Ayniwan jich awaʼiyoj aba te maʼyuk bin ya xjuʼ awuʼun spasel ta skoltayel te ants winik te ay machʼa laj yuʼun te kʼax kʼux ta yoʼtane. Maniwan ya jnaʼtik bin ya jpastik o ya kalbeytik, jich yuʼun manchukme maʼyuk bin ya kaltik o ya jpastik ta stojol, ay bayal bin ya xjuʼ ya jpastik ta yakʼel koltayel.

Ay baeltik tikʼ-a te ya jokintik sok ya kalbeytik te bayal ya jmel koʼtantik ta stojole. Bayal ta pam lum ya yakʼik ta ilel te ay ta yoʼtanik te machʼa ay ta wokol te kʼalal ya spetik sok te kʼalal tulan ya stsakbeyik skʼabe. Teme ya skʼan ya xkʼopoj te machʼa yak ta yaʼiybeyel skʼuxul te mel-oʼtane, chʼambeya awaʼiy. O te bin lekxane, jaʼ te ya apas te bin ya xtuun yuʼun te sfamiliae, melel ayniwan maba ya xjuʼ yuʼun spasel, jich yuʼun teme lek ya yilike ya xjuʼ ya akoltay ta spasel weʼelil, skanantayel alaletik sok schajpanel te bin-utʼil ya yichʼ mukel te machʼa laje. Te bintik ya apas ta stojole, jaʼ bayalxan skʼoplal ya xkʼot ta stojol.

Ta patil ayniwan ya xtal ta awoʼtan te ya awalbey skʼoplal te machʼa laje, yaniwan ajultesbey ta yoʼtan te slekil talele o ya acholbey junuk te bin tʼujbil kʼax ta stojole. Lekniwan ya xkʼot ta yoʼtan te bin ya awalbeye sok ayniwan ya xtijbot jtebuk stseʼej te machʼa yak ta yaʼiybeyel skʼuxul te mel-oʼtane. Jaʼ jich kʼot ta swenta jtul ants te Pam sbiile, jaʼ te ayix wakeb jaʼbil slajel te smamlal te Ian sbiile, jich la yal: «Te ants winiketik ya scholbonik kaʼiy te bintik lek la spas te Ian, maʼyuk jnaʼoj-a, ta swenta-abi leknax ya kaʼiy jba yuʼun».

Ay chaʼoxtul te machʼatik ay bin ya stʼunbeyik skʼoplale ya yalik te jaʼnax ya yichʼik bayal koltayel yuʼun yamigotak te machʼatik yak ta kʼaxel yuʼunik te skʼuxul mel-oʼtan te kʼalal kʼaxelto-a te wokolil ta stojole, mel-oʼtantik sba-abi, jaʼukmeto te kʼalal ya xjajchik ta spasel te yaʼtelik ta skuxlejalik te yamigotake, ya xchʼay ta yoʼtanik te ayto bayal ya skʼan koltayel te machʼa ay swokole. Jaʼ yuʼun mame xa awijkʼitay skʼoponel. * Bayal ta tul te machʼatik yak ta yaʼiybeyel skʼuxul te mel-oʼtane ya yalik bayal wokol yuʼun te ay machʼa ya x-aʼiybot te bin yaʼiyel ya yaʼiy sbaik te kʼalal kʼaxemix-a te tiempoe.

Ilawil bin kʼot ta stojol jtul achʼix te Kaori sbiile, jaʼ slumal te Japón, kʼax stukel la yaʼiy sba te kʼalal laj te smeʼe, jaʼnix jich joʼlajuneb u ta patil laj te swixe. Lek la yaʼiy sba te bayal buelta koltayot yuʼun te yamigotake. Te Kaori ay jtul yamiga te ayix bayal yaʼbilale, Ritsuko sbiil, jaʼ la sjap sba ta skanantayel jich bitʼil jtul yal. Te Kaori jich la yal: «Ya kal ta jamal te maba la jmulan te ya skanantayone, melel maʼyuk yan jich bitʼil te jmeʼe sok maba la jkʼan te ay machʼa ya skuy sba ta jmeʼe. Jaʼukmeto ta swenta te bin la spas ta jtojole, kʼax kʼux la kaʼiy ta koʼtan te Ritsuko sok jaʼ te machʼa bayal skʼoplal ta koʼtane. Ta spisil semana jun-nax la jcholtik skʼop Dios sok jun-nax bootik ta tsoblejetik ta swenta yichʼel ta mukʼ te Diose. La yikʼon ta yuchʼel té, la yichʼbon bael jweʼel sok la stsʼibaybon tut junetik sok kartaetik. Ta skaj te lek spisil te bin ya yal sok te bin ya spas te jmeʼ Ritsuko bayal la skoltayon».

Kʼaxemix lajchayeb jaʼbil slajel te smeʼ Kaori. Te kʼajkʼal ini, te Kaori sok te smamlal bayal ya slokʼes stiempoik ta scholbeyel skʼop Dios te spatxujkike, jich ya yal: «Te jmeʼ Ritsuko ya sjojkʼoybon te bin-utʼil ayone. Te kʼalal ya sujton bael ta jna ya xbajtʼ kulaʼtay sok bayal ya jmulan te ya jokin jba soke».

Te Poli jaʼ tul testigo yuʼun Jehová, jaʼ slumal te Chipre, jaʼnix jich staoj lekilal yuʼun te la yichʼ koltayel yuʼun te yantike. Te smamlal jaʼ te Sozos sbiile, jaʼ jtul winik te bayal yutsil yoʼtan sok jaʼ jtul anciano ta kongregasion te lek stalel-ae. Kʼayem-a te ya yikʼ bael ta sna te meʼba alaletik sok te meʼba antsetik ay ta skongregasion swenta ya sjokin sbaik ta weʼel sok ya sjokin sbaik jtsʼinuk (Santiago 1:27). Mel-oʼtantik sba, te kʼalal ayix 53 yaʼbilal-ae, laj ta skaj te chʼi tumor ta schinam. Te Poli jich la yal: «Laj te joy te kʼax jun koʼtan jba soke, la jokin jba sok 33 jaʼbil».

Te kʼalal yichʼojix mukel-a te smamlale, te Poli bajtʼ ta nainel ta lum Canadá sok skerem-al te 15 yaʼbilale. Tey jajch stsob sbaik sok te stestigotak Jehová. Te Poli jich la yal: «Manchukme te hermanoetik ta kongregasion ma snaʼik te bin kʼax ta jtojolkotike, la yakʼbonkotik smukʼul kʼinal kaʼiykotik ta swenta yutsil skʼop yaʼiyejik sok leknax te koltayel la yakʼbonkotike. ¡Leknax la yaʼiy sba te jkerem-al yuʼun-abi, melel bayal  ya snaʼ te state! Te machʼatik swentainojik te kongregasion la yakʼik ta ilel te ay ta yoʼtanik te jkerem-al Daniel. Ay jtul te machʼa ma xchʼay ta yoʼtan yikʼel bael te jkerem-al ta sjokinel sba sok yamigotak o ya xbajtʼik ta tajimal pelota». Ta ora ini, te Poli sok te Daniel lek ayik sok tseʼelnax yoʼtanik.

Ta melel bayal bin-utʼil ya xjuʼ ya jkoltaytik sok ya kakʼbeytik yip yoʼtanik te ants winiketik te ay lajem yuʼunik te machʼa kʼax kʼux ta yoʼtanike. Ilawil te yan articulo bin-utʼil te Biblia ya yakʼ smukʼul kʼinal ya kaʼiytik ta swenta te ya yalbotik te bin tʼujbil ya xkʼot ta pasel sok te ay bin ya yakʼ jmaliytik ta pajel chaʼbeje.