Ta yan artículo la kiltik te bintik señail la yal te Jesuse. Te señailetik-abi ya yakʼ jnaʼtik te jaʼix Ajwalil ta chʼulchan te Jesucristo yuʼun te Wentainel yuʼun Dios.

Te Biblia ya yal te bin nail la spas te kʼalal och ta Ajwalil te Jesús, jaʼ te la schʼoj koel tal ta Balumilal te Satanás sok te pukujetik yuʼune. Jaʼ yuʼun jaʼnax ya xjuʼ ya spas yaʼtelik ta Balumilal, jaʼ ta swenta te bayal batsʼejemix te wokolil jaʼto talel ta 1914 (Apocalipsis 12:7, 9).

Manchukme yak ta toyel te wokolil ta ora ini, te Jesús, te jaʼ Ajwalil yuʼun te Wentainel yuʼun Dios bayal bin lek spasojix ta stojol te ants winiketik. Jaʼ yak ta yilel te nojptesel yuʼun Biblia te ya yichʼ akʼel ta swolol Balumilal sok bayal millón ta tul ants winiketik koltaybilik ta stojobtesel te skuxlejalik sok ta spasel te bin ya yakʼ ta nopel te Bibliae (Isaías 2:2-4). Te ants winiketik la snopikix swenta ma jaʼuk ya xbajt ta yoʼtan te yaʼtelike, te lekuk ya yil sbaik ta sfamiliaik sok ta smulanel te sbilukik jaʼnax te ma jaʼuk ya yakʼ sbaik ta mosoinel yuʼun. Ya xkoltayotik yuʼun te Biblia ta slekubtesel te skuxlejalik sok ya schajpanotik yuʼun lekil ants winiketik ya xkʼotik jich bitʼil ya skʼan te Dios te kʼalal ya xwentainwane.

Manchukme Ajwalilix ta chʼulchan te Jesuse, ayto ajwaliletik ta Balumilal. Te Diose jich la yalbey te Jesús: «¡Ya me awaʼiy cuentahinwanej ta stojol te acontrataque!» (Salmo 110:2). Te Jesús nopolix ya xbajt slajin te skontratak sok te wokoliletik te ya yakʼbey smel yoʼtan te machʼatik ya skʼan ya schʼuunbeyik smantal te Diose.

Ta yorail-abi, te Wentainel yuʼun Dios yame spas ini:

• Ya slajin te lotil religionetik. Te Biblia ya spajbey skʼoplal te lotil religionetik jich bin-utʼil j-antsinel ants te nopol ya yichʼix lajinele. Jaʼ yuʼun yame yichʼ lajinel te religionetik te yakʼojbey snop te ants winiketik lotil ta swenta te Dios soknix te yakʼojbey swokole. Bayal machʼatik chajpnax ya yilik-a te kʼalal ya yichʼ lajinele (Apocalipsis 17:15, 16).

• Ya slajin te ajwaliletik ta Balumilal. Te Wentainel yuʼun Dios ya xbajt slajin te ajwaliletik ta Balumilal (Apocalipsis 19:15, 17, 18).

• Ya slajin te chopol ants winiketik. ¿Bin ya xkʼot ta stojolik te machʼatik chopolik sok te ma skʼan ya schʼuunbeyik smantal te Diose? Te Biblia ya yal: «Te machʼatic chopolic ya me yichʼic loqʼuesel ta qʼuinal» (Proverbios 2:22).

• Ya slajin te Satanás sok te pukujetik yuʼune. Te Satanás sok te pukujetik yuʼune, «maba ya sloʼlayix te nacionetik» (Apocalipsis 20:3, 10).

¿Bin ya staik te ants winiketik te jun yoʼtan ya yakʼ sbaik ta stojol te Wentainel yuʼun te Diose?

Te Jesucristo kʼalalto ta chʼulchan, bayalxan bin ya spas te bin-utʼil jtul ajwalil yuʼun Balumilal. Jaʼnix jich ya xkoltayot yuʼun 144 mil ta tul ajwaliletik te tsabilik ta yolil ants winiketik (Apocalipsis 5:9, 10; 14:1, 3). Jaʼme ya xbajt skʼotes ta pasel te skʼanojel yoʼtan Dios ta swenta te Balumilale. ¿Bin ya xbajt spas te Wentainel yuʼun Dios ta stojol te ants winiketike?

• Ya slajin te chamel sok te lajel. «Mayuc machʼa [...] te hich ya yal: Ayon ta chamel» sok «maʼyukix lajel» (Isaías 33:24; Apocalipsis 21:4).

• Ya yakʼ lamalkʼinal sok maʼyuk machʼa ya x-utsʼinwan. «Ya xpʼohl te lamal quinal ya yaʼiyic te awal-anichʼnabique» sok «jujutuhl ya shuhcan sbahic ta yeʼtal te stsʼusubil soc ta yeʼtal te higuera yuʼune, mayuc machʼa ya xiwtesotic yuʼun» (Isaías 54:13; Miqueas 4:4).

• Ya yakʼbotik aʼtelil te ya yakʼ sbujtsʼ kʼinal. «Te machʼatic tsahbilic cuʼun ya me yaʼiybe yutsilal te yaʼtel scʼabique. Ma ba tojol nax ya xʼaʼtejic» (Isaías 65:22, 23).

• Ya slekubtes te lumkʼinal. «Ay yutsil qʼuinal ya yaʼiyic te jochol taquin qʼuinal soc te taquin lum; tseʼel yoʼtan te jochol taquin qʼuinal, hich ya xnichin te bin utʼil te tsajal nichime» (Isaías 35:1).

• Ya snojptes te ants winiketik te bin ya skʼan ya spasik yuʼun ya xkuxinik ta sbajtelkʼinal. «Jichme ya sta skuxlejalik sbajtelkʼinal te ants winiketik: te ya snaʼbat aba te jaʼatnax te smelelil Diosate, sok te ya snaʼbeyik sba-euk te Jesucristo te tikunbil tal awuʼune» (Juan 17:3).

Te Diose ya skʼan te yakuk amulan te bendicionetik ini (Isaías 48:18). Ta yan artículo yame awil te bin ya skʼan ya apas ta ora ini yuʼun jich ya ata-a te bendicionetik ta pajel chaʼbej.