TEME ay machʼa lajem awuʼun te kʼux ta awoʼtane ayniwan awaʼiyoj te ya yakʼ mel-oʼtan, te atukel ya awaʼiy aba sok jich ya awaʼiy te maʼyukix bin ya xjuʼ ya apase. Jaʼnix jich ayniwan ya x-ilinat, te ay amul ya awaʼiy sok te ay xiwel ta awoʼtan soknix ayniwan ya xtal ta awoʼtan teme jaʼbal lek te kuxulat-toe.

Yame skʼan ya anaʼ te mame yuʼunuk kʼun awoʼtan te ya x-okʼate, melel jaʼ jich ya kakʼtik ta ilel te bayal skʼoplal ta koʼtantik te machʼa laje. Pero, ¿aybal bin ya xjuʼ ya slamantesbat te awoʼtane?

Manchukme jich ya awaʼiy te maʼyuk bin ya slamantesbat te awoʼtane, te bintik ya yichʼ albeyel skʼoplal liʼ ini yaniwan xjuʼ ya skoltayat.

LOKʼESA TIEMPO YUʼUN YA X-OKʼAT

Yanyantik-a te bitʼil ya smel yoʼtanik te ants winiketik sok te jayeb tiempo ayik ta mel-oʼtane. Pero te kʼalal ya x-okʼike jaʼ ya xkoltayotik swenta lek ya yaʼiy sbaik-a. Te Vanessa te la kalbeytikix skʼoplale jich la yal: «Jaʼnax baem koʼtan ta okʼel yuʼun jich ya jlokʼes-a te bin ay ta koʼtane». Te Sofía te repentenax laj te yijtsʼine jich la yal: «Kʼax kʼux ya kaʼiy te kʼalal ya xtal ta koʼtan te kijtsʼine. Jich kʼoem te ya yichʼ jamel jun ejchʼen swenta ya yichʼ poxtayel ta lek. Mero ma xkujch te skʼuxule, pero yuʼun-nix jich ya skʼan pasel-a swenta ya smak sba te ejchʼene».

ALA TE BIN AY TA APENSAR SOK TA AWOʼTAN

Yuʼun-nix stalel-a te ay baeltik te jtukeltik ya jkʼan ya x-ayinotike, pero tulanme ta sitintayel te jwokoltik teme ya jtukeltay jbatike. Te Jared te 17  yaʼbilal-a te kʼalal laj te state jich la yal: «Ay maʼyuk swentail ya kaʼiy te bintik ya kale, pero ya skoltayon ta bayal te kʼalal ya jlokʼes te bin ay ta koʼtane». Te Janice te la kalbeytik skʼoplal ta sbabial artikuloe jich la yal: «Jaʼ la yakʼbon smukʼul koʼtan te kʼalal ay machʼa la jcholbey te bin yaʼiyel la kaʼiy jbae, jich la kaʼiy te maba jtukeluke sok te ya xkʼot ta yoʼtanik te bin-utʼil ayon-ae».

AKʼA ABA TA KOLTAYEL

Jtul doktora jich la yal: «Te machʼatik ya yakʼ sbaik ta koltayel yuʼun te sfamiliatak sok te yamigotak te kʼalal kʼaxelto-a te swokolike, jaʼikme te machʼatik ya xjuʼ ya sitintayik te swokolik te ya xtal ta patile». Albeya te awamigotak te bin ya xjuʼ ya spasik yuʼun ya skoltayatik. Lekniwan ya yaʼiyik, melel ay ma snaʼik te bin-utʼil ya xjuʼ ya skoltayatike (Proverbios 17:17).

NOPTSAJANXAN TA STOJOL TE DIOSE

Te Tina jich la yal ta jamal: «Kʼalal laj ta kanser te jmamlale, maʼyukix machʼa ya xjuʼ ya jcholbey yaʼiy-a te bin ya xkʼax ta jtojole, jaʼ yuʼun jaʼ kaj jcholbey yaʼiy Dios spisil te bin ay ta koʼtane. Kʼalal ya xjajchon ta wayel-ae jaʼ ya jkʼanbey te Dios te yakuk yakʼbon yip koʼtan swenta lek ya xkʼax kuʼun te kʼajkʼale. Bayal te bin-utʼil la skoltayon te Diose». Te Tarsha te 22 yaʼbilal-a te kʼalal laj te smamae jich la yal: «Jaʼ la yakʼbon bayal smukʼul koʼtan te skʼoponel te Biblia ta jujun kʼajkʼale. Spisil-ora ay bin lek la yakʼbon jnop».

NOPA AWAʼIY TE KʼALAL YA XCHAʼKUXAJE

Jich la yal te Tina: «Ta sjajchibal maba la skoltayon snaʼel te ay chaʼkuxajele, jaʼ ya jkʼan-a te kuxuluk te jmamlale sok te alaletik kuʼun ya snaʼik te statike. Pero te bitʼil kʼaxemix chaneb jaʼbile, jaʼ smukʼulinejix koʼtan te ay chaʼkuxajele. Jich ya kaʼiy te jaʼ ya skoltayone. Te kʼalal ya jnop kaʼiy te binwan yilel te kʼalal ya kil jba sok yan buelta te jmamlale, ya yakʼbon stseʼelil koʼtan sok slamalil koʼtan».

Maniwan orauk te ay bin ya xjuʼ ya slamantesbat te awoʼtane, pero yaniwan skoltayat te bin la yal te Vanessae: «Jich ya awaʼiy te ma xjuʼ awuʼun sitintayel te awokole, pero aynixme te bin-ora ya xlekub ya kaʼiytik te kʼinale».

Manchukme jkʼaxel maʼyuk sbujtsʼ kʼinal ya awaʼiy, naʼame te kʼax lek te kuxulotike. Te Dios ya skoltayat yuʼun ya amulanbeyxan yutsilal sjokinel te awamigotak sok te ya atabey swentail te akuxlejale. Te Dios nopolme ya schaʼkuxajtes te machʼatik lajemike. Jaʼ ya skʼan te yakuk apet aba sok te machʼatik lajemik awuʼun soknix ya stupʼ ta jkʼaxel te wokolil ataoje.