Bayal ants winiketik ya yalik te yuʼun lek-a te skuxlejalik, ya skʼan te lekuk stalelik. Jaʼ yuʼun ya spasik tulan yuʼun lekuk yoʼtanik, te ya spasik te bin ya x-albotik ta slumalik sok te manchuk ya spasik te bin ma leke. Te Linh jtul ants te kuxinem ta Vietnam, jich ya yal: «La jkuy te spisil-ora lek te jkuxlejal teme lek jtalel sok te ma xkaʼiy lot».

Bayal machʼatik ya spasik te bin lek yuʼun jich ya xnojptesot ta sreligionik. Jtul winik te kuxinem ta Taiwán te Hsu-Yun sbiil, jich ya yal: «La snojptesonik teme jtul ants winik ya xlaj, tseʼel yoʼtan o ya xkʼax swokol ta sbajtelkʼinal, jaʼ chikan te bin la spas ta skuxlejale».

Melelnix-a te lek ya kaʼiy jbatik te kʼalal ay bin lek ya jpastik ta stojol te yantik. Pero ay ants winiketik te staojik ta ilel te maʼyuk bin lek ya staik-a. Te Shiu Ping jtul ants te kuxinem ta Hong Kong, jich ya yal: «Te kʼalal ya jpastik te bin lek ma spisiluk-ora lek te bin ya xlokʼ kuʼuntik-a, melel laj skʼoplal te jnujpunel sok la yijkitayotik te jmamalal, manchukme jaʼ bajt ta koʼtan skanantayel te jfamilia sok ta spasel te bin leke.

Bayal machʼatik yilojik te aynix ma xkoltayotik yuʼun te religión ta sjeltayel te stalelik. Te Etsuko jtul ants te kuxinem ta Japón, jich ya yal: «Ochemon ta jun religión-a sok kichʼoj kaʼtel ta snojptesel te achʼix keremetik. Ma lek la kil te ma lek stalelik te ants winiketik, jaʼ ya skʼanik te yichʼojik mukʼ yaʼtelik sok ma lek ya stuuntesik te takʼin yuʼun te iglesia».

Ay bayal ants winiketik te ay sreligionik-a chebaj yoʼtanik te kʼalal la yilik te ma tuun ta jkʼaxel te bin lek la spasike. Jich la yaʼiy sba te Van jtul ants te ay ta Vietnam, jich la yal: «Spisil-ora ya kakʼ sit teʼetik, nichimetik sok weʼelil ta altar yuʼun te machʼatik lajemikixe, yuʼun jich ya jkuy-a te ya yakʼbonik bendición ta pajel chaʼbej. Bayal jaʼbil te jich la jpase, pero ta patil tsakot ta tulan chamel te jmamalal, sok te achʼix kuʼun te yak ta nop jun ta yan nación, laj te kʼalal 20 yaʼbilal-a».

Teme ma tikʼuknax-a te lek koʼtantik yuʼun lek ya xkuxinotik ta pajel chaʼbej, ¿bin-nix ya skʼan ya jpastik-a? Yuʼun ya jnaʼtik, ya skʼan te ayuk bin ya skoltayotik ta stabeyel sujtib te jojkʼoyeletik kuʼuntik sok te yakuk yalbotik te bin-utʼil ya xjuʼ ya jtatik jun lekil kuxlejalil ta pajel chaʼbej. ¿Banti ya xjuʼ ya jtatik te koltayel ini?