¿Bin yuʼun te Jesús la yal te kʼopetik te ay ta Salmo 22:1?

Jich bitʼil ya yal te Mateo 27:46 te kʼalal nopol ya xlajix-a te Jesús, jich la yal: «Dios cuʼun, Dios cuʼun, ¿bin yuʼun apihtesejon?» Jich te Jesús la skʼotes ta pasel te bin la yal te David ta Salmo 22:1 (Mar. 15:34). Ma jichuk la yal te Jesús yuʼun chebajem yoʼtan o pejkʼajem schʼuunel yoʼtan, snaʼoj te bin yuʼun ya xlaj sok jun yoʼtan ya spas (Mat. 16:21; 20:28). Jaʼnix jich snaʼoj te maba ya xkanantayot yuʼun te Jehová te kʼalal ya xlaje (Job 1:10) Te Jesús la yakʼ ta ilel te jun yoʼtan ta stojol te Jehová manchukme kʼax swokol te kʼalal laje (Mar. 14:35, 36).

¿Bin yuʼun jich la yal te Jesús? Kiltik cheʼoxebuk te bin yuʼune. *

Te Jesús jaʼniwan yak ta yalel te maba ya xkoltayot yuʼun Jehová te kʼalal ya yichʼ milele. Maba ya xkoltayot yuʼun Jehová te kʼalal ya stoj te jmultik, jaʼ jtul winik te ya xlaj ta jtojoltik (Heb. 2:9).

Te Jesús laniwan yal te kʼopetik ta Salmo 22 yuʼun ya sjultesbey ta yoʼtan te ants winiketik te bin ya yal spisil te salmo. Ta yorail-abi te judioetik kʼayemik ta snopel bayal salmoetik. Jich yuʼun teme ya xjultesbotik ta yoʼtanik jun bersikulo ya xtal ta yoʼtanik spisil te salmo. Teme jich yoʼtan te Jesús, jaʼ yak ta skoltaybel te judioetik yuʼun ya xjul ta yoʼtanik albilkʼopetik ta salmo ta swenta te slajele (Sal. 22:7, 8, 15, 16, 18, 24). Soknix ta slajibal te salmo ya yal te  ya «xcuentahinwan» te Jehová kʼalalto «ta stiʼil bahlumilal» (Sal. 22:27-31).

Kʼalal te Jesús la yal te bin la yal te David, yakniwan ta skoltaybeyel sba skʼoplal. Te kʼalal mato ya yichʼ milel-a te Jesús, kujch yuʼun spisil te bintik akʼbot smuline (Mat. 26:65, 66). La yichʼik ta kʼop ta ajkʼabal sok ma jichuk la spasik te bitʼil ya yal te ley (Mat. 26:59; Mar. 14:56-59). Kʼalal te Jesús la yal te kʼopetik te ay ta salmo, jaʼniwan yak ta yalel te ma snujpʼuk te bin-utʼil ya yichʼ milel.

Te bitʼil te Jesús la sjultesbey ta yoʼtan te yantik te bitʼil kʼax swokol te David ma yuʼunuk te ma lek ilbil yuʼun te Jehová. Te David ma chʼayem te schʼuunel yoʼtan, jaʼ yuʼun te kʼalal la spas te jojkʼoyel la yal te smukʼulinej yoʼtan te Jehová te ya skoltay te j-abatetik yuʼun sok akʼbot bendision (Sal. 22:23, 24, 27). Jich bitʼil kʼax ta stojol te Jesús te «snichʼan David» te kʼax swokol te kʼalal jipil ta teʼ, maba ya skʼan ya yal te ma lek ilbilix yuʼun te Jehová (Mat. 21:9).

Jaʼnix jich yakniwan ta yalel te kʼux la yaʼiy te Jesús te bitʼil ijkitayot yuʼun te Jehová yuʼun jich ya yakʼ ta ilel-a te jun yoʼtan ta stojol. Te bitʼil la xkʼaxuntayik kʼop te Adán sok Eva, jaʼ yuʼun puersa kʼax swokol sok laj te Jesús. Ma jichuk skʼanojel yoʼtan-a te Jehová te ya xkʼax swokol te Jesús, melel maʼyuk bin chopol spasoj, pero ya skʼan ya xkʼax swokol sok ya xlaj yuʼun jich ya yakʼ ta ilel-a te ma smeleliluk te bin ya yal te Satanás, yuʼun ya stojbotik te jmultik sok ya jtatik te kuxlejal ta sbajtelkʼinal (Mar. 8:31; 1 Ped. 2:21-24). Jaʼ ya xkʼot ta pasel teme ya x-ijkitayot yuʼun te Jehová.

Yanxan te bin yuʼun jich la yal te Jesús jaʼ te la skoltay te jnopojeletik, yuʼun jaʼ ya xbajt ta yoʼtanik snaʼel bin yuʼun te Jehová la yakʼ te jich la yichʼ milele. * Te bitʼil la yichʼ milel bitʼil jtul j-elekʼ te Jesús, bayalniwan machʼatik ma lek la yaʼiy sbaik yuʼun (1 Cor. 1:23). Teme jaʼ ya xbajt ta yoʼtanik snaʼel te bin yuʼun laje, jich ya xkʼot ta yoʼtanik te jnopojeletik te bin swentaile (Gál. 3:13, 14). Jich yuʼun maba la yilik bitʼil jtul chopol winik, jich la yilik bitʼil jkoltaywanej yuʼunik.

Chikan te bin yuʼun jich la yal te Jesús, snaʼoj te kʼalal ya xlaj yak ta spasbeyel skʼanojel yoʼtan te Jehová. Kʼalal jich la yakʼ ta naʼele, jich la yal: «Huʼix» (Juan 19:30; Luc. 22:37). Te Jehová maba la skanantay te Jesús yuʼun ya xkʼot ta pasel-a te bin yuʼun tal ta Balumilal sok jich ya xkʼot ta pasel-a te bin la yal «ta Ley yuʼun Moisés, ta shun jalwanejetic soc ta salmohetic» (Luc. 24:44).