Te congregación jichme ya yil te la slajinbey skʼoplal te snujpunel te kʼalal chaʼnujpun, sok jaʼ yinamix te machʼa nujpun soke. Swenta ya xkʼot ta koʼtantik bin yuʼun te jich ya kaltike, kiltik bin la yal te Jesús ta swenta te ay machʼa ya slajinbey sjunal te snujpunel sok te ya xchaʼnujpun.

Ta Mateo 19:9, te Jesús la yal te jun-nax swentail te bin yuʼun ya xjuʼ ta lajinbeyel sjunal te nujpunele. Jich la yal: «Spisil machʼa ya yihquitay hilel yihnam, teme ma ta scuentahuc yajmul, soc teme ya xnuhpun soc yan ants, yac me ta antsiwej». Te bin la yal te Jesús ay cheb bin ya yakʼ ta nopel. 1) Te Biblia ya yal te jaʼnax ya xjuʼ ta lajinbeyel sjunal te nujpunel teme ay machʼa yal ta mulwej. 2) Te winik te spasemal yoʼtan ya slajinbey sjunal te snujpunel sok ya xchaʼnujpun, yakme ta antsiwej. a

Ta swenta te bin la yal te Jesús teme jtul winik yal ta antsiwej sok ya slajinbey sjunal te snujpunel, ¿yabal skʼan ya yal te libre ya xjil yuʼun ya xchaʼnujpun? Maʼuk. Te kʼalal ay machʼa ya yaʼiy antsiwej o antsinel, te sjoy jaʼ ya sta ta nopel teme ya spasbey perdón o maʼuk. Teme maba la spas perdón sok teme la slajinbey sjunal te snujpunel, libre ya xjilik yuʼun ya xchaʼnujpunik, jaʼto te kʼalal chajpajemix-a te sjunal yuʼunike.

Pero, te ants maniwan skʼan ya slajinbey skʼoplal te nujpunel yuʼune, jaʼ yuʼun ya spasbey perdón te smamalal. Pero, ¿jaxan teme te mamalalil ya spʼaj te perdón te akʼbot yuʼun te yinam sok ya sle bin-utʼil ya slajinbey sjunal te snujpunelike? Te winik ma libre ay yuʼun ya xchaʼnujpun, melel te inamil yakʼoj ta yoʼtan te ya spasbey perdón te smamalal. Pero teme maba ya schʼuun te bin ya yal te Biblia sok ya xchaʼnujpun, yak ta antsiwej yan buelta. Te ancianoetik ta congregación ya schaʼpasikxan yan comité judicial yuʼun ya yilbeyik skʼoplal te mulil-abi (1 Cor. 5:1, 2; 6:9, 10).

Teme ay jtul winik ya xchaʼnujpun manchukme maba libre ay yuʼun ya spas, ¿bin-utʼil ya skʼan ya yil te congregación te sbabial snujpunel sok te schebal snujpunel? ¿Aytobal skʼoplal ta sit Dios te sbabial nujpunel yuʼune? ¿Yatobal xjuʼ ya sta ta nopel te inamil teme ya spasbey perdón o maʼuk? ¿Yakikbal ta mulwej te yachʼil nujpunele?

Te congregación jich ya yil-a te yakik ta mulwej te yachʼil nujpunel, melel kuxulto te sbabial yinam, maba nujpunem sok maba yalem ta mulwej. Pero te Jesús maʼyuk bin la yal ta stojol te inamil o te mamalalil te maba yalem ta mulil. Te bin la yal te Jesús jaʼ teme ay jtul winik te ya slajinbey sjunal te snujpunel yuʼun-nax jich ya skʼan yoʼtan sok ya xnujpun sok yan ants, yak ta antsiwej-abi. Te kʼalal la slajinbey sjunal te snujpunel sok  chaʼnujpun, laj skʼoplal te sbabial nujpunel yuʼune.

Kʼalal ay machʼa ya slajinbey sjunal te snujpunel sok ya xchaʼnujpun, te inamil o te mamalalil te maba yalem ta mulil ma xjuʼix ya sta ta nopel teme ya spasbey perdón o maʼuk. Jaʼ yuʼun te bin yilel ya skʼan ya yil te congregación te yachʼil nujpunele mame jaʼuk ta skaj te kuxulto te sbabial yinam, teme ma nujpunem o teme maba yalem ta mulwej. b

Ta ejemplo te la kalbeytik skʼoplal ta sjajchibal te mamalalil la yaʼiy antsiwej, jich laj skʼoplal te nujpunel yuʼune. ¿Jaxan teme ya slajinbey sjunal te snujpunel sok ya xchaʼnujpun manchukme maba la yaʼiy antsiwej? ¿Jaxan teme slajinojbeyix sjunal te snujpunel te kʼalal la yaʼiy antsiwej sok chaʼnujpun manchukme te sbabial yinam la yal te ya spasbey perdone? Te kʼalal la slajinbey sjunal te snujpunel sok chaʼnujpun —yaknanix ta antsiwej-a— jich la slajinbey skʼoplal te sbabial snujpunel. Te machʼa nujpun soke jaʼ mero yinamix ya xkʼot. Te revista La Atalaya 15 yuʼun febrero 1980, página 30, ya yal te machʼa ya xchaʼnujpun «ma xjuʼ te jichnax ya slajinbey skʼoplal te yachʼil snujpunel sok te ya xchaʼsujt sok te machʼa la yinamin ta nailale; melel te sbabial snujpunel laj skʼoplal te kʼalal la slajinbey sjunal, kʼalal la yaʼiy antsiwej sok te chaʼnujpune».

Te bin la yichʼix cholbeyel skʼoplal ya yakʼ ta ilel te yuʼun-nix chʼultesbil-a te nujpunel sok te yuʼun-nix tulan mulil-a te antsiwej o antsinel. Teme jtul winik spasemal yoʼtan ya slajinbey sjunal te snujpunel sok ya xchaʼnujpun, te ancianoetik ya spasik jun comité judicial ta skaj te la yaʼiyix antsiwej. (Teme hermana te machʼa nujpun soke, ya skʼan ya yichʼ pasel yan comité judicial, melel la yakʼ sba ta antsinel). Manchukme nujpunikix sok maʼyukikix ta mulwej, ya xkʼax bayal jaʼbil yuʼun ya x-akʼbot mukʼ yaʼtel ta congregación te winike. Jaʼto te kʼalal maʼyukix bin ya yalik-a te ants winiketik ta swenta te bin la spase. Jaʼnix jich ya skʼan ya yichʼ ichʼel ta wenta te bin yaʼiyel ya yaʼiy sba te sbabial yinam sok te snichʼnab te la yijkitay jilele (Mal. 2:14-16).

Te j-abatotik yuʼun Dios ya skʼan ya jtʼunbeytik stalel te Jehová te chʼultesbil ya yil te nujpunele, melel bayal wokolil ya staik te machʼatik ya slajinbeyik sjunal te snujpunelik sok te ya xchaʼnujpunike (Ecl. 5:4, 5; Heb. 13:4).