1. ¿Bin-utʼil chajpanbilik-a te j-abatetik yuʼun Jehová ta sbabial siglo?

 KʼALAL te Jehová ay bin ya yakʼbey spas te j-abatetik yuʼun, ya smaliy te chajpanbiluk ta lek te bitʼil ya yichʼ pasele (1 Cor. 14:33). Te Jehová ya skʼan te ya yichʼ cholel te lek yachʼil kʼop ta swolol Balumilal (Mat. 24:14). Jaʼ yakʼojbey yaʼtel te Jesús ta swentainel te aʼtelil-abi. Sok te Jesús ya yil te lekuk chajpanbile. Ta sbabial siglo, ta Jerusalén ay jtsob jpuk-kʼopetik sok ancianoetik te ay bin ya staik ta nopel spasel sok ya yakʼik tojobtesel ta stojol te congregacionetik (Hech. 15:2; 16:4). Ta jujun congregación ya yichʼ leel machʼa ya yakʼbeyik yaʼtel ta ancianoil yuʼun ya stojobtes te hermanoetik (Hech. 14:23). Te bitʼil la schʼuunik te bin la yichʼik albeyel te hermanoetike, «la stsakxan yip te schʼuunel yoʼtanik te congregacionetike» (Hech. 16:5).

2. Jaʼto talel ta 1919, ¿bin-utʼil te Jehová smakʼlinoj sok stojobtesoj te lum yuʼune?

² Ta jkʼajkʼaleltik, te Jehová maba yijkitayoj schajpanel te lum yuʼune. Ta 1919, te Jesús jajch stuuntes jtsob winiketik te chʼultesbilik yuʼun ya schajpanik te scholel skʼop Dios sok yuʼun ya smakʼlinik te jnopojeletik yuʼune (Luc. 12:42). a Te Jehová yak ta yakʼbeyel bendición te aʼtelil ya spasik te winiketik-abi (Is. 60:22; 65:​13, 14).

3, 4. 1) Chola kaʼiytik sok jun ejemplo te bin lekilal ya jtatik ta swenta te lek chajpanbilotike. 2) ¿Bin ya kilbeytik skʼoplal ta artículo ini?

³ Te manchuk chajpanbilotike, ma xjuʼ ya jcholtik skʼop Dios te jichuke (Mat. 28:​19, 20). Te manchuk chajpanbiluk  te jterritoriotik te banti ya jcholtik te skʼop Dios, bayuknax ya jcholtik skʼop Dios te jichuke. Maniwan ya jeltik te lugar te banti ya kaltik te lek yachʼil kʼop o ayniwan te banti jkʼaxel ma jcholtike. ¿Aybal yan bin lekilal ya jtatik te bitʼil lek chajpanbilotike?

⁴ Ta kʼajkʼal ini, te Jesús jichnix ya schajpan te lum yuʼun Dios jich te bin-utʼil la schajpan te jnopojeletik yuʼun kʼalal xtaluk ta Balumilal. Ta artículo ini yame kilbeytik skʼoplal te ejemplo la yakʼ te Jesús sok ya kiltik bin-utʼil te organización jich ya skʼayin-euk. Jaʼnix jich ya kilbeytik skʼoplal te bin ya xjuʼ ya jpastik yuʼun ya kakʼtik ta ilel te ya smukʼulin koʼtantik te organización yuʼun te Jehová.

TE ORGANIZACIÓN KUʼUNTIK YA SKʼAYIN TE EJEMPLO YUʼUN TE JESÚS

5. ¿Bin-utʼil ya skʼayin te ejemplo yuʼun te Jesús te organización yuʼun te Jehová? (Juan 8:28).

⁵ Te Jesús jaʼ akʼbot snop yuʼun te sTat te bin ya skʼan ya spas sok te bin ya skʼan ya yal. Jaʼnix jich, te organización yuʼun te Jehová jaʼ ya yakʼ ta nopel te bin ya yal te skʼop Diose (kʼopona Juan 8:28; 2 Tim. 3:​16, 17). Jaʼnix jich, te organización yuʼun te Jehová ya sjultes ta koʼtantik te yakuk jkʼopontik te Biblia sok te yakuk jpas ta jkuxlejaltik te bin ya jnoptik tey-ae. ¿Bin lekilal ya jtatik kʼalal ya jchʼuuntik spasel te consejo-abi?

6. ¿Bin lekilalya jtatik kʼalal ya jnoptik te Biblia?

⁶ Snopel te Biblia sok te publicacionetik kuʼuntik bayal ya skoltayotik. Ya skoltayotik ta yilel te lokʼem ta Biblia te tojobteseletik ya yakʼbotik te organización. Kʼalal ya kiltik te lokʼem ta Biblia te tojobteseletik-abi, ya stsakxan yip te smukʼul koʼtantik ta stojol te organización yuʼun te Jehová (Rom. 12:2).

7. ¿Bin la schol ta alel te Jesús, sok bin-utʼil ya skʼayinbey stalel te organización yuʼun Jehová?

⁷ Te Jesús la schol «te lek yachʼil kʼop yuʼun te Wentainel yuʼun te Diose» (Luc. 4:​43, 44). Jaʼnix jich, la stikun te jnopojeletik yuʼun te jichuk akʼa spasike (Luc. 9:​1, 2; 10:​8, 9). Ta jkʼajkʼaleltik, spisil te machʼatik ayik ta organización yuʼun te Jehová ya scholik te lek yachʼil kʼop yuʼun te Wentainel yuʼun te Jehová chikan banti nainemik sok bin aʼtelil ya spasik.

8. ¿Bin mukʼul majtanil kichʼojtik?

⁸ Jaʼ kʼax mukʼul majtanil te ya xjuʼ ya jcholbeytik skʼop Dios spisil te ants winiketik, melel ma spisiluk te ants winiketik ya xjuʼ yuʼunik spasel. Kʼalal xtaluk ta Balumilal te Jesús, maba la yakʼ te ya x-albot skʼoplal yuʼun te pukujetike (Luc. 4:41). Ta jkʼajkʼaleltik, yuʼun ay machʼa ya xjuʼ ya xlokʼ ta scholel skʼop Dios sok te testigoetik yuʼun Jehová, nail ya skʼan te ay bintik ya spas ta skuxlejal. ¿Bin-utʼil ya xjuʼ ya kaltik wokol yuʼun te mukʼul majtanil-abi? Jaʼ te kʼalal ya jcholtik te skʼop te Dios te ban kʼalal ya xjuʼ kuʼuntik. Jich te bin-utʼil te Jesús, ya jtsʼuntik sok ya kakʼbeytik yaʼlel te smelelil kʼop ta yoʼtan te ants winiketik (Mat. 13:​3, 23; 1 Cor. 3:6).

9. ¿Bin spasoj te organización yuʼun te Jehová swenta ya yakʼ ta naʼel te sbiil te Diose?

⁹ Te Jesús la yakʼ ta naʼel bin sbiil te Diose. Ta jun buelta jich la yalbey te sTate: «La kakʼbeyix snaʼik te abiile» (Juan 17:26). Te organización yuʼun te Jehová ya skʼayinbey te ejemplo yuʼune kʼalal ya spasik tulan te bantito kʼalal ya xjuʼ yuʼunik yuʼun ya yakʼbeyik snaʼ te ants winiketik bin sbiil te Dios. Jun te bin ya yichʼ tuuntesel jaʼ te Skʼop Dios swenta Achʼ Balumilal te lokʼem ta spajkal o olilnax ta kʼaxem ta 270 kʼopiletik. Ta traducción yuʼun  te Biblia ini la yichʼ otsesel te sbiil te Dios te bantinix ya skʼan ya xchiknaj-ae. Ta apéndice A4 sok A5 te ay ta español ya scholbeyxan skʼoplal te bin-utʼil la yichʼ chaʼotsesel te sbiil te Dios te bantinix ya skʼan ya yichʼ akʼel-ae. Sok ta apéndice C, te ay ta Biblia de estudio ta español, ya yakʼ ta ilel bayal pruebaetik te bin yuʼun ya skʼan ya xchiknaj 237 buelta ta Escrituras Griegas Cristianas te sbiil te Diose.

10. ¿Bin kʼax ta stojol jtul ants ta Myanmar?

¹⁰ Jich bitʼil te Jesús, ya jkʼantik te bayal ants winiketik ya snaʼbeyik sbiil te Dios. Ta Myanmar, jtul Testigo la snojptes jtul ants te 67 yaʼbilal ta swenta te sbiil te Dios te jaʼ Jehová. Te ants bayal la smulan sok okʼ yuʼun, jich la yal: «Jaʼ sbabial buelta te ya kaʼiybey te sbiil te Dios. [ . . . ] Ay bin mukʼ skʼoplal la anojpteson». Te bin kʼax ta stojol te ants ini, ya yakʼ jnaʼtik te kʼalal ya jnopbeytik sbiil te Dios ya xjuʼ ya sjeltaybotik te jkuxlejaltik.

AKʼA SMUKʼULIN KOʼTANTIK TE ORGANIZACIÓN

11. ¿Bin-utʼil ya yakʼik ta ilel te ancianoetik te ya smukʼulin yoʼtanik te organización yuʼun Dios? (Jaʼnix jich ilawil te fotoetik).

¹¹ ¿Bin-utʼil ya yakʼik ta ilel te ancianoetik te ya smukʼulin yoʼtanik te organización yuʼun Dios? Jaʼ te yakuk skʼoponik ta lek te bin ya yichʼik albeyel sok te yakuk skʼotesik ta pasel. Te ancianoetik ya yichʼik nojptesel ta swenta te bin-utʼil ya yichʼ pasel te asignacionetik sok te oración ta tsoblejetik, jaʼnix jich te bin-utʼil ya xjuʼ ya skanantayik te tuminchijetik. Kʼalal te ancianoetik ya spasik te bin ya yichʼik albeyel yuʼun te organización, te hermanoetik jich ya yaʼiyik te kʼux aʼiybilik yuʼun te Jehová sok te kanantaybilik yuʼun.

12. 1) ¿Bin yuʼun ya skʼan ya jchʼuuntik te bin ya yalbotik te machʼa ya swolotik ta congregación? (Hebreos 13:​7, 17). 2) ¿Bin yuʼun jaʼ ya skʼan ya kiltik te bin lek ya spasik te machʼatik ya swolotike?

¹² Kʼalal ay bin ya yakʼ jpastik te ancianoetik, jaʼ lek te ya jchʼuuntik spasel sok spisil koʼtantik jich maba wokol ya yaʼiyik spasel-a te yaʼtelike. Te Biblia ya yalbotik te akʼa jchʼuuntik mantal sok pekʼel akʼa kakʼ jbatik ta stojol te machʼa ya swolotik ta congregación (kʼopona Hebreos 13:​7, 17). Aynix wokol ta pasel, melel maba tojik-euk te ancianoetik. Pero juluk ta koʼtantik, teme jaʼ ya xbajt ta koʼtantik te bin ma lek ya spasike, jaʼ yakotik ta spasel te bin ya skʼan te jkontratik. ¿Bin yuʼun te jich ya kaltik? Melel, teme ay bin ma lek ya jnoptik ta stojol te ancianoetik, ya xjuʼ te ma smukʼulinix koʼtantik te organización yuʼun Jehová. Jaʼ yuʼun, ¿bin ya skʼan ya jpastik yuʼun ya kiltik sok ya jpʼajtik te lotiletik ya yal te jkontratik?

MAME JCHʼAM KAʼIYTIK TE MACHʼA YA SCHEBAJTES KOʼTANTIK

13. ¿Bin ya yalik te jkontrataktik ta swenta te organización yuʼun te Dios?

¹³ Te jkontrataktik ya yalik te ma lek te bin ya spas te organización yuʼun te Dios. Te Biblia ya yal te Jehová ya skʼan te maʼyuk yabakul te j-abatetik yuʼun, te lekuk te bin ya spasik sok tulanuk te schʼuunel yoʼtanik. Jaʼnix jich ya yal te machʼa chopol te bin ya spas sok te ma sujtes yoʼtan, ya yichʼ lokʼesel ta congregación (1 Cor. 5:​11-13; 6:​9, 10). Te bitʼil ya jchʼuuntik spasel te mantalil ini, te jkontrataktik ya yalik te chopolotik sok te ya jtoy jbatik.

14. ¿Machʼanix-a te ya spuk ta alel lotil ta swenta te organización yuʼun te Diose?

¹⁴ Juluk ta koʼtantik machʼanix-a te jkontratik. Te Satanás «jaʼ tatil yuʼun spasel lot», jaʼme te machʼa yak ta spukel lotil ta  swenta te organización yuʼun Dios (Juan 8:44; Gén. 3:​1-5). Ma chamuk koʼtantik yuʼun te ya stuuntes chaʼoxtul ants winiketik yuʼun ya spuk-a te lote, melel jich la spas ta sbabial siglo.

15. ¿Bin la spasik ta stojol te Jesús sok te jnopojeletik yuʼun te jwolwanejetik yuʼun te religione?

¹⁵ Manchukme te Jesús te sNichʼan te Dios, tojil winik sok ya spas milagroetik, te Pukuj la stuuntes chaʼoxtul ants winiketik yuʼun ya yalik lot ta stojol. Jich bitʼil te jwolwanejetik yuʼun te religión la yalbeyik te ants winiketik te Jesús «ya slokʼes pukujetik ta swenta yuʼel te jolal yuʼun te pukujetike» (Mar. 3:22). Patil, kʼalal yak ta ichʼel ta kʼop-a te Jesús, te jwolwanej yuʼun te religionetik la yalik te yak ta bolkʼoptaywanej te Jesús sok la stijbey yoʼtan te ants winiketik te yakuk skʼanik te ya yichʼ milel (Mat. 27:20). Patil, kʼalal te jnopojeletik yuʼun te Cristo jajch scholik skʼop Dios, te skontratakik «la stijbeyik yoʼtan te ants winiketik yuʼun ya skontrainik» yuʼun jich ya yichʼik nutsel-a (Hech. 14:​2, 19). Te La Atalaya 1 yuʼun diciembre 1998 la scholbey skʼoplal te bin ya yal Hechos 14:​2, te banti la yal te jkontrainwanej judioetik ma jaʼuknax la spʼajik te bin la yichʼ alele, jaʼnix jich la stijbey yoʼtan te ants winiketik te yakuk yalik bolkʼop ta stojol te jchʼuunjeletik.

16. ¿Bin ya skʼan ya jpastik yuʼun maba ya jchʼuuntik te lotiletik?

¹⁶ Te Satanás maba skomoj sba ta spasel lot, yakto «ta sloʼlayel spisil te ants winiketik ta balumilal» (Apoc. 12:9). Jaʼ yuʼun, te kʼalal ya kaʼiytik stojol te ya yichʼ alel lotil ta stojol te organización yuʼun te Dios o ta stojol te hermanoetik te ya swolotik, juluk ta koʼtantik te jich la spasik te skontratak  te Dios ta stojol te Jesús sok te jnopojeletik ta sbabial siglo. Jich bitʼil ya yal te Biblia, te ants winiketik maba skomoj sbaik ta skontrainel te testigoetik yuʼun Jehová sok ta yalel lotiletik ta stojolik (Mat. 5:​11, 12). Te jkontrataktik ma xjuʼ te ya sloʼlayotik, melel jnaʼojtik te banti talem te lotiletik sok ya jkanantay jbatik ta ora. ¿Bin ya jpastik yuʼun ya jkanantay jbatik?

17. ¿Bin ya skʼan ya jpastik teme ya yalik lotil kʼopetik ta jtojoltik? (2 Timoteo 1:13; jaʼnix jich ilawil te recuadro « Te bin ya skʼan ya apas teme ya awichʼ albeyel lotil kʼop»).

¹⁷ Jpʼajtik te lotil. Te jpuk-kʼop Pablo jamal la yal te bin ya skʼan ya jpastik teme ya yichʼ alel lotil ta jtojoltik. Ta 1 Timoteo 1:​3, 4 jich la yal: «Manchuk jaʼ ya xbajt ta yoʼtanik yaʼiyel stojol lotil kʼopetik». Sok jich la yalbey te Timoteo: «Pʼaja te lotil aʼiyejetik te ma xyakʼ ta ichʼel ta mukʼ te Diose» (1 Tim. 4:7). Ya kaltik jun ejemplo: teme ay jtul alal te ay bin ya sta ta piso, yaniwan stsak sok ya yotses ta ye, pero te machʼa mukʼix o ayix spʼijil maniwan jichuk ya spas, melel ya snaʼ te ya sta swokol yuʼun. Jaʼ yuʼun ya jpʼajtik te lotiletik sok jaʼnax ya jchʼam kaʼiytik «te lekil kʼopetik» yuʼun te bin smelelil (kʼopona 2 Timoteo 1:13).

18. ¿Bin-utʼil ya kakʼtik ta ilel te ay smukʼul koʼtantik ta stojol te organización yuʼun te Jehová?

¹⁸ Ta artículo ini, la kiltikix oxchajp bin-utʼil te organización yuʼun te Dios ya skʼayinbey stalel te Jesús, pero ma jaʼuknax-abi. Kʼalal ya anopxan bael te Biblia, bayalniwan ya ataxan. Mame xa awijkitay skoltayel te hermanoetik yuʼun ya smukʼulin yoʼtanik te organización. Junukme awoʼtan ya x-abatinat ta stojol te Jehová, mame xa awakʼ te ay bin ya snamajtesat ta stojol te organización te jaʼ ya stuuntes te Jehová ta spasel te skʼanojel yoʼtan (Sal. 37:28). Ya yakʼ stseʼelil koʼtantik te ya x-abatinotik ta stojol Jehová ta jun organización te banti ay kʼuxul oʼtanil sok jun oʼtanil. ¡Mukʼuk skʼoplal ta koʼtantik te majtanil ini!