Te jpuk-kʼop Pablo jich la yalbey te jchʼuunjeletik ta Tesalónica: «Teme ay machʼa ma schʼuun te bin la kalkotik ta carta ini, akʼaik ta naʼel machʼa-a» (2 Tes. 3:14). Ta nailal jich kʼoem ta koʼtantik-a te jaʼ mantalil ta stojol te ancianoetik. Teme ay machʼa ma schʼuun spasel te tojobtesel ay ta Biblia sok te bayal buelta akʼbilix consejo, te ancianoetik ya xjuʼ ya yakʼik jun discurso swenta ya yakʼbeyik snaʼ te congregación. Te kʼalal jich ya yichʼ pasele, te hermanoetik maba ya sjokinikix te hermano ini, pero ya xjuʼ ya sjokinik ta tsoblejetik sok ta scholel skʼop Dios.

Pero ta ora ini, ya xkʼot ta koʼtantik te bin la yal te Pablo, jaʼ te bin ya xjuʼ ya sta ta nopel ta jujuntul te hermanoetik kʼalal jich ya xkʼot ta pasel. Jaʼ yuʼun ma puersauk te ya skʼasesik jun discurso te ancianoetik yuʼun ya yakʼbeyik snaʼ te congregación. ¿Bin yuʼun te jich ya xbajt yichʼix pasele? Kilbeytikxan skʼoplal ta lek te bin la yal te jpuk-kʼop Pablo.

Te Pablo la yal te ay chaʼoxtul hermanoetik ta congregación «te ma schʼuun mantale». Maba la schʼuunik spasel te tojobtesel la yakʼ te Pablo te lokʼem ta Skʼop Diose. Te kʼalal ay la yulaʼtay ta nailal, te Pablo jich la yaltiklanbey: «Teme ay machʼa ma skʼan ya x-aʼtej, jaʼnix jich mame akʼa weʼuk». Manchukme jich-abi, ay machʼatik te maba la skʼan aʼtejik ta sleel te bin ya xtuun yuʼunik, manchukme ya xjuʼ yuʼunik spasel. Jaʼnix jich ya schʼik sbaik-a te bin ma swentaikuke. ¿Bin ya skʼan ya spasik te hermanoetik te kʼalal ay machʼa jich stalel ini? (2 Tes. 3:​6, 10-12).

Te Pablo jich la yal: «Akʼaik ta naʼel machʼa-a». Ta kʼopil griego jaʼ ya yalbey skʼoplal te ya skʼan ya yichʼ naʼel machʼa-a te jich stalel sok te yakuk stsajtay sbaik yuʼun maba ya skʼayinbeyik te stalele. Te mantalil ini la yichʼ tikunel ta stojol te congregación, ma jaʼuknax ta stojol te ancianoetik (2 Tes. 1:1; 3:6). Jaʼ yuʼun teme ay jtul hermano ya snaʼ te ay machʼa ma schʼuun te mantalil te lokʼem tal ta skʼop te Diose, ta jujuntul ya sta ta nopel te maba ya sjokinik sok ya yamigoinik te machʼa jich stalele.

¿Yuʼunbal ya skʼan ya yal-abi te jich ya yichʼ ilel te bitʼil te machʼa ya yichʼ lokʼesel ta congregación? Maʼuk, melel te Pablo jich la yalxan: «Jaʼ lekxan te ya atojobtesik jich bitʼil jtul hermano». Jich yuʼun ta jujuntul te hermanoetik ya xjuʼ ya sjokinik ta tsoblejetik sok ta scholel skʼop Dios, pero maba ya sjokinik ta skʼasesel tiempo sok, o ta jun reunión social. Te Pablo la scholbey skʼoplal te bin swentail: «Yuʼun jich ya xkʼexaw-a». Te kʼalal maba ya yichʼ jokinel te machʼa ma schʼuun mantale yaniwan xkʼexaw yuʼun sok ya slekubtes te stalele (2 Tes. 3:​14, 15).

¿Jaxan te joʼotike? ¿Bin-utʼil ya xjuʼ ya jchʼuuntik spasel te mantalil ini? Ta nail, ya skʼan ya kiltik ta lek te yuʼun-nix «ma schʼuun» mantal-a jich bitʼil la yal te Pablo. Ma jaʼuk la yalbey skʼoplal ta stojol te hermanoetik te yanyantik-a te bin ya staik ta nopel spasel ta swenta te bin ya x-albot te yoʼtanik o te bin ya smulanik spasel. Sok ma jaʼuk ya yalbey skʼoplal ta stojol te hermanoetik te ay bin ma lek ya spas ta jtojoltike. Te bin la yalbey skʼoplal te Pablo jaʼ ta stojol te hermanoetik te spasemal yoʼtanik ya skʼaxuntayik mantal manchukme ay bayal buelta la yichʼikix akʼbeyel tojobtesel.

Teme ay ya jnaʼtik stojol te ay jtul hermano te yak ta skʼaxuntayel jun mantalil te ay ta Biblia, a ya xjuʼ ya jtatik ta nopel te maba ya jokintik ta skʼasesel tiempo sok, o ta jun reunión social. Te bitʼil jujuntul ya jtatik ta nopele, ma xjuʼ ya kalbeytik te yantik familiaetik te jichuk ya spasik-euke. Pero ya xjuʼ ya jokintik ta tsoblej sok ta scholel skʼop Dios. Kʼalal ya sjeltay te spensar sok te stalel, ya xjuʼ ya jokintikix jich bitʼil ta nailal.