Te kʼalal chʼionxane, kʼunkʼun la yijkitay ta yamigoinel te Jehová. Jich la kil te bayal bin ya spasik te joʼtak ta klase, jaʼ yuʼun jich la jkʼan la jpas-euk. Te mantaliletik te ya yakʼbon te jmeʼ jtat sok te Biblia jich ya kaʼiy te jaʼ jun ijkatsil jaʼnix jich-euk te ya x-abatinon ta stojol te Jehová. Manchukme maʼyuk bin-ora lokʼ ta ke yalel te maʼyuk te Jehová, jich la kaʼiy te pejkʼaj te schʼuunel koʼtan.

Maʼyuk bin-ora la kijkitay te scholel skʼop Dios, pero jich ya jpas yuʼun-nax ma snaʼik stojol-a te bin yaʼiyel ya kaʼiy jbae. Kʼalal ya xlokʼon ta scholel skʼop Dios ma jchajpan jba, jich yuʼun wokol ya kaʼiy te ya xkʼopojon sok te ants winiketik. Jaʼ yuʼun maʼyuk jrebisita sok maʼyuk machʼa ya jnojptes ta Biblia ma xyakʼbonix stseʼelil koʼtan te ya xlokʼon ta scholel skʼop Dios, jaʼ yuʼun pejkʼajxan te schʼuunel koʼtan. Ya jojkʼoybey jba: «¿Bin-utʼil ay machʼa jich ya spas ta jujun semana sok ta jujun u?».

 Te kʼalal 17 kaʼbilal-ae la jtukeltay jba, jaʼ yuʼun boon ta Australia. Te jmeʼ jtat la smel yoʼtanik yuʼun, pero la skuyik te maba ya jkom jba ta spasbeyel yaʼtel te Jehová.

Ta Australia pejkʼajxan ta jkʼaxel te schʼuunel koʼtan. Ma xboonix ta tsoblejetik sok ya jokinlan te achʼix keremetik te jichnix stalelik bitʼil te joʼone, ya xbajtik ta tsoblej pero ta yan kʼajkʼal ya xlokʼik ta yuchʼel trago sok ta ajkʼot. Kʼot ta koʼtan te yakon ta spasel te bin ya skʼan yoʼtan te Jehová sok te bin ya skʼan te balumilale, jaʼ yuʼun jich ya kaʼiy te ma jnaʼix te banti ayone.

Cheb jaʼbil ta patil la jnaʼbey sba jtul ermana te la yakʼon ta pensar yuʼun te bin yakon ta spasel ta jkuxlejal. Yakon ta kuxinel sok joʼtul ermanaetik te mato ayuk smamalalik sok la kikʼtik jun semana ta jnatik te superintendente yuʼun sirkuito sok te yinam, te Tamara sbiil. Kʼalal te ermano ya spas yaʼtel ta swenta kongregasion, te Tamarae ya skʼases tiempo sok joʼotik sok ya stseʼejinotik. Bayal la jmulan-abi sok ma jmaliyoj-a te machʼa tulan schʼuunel yoʼtan ya xjuʼ te lek stalel sok te tseʼelnax yoʼtane.

Te Tamara kʼux ta yoʼtan te Jehová sok ya smulan te scholel skʼop Dios. Ay stseʼelil yoʼtan te ya spasbey te yaʼtel te Jehová, yan te joʼone maʼyuk stseʼelil koʼtan ta swenta te bin yakon ta spasele. Te bitʼil leknax stalel sok te ay stseʼelil yoʼtan la stijbon koʼtan. Te ejemplo yuʼune la yakʼbon jnop te Jehová ya skʼan te ayuk stseʼelil koʼtantik kʼalal ya x-abatinotik ta stojol (Sal. 100:2).

Jich ya jkʼan te ayuk stseʼelil koʼtan te bitʼil te Tamara, jaʼ yuʼun kʼunkʼun jajch jelontes te bin ya jpas ta jkuxlejal. Jajch jchajpan jba ta scholel skʼop Dios sok baeltik ya x-ochon ta prekursora auksiliar. Jaʼ la skoltayon yuʼun ma bayal ya xiwonix. Te bitʼil ya jtuuntes te Biblia ya yakʼbon stseʼelil koʼtan, jaʼ yuʼun ochon ta prekursora auksiliar ta jujun u.

 La jta kamigotak te yanyantik yaʼbilalik, te tulan schʼuunel yoʼtanik sok te ya smulanik ya x-abatinik ta stojol te Jehová. Te lekil ejemplo yuʼunik la yakʼbon kil te bin mukʼ skʼoplal sok te yakuk jkʼaytes jba ta snopel te Biblia. Jich kaj jmulan te scholel skʼop Dios sok ochon ta prekursora regular. Jich la kaʼiy te ayix stseʼelil koʼtan sok te ya jmulan ya jokin te ermanoetik.

Jun jaʼbil ta patil la jnaʼbey sba te Alex jtul ermano te lek yoʼtan sok te kʼux ta yoʼtan te Jehová sok te scholel skʼop Dios. Jaʼ sierbo ministerial sok ayix wakeb jaʼbil te ochem ta prekursor. Jaʼnix jich la schol skʼop Dios ta Malaui, te banti ya skʼanxan jcholkʼopetik. Tey la sjokinlan chaʼoxtul misioneroetik te ijkitaybot jun lekil ejemplo sok tijbot yoʼtan te jaʼuk nail ya spasbey te skʼanojel yoʼtan te Dios.

Ta 2003 nujpunon sok te Alex, ta jchebaltik abatinotik ta stojol Jehová. Bayal bin mukʼ skʼoplal jnopojtik sok te Jehová yakʼojbotik bayal bendision.

Ta 2009 ochotik ta misionero, bootik ta Timor Oriental te jaʼ chʼin nasion te nopol ay ta Indonesia. Chamnax koʼtantik yuʼun, la yakʼbotik stseʼelil koʼtantik sok xiwotik. Joʼeb u ta patil kʼootik ta Dili.

Kʼayotik-a te bintik ya spasik, te skostumbreik, te skʼopik, te sweʼelik sok te bin yilel skuxlejalik. Te kʼalal ya jcholtik skʼop Dios ya jtatik ants winiketik te pobreik, te ma snopojik jun sok te utsʼinbilik sok bayal machʼatik la jnaʼbeytik sba te ay jilem señail yejchenik ta sbakʼetalik sok te ma lek ya yaʼiy sbaik ta swenta te guerra te kʼax ta stojolike. *

 ¡Te scholel skʼop Dios kʼax tʼujbil! Ta jun buelta la jta tul achʼix te 13 yaʼbilal te bayal smeloj yoʼtan-ae, te María sbiil. * Bayalix jaʼbil slajel te smamae sok maʼyuk bin-ora la yil te spapae. Te María ma snaʼ te bin ya spas ta skuxlejal, jich bitʼil te achʼix keremetik te pajal yaʼbilal soke. Ya xjul ta koʼtan te yak ta okʼel-a te la yalbon te bin yaʼiyel ya yaʼiy sba. Pero ma kʼot ta koʼtan te bin la yalbone, melel mato jnaʼ-a te kʼopil ya xkʼopoje. Jich yuʼun la jkʼanbey koltayel te Jehová te yakuk skoltayon yuʼun ya kakʼbey smukʼul yoʼtan. La jkʼoponbey tekstoetik ta Biblia yuʼun lek ya yaʼiy sba-a. Te kʼalal kʼax bael te jaʼbil, la kil bin-utʼil te María jelon te stalel, te bin yilel sok te skuxlejal. La yichʼ jaʼ sok yakix ta yakʼel nojptesel ta Biblia. Jich ya yaʼiy te ayix sfamilia te jun schʼuunel yoʼtan sok te kʼux aʼiybile.

Te Jehová yakʼojbey bendision te scholel skʼop Dios ta Timor Oriental. Te ayix tal lajuneb jaʼbil jteb ma spisiluk te jcholkʼopetik la yichʼik jaʼ, ay machʼatik ochemik ta prekursor, ta sierbo ministerial sok ta ansiano. Ay yantik te ya x-aʼtejik ta Ofisina yuʼun Traduksion sok ay yantik te ya xkoltaywanik ta spasel tradusir te publikasionetik ta skʼopik. Tseʼel koʼtan yuʼun te ya xkʼayojinik ta tsoblejetik, te tseʼel yoʼtanik sok te ya xchʼi te schʼuunel yoʼtanik ta stojol te Jehová.

Te jkuxlejal ta Timor Oriental ma pajaluk sok te kʼalal ayon ta Australia. Pero tseʼel koʼtan ya kaʼiy jba ta Timor. Ay baeltik te ya xbootik ta autobus te nojel ta ants winiketik te ya xtalik ta smanel chay sok itajetik ta merkado. Ay ya kakʼtik nojptesel yuʼun Biblia ta chʼin naetik te maʼyuk spisoil, te ay mutetik ta sjoyobal sok te kʼux kʼajkʼal ta yutil. Manchukme ay jwokoltik pero kʼax tʼujbil te liʼ ayotike.

Kʼalal ya xtal ta koʼtan te bin kʼaxem ta jtojole, tseʼel koʼtan yuʼun te jmeʼ jtat te la snojptesonik ta swenta te Jehová sok te la skoltayonik te kʼalal jchʼiel achʼixonix-ae. Te bin ya yal te Proverbios 22:6 kʼot ta pasel ta jtojol. Te jpapa sok te jmama lek ya yilik te Alex sok te joʼon. Tseʼel yoʼtanik yuʼun te ya stuuntesotik te Jehová. Jaʼto tal ta 2016 ya x-aʼtejotik jich bitʼil superintendente yuʼun sirkuito te jaʼ ay ta swenta yilel te sukursal yuʼun Australasia.

Ma schʼuun koʼtan te la kal te jaʼ ijkatsil te scholel skʼop Dios, melel ta ora ini ya jmulan spasel, kʼotix ta koʼtan teme ya jkʼantik te ay stseʼelil koʼtantik, ya skʼan ya x-abatinotik ta stojol te Jehová sok spisil koʼtantik chikan biluk wokolil ya xkʼax ta jtojoltik. Kʼax tseʼel koʼtan sok te Alex te ayix 18 jaʼbil te yakotik ta abatinel ta stojol te Jehová. Jich ya kil te ay rason yuʼun te David kʼalal jich la yalbey te Jehová: «Tseʼeluc me yoʼtanic spisil machʼatic ya smucʼulinat yoʼtanic; spisiluc ora acʼa cʼayojinuc soc yutsil yoʼtanic, [...] tseʼel yoʼtanic ta acuenta te machʼatic cʼux ta yoʼtanic te abihile» (Sal. 5:11).