La yal: «Yame skontrain sbaik te nacionetik sok yame skontrain sbaik te ajwaliletike. Yame xtal tulan nijkel, jaʼnix jich yame xtal tulan wiʼnal sok tulan chamel ta bayuk» (Lucas 21:10, 11). Jaʼ pajal sok te kʼalal ya xchiknaj tsantsewal ta chʼulchan te ya yakʼ ta naʼel te ya xtal jaʼale, jaʼ yuʼun te kʼalal jich ya xchiknaj te señailetik-abi, yame jnaʼtik te nopol ya xtalix te Wentainel yuʼun te Diose. ¿Jichbal yakotik ta yilel ta ora ini? ¿Jichbal yak ta kʼoel ta pasel ta swolol Balumilal? ¿Bin-utʼil ya jnaʼtik?

1. GUERRAETIK

Ta jaʼbil 1914 jajch jun guerra te maʼyuk jich kʼoem ta pasel-ae. Te historiadoretik ya yalik te jelon te kuxlejalil ta jaʼbil-abi, melel jajch te Primera Guerra Mundial te bayal wokolil la yakʼ ta swolol Balumilal. Ta guerra-abi la stuuntesik tanqueetik yuʼun guerra, avionetik te ya schʼojik bomba, metralletaetik, gas te ya xmilawan sok yantikxan aʼtejibaletik yuʼun guerra. Ta Segunda Guerra Mundial chiknaj te bomba atómica. Jaʼto tal ta 1914 chiknajem bayal guerraetik ta bayuk te bayal millón ta tul ants winiketik lajemik yuʼune.

2 TULAN NIJKEL

Te enciclopedia Britannica Academic jich ya yal, ta jujun jaʼbil ayniwan 100 buelta ya xkʼax tulan nijkel te ya yakʼ bayal wokolile. Jaʼnix jich te Servicio Geológico de Estados Unidos jich la yal ta jun informe: «Jaʼto tal ta jaʼbil 1900, ta jujun jaʼbil ayniwan ya xkʼax 16 tulan nijkel». Ayniwan machʼatik ya yalik te bayal nijkel ya xkʼax, melel ayix aparatoetik te ya staik ta ilele. Pero ta smelelil bayal ants winiketik staojik wokol sok bayal machʼatik lajemik ta skaj te nijkele.

 3 MAʼYUK WEʼELIL

Ta skaj te guerraetik, te maʼyuk takʼin, te ya x-elkʼajik te machʼatik yichʼoj tulan yaʼtelik, te ma swentainik ta lek te tsʼunbajel sok te chambalametik, soknix te ma xyilik ta lek te kʼalal ya xtal bayal kʼajkʼal o bayal sik, spisil ini jaʼ ya yakʼ te maʼyuk weʼelile. Jun informe yuʼun te Programa Mundial de Alimentos ya yal: «Ta swolol Balumilal, ay 821 millón ta tul ants winiketik te ma staix sweʼelik, ta spisil-abi ay 124 millón te ya xjuʼ ya xlajik yuʼune» (2018 Year in Review). Ta skaj te ma staix sweʼelik, ta jujun jaʼbil ya xlaj 3.1 millón ta tul alaletik. Ta jaʼbil 2011 jteb ma sta 45% te alaletik ta swolol Balumilal lajik yuʼun.

4 TULAN CHAMEL

Jun informe yuʼun te Organización Mundial de la Salud jich ya yal: «Te siglo 21 la yichʼ naʼbeyel sba ta swenta te tulan chamel. Ay chamel te naʼbil sba te chaʼchiknaj jich bitʼil cólera, te chamel te oranax ya spuk sba sok te fiebre amarilla sok ay yantik chamel te chiknajelto jich bitʼil, síndrome respiratorio agudo y grave, gripe pandémica, síndrome respiratorio de Oriente Medio, ébola sok te sika». Jaʼnix jich, te tulan chamel te kʼaxelto te COVID-19 sbiile. Manchukme te cientificoetik sok te doctoretik ya snaʼik te bin-utʼil ya xchiknaj te jayeb ta chajp chamele, ma juʼem yuʼunik stabeyel spoxil.

5 SCHOLEL SKʼOP DIOS TA SWOLOL BALUMILAL

Te Jesús la yalbey skʼoplal yan señail: «Yame xpujk ta alel ta swolol balumilal te lek yachʼil kʼop yuʼun te Wentainel yuʼun te Diose, jichme ya yaʼiyik te skʼop Dios spisil te ants winiketik, tey-abi ya xtal te slajibal kʼajkʼale» (Mateo 24:14). Manchukme bayal wokolil ta ora ini, kʼaxem ta 8 millón ta tul ants winiketik ta swolol Balumilal yakik ya scholel te lek yachʼil kʼop yuʼun te Wentainel yuʼun Dios ta 240 nacionetik sok lumetik te kʼaxem ta jmil kʼopil. Maʼyuk bin-ora jich kʼoem ta pasel-a.

Spisil te señailetik la yalbey skʼoplal te Jesuse yak ta kʼoel ta pasel ta kʼajkʼal ini. ¿Bin yuʼun te bayal skʼoplal ta koʼtantike? Melel te Jesús jich la yal: «Te kʼalal ya awilik te ya xkʼot ta pasel spisil ini, naʼaikme te nopol ayix te Wentainel yuʼun te Diose» (Lucas 21:31).

Te señailetik la yal te Jesús sok teme ya jtʼuntik te bintik ya yal te Biblia, ya yakʼ ta naʼel te jajch ta mantalteswanej te Wentainel yuʼun Dios ta chʼulchan ta jaʼbil 1914. a Ta jaʼbil-abi, te Dios la yakʼbey yaʼtel ta ajwalil te sNichʼan jaʼ te Jesucristo (Salmo 2:2, 4, 6-9). Nopol ya swentainix Balumilal te Wentainel yuʼun Dios sok yame slajin te ajwaliletik sok yame yichʼ pasel ta Nichimal Kʼinal te Balumilal te banti ya xkuxinotik ta sbajtelkʼinal.

Nopolix ya xkʼot ta pasel te oración te la yakʼ ta nopel te Jesús te naʼbil sba jich bitʼil padrenuestro: «Akʼa taluk te Wentainel awuʼune. Akʼa yichʼ pasel te skʼanojel awoʼtan ta balumilal jich bin-utʼil yak ta pasel ta chʼulchan» (Mateo 6:10). Jaʼ yuʼun, ¿bin yak ta spasel te Wentainel yuʼun Dios jaʼto tal ta 1914? ¿Bin ya xbajt spas kʼalal ya swentain te ants winiketike?