Te Sally * te maʼyuk bayal jil sbiluk ta skaj te tulan yikʼal jaʼal kʼax ta slumale jich la yal: «Jich la kaʼiy te ma xkujchix kuʼun te jwokole. Bayal kʼajkʼal te jich la kaʼiy jbae».

Jaʼnix jich te kʼalal ay machʼa ya xlaj kuʼuntik ya yakʼotik ta bayal mel-oʼtan. Te Janice te jaʼ slumal te Australia jich la yal: «Kʼalal laj te chaʼtul kalatake jin ta jkʼaxel te jkuxlejale, kaj jpas tulan yuʼun ya jlekubtes yan buelta te jkuxlejale. Jich la kalbey sok spisil koʼtan te Diose: “Dios Kajwal, ¡ma xkujchix kuʼun! Jaʼnax ya jkʼan ya xwayon sok te maʼyuk bin-ora ya xwikʼ jsit”».

Te bin jinbot skuxlejal yuʼun te Daniele jaʼ te loʼlayot yuʼun te yiname. Jich la yal: «Kʼalal la yalbon te kinam te la sloʼlayon sok yane jich la kaʼiy te la slowbonik ta kuchiyo te koʼtane. Yuʼun-nix kʼax kʼux la kaʼiy-a, bayal u te jich la kaʼiy te bayal buelta yak ta slowbelonik ta kuchiyoe».

Te wokoliletik te liʼ cholanbil skʼoplale, ¿aybal jich yak ta kʼaxel ta atojol?

• Te bintik ya xkʼax te bayal bin ya sjin jilel

• Kʼalal ay machʼa ya xlaj kuʼuntik

• Kʼalal ya sloʼlayotik te joytik ta nujpunel

• Kʼalal ayotik ta tulan chamel

• Kʼalal ay bin ma lek ya kaʼiy jbatik yuʼun

Teme aye, te numero yuʼun Te J-ilkʼinal ta toyol ini ya skoltayat ta yilel te kʼax lek te kuxulotike.