1. ¿Bin ya yilbey Jehová te j-abatetik yuʼun?

YA YAKʼBOTIK stseʼelil koʼtantik te bitʼil «te Jehová ya smulan te pueblo yuʼune» (Sal. 149:4). Jaʼ ya yil te jlekil jtaleltik, te bin ya xjuʼ kuʼuntik spasel sok ya yamigoinotik. Teme jun koʼtantik ya kakʼ jbatik ta stojol, jich nopol ay ta jtojoltik (Juan 6:44).

2. ¿Bin yuʼun ay ermanoetik te wokol ya yaʼiyik schʼuunel te kʼux aʼiybilik yuʼun te Jehová?

² Ayniwan machʼa jich ya xjuʼ ya yal: «Ya jnaʼ te Jehová kʼux ta yoʼtan te pueblo yuʼun, pero ¿bin-utʼil ya jnaʼ te kʼuxon ta yoʼtane?». ¿Bin yuʼun ay ermanoetik te jich ya sjojkʼoybey sbaike? Kiltik te bin la yal te Oksana * te kʼax swokol te kʼalal chʼinto-ae, jich ya yal: «Tseʼelnax koʼtan te kʼalal la kichʼ jaʼ sok te ochon ta prekursora, pero 15 jaʼbil ta patil tal ta koʼtan te bintik ma lek kʼaxem ta jkuxlejal. Jich la jnop te ma lek ya yilonix te Jehová sok te ma snujpʼuk te kʼuxon ta yoʼtane». Jtul prekursora te Yua sbiil te jaʼnix jich kʼax swokol te kʼalal chʼinto-ae, jich ya yal: «La kakʼ jba ta abatinel ta stojol te Jehová yuʼun ya jkʼan te ayuk stseʼelil yoʼtane, pero kʼoem ta koʼtan te maʼyuk bin-ora ya skʼanon te Jehová».

3. ¿Bin jojkʼoyeletik ya kakʼbeytik sujtib ta artikulo ini?

³ Jich bitʼil kʼax ta stojol te chaʼtul ermanaetik wokolniwan ya kaʼiytik schʼuunel te kʼuxotik ta yoʼtan te Jehová. Ta artikulo ini ya kakʼbeytik sujtib te cheb jojkʼoyeletik ini: ¿Bin yuʼun ya skʼan te schʼuunej koʼtantik te kʼuxotik ta yoʼtan te Jehová? Sok ¿bin ya skʼan ya jpastik yuʼun ma jichuk ya kaʼiy jbatik?

4. ¿Bin yuʼun ma skʼan ya jkuytik te ma kʼuxotik ta yoʼtan te Jehovae?

⁴ Teme schʼuunej koʼtantik te kʼuxotik ta yoʼtan te Jehová ya stijbotik koʼtantik ta spasel tulan, manchukme ya xkʼax jwokoltik. Pero teme xchebet koʼtantik yuʼun maʼyuk bayal yip koʼtantik (Prov. 24:10). Teme ya xchebaj koʼtantik sok te ya jkuytik te ma skʼanotik te Jehová, maʼyuk yip koʼtantik ta sitintayel te pejtsʼetik ya yakʼbotik te Satanás (Efes. 6:16).

5. ¿Bin kʼoem ta stojol chaʼoxtul ermanoetik te la skuyik te ma kʼuxuk aʼiybilik yuʼun te Diose?

⁵ Ay j-abatetik yuʼun Dios skuyojik te maʼyuk skʼoplal ya x-ilotik yuʼun te Jehová, jaʼ yuʼun pejkʼajem te schʼuunel yoʼtanik. Jtul ansiano te James sbiil, jich ya yal: «Manchukme ya x-abatinon ta Betel sok ya jchol skʼop Dios ta yan kʼopil, ya jojkʼoybey jba teme lek ya yil Jehová te bin yakon ta spasele. La jnop ta koʼtan teme yanix yaʼiybon-a te Jehová te kʼalal ya jkʼopone». Te Eva te jaʼnix jich ya x-abatin ta stojol te Jehová, jich ya yal: «Kʼot ta koʼtan teme ya jkuytik te ma kʼuxotik ta yoʼtan te Jehová, yaniwan ya schʼay te sbujtsʼ koʼtantik ta spasbeyel yaʼtel sok te jich ya kaʼiytik te maʼyukix bin ya xjuʼ kuʼuntik spasel». Te Michael jtul prekursor regular sok ochem ta ansiano, jich ya yal: «Teme ma schʼuun awoʼtan te mukʼ akʼoplal ya yilat te Diose, kʼunkʼunme ya xnamajat ta stojol».

6. ¿Bin ya skʼan ya jpastik teme ma lek ya kaʼiy jbatike?

⁶ Te bin la yalik te ermanoetik ya skoltayotik yuʼun ya xkʼot ta koʼtantik te bin yuʼun ma lek ya jkuytik te ma kʼuxotik ta yoʼtan te Diose. ¿Bin ya skʼan ya jpastik teme jich ya kaʼiy jbatike? Ya skʼan jlokʼestik ta oranax ta koʼtantik. Jkʼanbeytik te Jehová te ayuk slamalil koʼtantik sok te yakuk skanantaybotik te koʼtantik soknix te maʼyuk bin ya snaʼulan te koʼtantike (Sal. 139:23; Filip. 4:6, 7). Mame xchʼay ta koʼtantik te ay ermanoetik te jichnix ya yaʼiy sbaik te yakik ta spasel tulane. Jaʼnix jich ayme j-abatetik ta namey te jichnix la yaʼiy sbaike. Kiltik te bin ya jnoptik ta swenta te bin kʼax ta stojol te jpuk-kʼop Pablo.

7. ¿Bin wokolil kʼax ta stojol te Pablo?

⁷ ¿Bayalbal kaʼteltik te jich ya kaʼiytik te ma xjuʼix kuʼuntik spasele? Jich la yaʼiy sba-euk te jpuk-kʼop Pablo, la yal te la smel yoʼtan ta stojol te kongregasionetik (2 Cor. 11:23-28). ¿Ayotikbal ta tulan chamel te maʼyuk spoxile sok te maʼyukix stseʼelil koʼtantik? Te Pablo smeloj yoʼtan, melel ma xjuʼ ya slokʼes te «mucʼul chʼix te tsʼapal» ta sbakʼetal jaʼniwan tulan chamel (2 Cor. 12:7, TZOXCH; 12:8-10). ¿Chebajembal koʼtantik yuʼun te bitʼil jmulawilotike? Jich la yaʼiy sba te Pablo kʼalal la yal te oʼbol sba, melel spisil-ora yak ta spasel tulan yuʼun ya spas te bin leke (Rom. 7:21-24).

8. ¿Bin koltayot te Pablo yuʼun ma xyijkitay sba ta abatinel ta stojol te Jehová manchukme ay swokol?

⁸ Manchukme bayal kʼax swokol te Pablo ma la yijkitay sba ta abatinel ta stojol te Jehová. ¿Bin-utʼil la sta yip yoʼtan? Manchukme snaʼoj te aynix ban ya schʼay, pero tulan schʼuunel yoʼtan ta swenta te stojol kolele. Snaʼoj ta lek te bin yaloj te Jesús te «spisil te machʼatic ya schʼuhunic» ya staik kuxlejalil ta sbajtelkʼinal (Juan 3:16; Rom. 6:23). Te Pablo ay schʼuunel yoʼtan ta swenta te stojol kolele sok snaʼoj te ya spasbey perdon Jehová spisil te machʼatik ya sujtes yoʼtanik (Sal. 86:5).

9. ¿Bin ya yakʼ jnoptik te bin la yal te Pablo ta Gálatas 2:20?

⁹ Te Pablo schʼuunej te kʼux aʼiybil yuʼun te Jehová, melel snaʼoj te la stikun tal te Jesús yuʼun laj ta stojol. Kiltik te bin la yal te Pablo ta Gálatas 2:20 (kʼopona). Te Pablo jich la yal: «Te Snichʼan Dios, te cʼuxon ta yoʼtan soc te la yacʼ sba ta jcuenta». Te Pablo ma la snop te aynax ban kʼalal ya yakʼ ta ilel skʼuxul yoʼtan te Dios, ma jichuk la yal: «Jnaʼoj te Jehová kʼux ta yoʼtan te kermanotak, pero te joʼone ma kʼuxon ta yoʼtan». Jaʼ yuʼun jich la yalbey te romanoetik: «Cham Cristo cuʼuntic te cʼalal ayotic to ta mulil a» (Rom. 5:8). Te skʼuxul yoʼtan te Dios ma pʼisbiluknax ya yakʼ ta ilel.

10. ¿Bin ya yakʼ jnoptik te bin ya yal te Romanos 8:38, 39?

¹⁰ (Kʼopona Romanos 8:38, 39). Te Pablo snaʼoj te ay skʼuxul yoʼtan te Diose, jaʼ yuʼun jich la stsʼibay: «Ma xhuʼ ya spitotic loqʼuel ta stojol te scʼuxul  yoʼtan Dios». Snaʼoj te la yakʼbey yil slamalil yoʼtan te lum yuʼun Israel soknix te naʼbot yoʼbolil sba. Te bin la skʼan la yal te Pablo, jaʼ ini: «Ma jkuy te ma kʼuxon ta yoʼtan te Dios, melel la yakʼ tal te sNichʼan yuʼun laj ta jtojol» (Rom. 8:32).

11. Manchukme bayal bin ma lek la spas te Pablo, jich bitʼil ya yal te 1 Timoteo 1:12-15, ¿bin yuʼun snaʼoj te kʼux aʼiybil yuʼun te Jehovae?

¹¹ (Kʼopona 1 Timoteo 1:12-15). Te Pablo ayniwan ma lek la yaʼiy sba yuʼun te bin la spase. La yal te jaʼ «cʼax» jich jmulawil-a te bin-utʼil te yantik. Te kʼalal mato snaʼbeyoj sba-a te Diose, la snutstiklan te jchʼuunjeletik, la yotseslan ta karsel sok lek la yil te kʼalal ya xmilotik (Hech. 26:10, 11). ¿Binwan yaʼiyel la yaʼiy sba te Pablo te kʼalal la snaʼbey sba jtul j-abat yuʼun Dios te la yakʼbey ta milel te smeʼ stat? Te Pablo la smel yoʼtan yuʼun spisil te bintik ma lek la spas, pero snaʼoj te maʼyukix bin ya xjuʼ ya yichʼ pasele. Kʼot ta yoʼtan te jaʼ laj ta stojol te Cristo, jaʼ yuʼun jich la stsʼibay: «Ta scuenta yutsil yoʼtan Dios hich ayon te bin utʼil ayone» (1 Cor. 15:3, 10). ¿Bin ya yakʼ jnoptik? Jaʼ te ya skʼan ya schʼuun koʼtantik te laj ta jtojoltik te Jesús, jaʼ yuʼun ya xjuʼ ya kamigointik te Jehová (Hech. 3:19). Te bin mukʼ skʼoplal ta yoʼtan te Dios jaʼ te bin ya jpastik ta ora ini sok ta pajel chaʼbej, ma jaʼuk te bin chopol jpasojtik chikan teme testigootikix-a o teme maʼuke (Is. 1:18).

12. Jich bitʼil ya yal te 1 Juan 3:19, 20, ¿bin ya skʼan ya jpastik teme jich ya kaʼiytik te maʼyuk jkʼoplaltik sok te ma snujpʼuk te ay machʼa kʼux ya yaʼiyotik?

¹² Te koʼtantik ya xjuʼ ya sloʼlayotik ya yalbotik te maʼyuk jkʼoplaltik sok te ma snujpʼuk te ay machʼa kʼux ya yaʼiyotik (kʼopona 1 Juan 3:19, 20). Jaʼ yuʼun  yaniwan jnoptik te ma xkichʼtik pasbeyel perdon ta swenta te la yakʼ sba ta lajel te Jesús. Te kʼalal jich ya kaʼiy jbatik akʼa juluk ta koʼtantik te «ha cʼax mucʼ te Dios te bin utʼil te coʼtantic». Manchukme jich ya kaʼiytik te ma kʼuxotik ta yoʼtan sok te ma spasbotik perdon te Jehová, pero kʼuxotik ta yoʼtan sok ya spasbotik perdon. Jaʼ yuʼun ya skʼan ya kakʼ ta koʼtantik te jich ya spase. Yuʼun jich ya xkʼot ta pasel ya skʼan te jujun kʼajkʼal ya jkʼopontik te Biblia, te spisiluk-ora ya jkʼopontik Dios sok te ya jkʼasestik tiempo sok te ermanoetik. Kiltik bin yuʼun te mukʼ skʼoplale.

13. ¿Bin-utʼil ya skoltayotik te snopel te Biblia? (Ilawil-euk te rekuadro « Te bin-utʼil ya xkoltayotik yuʼun te Biblia»).

¹³ Snopel te Biblia ta jujun kʼajkʼal. Teme jich ya jpastik ya jtatikxan ta ilel te lekil taleliletik yuʼun te Jehová sok ya xkʼot ta koʼtantik te kʼuxotik ta yoʼtan. Teme ya jnop ta koʼtantik te bin ya yal te Biblia ya xkʼot ta jpensartik sok ta koʼtantik yuʼun jich ya jpastik te bin lek (2 Tim. 3:16). Jtul ansiano te Kevin sbiil maʼyuk skʼoplal ya yaʼiy sba, jich ya yal: «Kʼalal ya jkʼopon te Salmo 103 sok te ya jnopilan ta koʼtan jaʼ skoltayejon ta yilel te bintik lek sok te ya xkʼot ta koʼtan te bin yilel ya yilon te Jehová». Te Eva te la kalbeytik skʼoplal ta parrafo 5, jich ya yal: «Ya jlokʼes tiempo ta snopilanel ta koʼtan te bin yaʼiyel ya yaʼiy sba te Jehová, jaʼ ya yakʼbon slamalil koʼtan sok ya stsak yip te schʼuunel koʼtan».

14. ¿Bin-utʼil ya skoltayotik te orasion?

¹⁴ Kʼopona Dios spisil-ora (1 Tes. 5:17). Spisil-ora lokʼem ta yoʼtan sok smelelil ya xkʼopojik te machʼa yamigo sbaike, jaʼnix jich ya jpastik ta stojol te Jehová. Kʼalal ya kalbeytik te bin yaʼiyel ya kaʼiy jbatik, te bin ya jnop ta koʼtantik sok te bin ya jmel koʼtantik yuʼun, jich ya kakʼtik ta ilel te ay smukʼul koʼtantik ta stojol sok te ya jnaʼtik te kʼuxotik ta yoʼtan (Sal. 94:17-19; 1 Juan 5:14, 15). Te Yua te la kalbeytikix skʼoplal, jich ya yal: «Kʼalal ya jkʼopon te Jehová ma jaʼuknax ya kalbey te bin la jpas ta kʼajkʼal-abi, ya kalbey te bin ay ta koʼtan sok te bin yaʼiyel ya kaʼiy jba. Kʼunkʼun kʼoem ta koʼtan te jich ya kil te Jehová bitʼil jtul tatil te kʼux ta yoʼtan te snichʼnab». (Ilawil te rekuadro « ¿Aybal akʼoponoj?»).

15. ¿Bin-utʼil ya yakʼ ta ilel Jehová te ay jkʼoplaltik ta yoʼtan?

¹⁵ Jokintik te ermanoetik. Jaʼ majtanil yakʼojbotik te Jehová (Sant. 1:17). Te Jehová ya yakʼ ta ilel te ay jkʼoplaltik ta yoʼtan ta swenta te ay ermanoetik te kʼuxotik ta yoʼtan «spisil ora» (Prov. 17:17). Ta Colosenses 4:10 sok 11 te Pablo la yal te ay ermanoetik te koltayot yuʼun  sok te akʼbot smukʼul yoʼtan. Te Jesucristo la yal wokol yuʼun te koltayel akʼbot yuʼun te yamigotak sok te chʼul-abatetik (Luc. 22:28, 43).

16. ¿Bin-utʼil ya skoltayotik te kermanotaktik yuʼun ya xnoptsajotik ta stojol te Jehová?

¹⁶ ¿Yabal jkʼanbeytik koltayel te ermanoetik ta kongregasion? Teme ya kalbeytik jtul ermano te bin yaʼiyel ya kaʼiy jbatik ma yuʼunuk maʼyuk yip koʼtantik, jaʼ yuʼun te ya jkʼantik kanantayel. Jnop kaʼiytik te bin la yal te James te la yichʼ albeyel skʼoplal ta parrafo 5 jich ya yal: «Yamigoinel te ermanoetik te tulan schʼuunel yoʼtanik jaʼ skoltayejon te kʼalal ya xtal ta koʼtan te bin ma lek, te kamigotak ya yaʼiybonik jkʼop sok ya yalbonik te ya skʼanonik. Jich ya kil te kʼuxon ta yoʼtan te Jehová sok te ya smel yoʼtan ta jtojol». ¡Mukʼ skʼoplal te ayuk kamigotik ta kongregasion!

17, 18. ¿Machʼa ya jchʼuunbeytik skʼop sok bin yuʼun?

¹⁷ Te Satanás ya skʼan te ya xchebaj koʼtantik sok te yakuk jpastik te bin ma lek. Ya skʼan te yakuk jnoptik te ma kʼuxotik ta yoʼtan te Jehová sok te ma snujpʼuk te ya yakʼbotik te jkoleltik. Pero ma jichuk te bin ya yal te Satanás.

¹⁸ Te Jehová kʼux ta yoʼtan sok mukʼ skʼoplal ya yil te j-abatetik yuʼune. Teme ya jchʼuunbeytik skʼop ya x-ayinotik ta skʼuxul yoʼtan te Jehová sok te Jesús (Juan 15:10). Jaʼ yuʼun ma xkichʼtik ta wenta te bin ya yal te Satanás ni jaʼuk te koʼtantik kʼalal ya yalbotik te ma kʼuxotik ta yoʼtan te Jehová. Te bin ya skʼan ya jpastik jaʼ te ya jchʼuunbeytik skʼop te Jehová te jaʼ ya yil te lekil taleliletik kuʼuntik. Ayuk ta koʼtantik «te Jehová ya smulan te pueblo yuʼune», jaʼnix jich te jaʼat kʼuxat ta yoʼtan.