1, 2. 1) ¿Bin-a te mulile sok bin-utʼil ya jtsaltik? (Ilawil te «Te bin mukʼ skʼoplal»). 2) ¿Bin ya kilbeytik skʼoplal ta artículo ini sok ta yantikxan artículoetik yuʼun te revista ini? (Jaʼnix jich ilawil te «Ta swenta te machʼa ya skʼopon» te ay ta revista ini).

 KʼAX KʼUXAT ta yoʼtan te Jehová. Yuʼun ya awichʼbey swentail-abi mukʼ skʼoplal te ya anop ta lek te bin-utʼil yakʼojat ta libre ta swenta te mulil sok te lajele. Te mulile a jaʼ jun kontrail te kʼax mukʼ te maʼyuk machʼa ya xjuʼ ya stsal ta stukel. Jpisiltik te ants winikotik jujun kʼajkʼal ya jta jmultik, jmulawilotik jaʼ yuʼun ya xlajotik (Rom. 5:12). Pero ay jun lekil noticia, seguro ayotik te jaʼnax ta swenta te koltayel yuʼun te Jehová ya xjuʼ ya jtsaltik te mulile.

² Te Jehová ayniwanix 6 mil jaʼbil yak ta skoltayel te ants winiketik yuʼun ya stsalik te mulile. ¿Bin yuʼun? Melel kʼax kʼuxotik ta yoʼtan. Jaʼto tal te kʼalal la spasotike, bayal kʼuxotik ta yoʼtan sok chikan biluk ya skʼan ya spas yuʼun ya skoltayotik ta stsalel te mulile. Te Diose ya snaʼ te ya yakʼ xlajotik te mulile sok maba ya skʼan te ya xlajotike, jaʼ ya skʼan te yakuk xkuxinotik ta sbajtelkʼinal (Rom. 6:23). Jaʼnix jich ya skʼan ya spas ta atojol-euk. Ta artículo ini ya kakʼbeytik sujtib oxeb jojkʼoyeletik: 1) ¿bin la spas te Jehová yuʼun ya yakʼbey smukʼul yoʼtan te ants winiketike? 2) ¿bin la spasik te ants winiketik ta namey kʼinal yuʼun ya yakʼbeyik stseʼelil yoʼtan te Jehová manchukme jmulawiletik? Sok 3) ¿bin la spas  te Jesús yuʼun ya skoltay te ants winiketik ta swenta te mulil sok te lajele?

¿BIN LA SPAS TE JEHOVÁ YUʼUN YA YAKʼBEY SMUKʼUL YOʼTAN TE ANTS WINIKETIKE?

3. ¿Bin-utʼil la sta smulik te Adán sok te Eva?

³ Kʼalal te Jehová las spas te Adán sok te Eva, jaʼ la skʼan te ayuk stseʼelil yoʼtanik. Jaʼ yuʼun la yakʼ kuxinuk ta jun lugar te kʼax tʼujbile, la yakʼ te ya xnujpunik, la yakʼbey yaʼtel yuʼun ya snojesik ta ants winiketik te Balumilal, jaʼnix jich te yakuk skʼatpunik ta nichimal kʼinal swolol te Balumilal jich bitʼil te tsʼunbil kʼinal Edén. Jaʼnax jun la yalbey te bin ma xjuʼ ya spasik sok la yalbey te ya xjuʼ ya xlajik teme ya skʼaxuntayik te mantalil ini. Ya jnaʼtik te bin kʼot ta pasel, melel jtul chopol chʼul-abat te maba kʼux ta yoʼtan te Jehová, te Adán sok te Eva, jaʼ yuʼun la yakʼ te ya xyalik ta mulil te sbabial ants winik. Te Adán sok te Eva ma jaʼuk la smukʼulin yoʼtanik te Jehová te kʼax kʼux aʼiybilik yuʼune, jaʼ la schʼuunbeyik skʼop te chopol chʼul-abat sok yalik ta mulil. Jich kʼot ta pasel te bin jamal yalojix-a te Jehová. Teyto tal-abi bayal wokolil la sitintayik, melel meʼel mamalubik sok lajik (Gén. 1:​28, 29; 2:​8, 9, 16-18; 3:​1-6, 17-19, 24; 5:5).

4. ¿Bin yuʼun te Jehová ya spʼaj ta jkʼaxel te mulile, sok bin yuʼun ya skoltayotik ta stsalel? (Romanos 8:​20, 21).

⁴ Spisil te bin kʼot ta pasel kʼax mel-oʼtantik sba, pero te Jehová la yakʼ ta tsʼibayel ta Biblia yuʼun ya xkʼot ta koʼtantik te bin kʼax mukʼ skʼoplale, jaʼ te ya spʼaj ta jkʼaxel te mulile. Te mulile ya yakʼ namajukotik ta stojol te Jehová sok ya yikʼotik bael ta lajel (Is. 59:2). Jaʼ yuʼun te chopol chʼul-abat te jaʼ te Satanás, ya smulan te ya xyalotik ta mulil, jaʼ yuʼun la yakʼ yaluk ta mulil te Adán sok te Eva. Jaʼnix jich ta ora ini ya sle te bin-utʼil ya yakʼ xyalotik ta mulil. Ayniwan la snop te juʼ yuʼun tsalaw tey ta tsʼunbil kʼinal Edén. Pero maba kʼoem ta yoʼtan te kʼax mukʼ te skʼuxul yoʼtan te Jehová. Te Diose maʼyuk bin-ora la sjel te bin snopoj ta stojol te stsʼumbal te Adán sok te Eva. Kʼax kʼux ta yoʼtan te ants winiketik jaʼ yuʼun oranax la yakʼbey smukʼul yoʼtanik (kʼopona Romanos 8:​20, 21). Snaʼoj ta lek te ay chaʼoxtul te kʼux ya x-aʼiyot yuʼun sok te ya sleik koltayel ta stojol yuʼun ya stsalik-a te mulile. Te bitʼil jaʼ Jpaswanej sok jaʼ lekil Tatil kuʼuntik te Jehová, ay bin ya xbajt spas yuʼun ya sle bin-utʼil ya xjuʼ ya snoptsajik ta stojol te ants winiketik sok yuʼun ya stsalik-a te mulil sok te lajele. ¿Bin-utʼil ya xbajt spas?

5. ¿Bin-ora sok bin-utʼil la yakʼbey smukʼul yoʼtan Jehová te ants winiketike? (Génesis 3:15).

⁵ (Kʼopona Génesis 3:15). Te sbabial mukʼul oʼtanil la yakʼ te Jehová jaʼ te kʼalal la yal te ya xbajt slajin te Satanás. Te Dios la yalbey skʼoplal jun tsʼumbalil te kʼax mukʼ skʼoplal te ya xbajt slajin te Satanás sok te ya xbajt schajpan spisil te wokoliletik te jajch ta tsʼunbil kʼinal Edén (1 Juan 3:8). Pero te tsʼumbalil-abi ya xkʼax swokol, melel te Satanás ya xbajt yejchentes jaʼto te kʼalal ya smil. Jaʼ ini kʼax kʼux ya xbajt yaʼiy te Jehová, pero la sta ta nopel te jaʼ lek te jich ya xkʼot ta pasele, melel ta swenta-abi bayal millón ta tul ants winiketik ya xkolik jilel ta swenta te mulil sok te lajele.

TE BIN LA SPASIK TE ANTS WINIKETIK TA NAMEY KʼINAL YUʼUN LA YAKʼBEYIK STSEʼELIL YOʼTAN TE JEHOVÁ

6. ¿Bin la spasik te Abel sok te Noé yuʼun ya xnoptsajik ta stojol te Jehová?

⁶ ¿Bin-utʼil ya xjuʼ ya snoptsajik ta stojol Jehová te jmulawil ants winiketike? Te kʼalal kʼax tal te jaʼbile kʼunkʼun la yakʼ ta naʼel. Te kʼalal la skʼaxuntayik mantal te Adán sok te Eva, te sbabial winik te la yakʼ schʼuunel yoʼtan ta stojol te Jehová, jaʼ te Abel. Kʼux la yaʼiy ta yoʼtan te Jehová, la yakʼbey stseʼelil yoʼtan sok noptsaj ta stojol. Ta swenta-abi la sta ta nopel te ya yakʼ jun chikʼbil majtanil, te bitʼil jaʼ jkanan tuminchij la stsak «te sba yal te tuminchijetik» yuʼun ya  yakʼbey ta chikʼbil majtanil te Jehová. ¿Bin la spas te Diose? «Lek la yil te Abel sok te majtanil la yakʼe» (Gén. 4:4). Ta patil, lek la yil-euk te chikʼbil majtaniletik la yakʼik te yantik ants winiketik te kʼux ya x-aʼiyot yuʼun sok te ay smukʼul yoʼtanik ta stojole, jich bin-utʼil te Noé (Gén. 8:​20, 21). Jich la yakʼ ta ilel te manchukme jmulawil te ants winiketik ya xjuʼ ya snoptsajik ta stojol te Jehová sok ya xjuʼ ya yakʼbeyik stseʼelil yoʼtan. b

7. ¿Bin ya yakʼ jnoptik te Abrahán ta swenta te spisil yoʼtan kʼan yakʼ ta chikʼbil majtanil te snichʼane?

⁷ Ay jtul winik te Abrahán sbiil te jaʼ nix jich mukʼ schʼuunel yoʼtan, ay bin la yichʼ kʼanbeyel yuʼun te Jehová te kʼax wokol ta chʼuunele: jaʼ te ya yakʼ ta chikʼbil majtanil te snichʼan, jaʼ te Isaac. Te Abrahán kʼax kʼux la yaʼiy te bin la yichʼ kʼanbeyele. Manchukme jich abi, sok spisil yoʼtan la schʼuun te bin albote. Te kʼalal kʼan smilix-a te snichʼane, komot yuʼun te Jehová. Pero te ejemplo yuʼun ay bin mukʼ skʼoplal ya yakʼ jnoptik: jaʼ te Jehová sok spisil yoʼtan la yakʼ ta chikʼbil majtanil te sNichʼan ta swenta te kʼax kʼux ta yoʼtan te ants winiketike (Gén. 22:​1-18).

8. ¿Bin ya yakʼ jnoptik te chikʼbil majtaniletik la yakʼ te israeletik ta swenta te Ley yuʼun Moisés? (Levítico 4:​27-29; 17:11).

⁸ Bayal jaʼbil ta patil, kʼalal te Jehová la yakʼbey te Ley te israeletik, la yaltiklanbey te ya skʼan ya yakʼik ta chikʼbil majtanil te chambalametik yuʼun jich ya yichʼik pasbeyel perdón-a te smulike (kʼopona Levítico 4:​27-29; 17:11). Te chikʼbil majtaniletik-abi la yakʼ ta ilel te ya xbajt yakʼ chikʼbil majtanil te Jehová te kʼax lekxan-a, melel ya skoltay spisil te ants winiketik ta swenta te smulike. Te Dios la yakʼ te ya scholbey skʼoplal te j-alwanejetik ta swenta te tsʼumbalil te albil skʼoplale, jaʼ te sNichʼan te Dios te ya xkʼax swokol sok ya xlaj. Te jaʼ pajal sok te bin-utʼil jkojt tuminichij te ya yichʼ akʼel ta chikʼbil majtanil (Is. 53:​1-12). Nopanax awaʼiy, te Jehová ya yakʼ te sNichʼan jich bitʼil chikʼbil majtanil yuʼun ya skoltay te ants winiketik ta swenta te mulil sok te lajel, teyme ochem akʼoplal-euk-a.

TE JESÚS LA SKOLTAY TE ANTS WINIKETIK TA SWENTA TE MULIL SOK TE LAJEL

9. ¿Bin la yakʼ ta naʼel te Juan J-akʼ-ichʼjaʼ? (Hebreos 9:22; 10:​1-4, 12).

⁹ Ta jaʼbil 29, kʼalal te Juan J-akʼ-ichʼjaʼ la yil te Jesús te talem ta Nazaret, jich la yal: «¡Ilawilik, te Jkolel Tuminchij yuʼun Dios te ya schʼaybey smul te ants winiketik ta balumilal!» (Juan 1:29). Jich la yakʼ ta naʼel te jaʼ Jesús te tsʼumbalil te yalojbey skʼoplal te Diose, jaʼ te Jesús te ya xbajt yakʼ te skuxlejal jich bitʼil chikʼbil majtanil. Jich-abi ya xjuʼ ya yilik te jmulawil ants winiketik te ya xbajt stsalik ta jkʼaxel te mulil sok te lajele (kʼopona Hebreos 9:22; 10:​1-4, 12).

10. ¿Bin-utʼil la yakʼ ta ilel te Jesús te jaʼ tal sle te jmulawiletike?

¹⁰ Te Jesús jaʼ la skoltayxan te machʼatik ma lek ya yaʼiy sbaik ta skaj te jmulawiletik sok la yaltiklanbey te yakuk xtʼunot yuʼune. Snaʼoj-a te jaʼ ta swenta te mulil te ya xkʼax swokol spisil te ants winiketik. Jaʼ yuʼun la sle te bin-utʼil ya xnoptsaj ta stojol te ants winiketik te naʼbilik sba jich bitʼil jmulawiletik. Te Jesús, jich la yal: «Te machʼatik lek ayike ma xtuun yuʼunik jpoxtaywanej, jaʼnax te machʼatik ayik ta chamele». Jich la yalxan: «Maba tal jle te machʼatik tojike, jaʼ tal jle te jmulawiletike» (Mat. 9:​12, 13). Jaʼnix jich la yakʼ ta ilel sok yaʼtelul, melel sok yutsil yoʼtan la spasbey perdón te ants te pokbot yok yuʼun ta yaʼlel sit (Luc. 7:​37-50). Jaʼnix jich manchukme maba lek skuxlejal te samaritana-ants, ay bintik mukʼ skʼoplal la yakʼtiklanbey snop ta sJun Dios (Juan 4:​7, 17-19, 25, 26). Te Jehová la yakʼbey yuʼel te Jesús yuʼun ya  xchaʼkuxajtes winiketik, antsetik sok alaletik, jich la yakʼ ta ilel te ya stsal ta jkʼaxel te lajel te talem ta swenta te mulile (Mat. 11:5).

11. ¿Bin yuʼun la skʼan la stʼunik te Jesús te jmulawiletike?

¹¹ Jaʼnix jich te ants winiketik te spasojik tulan mulil la skʼan la stʼunik te Jesús. Ma chajpuknax ya kaʼiytik te ya skʼan ya xnoptsajik ta stojole, melel ya xkʼot ta yoʼtan te bin ya ʼiyel ya yaʼiy sbaik sok ya snaʼtiklanbey yoʼbolil sba (Luc. 15:​1, 2). La yutsilkʼoptaylan sok jaʼnix jich ay bin lek la spas ta stojol te machʼatik la yakʼ schʼuunel yoʼtanik ta stojole (Luc. 19:​1-10). Te Jesús la yakʼ ta ilel ta lek te stalel te sTat te kʼalal la snaʼtiklanbey yoʼbolil sba te yantike (Juan 14:9). Ta swenta skʼop sok te bintik la spas la yakʼ ta ilel te kʼux ta yoʼtan Jehová te ants winiketik, te ya snaʼtiklanbey yoʼbolil sba sok jaʼnix jich ya skʼan ya skoltayotik ta stsalel te mulil. Te Jesús la stijbey yoʼtan te jmulawiletik te yakuk sjeltay te stalelik sok te yakuk xtʼunotik yuʼune (Luc. 5:​27, 28).

12. ¿Bin la yakʼ ta nopel te Jesús ta swenta te bin ya xkʼot ta stojole?

¹² Te Jesús snaʼoj ta lek-a te bin ya xkʼot ta stojole. Bayal buelta la yalbey te jnopojeletik yuʼun te ya yichʼ akʼel ta kʼabal sok te ya yichʼ jijpanel ta teʼ (Mat. 17:22; 20:​18, 19). Jaʼnix jich snaʼoj-a te kʼalal ya yakʼ sba ta lajel ya slajinbey skʼoplal te mulil ta balumilal, jichnix te bin-utʼil la yalbey skʼoplal te Juan sok te j-alwanejetik. Jaʼnix jich, la yal te yame xtal ta stojol «spisil te ants winiketike» te kʼalal chaʼkuxajemix-ae (Juan 12:32). Spisil te machʼatik ya yakʼ schʼuunel yoʼtanik ta stojol te Jesús sok te ya stʼunik  te bin ya yale, ya xjuʼ ya yakʼbeyik stseʼelil yoʼtan te Jehová sok te libre ya xjilik «yuʼun te mulile» (Rom. 6:​14, 18, 22; Juan 8:32). Te Jesús maba xiw yoʼtan sok spisil yoʼtan la yakʼ sba ta lajel yuʼun ya skoltay te ants winiketike (Juan 10:​17, 18).

13. ¿Bin-utʼil la yichʼ milel te Jesús sok bin ya yakʼ jnoptik? (Janix jich ilawil te dibujoetik).

¹³ Te Jesús la yichʼ akʼel ta kʼabal, la schukik, la slabanik, la sbolkʼoptayik, la slebeyik smul sok la yutsʼinik. Ta patil, ay chaʼoxtul soldadoetik la sjijpanik ta teʼ yuʼun ya smilik. Te Jesús jun yoʼtan kujch yuʼun spisil te wokolil-abi, pero jaʼ kʼax kʼux-xan la yaʼiy te Jehová te kʼalal la yil te bin yak ta kʼaxel ta stojol te sNichʼane. Manchukme kʼax kʼux ta yoʼtan sok bayal yuʼel, maba la skoltay. ¿Bin yuʼun? Jaʼ ta swenta te skʼuxul yoʼtan. Te Jesús jich la yal: «Te Diose kʼax kʼux la yaʼiy ta yoʼtan spisil te ants winiketik te jich la yakʼ te jip jtul sNichʼan swenta yuʼun te machʼa ya yakʼ schʼuunel yoʼtan ta stojole maba ya yichʼ lajinel, yame sta skuxlejal sbajtelkʼinal» (Juan 3:16).

14. ¿Bin ya yakʼbat anop te bin-utʼil la yakʼ sba ta lajel te Jesús?

¹⁴ Te bitʼil la yakʼ sba ta lajel te Jesús chiknaj ta ilel te kʼax kʼuxotik ta yoʼtan te Jehová te bitʼil yal snichʼnabotik te Adán sok te Eva. Jaʼnix jich la yakʼ ta ilel te kʼax kʼuxat ta yoʼtane. ¿Mabal chamuk awoʼtan yuʼun te ya anop ta swenta te Dios te bitʼil jun yoʼtan la yakʼ ta lajel sok te kʼax swokol te sNichʼan yuʼun ya skoltayat lokʼel ta mulil sok ta lajel? (1 Juan 4:​9, 10). Te Diose ya skʼan ya skoltayotik ta jpisiltik sok ta jujuntul yuʼun yakuk jpastik tulan ta stsalel te mulile.

15. ¿Bin ya skʼan ya jpastik yuʼun ya jta jlekilaltik yuʼun te bitʼil la yakʼ sba ta lajel te Jesús?

¹⁵ Te bitʼil la yakʼ ta lajel te jip jtul sNichʼan te Diose, jaʼ jun majtanil yuʼun jich ya xjuʼ ya kichʼtik pasbeyel perdón te jmultike. Pero ay bin ya skʼan ya jpastik. Te Juan J-akʼ-ichʼjaʼ sok te Jesucristo la yalik te bin ya skʼan ya jpastike: «Sujtesa awoʼtanik, melel nopol ayix te Wentainel yuʼun te chʼulchane» (Mat. 3:​1, 2; 4:17). Jaʼ yuʼun teme yuʼun-nix ya jkʼan ya jtsaltik-a te mulil sok teme ya jkʼantik ya snoptsajotik ta stojol te jTatik Jehová, mukʼ skʼoplal te ya sujtes koʼtantik. Pero, ¿bin ya skʼan ya yal te ya sujtes koʼtantik, sok bin-utʼil ya skoltayotik yuʼun ya kakʼbeytik stseʼelil yoʼtan te Jehová manchukme jmulawilotik? Yame kilbeytik sujtib ta yan artículo.