1, 2. 1) ¿Bin yilel ya yil Jehová te machʼatik ya spasik mulil sok te ma skʼan ya sujtes yoʼtanike? 2) ¿Bin ya skʼan te Jehová?

 TE Jehová ma jaʼuk jun Dios te ya smulan te ya yichʼ pasel te mulil o te lek ya yile (Sal. 5:​4-6). Jaʼ ya skʼan te yakuk jchʼuuntik spasel te tojil mantaliletik te ay ta Biblia. Ta melel, ma yuʼunuk ya skʼan te kʼax tojotik, melel snaʼoj te jmulawilotike (Sal. 130:​3, 4). Pero ya spʼaj te «winiketik te ma xyichʼik ta mukʼ te Diose, [te] maʼyuk skʼexlalik ta skʼaxuntayel mantal, melel jaʼ ya smak sbaik-a te slekil yoʼtan Dios» (Jud. 4). Te Biblia ya yal te ya yichʼik lajinel yuʼun Dios ta Armagedón «te ants winiketik te chopolike» (2 Ped. 3:7; Apoc. 16:16).

² Te Jehová ma skʼan te ni jtuluk ya yichʼ lajinel. Jich bitʼil la kiltikix ta yantik artículo, te Biblia jamal ya yal te «jaʼ ya skʼan te yakuk sujtes yoʼtanik ta spisilik» (2 Ped. 3:9). Te ancianoetik ya skʼayinbeyik stalel te Jehová kʼalal sok slamalil yoʼtanik ya skoltayik te machʼatik la spasik tulan mulil swenta ya sujtes yoʼtanik sok te ya yamigoinikxan te Jehová. Pero ma spisiluk ya skʼanik te koltayel-abi (Is. 6:9). Ay machʼatik ma skʼan ya sjeltay te stalelik manchukme bayal buelta ya yichʼik koltayel yuʼun te ancianoetik yuʼun ya sujtes yoʼtanik. ¿Bin ya yichʼ pasel teme jich ya xkʼot ta pasele?

 «LOKʼESAIK TE MACHʼA CHOPOL»

3. 1) ¿Bin ya yichʼ pasel te kʼalal ay machʼa ya spas tulan mulil sok te ma sujtes yoʼtane? 2) Teme ay jtul ants winik maba ya sujtes yoʼtan, ¿bin yuʼun ya kaltik te jaʼnix la slokʼes sba ta congregación?

³ Teme ay machʼa ya spas tulan mulil sok te maba ya sujtes yoʼtan, te ancianoetik jaʼme ya schʼuunik spasel te mantalil ya yal ta 1 Corintios 5:13 te jich ya yal: «Lokʼesaik te machʼa chopol ay ta awolilike». Ya xjuʼ ya kaltik te machʼa la spas tulan mulil jaʼnix la slokʼes sba, melel jaʼ yak ta yilbeyel swokolil te bin ma lek la spase (Gál. 6:7). ¿Bin yuʼun? Melel maba la schʼuun te bayal buelta akʼbot koltayel yuʼun te ancianoetik (2 Rey. 17:​12-15). Ta swenta te bin ya spas ya yakʼ ta ilel te maba ya skʼan ya schʼuunbey smantal te Jehová (Deut. 30:​19, 20).

4. ¿Bin yuʼun ya yichʼ kʼasesel ta jun anuncio kʼalal ay machʼa ya yichʼ lokʼesel ta congregación?

⁴ Kʼalal ya yichʼ lokʼesel ta congregación te machʼa ya spas tulan mulil sok te maba ya sujtes yoʼtan, ya yichʼ akʼel jun anuncio ta congregación swenta ya yichʼ naʼel te ma jaʼukix testigo yuʼun Jehová. Pero ma yuʼunuk ya yichʼ kʼexlaltesel, ya yichʼ pasel yuʼun jich te congregación ya xjuʼ ya schʼuun te mantalil ay ta Biblia jaʼ te manchuk ya sjokinikix sok te manchuk ya xweʼik soke (1 Cor. 5:​9-11). Te Jehová la yakʼ te mantalil ini yuʼun ay bin lek ya xlokʼ-a. Te jpuk-kʼop Pablo jich la stsʼibay: «Jtebnax levadura ya spajubtes skʼolol te harinae» (1 Cor. 5:6). Te manchuk ya yichʼ lokʼesel ta congregación te machʼa maba ya sujtes yoʼtan, ayniwan hermanoetik ya snopik te ma puersauk ya spasik tulan ta spasel ta skuxlejalik te mantaliletik yuʼun te Jehová (Prov. 13:20; 1 Cor. 15:33).

5. ¿Bin yilel ya skʼan ya kiltik te machʼa ma jaʼukix testigo yuʼun Jehová sok bin yuʼun?

⁵ Jich yuʼun, ¿bin yilel ya skʼan ya kiltik te machʼa ma jaʼukix testigo yuʼun Jehová? Manchukme maba ya jokinix jbatik sok, ma jichuk ya kiltik te jkʼaxel chʼayemix, ya skʼan ya kiltik jich bitʼil jkojt tuminchij te chʼayem sok te ya xjuʼ ya sujt tal ta congregación. Mame xchʼay ta koʼtantik te ta nailal la yakʼ skuxlejal ta stojol te Jehová. Pero ta ora ini maba yakix ta spasel ta skuxlejal te bin la yalbey ta jamale, jaʼ yuʼun ay ta wokol te skuxlejal (Ezeq. 18:31). Pero te bitʼil ayto tiempo sok te ya snaʼ yoʼbolil jbatik te Jehová, ay smukʼul koʼtantik te yato xjuʼ te ya sujt tal te machʼa lokʼeme. Jich yuʼun, ¿bin-utʼil te ancianoetik ya xjuʼ ya skoltay te machʼa la yichʼ lokʼesel ta congregación?

TE ANCIANOETIK YA SKOLTAYIK TE MACHʼATIK YICHʼOJIK LOKʼESEL TA CONGREGACIÓN

6. ¿Bin ya spasik te ancianoetik swenta ya skoltayik te machʼa la yichʼ lokʼesel ta congregación?

⁶ Te kʼalal ay machʼa ya yichʼ lokʼesel ta congregación, ¿bin ya spasik te ancianoetik? ¿Yabal yijkitayik ta jkʼaxel o maba ya skoltayikix yuʼun ya sujt ta stojol te Jehová? ¡Maʼuk! Kʼalal te comité yuʼun ancianoetik ya yalbey te ya yichʼ lokʼesel ta congregación, ya scholbeyik yaʼiy te bin ya skʼan ya spas swenta ya xchaʼsujt. Pero ma jaʼuknax-abi, jaʼnix jich ya yalbeyik yaʼiy te ya smulanik te ya xchaʼtsob sbaik sok cheʼoxeb u ta patil yuʼun ya yilik teme jelonemix te stalele. Teme ya skʼane, ya stsob sbaik sok te ancianoetik sok ya yalbeyik sok skʼuxul yoʼtanik te yakuk sujtes yoʼtan sok te yakuk xchaʼsujt ta stojol te Jehová. ¿Jaxan teme ya yilik te maba jelonem te stalele? Manchukme jich-abi, te ancianoetik ya spasik tulan yuʼun ya xchaʼtsob sbaikxan sok.

7. ¿Bin-utʼil te ancianoetik ya skʼayinbeyik stalel te Jehová kʼalal ay machʼa ya yichʼ lokʼesel ta congregación? (Jeremías 3:12).

⁷ Te ancianoetik ya skʼan ya spasik tulan ta skʼayinbeyel te skʼuxul yoʼtan te Jehová kʼalal ya xkʼopojik sok te machʼatik ya yichʼ lokʼesel ta congregación. Jich bitʼil, kʼalal la skʼaxuntayik  mantal te israeletik ta namey, te Jehová ma jaʼuknax la smaliy te ya xchaʼsujtik tale. Te bin la spase, jaʼ te nail la yakʼ ta ilel te ya skoltaylan manchukme maba yakʼojik ta ilel-a te ya sujtes yoʼtanike. Jich bitʼil la kiltik ta schebal artículo yuʼun te revista ini, te Jehová la stuuntes te j-alwanej Oseas yuʼun ya yakʼ ta ilel te ya snaʼ yoʼbolil jbatik. La yalbey te Oseas, manchukme yakto ta antsinel-a te yinam la yal te yakuk xchaʼsujt soke (Os. 3:1; Mal. 3:7). Jichnix bitʼil te Jehová, te ancianoetik jaʼ ya skʼanik te yakuk sujtes yoʼtan sok te ya sujt ta organización te machʼa yichʼoj lokʼesele sok te yakuk skoltayike (kʼopona Jeremías 3:12).

8. ¿Bin-utʼil ya skoltayotik te lokʼombakʼop yuʼun te nichʼanil te chʼayem yuʼun ya xkʼot ta koʼtantik te ya snaʼ yoʼbolil jbatik te Jehová? (Lucas 15:7).

⁸ Juluk ta koʼtantik te lokʼombakʼop yuʼun te nichʼanil te chʼayem te la kalbeytik skʼoplal ta schebal artículo yuʼun te revista ini. Te kʼalal taot ta ilel yuʼun te state, «animalnax bajt sta talel te snichʼane, la spet sok la yujtsʼuy sok skʼuxul yoʼtan» (Luc. 15:20). Kʼax kʼux ta yoʼtan te snichʼan te maba la smaliy te ya xkʼanbot perdón yuʼune, melel jaʼ bajt sta talel te snichʼane, jich te bitʼil ya spas jtul tatil te bayal skʼuxul yoʼtan. Jich ya yaʼiy sbaik te ancianoetik ta stojol te machʼatik lokʼemik ta congregación sok ya spasik tulan yuʼun ya skoltayik swenta ya xchaʼsujt tal (Luc. 15:​22-24, 32). Kʼalal jtul jmulawil ya xchaʼsujt ta congregación, ya x-akʼbot stseʼelil yoʼtan te Jehová, te Jesús, te chʼul-abatetik sok te hermanoetik ta congregación (Kʼopona Lucas 15:7).

9. ¿Bin ya yalbey Jehová te machʼatik spasojik tulan mulil?

⁹ Spisil te bin la kilbeytik skʼoplal ta ora ini, ya yakʼ kiltik te bin-utʼil te Jehová maba lek ya yil teme maba ya yichʼ lokʼesel ta congregación te machʼa ya spas tulan mulil sok te maba ya sujtes yoʼtane. Pero maba ya xchʼay ta yoʼtan, jaʼ ya skʼan te yakuk sujt tale. Ta Oseas 14:4 ya yakʼ kiltik te bin yilel ya yil Jehová te machʼatik ya sujtes yoʼtanik, jich ya yal: «Ya jlecubtesbe te stoybahil, ta scuenta yutsil coʼtan cʼux ya caʼiy ta coʼtan, como te quilimba locʼ bahel ta stojolic». ¡Kʼax mukʼ skʼoplal te yakuk yilik ta oranax te ancianoetik teme ay machʼa ya skʼan ya sujtes yoʼtane! ¡Jaʼnix jich mukʼ skʼoplal te ayuk bin ya spasik ta oranax te machʼatik yijkitayojik te Jehová swenta ya sujtik talel ta stojol!

10, 11. ¿Bin-utʼil te ancianoetik ya xjuʼ ya skoltayik te machʼa la yichʼ lokʼesel ta congregación te ayix tal jaʼbile?

¹⁰ ¿Bin ya yichʼ pasel ta stojolik te machʼatik la yichʼik lokʼesel ta congregación te ayix tal bayal jaʼbile? Ayniwan maba yakikix ta spasel te mulil te la yichʼik lokʼesel yuʼune, o ayniwan maba ya xjulix ta yoʼtanik bin yuʼun te la yichʼik lokʼesele. Chikan te bin kʼot ta pasele, te ancianoetik ya skʼan ya sleik sok ya yulaʼtayik spisil te ants winiketik-abi. Te kʼalal ya yulaʼtayik ya xjuʼ ya skʼoponik Dios, sok skʼuxul yoʼtanik ya stijbeyik yoʼtan te yakuk xchaʼsujt ta congregación. Teme ay machʼa bayalix jaʼbil te lokʼem ta organización, kʼax pejkʼajemix te schʼuunel yoʼtan. Jaʼ yuʼun, teme ya yal te ya skʼan ya xchaʼsujte, te ancianoetik ya xjuʼ ya staik ta nopel te ya yalbeyik jtul hermano o hermano yuʼun ya yakʼbey nojptesel ta Biblia manchukme matoba sujtem-a. Pero te ancianoetik jaʼ ya stsaik ta nopel spisil ini.

¹¹ Te ancianoetik ya skʼan ya skʼayinbeyik stalel te Jehová te ya snaʼ yoʼbolil jbatik. Jaʼ yuʼun ya spasik tulan ta sleel sok ta skoltayel te ants winiketik te ya skʼan ya xchaʼsujtike. Teme ay machʼa lokʼesbil ta congregación ya yakʼ ta ilel te sujtesojix yoʼtan sok te maba yakix ta spasel te mulil, ya xjuʼ ya yichʼ otsesel ta congregación ta oranax (2 Cor. 2:​6-8).

12. 1) ¿Bintik-ora te ancianoetik ya skʼan ya yilik ta lek kʼalal ay machʼa ya xchaʼyotsesik ta congregación? 2) ¿Bin yuʼun ma xjuʼ ya kaltik te ay machʼatik te la spasik tulan mulil te ma snujpʼuk te ya yichʼ naʼbeyel yoʼbolil sba yuʼun te Jehová? (Jaʼnix jich ilawil te nota).

 ¹² Te ancianoetik ay baeltik ya skʼan ya yilik ta lek te machʼa ya xchaʼyotsesik ta congregación, jich bitʼil teme ay la yutsʼin alaletik, ay la skontrain te organización yuʼun te Jehová o teme la schajpan te bin-utʼil ya slajinbey skʼoplal te snujpunel. Teme jiche, te ancianoetik ya skʼan ya yilik ta lek teme yuʼun-nix sujtesojix yoʼtanik ta smelelil-ae (Mal. 2:14; 2 Tim. 3:6). Te ancianoetik ya skʼan ya skanantayik te hermanoetik ta congregación. Pero jaʼnix jich ya skʼan ya xkʼot ta yoʼtanik te lek ya yil te Jehová te ya xchaʼsujt ta lum yuʼun machʼauk-a te ya sujtes yoʼtan ta smelelil sok te ya yijkitayik spasel te tulan muliletike. Manchukme te  ancianoetik ya yilik te kʼax chopol stalel te machʼa la yichʼ lokʼesel ta congregación, maba ya yalik te ma snujpʼuk te yichʼ naʼbeyel yoʼbolil sba yuʼun te Jehová (1 Ped. 2:10). a

TE BIN YA XJUʼ YA SPAS TE CONGREGACIÓN

13. ¿Bin-utʼil ya kiltik te machʼa la yichʼix komel ta swenta te ay bin ma lek la spase sok te machʼa la yichʼ lokʼesel ta congregación?

¹³ Jich bitʼil la kiltik ta yan artículo, ay baeltik te ya yichʼ akʼel jun anuncio te kʼalal ay machʼa la yichʼix komel ta swenta te ay bin ma lek la spase. Kʼalal jich ya xkʼot ta pasel ya xjuʼ ya jokin jbatik sok, melel jnaʼojtik te la sujtesix yoʼtan sok te maba yakix ta spasel te mulile (1 Tim. 5:20). Ya xjuʼ ya x-ayin ta congregación sok ya skʼan te yakuk x-akʼbot smukʼul yoʼtan yuʼun te hermanoetik yuʼun jich ya spasxan te bin leke (Heb. 10:​24, 25). Ma pajaluk sok te kʼalal ay machʼa ya yichʼ lokʼesel ta congregación. Kʼalal jich ya xkʼot ta pasel, maba ya jokinix jbatik sok, ni jaʼuk te ya xweʼotik sok (1 Cor. 5:11).

14. Teme ay machʼa lokʼesbil ta congregación ya xkʼot ta tsoblej, ¿bin ya staik ta nopel ta jujuntul te hermanoetik ja chikan te bin ya x-albot te yoʼtanik ta swenta te bin snopojikix ta Biblia? (Jaʼnix jich ilawil te fotoetike).

¹⁴ ¿Yuʼunbal ya skʼan ya yal te jkʼaxel maba ya jkʼopontikix te machʼa ya yichʼ lokʼesel ta congregación? Maʼuk. Te bin ya skʼan ya yale jaʼ te maba ya jkʼasestik tiempo sok. Pero teme jaʼ jtul jfamiliatik o jaʼ jtul kamigotik, ta jujuntul ya jtatik ta nopel ja chikan te bin yalbotik te koʼtantik ta swenta te bin jnopojtikix ta Biblia teme ya kalbeytik te yakuk xbajt ta tsoblej. Pero, ¿bin-utʼil ya skʼan ya kiltik te kʼalal ya xkʼot ta sNail Tsoblej? Ta nail talel maba ya jpatbeytik yoʼtan-a. Pero ta ora ini ta jujuntul ya jtatik ta nopel teme ya jpatbeytik yoʼtan o maʼuk, ja chikan te bin yalbotik te koʼtantik ta swenta te bin jnopojtikix ta Biblia. Ay machʼatik ya staik ta nopel te ya spatbeyik yoʼtan o ya yalbeyik te lek te kʼot ta tsoblej. Te bin ma xjuʼ ya jpastike jaʼ te jal ya xkʼopojotik sok, o te ya jokin jbatik soke.

15. ¿Machʼatik ya yalbey skʼoplal te 2 Juan 9-11? (Jaʼnix jich ilawil te recuadro  «¿Pajalbal te mulil te la yalbey skʼoplal te Juan sok te Pablo?»).

¹⁵ Yaniwan xjuʼ te jich ya jojkʼoybey jbatik: «¿Pero mabal jichuk ya yal te Biblia te  machʼa ya spatbey yoʼtan te ants winiketik-abi ‹pajal chopol yaʼtel ya xkʼot sok›?» (kʼopona 2 Juan 9-11). Te versiculoetik ini jaʼ ya yalbey skʼoplal te machʼatik ya skontrainik te organización yuʼun te Jehová (apostataetik) sok te machʼatik ya stijbeyik yoʼtan yantik ta spasel te mulile (Apoc. 2:20). Jich yuʼun, teme ay jtul ants winik ya yakʼ ta nopel lotiletik ta swenta te organización yuʼun te Jehová o ya stijbey yoʼtan yantik ta spasel muliletik, te ancianoetik maba ya xbajt yulaʼtayik. Melelnix-a te yato xjuʼ ya xjelone. Pero te bitʼil mato jichuk kʼoem ta pasele, maba ya jpatbeytik yoʼtan sok maba ya kalbeytik te yakuk xbajt ta tsoblej.

AYUK SKʼUXUL KOʼTANTIK SOK JNAʼBEYTIK YOʼBOLIL SBA TE YANTIK JICH BITʼIL YA SPAS TE JEHOVÁ

16, 17. 1) ¿Bin ya skʼan te Jehová te yakuk spasik te machʼatik la spasik mulile? (Ezequiel 18:32). 2) ¿Bin-utʼil ya x-aʼtejik sok te Jehová te ancianoetik?

¹⁶ ¿Bin la jnoptik ta joʼeb articuloetik ini? Te Jehová ma skʼan te ay machʼa ya yichʼ lajinel (kʼopona Ezequiel 18:32). Jaʼ ya skʼan te yakuk sujtik tal ta stojol te machʼatik la spasik mulile (2 Cor. 5:20). Jaʼ yuʼun ta nameyto tal, te Jehová la skʼanbey te machʼatik la yijkitayik, te yakuk sujtik tal ta stojol sok te yakuk sujtes yoʼtanik. Jaʼ jun majtanil yichʼoj akʼbeyel te ancianoetik te jun ya x-aʼtejik sok te Jehová ta skoltayel ta sujtesel yoʼtanik te machʼatik la spasik tulan mulile (Rom. 2:4; 1 Cor. 3:9).

¹⁷ ¡Jnopnax kaʼiytik te jayebto tseʼel oʼtanil ya x-ayin ta chʼulchan kʼalal ya sujtes yoʼtanik te machʼatik la spasik mulile! Te jTatik Jehová te ay ta chʼulchan, bayal stseʼelil yoʼtan kʼalal ya yil te ya sujt tal ta congregación te tuminchijetik yuʼun te chʼayemike. Akʼa jnopilantikxan ta jujun kʼajkʼal te skʼuxul yoʼtan, te bitʼil ya snaʼ yoʼbolil jbatik sok te slekil yoʼtan te ma snujpʼuk ya kichʼtik, jichme te skʼuxul koʼtantik ta stojol te Jehová ya xmukʼubxan ta jujun kʼajkʼal (Luc. 1:78).