¿AYBAL jich kʼaxem ta atojol? Teme aye, ya xkʼot ta awoʼtan te ya yakʼ mel-oʼtan, ya xchʼay yip koʼtantik sok ma jnaʼtikix te bin ya jpastik yuʼune. Bayal te machʼatik jich kʼaxem ta stojolike maʼyukix yip yoʼtanik sok chebajem yoʼtanik, jich ya yaʼiyik te ma skʼan ya xkuxinikixe.

Teme la achʼay spisil te bintik ay awuʼun ta skaj te bintik ya xkʼax te bayal bin ya sjin jilele, jichniwan ya awaʼiy-euk te ma xkujchix awaʼiy te awokole. Jichniwan ya anop te maʼyukix swentail te akuxinele. Pero te Biblia ya yal te kʼax lek te kuxulotike sok ya skʼan ya schʼuun koʼtantik te ay bin lek ya jmaliytik ta pajel chaʼbeje.

Te Santiago 5:11 ya yal te «ha bayel yutsilic te machʼatic ya xcuhch yuʼunic te swocolique». Te kʼalal yaktonax atambel aba jajchele jichniwan ya awil te kʼax wokol te akuxlejale, pero teme ya apas tulane yame awil te ya xlekub bael te akuxlejale.

Te Biblia ya yal te ya sta yorail te maʼyukix te «mel-oʼtan, oqʼuel o te bin cʼux» (Apocalipsis 21:4). Te bin ya yal te Biblia ya xkʼot ta pasel kʼalal te Wentainel yuʼun Dios ya spas ta nichimal kʼinal te Balumilale (Salmo 37:11, 29). Yame xlaj skʼoplal te bintik ya xkʼax te bayal bin ya sjin jilele. Spisil te bintik ay ta koʼtantik te ya yakʼ mel-oʼtan sok te bin ochemix xiwel ta koʼtantik yuʼune, yame xlaj skʼoplal ta jkʼaxel. Te Dios te spisil ya xjuʼ yuʼune jich ya yal: «Te bin ay ta nahil mayuquix ta naʼel, jcʼaxel ma xnaʼotix» (Isaías 65:17).

Nopa awaʼiy ta swenta ini, te Jpaswanej kuʼuntike ay bintik yakix ta spasel swenta ay bin ya xjuʼ ya jmaliytik ta pajel chaʼbej, melel jaʼ ya skʼan te jun koʼtantik ya xkuxinotik te kʼalal ya smantaltesotik te Wentainel yuʼune (Jeremías 29:11). Te bin ya yakʼ jmaliytik te Diose, ¿yabal skoltayat yuʼun ya amulanxan te kuxinele? Te Sally te la kalbeytik skʼoplal ta sbabial artikuloe jich ya yal: «Kʼalal jaʼ ya jnopilan ta koʼtantik te bin tʼujbil ya yakʼ jmaliytik te Wentainel yuʼun te Diose, jaʼ ya skoltayotik yuʼun ma jnaʼulantikix te bin kʼax ta jkuxlejaltik sok ya skoltayotik yuʼun ya xkujch kuʼuntik te jwokoltike».

¿Binxan nopol ya xbajtʼ spas te Wentainel yuʼun te Diose? Ya kikʼatkotik ta stael te sujtibe. Jichme ya ata ta ilel te kʼax lek te kuxinel manchukme ay te jwokoltike sok te nopol ya xlaj skʼoplal spisil te bintik ya xkʼax te bayal bin ya sjin jilele. Te bitʼil yakotik ta smaliyel te ya xkʼot ta pasel-abi, jaʼme ya xjuʼ ya skoltayotik te bintik ya yal te Biblia yuʼun jich ya xkujch kuʼuntik-a te jwokoltike.