¿Bin yuʼun ya jkʼantik te yakuk xtalix te Wentainel yuʼun te Diose?
Ta sjajchibalto tal, te Jpaswanej kuʼuntik te Jehová sbiil, jaʼnax stukel wentainwan sok skʼuxul yoʼtan. Jaʼ yuʼun la spas jun nichimal kʼinal te banti ya xkuxin te ants winiketik sok la yakʼ bayal weʼelil tey-a. Jaʼnix jich la yichʼik akʼbeyel jun aʼtelil te akʼbot stseʼelil yoʼtanike (Génesis 1:28, 29; 2:8, 15). Te lajuk skʼanik te ya xwentainotik yuʼun te Diose, ay lamalkʼinal liʼ ta Balumilal te jichuke.
Te sbabial ants winik ma la skʼanik te ya xwentainotik yuʼun te Diose.
Te Biblia ya yal te ay jtul chʼul-abat te la stoy sba te la yal te ma lekuk ya xwentainwan te Diose, jaʼ te Satanás. La yakʼ ta naʼel te jaʼ ayxan stseʼelil yoʼtan te ants winiketik teme maba ya xwentainotik yuʼun te Diose. Mel-oʼtantik sba, te Adán sok te Eva la schʼuunbeyik skʼop te Satanás jich la skʼaxuntaybeyik smantal te Diose (Génesis 3:1-6; Apocalipsis 12:9).
Te bitʼil la skʼaxuntaybeyik smantal te Jehová sok te ma la skʼanik te ya xwentainotik yuʼune, namajik ta stojol. Jich la schʼayik te Nichimal Kʼinal sok te skuxlejalik ta sbajtelkʼinal (Génesis 3:17-19). Ta swenta-abi la yakʼbeyik jilel swokol te yal snichʼnabike. Te Biblia jich ya yal: «Ta swenta jtul winik [Adán] och mulil ta balumilal sok ta swenta te mulil och te lajele » (Romanos 5:12). Jaʼnix jich te mulil la yakʼ yan wokolil, melel te «winic ya smosohin yan winic yuʼun ya yaʼbe swocol» (Eclesiastés 8:9). Ya skʼan ya yal-abi te ay kʼopetik ta bayuk te kʼalal stukelnax ya skʼan ya spas sbaik ta mantal te ants winiketike.
JAJCH TA WENTAINWANEJ TE WINIKE
Te Nemrod la stoy sba ta stojol te Jehová.
Te sbabial winik te och ta ajwalil te ya yalbey skʼoplal te Biblia, jaʼ te Nemrod, te la stoy sba ta stojol te Diose. Jaʼto tal-abi, bayal ajwaliletik stoyoj sbaik yuʼun te yaʼtelike. Jaʼ yuʼun ayix tal oxmil jaʼbil te jpʼijil ajwalil Salomon jich la stsʼibay: «La jquil yan buelta spisil te utsʼinel te yac ta pasel ta yeʼtal chʼulchan: ha te yaʼlel sitic te machʼatic utsʼimbilic, mayuc machʼa ya xmucʼubtesbot qʼuinal ya yaʼiyic yuʼun; ay yip ta scʼabic te jʼutsʼinwanejetic yuʼunic» (Eclesiastés 4:1).
Ta jkʼajkʼaleltik jaʼnix jich yak ta kʼoel ta pasel. Jun informe yuʼun te Naciones Unidas te lokʼ ta 2009, jich la yal: Bayal ants winiketik staojik ta ilel te jaʼ «smul te ajwaliletik te bayal swokol te ants winiketik ta skaj te maba lek ya xwentainwanik».
AY BIN YA SKʼAN PASEL
Te ants winiketik ya skʼanik te ayuk lekil ajwaliletik te ya snaʼik ta lek wentainwaneje. Jaʼme te bin ya skʼan ya yakʼbotik te Jpaswanej kuʼuntike.
Maʼyuk jtuluk ajwalil juʼem yuʼun schajpanel te wokoliletik ay ta Balumilale.
Te Dios schajpanojix te machʼa ya yakʼ ta Ajwalil te jaʼ ya sjelolin spisil te ajwaliletik ta Balumilal sok te «sbahtel qʼuinal ya xhil stuquel» (Daniel 2:44). Jaʼme te Wentainel yuʼun Dios te ya skʼanik ta oración bayal ants winiketik (Mateo 6:9, 10). Pero mame jaʼuk ya x-och ta Ajwalil te Diose, melel stsaojix te machʼa ya x-och ta Ajwalil te kuxin jich bitʼil jtul winik ta Balumilal. ¿Machʼawan-a?
Yaniwan amulan-euk sk'oponel ini
JOJKʼOYELETIK TA SWENTA TE BIBLIA
¿Bin-utʼil ya x-ayin lamalkʼinal ta Balumilal?
Te Biblia ya yal te wentainel yuʼun Dios ya yakʼ lamalkʼinal ta Balumilal.
JOJKʼOYELETIK TA SWENTA TE BIBLIA
¿Jaʼnaxbal ay ta koʼtantik te Wentainel yuʼun te Diose?
Ay Bibliaetik te jich ya yalik: «Ay ta awoʼtanic te cuentahinel yuʼun Dios». ¿Bin ya skʼan ya yal-abi?
