TA SWOLOL Balumilal te ancianoetik bayal skʼoplal ta yoʼtanik te aʼtelil ya apasik ta organisasion yuʼun te Diose. Ta melel, jpisiltik tseʼel koʼtantik yuʼun te koltayel ya awakʼike. Jaʼukmeto, mato jaluk la yichʼ kʼanbeyel te ancianoetik te toyolix yaʼbilalik te akʼa yakʼbeyik jilel ta skʼab ancianoetik te pekʼelxan yaʼbilalik aʼteliletik te mero tulanik skʼoplal.

Jaʼto te jich jajch ta pasele, te superintendenteetik yuʼun circuito sok te machʼatik ya x-aʼtejik ta yakʼel pʼijubtesel ta swenta skʼop Dios ya yijkʼitay te yaʼtelik kʼalal ya stsʼakaj 70 yaʼbilalik. Jaʼnix jich te ancianoetik te staojikix 80 yaʼbilalik ya yakʼbeyik jilel te machʼatik pekʼelxan yaʼbilalik aʼteliletik jich bitʼil coordinador ta Komite yuʼun Betel o coordinador yuʼun te jtsojb ancianoetik ta kongregasion. ¿Bin spasojik te hermanoetik-abi yuʼun te ay yijkʼitayoj yaʼtelike? Yakʼojik ta ilel te jun yoʼtanik ta stojol te Jehová sok te organisasion yuʼune.

Te hermano Ken jteb ma sta 49 jaʼbil aʼtej ta coordinador ta Komite yuʼun Betel, jich ya xjul ta yoʼtan: «Kʼalal la kaʼiy stojol te ya kijkʼitay te kaʼtele, akuerdo ayon-a. Ta sabnix ta kʼajkʼal-abi, la kalbey te Jehová te ya jkʼantik yan coordinador te pekʼelxan yaʼbilale». Bayal hermanoetik ta swolol Balumilal te ayix yaʼbilalik jichnix ya snopik bitʼil te Ken. Ta melel spisil te ancianoetik-abi te jun yoʼtanike, mero ya smulanik aʼtel ta stojol te yermanotakik, jaʼ yuʼun ay machʼatik ta sjajchibal la smel yoʼtanik jtebuk kʼalal jil yaʼtelike.

 Te hermano Esperandio te jaʼ coordinador yuʼun te jtsojb ancianoetik ta skongregasion ya yal te la smel yoʼtan jtebuk kʼalal jil te yaʼtele. Pero jaʼnix jich ya yal te bayalix swokol yuʼun te yaʼbilale, jich yuʼun ya skʼan te jocholix jtebuk yuʼun ya skanantay sba. Bitʼil stalelnanix-a te ya spase, jun yoʼtan yakto ta abatinel ta stojol Jehová sok jaʼ bendision kʼoem ta stojol te yermanotake.

Jaxan te hermanoetik te bayal jaʼbil aʼtejik ta yulaʼtayel kongregasionetik, ¿bin-utʼil ya yaʼiy sbaik yuʼun te jil te yaʼtelike? Te hermano Allan te 38 jaʼbil yichʼoj te aʼtelil-abi ya yal: «Jkʼaxel ma la jnaʼ bin ya jpas kʼalal la kaʼiy stojole». Pero te hermano ya yal te bayal bin lek ya xlokʼ kʼalal ya yichʼ pʼijubtesel ta spasel te aʼtelil hermanoetik te pekʼelxan yaʼbilalike. Te Allan jun yoʼtan yak ta abatinel kʼalal ta ora ini.

Te hermano Russell aʼtej 40 jaʼbil ta superintendente yuʼun circuito sok ta yakʼel chaʼoxchajp pʼijubtesel ta swenta skʼop Dios te ya yakʼ te organisasion kuʼuntike. Jich ya yal: «Mero ay skʼoplal ta koʼtantik te kaʼteltike sok jich ya kaʼiykotik te yato xjuʼ jpasbeltike». Jaʼ yuʼun ya yal te la smel yoʼtan sok te yinam ta sjajchibale. Ta ora ini schebalik yakik ta stuuntesel ta lek ta skongregasionik te bin ya snaʼik sok te bin snopojike, te hermanoetik kʼax tseʼel yoʼtanik te tey ayike.

Maniwan jichuk kaʼiyoj jbatik bitʼil te hermanoetik-abi. Pero snopel te bin kʼot ta stojol jtul winik te ya xchiknaj skʼoplal ta 2 Samuel ya skoltayotik yuʼun ya xkʼot ta koʼtantik bin-utʼil ya yaʼiy sbaik.

Jultestik ta koʼtantik bin kʼot ta pasel kʼalal te ajwalil David kontrainot yuʼun te snichʼan Absalón. Jich yuʼun te David lokʼ ta Jerusalén, bajtʼ ta anel ta Mahanaim ta stojol este yuʼun te mukʼul jaʼ Jordán. Tey-a te David sok te winiketik yuʼune laj sweʼelik. Kiltik bin kʼot ta pasel-a.

Oxtul winiketik te nopol nainemik tey-ae la yakʼik ta ilel yutsil yoʼtanik ta stojolik, la yakʼik wayibaletik, weʼelil sok yantik biluketik te ya xtuun yuʼunike. Barzilai sbiil te jtule (2 Sam. 17:27-29). Kʼalal laj yip te kontrainel yuʼun te Absalone, sujt ta Jerusalén te David, jokinot bael kʼalal ta Jordán yuʼun te Barzilai. Te David la yalbey te yakuk xbajtʼ sjokin ta nainel ta Jerusalén sok la yalbey te ya smakʼlin, manchukme ma puersauk ya x-akʼbot sweʼel te Barzilai, melel mero jkʼulej winik (2 Sam. 19:31-33). ¿Binwan yuʼun mero kʼux ta oʼtanil te Barzilai yuʼun te Davide? Jaʼniwan yuʼun te lekil taleliletik ay yuʼune sok te tsitsel ya xjuʼ x-akʼbot yuʼun, melel bayal bin yilojix ta skuxlejal. Ta melel jaʼ tʼujbil bendision te ya xkuxin sok ya x-aʼtej ta sna ajwalil te Barzilai.

Jaʼukmeto pekʼel la yakʼ sba te Barzilai sok la snaʼ te ma xjuʼix yuʼun stsakel te aʼtelil yak ta akʼbeyele, la yalbey te David te ma snaʼix «stsahtayel te bin ay yutsil soc te bin mayuc yutsil», melel ayix 80 yaʼbilal-a. ¿Bin yak ta yalbeyel skʼoplal-a? Ta melel, te jayeb jaʼbil kuxinem staoj bayal spʼijil yoʼtan. Ya jnaʼtik te manchuk mamalix yato xjuʼ yuʼun yakʼel lekil tsitsel, jich bitʼil la yakʼik lekil tsitsel ta patil bael «te mamaletic» ta stojol te ajwalil Roboam (1 Rey. 12:6, 7; Sal. 92:12-14; Prov. 16:31). Jich yuʼun  te Barzilai jaʼniwan yak ta yalbeyel skʼoplal-a te ay bintik ma xjuʼ ya spasix yuʼun te mamalixe. Jaʼnix jich la yal te ma xyaʼiybeyix sbujtsʼ te sweʼel sok te ma mero ya yaʼiyix kʼinal (Ecl. 12:4, 5). Jaʼ yuʼun la yalbey te David te jaʼ yakuk yikʼ bael ta Jerusalén te kerem Quimam te jaʼniwan snichʼane (2 Sam. 19:35-40).

Te bin la yichʼ alel ta sjajchibal te articulo jteb ma pajal sok te bin la spas te Barzilai. Pero ya skʼan ichʼel ta wenta te jaʼnax stukel te Barzilai la yichʼ ilel bin-utʼil ay skuxlejal sok bin ma xjuʼ ya spasix. Yan stukel ta ora ini te organisasion ya yil bin-utʼil lekxan ya xkʼotik ta lokʼel bayal ancianoetik te jun yoʼtanik ta stojol Dios ta swolol Balumilal.

Te ancianoetik-abi te toyolix yaʼbilalik pekʼel yakʼoj sbaik sok staojik ta ilel te bayal bin lek ya xlokʼ kʼalal ay machʼa ya yakʼbeyik jilel te yaʼtelike. Teme ya yijkʼitayik ta skʼab ancianoetik te pekʼelxan yaʼbilalik te aʼtelil yichʼojik-ae, te organisasion chapal ya xkʼot ta yilel ta pajel chaʼbej te aʼtelile. Jteb ma spisil-ora jaʼnix te hermanoetik spʼijubtesojik te machʼatik pekʼelxan yaʼbilalike, jich bitʼil laniwan spas te Barzilai sok te snichʼane o bitʼil la spas te Pablo sok te Timoteo (1 Cor. 4:17; Filip. 2:20-22). Te hermanoetik te pekʼelxan yaʼbilalik yakʼojik ta ilel te jaʼ «mahtaniletic» sok te ya xjuʼ xkoltaywanik «scuenta yuʼun ya yichʼ yip te sbaqʼuetal Cristo» (Efes. 4:8-12; paja sok te Números 11:16, 17, 29).

Ta swolol Balumilal bayal hermanoetik te yan machʼa la yakʼbeyik jilel te aʼtelil yichʼojik-ae stuuntesojik te stiempoik yuʼun ay bintik yan ya spasik ta abatinel ta stojol Dios.

Te hermano Marco te aʼtej ta superintendente yuʼun circuito 19 jaʼbil ya yal: «Te bitʼil jocholonxane, ya xjuʼ xbajtʼ kulaʼtay te smamlal te hermanaetik te ma Testigoik te ayik ta jkongregasion».

Te hermano Geraldo te jaʼnix jich aʼtej ta yulaʼtayel kongregasionetik 28 jaʼbil ya yal: «Joʼon sok te kinam ay bin yachʼil jnopojtik te ya jpastik, jich bitʼil skoltayel te machʼatik yijkʼitayojik scholel skʼop Dios sok te bayalxan machʼatik ya jnojptestik ta skʼop Dios». Ta ora ini quincelaj ta tul te machʼa yak snojptesbelik ta skʼop Dios sok bayal machʼatik te yijkʼitayojik scholel skʼop Dios yakiklaj ta kʼoel yan buelta ta tsoblejetik.

Te Allan te la kalbeytikix skʼoplal ta sjajchibal ya schol kaʼiytik: «Ta ora ini jaʼ ya xbajtʼxan ta koʼtantik scholel skʼop Dios. Mero ya jmulantik scholel skʼop Dios te banti ya xkʼax bayal ants winiketik, ta negosioetik sok teynix te banti ayotik ta nainele. Chaʼtul machʼatik jlakʼojtik ta nainel ay sjokinejotikix ta tsoblej».

Teme jich akʼoplal bitʼil te hermanoetik te jun yoʼtanik ta stojol Dios sok te pʼijubenik ta lek te jilix awaʼtele, ay yan bintik ya xjuʼ ya apas yuʼun ya x-aʼtejat sok te Jehová, ya xjuʼ ya awakʼbey snop te bin anopoj te hermanoetik te pekʼelxan yaʼbilalik te bitʼil te jaʼate. Te Russell te la kalbeytikix skʼoplal ya yal: «Te Jehová yak ta snojptesel sok ta stuuntesel hermanoetik te pekʼelxan yaʼbilalik te mero lek yaʼtelik sok te ya xjuʼ spasbelik te aʼtele. Ya sta yutsil slekil te hermanoetik ta swolol Balumilal ta swenta te ay yip yoʼtanik ta nojpteswanej sok ta skanantayel te tuminchijetik te hermanoetik-abi» (ilawil te recuadro « Nojptesa te winiketik te pekʼel yaʼbilalik ta aʼtel te ban kʼalal ya xjuʼ yuʼunik»).

Teme mato jaluk jil te awaʼtele, jaʼukme ya xbajtʼ ta awoʼtan snopel te bin leke. Bayalme machʼa akoltayoj ta skuxlejal ta swenta te aʼtelil la apas talel sok spisil awoʼtane, yame xjuʼ jichnix ya apas baelxane. Ta ora ini mero kʼuxat ta oʼtanil, spisilnanix-ora kʼuxat ta oʼtanil-a.

Te bin tulanxan skʼoplale, jaʼ te mero ayat ta yoʼtan te Jehová ta swenta spisil te bin apasoje. Te Jehová yaloj ta jamal te maʼyuk bin-ora ya xchʼay ta yoʼtan «te awaʼtelic soc te scʼuxul awoʼtanic te la awaqʼuic ta ilel ta scuenta sbihil, te bin utʼil la awacʼ abahic ta aʼbatinel ta stojol te machʼatic chʼuhltesbilic, soc te hich nix yaquex ta spasel cʼalal ora» (Heb. 6:10). Te bin ya yal te texto ini te lokʼem ta yoʼtan te Jehová ya yakʼ jnaʼtik ta jamal te ma jaʼuknax ya xjul ta yoʼtan te bin la jpastik tal ta namey. Te bitʼil bayal  akʼoplal ta yoʼtan te Jehová ma xchʼay ta yoʼtan te bin apasoj tal sok te bin yakat ta spasel ta ora ini yuʼun lek yoʼtan awuʼun.

Jaxan teme ma jichuk kʼoem ta atojol, ¿yabal xtuun awuʼun te bin yakotik ta yilele? Yakniwan, kiltik bin yuʼun.

Ta ora ini jokinejtikniwan hermanoetik te jilix yaʼtelike. Jich yuʼun ya xjuʼ te bayal bin ya jnoptik yuʼun te schʼuunel yoʼtanik sok te bin yilojik ta skuxlejalike. Jkʼanbeytik te yakuk skoltayotik ta snaʼel bin ya xjuʼ ya jpastik sok jojkʼoybeytik banti ya xjuʼ xlekubotikxan. Jaʼnix jich kiltik ta lek bin-utʼil jun yoʼtan ya stuuntesik te banti yakik ta abatinel ta stojol Dios ta ora ini te bin snopojik ta skuxlejalike.

Teme toyolix kaʼbilaltik te jilix kuʼuntik te kaʼteltik te kichʼojtik-ae o hermanootik o hermanaotik te ya xjuʼ ay bin ya jnoptik ta stojolike, juluk ta koʼtantik te bayal skʼoplal ta yoʼtan Jehová te machʼatik bayal jaʼbil jun yoʼtan abatinemik ta stojol sok te jichnix yakik ta spasel kʼalalto ta ora ini.