¿AYBAL kʼax ma lek awaʼiyoj aba te ma akʼan ya xkuxinatix yuʼune? Teme jiche, yaniwan xkʼot ta awoʼtan te bin yaʼiyel ya yaʼiy sba te Adrianae. Ta swenta te bayal ya smel yoʼtane jich ya yaʼiy te maʼyukix smukʼul yoʼtane.

Te Kaoru te la skanantay te smeʼ stat te meʼel mamalikix sok te ayik ta chamel-ae jich la yal: «Ta yorail-abi, mero tenbilon la kaʼiy jba yuʼun te kaʼtele. Jaʼ yuʼun ta patil chʼay sbujtsʼ te jweʼele sok ma x-ochix jwayel ta ajkʼabal. La jkʼan te yakuk xlajon swenta ma xwoklajonix-a».

Jtul winik te Ojebode sbiil jich la yal: «Spisil-ora ayon ta mel-oʼtan-a, ay maʼyukix swentail te bin ya x-okʼon yuʼun-ae. Jaʼnix jich ay tal ta koʼtan te ya jmil jbae». Te Ojebode, Kaoru sok te Adriana ma la smil sbaik, pero mel-oʼtantik sba te jteb ma sta ochocientos mil ta tul ants winiketik te smiloj sbaike.

Jteb ma spisiluk te machʼatik ya smil sbaike jaʼ winiketik, ay bayal ta tul te la smil sbaik ta swenta te kʼexawik ta skʼanel koltayel. Pero te Jesús la yal te machʼatik ayik ta chamel ya skʼanik koltayel yuʼun jtul jpoxtaywanej (Lucas 5:31). Teme jich ya awaʼiy aba te jaʼate mame xkʼexawat ta skʼanel koltayel. Bayal ants winiketik te skʼanojik koltayel lekubenikix ta swenta te la schʼuunik te bin albotik yuʼun te doktore. Te Ojebode, Kaoru sok te Adriana la yichʼik koltayel yuʼun doktoretik, ta ora ini lek ayikix.

Swenta ya xlekubik te machʼatik tsakbilik ta depresion, ay doktoretik te ya yakʼik poxetik, ya xtikunwanik ta stojol jtul psicólogo o ya yalik te schebal ya skʼan ya yichʼ pasele. Jaʼnix jich yame skʼan ya yichʼik koltayel yuʼun te sfamiliaik sok yamigotakik te machʼatik tsakbilik ta depresion, soknix te yakuk yakʼbeyik yil te ya xkʼot ta yoʼtanik te bin yaʼiyel ya yaʼiy sbaik sok te manchuk ya x-ilinik ta oranax ta stojolik. Te lekil amigo te ya xjuʼ ya skoltayotike jaʼ te Jehová sok ya yakʼbotik te lekil koltayel ta swenta te Bibliae.

Jteb ma spisiluk te machʼatik ayik ta depresion ya skʼan ya yichʼik ilel bayal tiempo yuʼun te doktor sok ya skʼan ay bintik ya sjel ta skuxlejalik swenta ya xkujch yuʼunik-a te swokolike. Teme tsakbilat ta depresion naʼame te ay bin kʼax tʼujbil ya xjuʼ ya amaliy ta pajel chaʼbej. Jaʼ jich ya snop te Ojebode: «Koʼtanukix te ya xkʼot ta spasel te bin yal te Isaías 33:24 te banti ya yal te maʼyuk jtuluk ants winik ya xbajtʼ yal: “Ayon ta chamel”, te xchie». Jaʼnix jich ya xjuʼ ya yakʼbat smukʼul awoʼtan te ya xbajtʼ spas «yachʼil bahlumilal» te Dios te banti maʼyukix «te bin cʼux», ni maʼyuk bin ya yakʼbatxan amel awoʼtan (Apocalipsis 21:1, 4). Yame xchʼay bael ta jkʼaxel te bintik ya amel awoʼtan yuʼune. Maʼyuk bin-ora te maba lek kʼinal ya xbajtʼ awaʼiy sok jkʼaxel ma xbajtʼ talukix ta awoʼtan (Isaías 65:17).