ta jamal bin-utʼil ay te schʼuunel koʼtantik sok teme yanix skoltayotik-a sok teme ya yakʼ yip koʼtantik kʼalal ya jtatik wokole. Ta ora ini, jich ya kaʼiytik te lekubenxan jtaleltike».

22. ¿Bin ya xjuʼ ya smukʼulin koʼtantik teme ya jpastik tulan yuʼun ya x-abatinotik ta stojol Dios chikan bin kileltik ta ora ini?

²² Ta repentenax ya xjuʼ xjelon jkuxlejaltik ta skajniwan te ya kichʼtik jelbeyel kaʼteltik, ya stsakotik chamel o ya jtatik skanantayel jfamiliatik, pero yame xjuʼ ya smukʼulin koʼtantik te bayal jkʼoplaltik ta yoʼtan te Jehová sok te ya skoltayotik ta mero yorail (Heb. 4:16; 1 Ped. 5:6, 7). Te bin ya xjuʼ ya jpastik te joʼotike, jaʼ te ya jpastik spisil te bin ya xjuʼ kuʼuntik chikan bin yilel ay te jkuxlejaltike. Akʼa jkʼopontik te jTatik ay ta chʼulchan yuʼun ya xnoptsajotikxan ta stojol sok kakʼ jbatik ta skʼab yuʼun jaʼ ya skanantayotik. Jich ma xchʼay te slamalil koʼtantik manchukme ay bin ya xjelon ta jkuxlejaltik.