TE TULAN mel-oʼtan jich kʼoem bin-utʼil jun ijkatsil te kʼax al te ya stenotik ya kaʼiytike (Prov. 12:25). ¿Aybal kʼax tenel awaʼiyoj aba te ma xjuʼix awuʼune? Ma atukeluk te jich ya awaʼiy abae. Ayniwan machʼa yakotik ta skanantayel ta skaj te ay ta chamele, ayniwan machʼa lajem kuʼuntik, ayniwan jwokoltik ta skaj te kʼaxem tulan yikʼal jaʼal o yantikxan, o ay bintik yak ta kʼaxel ta jkuxlejaltik te jich ya kaʼiytik te ma xjuʼix kuʼuntike. ¿Bin ya skoltayotik yuʼun ya jlamantestik te koʼtantik te kʼalal ayotik ta tulan mel-oʼtane? a

Te ejemplo yuʼun te ajwalil David jaʼme ya skoltayotik yuʼun ya jlamantestik te koʼtantike. Bayal wokolil kʼax ta stojol, sok ay baeltik kʼan lajuk (1 Sam. 17:34, 35; 18:10, 11). ¿Bin-utʼil la slamantes yoʼtan te Davide? ¿Bin-utʼil ya xjuʼ ya jkʼayintik te ejemplo yuʼune?

Te David bayal wokolil tal ta stojol. Kiltik bin kʼot ta pasel kʼalal yak ta anel ta stojol te ajwalil Saúl ta skaj te ya skʼan ya xmilot yuʼune. Kʼalal sujtik tal ta yakʼel guerra te David sok te swiniktake, la yilik te bajt ta elkʼanbeyel te sbilukik, la yichʼ chikʼel te snaik sok la yichʼ tsakel bael te sfamiliaike. ¿Bin yaʼiyel la yaʼiy sba te Davide? Te Biblia jich ya yal: «Te David soc te winiquetic sjoquinejic hahchic ta tulan oqʼuel ha to cʼalal laj yipic yuʼun oqʼuel». Jaʼnix jich te winiketik te jun yoʼtanik ta stojole, la yalik te ya schʼojik ta ton te Davide (1 Sam. 30:1-6). Ta jun-nax kʼajkʼal la sta oxchajp swokol te Davide, ¿bintik-a? Jaʼ te ya xjuʼ ya sta swokol te sfamiliae, ya skʼan xmilot yuʼun te swiniktake sok yak ta nutsel yuʼun te ajwalil Saule. Bayal bin la smel yoʼtan yuʼun te Davide.

¿Bin la spas te Davide? Oranax la skʼanbey koltayel te Jehová yuʼun ya sta yip yoʼtan. ¿Bin-utʼil la spas? Te David kʼayem–a te ya skʼopon te Jehová yuʼun ya skʼanbey koltayel sok te ya snopilan ta yoʼtan te bin spasoj ta stojole (1 Sam. 17:37; Sal. 18:2, 6). Jaʼnix jich te David snaʼoj-a te ya xtuun yuʼun te tojobtesel yuʼun Jehová, jich yuʼun la sjojkʼoybey te bin ya xjuʼ ya spase. Kʼalal sutbotix skʼop yuʼun-a te Jehovae, ay bin la spas ta oranax. Jich yuʼun te Jehová la yakʼbey bendición te David sok te swiniktake, jich juʼ yuʼunik spojel tal sujtel te sfamiliaik sok te sbilukike (1 Sam. 30:7-9, 18, 19). ¿Labal awil te bin oxchajp la spas te Davide? La skʼopon te Jehová yuʼun ya skʼanbey koltayel, la snopilan ta yoʼtan te bin-utʼil koltaybil yuʼun-a te Diose sok jaʼ la spas te bin albot yuʼun te Jehovae. Kiltik oxchajp te bin-utʼil ya xjuʼ ya jkʼayintik te bin la spas te Davide.

1. Jkʼopontik Dios. Te kʼalal bayal ya jmel koʼtantik, ya xjuʼ ya jkʼopontik te Jehová yuʼun ya skoltayotik ta snaʼel te bin ya xjuʼ jpastike. Teme jal ya jkʼopontik sok ya kalbeytik spisil te bin ya jmel koʼtantik yuʼune, yame jtatik slamalil koʼtantik. Teme ma xjuʼ kuʼuntik te jal ya jkʼopontike, ya xjuʼ jtsʼin-nax ya jkʼopontik o ta koʼtantiknax ya jkʼopontik. Te kʼalal jich ya jpastike, ya kakʼtik ta ilel te ay smukʼul koʼtantik ta stojol te Jehová jich te bin-utʼil la spas te Davide te jich la yal: «Te Jehová ha mucʼul ton cuʼun soc ahnibal cuʼun, ha jʼacʼaw ta libre cuʼun; ha Dios cuʼun, ha toyol chʼentiquil cuʼun te banti ya jnacʼ jba; ha jmahquil soc yip te colel cuʼun, ha toyol ahnibal cuʼun» (Sal. 18:2). ¿Yuʼun-nixbal ya skoltayotik-a te skʼoponel Diose? Jtul precursora te Kahlia sbiile, jich ya yal: «Te kʼalal ya xlaj koʼtan ta skʼoponel te Diose, jich ya jta slamalil koʼtan sok jaʼ ya skoltayon yuʼun pajaluk  te snopojibal kuʼun sok te Jehovae, soknix te yakuk smukʼulin koʼtan ta leke». Te oración jaʼ jun tʼujbil majtanil te yakʼojbotik te Jehová, melel ya skoltayotik yuʼun ya slamantesbotik te koʼtantik te kʼalal ayotik ta mel-oʼtane.

2. Jnopilan ta koʼtantik. Te kʼalal ya ajultes ta awoʼtan te bin kʼaxem ta akuxlejale, ¿yabal xjul ta awoʼtan te ay bintik kujchem awuʼun ta swenta te jaʼ la skoltayat te Jehová? Kʼalal ya jnoptik bin-utʼil la skoltay te Jehová te j-abatetik yuʼun ta namey kʼinal sok te bin-utʼil skoltayojotike, ya xchʼixan te smukʼul koʼtantik ta stojol sok ya jtatikxan slamalil koʼtantik (Sal. 18:17-19). Jtul anciano te Joshua sbiil jich la yal: «Jpasoj jun lista banti jtsʼibayoj te oración te sutojbon te Jehovae. Jaʼ ya sjultesbon ta koʼtan te jaʼnix la yakʼbon-a te bin la kalbey ta jamal te ya xtuun kuʼune». Jaʼ-abi, ya yakʼ kiltik te kʼalal ya jultes ta koʼtantik spisil te bin spasoj ta jtojoltik te Jehovae, ya yakʼxan kiptik swenta ya jtsaltikxan te tulan mel-oʼtane.

3. Ayuk bin ya jpastik. Te kʼalal ay bin ya jkʼan jtatik nopel spasele, akʼa kiltik te bin ya yal te Bibliae, melel tey ya jtatik–a te lekil tojobtesele (Sal. 19:7, 11). Bayal machʼatik staojik ta ilel te kʼalal ya yilbeyikxan ta lek skʼoplal te jun versiculoe, ya xkʼotxan ta yoʼtanik te bin-utʼil ya xjuʼ ya spas ta skuxlejalik. Jtul anciano te Jarrod sbiil jich la yal: «Te kʼalal ya kilbeyxan ta lek skʼoplal te jun versiculoe, ya xkʼotxan ta koʼtan te bin ya skʼan ya yale. Jaʼ jich ya xkʼotxan ta koʼtan ta lek te bin ya skʼan ya yalbon te Jehovae, sok ya jpas tulan te jaʼuk ya jpas te bin ya smulane». Kʼalal ya jletik te tojobtesel yuʼun te Jehová te ay ta Biblia sok te ya jchʼuuntik te mantaliletik yuʼune, jich chapalotik ta stsalel te tulan mel-oʼtane.

Te David snaʼoj ta lek te jaʼnax ya xjuʼ xkoltayot yuʼun te Jehová ta sitintayel te tulan mel-oʼtane. Bayal la yal wokol ta swenta te koltayel akʼbote, jaʼ yuʼun jich la yal: «Ta scuenta te Dios cuʼun ya caʼbe guerra pueblohetic te ay stsʼahcule». Sok jich la yalxan: «Ha te Dios te ya yaʼbon quip» (Sal. 18:29, 32). Ayniwan jich ya kiltik bitʼil mukʼul tsʼajkʼ te problemaetik kuʼuntik te ma xjuʼ kuʼuntik stsalele, pero yame xjuʼ kuʼuntik stsalel melel jaʼ ya skoltayotik te Jehová. Teme jaʼ ya jkʼopontik te Jehová ta skʼanbeyel koltayel, ya jnopilan ta koʼtantik te bintik spasoj ta jtojoltik sok ya jpastik te bin ya skʼane, seguro ayotik te jaʼ ya yakʼbotik kiptik sok ya sjam te snopojibal kuʼuntik yuʼun ya skoltayotik ta stsalel te tulan mel-oʼtane.