• Jaʼ tsabil yuʼun Dios. «Hoʼon la jcotses te ajwalil cuʼun [...]. Ya caʼbat awuʼuntay te nacionetic, awuʼun ya xcʼoht cʼalal ta stiʼil te bahlumilale» (Salmo 2:6, 8).

• Jaʼ ya yichʼbey jilel yaʼtel te ajwalil David. «Ayinemix jtuhl alal ta jcuentatic, aʼbilotic jtuhl nichʼanil [...]. Ya xmucʼub te cuentahinel yuʼun soc te lamal qʼuinal yuʼune, mayuc slajibal ta shuctajib David soc ta ban cʼalal scuentahinej; ha ya shach soc ya yaʼbe yip» (Isaías 9:6, 7).

• Ya x-ayin ta Belén. «Haʼat, Belén [...] ya xlocʼ tal ta atojol te machʼa ajwalil ya xcʼoht [...] mucʼ scʼoblal ya xcʼoht cʼalal ta stiʼil te bahlumilale» (Miqueas 5:2, 4).

• Ya yichʼ pʼajel sok ya smilik. «Ha pʼajbil, soc ma ba la jquichʼtic ta cuenta. [...] La yichʼ lowel ta scaj jtoybahiltic, juchʼbil cʼoht ta scaj jmultic» (Isaías 53:3, 5).

• Ya xchaʼkuxaj sok ya yichʼ albeyel yutsil skʼoplal. «Ma ba yac awihquitayon hilel ta muquenal, ma ba yac awacʼ ta cʼaʼel te machʼa awuʼun te chʼultesbile. [...] Ta awaʼel ay bintic mulantic sba sbahtel qʼuinal» (Salmo 16:10, 11).

Te machʼa jich kʼot ta stojol te bintik la yichʼix alele, jaʼ te Jesucristo. Ta melel, jtul chʼul-abat jich la yalbey te María te snan te Jesuse: «Te Jehová Dios yame yakʼbey te smukʼul naktajib te David te jaʼ stat. [...] Te Wentainel yuʼune maʼyuk bin-ora ya xlaj skʼoplal» (Lucas 1:31-33).

Kʼalal xtaluk ta Balumilal te Jesuse, maʼyuk bin-ora och ta ajwalil. Pero jaʼme ya x-och ta ajwalil yuʼun te Wentainel yuʼun Dios sok yame xpasawan tal ta mantal kʼalalto ta chʼulchan. ¿Bin yuʼun te jaʼ lekil Ajwalile? Kiltik te bin la spas kʼalal xtaluk ta Balumilal.

•   Te Jesús la snaʼbey yoʼbolil sba te ants winiketik. La skoltay te winiketik, antsetik, jchʼieletik sok te machʼatik ayix yaʼbilalike. Chikan te banti talemik sok teme pobreetik o jkʼulejetik (Mateo 9:36; Marcos 10:16). Ta jun buelta jich albot yuʼun jtul winik te tsakbil ta kʼaʼel chamel: «Te yakuk akʼane, ya xjuʼ ya alekubteson», te Jesús la snaʼbey yoʼbolil sba sok la slekubtes (Marcos 1:40-42).

• Te Jesús la yakʼ jnoptik bin-utʼil lek ya yilotik te Diose. Jich la yal: «Ma xjuʼ te ya awakʼ abaik ta abatinel ta stojol te Diose soknix ta stojol te Kʼulejalile». Jaʼnix jich la yakʼ jnoptik te ma jaʼuknax ay skʼoplal ta yoʼtan Dios te bin ya jpastike, jaʼnix jich te bin ya jpastik pensar sok te bin yaʼiyel ya kaʼiy jbatike. Jaʼ yuʼun teme ya jkʼantik te lek ya yilotike, ya skʼan ya jkom jbatik ta spasel te bin ay ta koʼtantike (Mateo 5:28; 6:24; 7:12). Te Jesús la yal teme ya jkʼantik stseʼelil koʼtantike, ya skʼan te ya jnaʼtik te bin ya skʼanbotik te Diose sok te yakuk jkʼotestik ta pasele (Lucas 11:28).

• Te Jesús nojpteswan ta yakʼel ta ilel kʼuxul oʼtanil. Te bintik la yal sok te bin-utʼil kʼopoj la stijbey yoʼtan te ants winiketik. Te Biblia ya yal: «Chamnax yoʼtanik yuʼun te ants winiketike, melel jich nojpteswan te bin-utʼil machʼa yichʼoj tulan yaʼtel» (Mateo 7:28, 29). Jaʼnix jich la yal ta mantal: «Kʼuxukme ta awoʼtanik te akontraike». Jaʼnix jich la skʼoponbey Dios ta stojol te machʼatik ya xmilot yuʼune: «Jtat, pastiklanbeya perdón, melel ma snaʼik te bin yakik ta spasele» (Mateo 5:44; Lucas 23:34).

Te Jesús jaʼ lekil ajwalil, melel pʼijubtesbil ta lek, kʼuxotik ta yoʼtan sok ya skʼan ya skoltayotik. Pero, «¿bin-ora ya xjajch ta wentainwanej?».