1. ¿Bin yaʼiyel ya yaʼiy sbaik chaʼoxtul hermanoetik kʼalal ya xlokʼik ta scholel skʼop Dios? (Jaʼnix jich ilawil te foto).

 TE J-ABATETIK yuʼun te Jehová ya jcholtik te skʼop Dios, melel kʼux ta koʼtantik te jTatik te ay ta chʼulchan sok ya jkʼantik te yakuk xnaʼbot sba yuʼun te ants winiketik. Bayal hermanoetik ya smulanik te scholel skʼop Dios, pero ay yantik te wokol ya yaʼiyik smulanel. ¿Bin yuʼun te jich ya yaʼiy sbaike? Melel ay bayal hermanoetik te wokol ya yaʼiyik te ya xkʼopojik, te maʼyuk smukʼul yoʼtan ta stojolik, te ma lek ya yaʼiy sbaik yuʼun te ya xbajt yulaʼtayik te machʼatik ma ikʼbilik yuʼun, te ya xiwik te ya yichʼik pʼajel sok ay machʼatik te yichʼojik nojptesel te ma skʼan ya schʼik sbaik ta kʼop. Spisil te hermanoetik ini kʼux ta yoʼtanik te Jehová, pero wokol ya yaʼiyik te ya scholbeyik te lek yachʼil kʼop te machʼatik ma snaʼbeyik sbae. Pero ya spasik, melel kʼoem ta yoʼtanik te mukʼ skʼoplal te jich ya spasike. ¡Kʼax tseʼel yoʼtan te Jehová ta stojolik!

2. ¿Bin yuʼun ma skʼan ya xchebaj awoʼtan teme wokol ya awaʼiy scholel te skʼop Dios?

² ¿Wokolbal ya awaʼiy smulanel te scholel skʼop Dios? Teme ay jich ya xkʼax ta atojole, mame xchebaj awoʼtan. Melel teme ay jich ya awaʼiy abae yuʼun ay spekʼelil awoʼtan, maniwan ya akʼan te mukʼ akʼoplal ya awichʼ ilel o te ya achʼik aba ta kʼop. Jaʼnix jich, maʼyuk machʼa ya smulan te ya yichʼ pʼajel kʼaxtoxan-a te jaʼnax ya akʼan ya xkoltaywanat. Te aTat te ay ta chʼulchan ya xkʼot ta yoʼtan ta lek te wokol ya awile sok ya skʼan ya skoltayat (Is. 41:13). Ta artículo ini ya kilbeytik skʼoplal joʼchajp te bin-utʼil ya xjuʼ ya skoltayat yuʼun  ma jichuk ya awaʼiy aba sok te yakuk amulan te scholel skʼop Dios.

TE YA YAKʼBAT YIP AWOʼTAN

3. ¿Banti la sta yip yoʼtan te Jeremías ta scholel skʼop Dios?

³ Te bayal jaʼbil kʼaxem tale, te skʼop Dios jaʼ yakʼojbey yip yoʼtan te j-abatetik yuʼun Dios kʼalal ay bin wokol ya skʼotesik ta pasel. Jich te bitʼil kʼax ta stojol te j-alwanej Jeremías. Kʼalal tikunot bael yuʼun te Jehová ta scholel skʼop Dios bayal xiw sok jich la yal: «¡Ay, Cajwal Jehová! Ma jnaʼ cʼop, como queremon to» (Jer. 1:6). ¿Bin-utʼil la stsal te xiwele? Akʼbot yip yoʼtan yuʼun te skʼop Dios. Jich la yal: «Pero hich ya xcʼoht te scʼop te bin utʼil cʼahcʼ te ya schicʼbon jbaquel. La jcʼan te ya jcom jba, pero ma ba huʼ cuʼun» (Jer. 20:​8, 9). Wokol scholel skʼop Dios te banti tikunot bael te Jeremías, pero te bin ya yalbey skʼoplale jaʼ akʼbot yip yoʼtan yuʼun ya skʼotes ta pasel te yaʼtele.

4. ¿Bin ya xlokʼ kuʼuntik-a kʼalal ya jkʼopontik te sKʼop Dios sok te ya jnopilan ta koʼtantik? (Colosenses 1:​9, 10).

⁴ Te j-abatotik yuʼun te Dios jaʼnix jich ya yakʼ smukʼul koʼtantik te bin ya yal te skʼop Dios. Kʼalal te Pablo la stsʼibaybey bael te jchʼuunjeletik ta Colosas, la yaltiklanbey te bin ya snopik ta skʼop Dios ya xtijbot yoʼtanik yuʼun lekuk te skuxlejalik «ta swenta te Jehová» sok «ta spasel spisil lekil aʼtelil» (kʼopona Colosenses 1:​9, 10). Jun lekil aʼtelil te ya yichʼ pasel, jaʼ te scholel te lek yachʼil kʼop. Jich bitʼil la kiltikix, kʼalal ya jkʼopontik te sKʼop Dios sok te ya jnopilan ta koʼtantik ya stsakxan yip te schʼuunel koʼtantik ta stojol te Jehová sok ya xkʼot ta koʼtantik ta lek te kʼax mukʼ skʼoplal te yakuk jpuktik ta alel te skʼop Diose.

5. ¿Bin ya skoltayotik yuʼun ya xkʼot ta koʼtantik ta lek te bin ya yal te Biblia?

⁵ Yuʼun ya xkʼotxan ta awoʼtan ta lek te bin ya yal te skʼop Dios, ma skʼan te oranax ya jkʼopontik o te maba ya jnopilan ta koʼtantik. ¿Bin ya xjuʼ ya apas teme ay ya ata jun texto te ma xkʼot ta awoʼtane? Ma xa awijkitay skʼoponel, jaʼ lek te yakuk ya awil te BIBLIOTECA TA INTERNET yuʼun Watchtower o te Sleojibal temaetik yuʼun te testigoetik yuʼun Jehová. Teme ya alokʼes tiempo ta snopilanelxan ta lek, ya xmukʼubxan te smukʼul awoʼtan ta swenta te sKʼop Diose (1 Tes. 5:21). Teme jich ya apase, yame amulanxan yalbeyel te yantik te bin la anope.

 CHAJPANA ABA TA LEK TA SCHOLEL SKʼOP DIOS

6. ¿Bin yuʼun ya skʼan ya jchajpan jbatik ta lek ta scholel skʼop Dios?

⁶ Teme ya jchajpan jbatik ta lek te kʼalal ya xlokʼotik ta scholel skʼop Dios, maba ya xiwotik te kʼalal ya jkʼopontik te ants winiketik. Te Jesús la snojpteslan ta lek te jnopojeletik yuʼun kʼalal mato xbajtik ta scholel skʼop Dios-a (Luc. 10:​1-11). Te jnopojeletik tseʼel yoʼtan la yaʼiy sbaik, melel la spasik te bin nojptesotik yuʼun te Jesús (Luc. 10:17).

7. ¿Bin-utʼil ya xjuʼ ya jchajpan jbatik ta scholel skʼop Dios? (Jaʼnix jich ilawil te foto).

⁷ ¿Bin-utʼil ya xjuʼ ya jchajpan jbatik ta scholel skʼop Dios? Ya skʼan ya jnoptik ta lek te bin-utʼil ya xbajt kaltik te smelelil kʼope. Jaʼnix jich lek te yakuk jpasbey jbatik cheʼoxebuk jojkʼoyel te ya spasik te ants winiketik sok te bin sujtib ya kakʼbeytik. Jich te kʼalal ya xkʼopojotik sok te ants winiketik maba ya xiwotik, ya stseʼejinotik sok leknax ya xkʼopojotik.

8. ¿Bin-utʼil pajal sok te vasijaetik te pasbil ta ajchʼal te j-abatetik yuʼun te Diose?

⁸ Te jpuk-kʼop Pablo la stuuntes jun lokʼombakʼop te ya yakʼ ta ilel bin-a te ya jpastik ta scholel skʼop Dios. Jich la yal: «Kichʼojtik te kʼulejalil ini te ay ta vasijaetik te pasbilik ta ajchʼal» (2 Cor. 4:7). ¿Bin-a te kʼulejalil ini? Jaʼ te yalbeyel skʼoplal te Wentainel yuʼun Dios, te jaʼ jun aʼtelil te ya sta skuxlejal yuʼun te ants winiketik (2 Cor. 4:1). Pero ¿bin-a te vasijaetik te pasbil ta ajchʼal? Joʼotik te j-abatotik yuʼun te Dios te ya jpuktik ta alel te lek yachʼil kʼop. Ta skʼajkʼalel te Pablo, te jchonbajeletik ya yichʼik bael te bintik mukʼ skʼoplal ta vasijaetik te pasbilik ta ajchʼal jich bitʼil te weʼelil, te vino o te takʼin. Jaʼnix jich ta ora ini te Jehová yakʼoj jpastik jun mukʼul aʼtelil: jaʼ te spukel ta alel te lek yachʼil kʼop. Ta swentanax te koltayel yuʼune ya yakʼbotik yip koʼtantik yuʼun ya xjuʼ ya jkʼotestik ta pasel te bin aʼtelil yakʼojbotike.

KʼANBEYA YIP AWOʼTAN TE DIOSE

9. ¿Bin-utʼil ya xjuʼ ya jtsaltik te xiwel ta stojol te ants winiketik? (Jaʼnix jich ilawil te foto).

⁹ Ayniwan ya jxiʼtik te ya spʼajotik te ants winiketik. ¿Bin ya xjuʼ ya skoltayotik? Jnoptik ta swenta te oración te la spas te  jpuk-kʼopetik kʼalal albotik ta mantal te yakuk yijkitayik te scholel te skʼop Dios. Ma la yakʼik te jaʼ ya stsalotik yuʼun te xiwel, la skʼanbeyik koltayel te Jehová yuʼun manchuk ya xiwik ta yalbeyel te skʼope. Jakʼbotik ta ora te bin la skʼanike (Hech. 4:​18, 29, 31). Kʼalal ya stsalotik te xiwel ta swenta te ants winiketik, jkʼanbeytik koltayel te Jehová. Jkʼanbeytik te akʼa skoltayotik yuʼun ya jtsaltik te xiwel ta stojol te ants winiketik ta swenta te skʼuxul koʼtantik ta stojolik.

10. ¿Bin koltayel ay kuʼuntik yuʼun ya jkʼotestik ta pasel te kaʼteltik jich bitʼil testigootik yuʼun Jehová? (Isaías 43:​10-12).

¹⁰ Te Jehová yotsesojotik ta Testigo yuʼun (kʼopona Isaías 43:​10-12). Sok ya yalbotik ta jamal te ya skoltayotik yuʼun manchuk ya xiwotik. Ya kiltik chanchajp te bin ya skoltayotik yuʼun ya xjuʼ kuʼuntik spasel. Sbabial, te Jesús ya skoltayotik kʼalal ya jcholtik te lek yachʼil kʼope (Mat. 28:​18-20). Schebal, te Jehová yakʼoj te chʼul abatetik yuʼun ya skoltayotik (Apoc. 14:6). Yoxebal, te Jehová ya yakʼbotik te schʼul espíritu, te jaʼ jkoltaywanej kuʼuntik te ya sjultesbotik ta koʼtantik te bin jnopojtikixe (Juan 14:​25, 26). Sok schanebal, te Jehová yakʼojbotik hermanoetik sok hermanaetik te ya sjokinotik. Ta swentanax te koltayel yuʼun te Jehová sok te hermanoetik, ya xjuʼ kuʼuntik stsalel te xiwele.

JELA TE BIN-ORA YA ACHOL SKʼOP DIOS SOK LEKUK TE BIN YA ATA TA NOPEL

11. ¿Bin ya xjuʼ ya apas yuʼun ya acholbey yaʼiy skʼop Dios spisil te ants winiketik? (Jaʼnix jich ilawil te foto).

¹¹ ¿Yabal xchebaj awoʼtan kʼalal ma xa ata bayal ants winiketik ta snaik? Teme jiche, jojkʼoybey aba ini: «¿Banti ayik ta ora ini? ¿Yakikbal ta aʼtel o baemik ta manbajel?» (Hech. 16:13). Teme jiche, chola skʼop Dios ta calleetik. Jtul hermano te Joshua sbiil jich ya yal: «Te bin skoltayojon jaʼ te ya jchol skʼop Dios te kʼalal ya xkʼaxon ta mercadoetik, te banti ya yaʼiyik manbajel o te banti ya yichʼ kʼejel te carroetik». Te hermano sok te yinam te Bridget sbiil, staojik bayal ants winiketik ta snaik kʼalal ya xbajt yulaʼtayik ta mal kʼajkʼal o ta jujun domingo (Efes. 5:​15, 16).

12. ¿Bin-utʼil ya xjuʼ ya jnaʼtik te bin ya schʼuunik te ants winiketik sok te bin ya smulanik yaʼiyel?

 ¹² Teme ma smulanik te ants winiketik te bin ya kalbeytike, akʼa jojkʼoybeytik te bin ya schʼuunik sok te bin ya smel yoʼtanik yuʼune. Te Joshua sok te Bridget jaʼ ya stuuntesik te jojkʼoyel te ay ta yelaw te tratadoetik. Jich bitʼil te kʼalal ya spukik te tratado ¿Binwan ya awal yuʼun ta swenta te Bibliae?, jich ya yalik: «Ay ants winiketik ya schʼuunik te talem ta stojol Dios te Bibliae, sok ay yantik te maʼuke. ¿Bin ya anop te jaʼate?». Te kʼalal jich ya spasike, koltaybilik yuʼun ya sjach yaʼiyejik sok te ants winiketik.

13. ¿Bin-utʼil ya xjuʼ ya jta stseʼelil koʼtantik ta scholel skʼop Dios manchukme maʼyuk machʼa ya smulan te bin ya kaltike? (Proverbios 27:11).

¹³ Te kʼalal ya jcholtik te skʼop Dios ma jaʼuk mukʼ skʼoplal te bin ya xlokʼ kuʼuntik-ae. ¿Bin yuʼun? Melel te bin mukʼ skʼoplale jaʼ te yakuk jkʼotestik ta pasel te bin ya yalbotik te Jehová sok te sNichʼan te jaʼ te ya jpuktik ta alel te lek yachʼil kʼop (Hech. 10:42). Jaʼ yuʼun ma jmel koʼtantik yuʼun teme maʼyuk machʼa kʼopojotik sok o teme ay machʼa la spʼaj te bin la kaltike. Jaʼ ya skʼan ya yakʼbotik stseʼelil koʼtantik te la jkʼotestik ta pasel te bin ya yalbotik te jTatik te ay ta chʼulchan (kʼopona Proverbios 27:11).

14. ¿Bin yaʼiyel ya kaʼiy jbatik kʼalal jtul publicador ya sta te machʼa ya smulan yaʼiyel te skʼop Dios, sok bin yuʼun?

¹⁴ Jaʼnix jich ya xjuʼ ya jta stseʼelil koʼtantik kʼalal jtul publicador ay machʼa ya sta te ya smulan yaʼiyel te skʼop Diose. Te J-ilkʼinal ta toyol la spajbey skʼoplal te kaʼteltik jich bitʼil sleel jtul chʼin kerem te chʼayeme. Bayal te machʼatik ya sleike sok ya sleik ta bayal lugaretik. Kʼalal ya yichʼ tael te chʼin kereme, ma jaʼuknax ya sta stseʼelil yoʼtan te machʼa la stae; spisil ya sta stseʼelil yoʼtanik. Jaʼnix jich kʼoem te kʼalal ya jletik jnopojeletik, jaʼ jun aʼtelil te jpisiltik ya jpastik. Jpisiltik ya xjuʼ ya xkoltaywanotik ta scholel te skʼop Dios ta yanyantik lugaretik sok jpisiltik ya jta stseʼelil koʼtantik kʼalal ay machʼa ya xbajt ta sNail Tsoblejetik.

AKʼA TA ILEL TE SKʼUXUL AWOʼTAN

15. ¿Bin ya skoltayotik yuʼun ayuk sbujtsʼ koʼtantik? (Mateo 22:​37-39, jaʼnix jich ilawil te foto).

¹⁵ Te sbujtsʼ koʼtantik ta scholel skʼop te  Dios ya xmukʼubxan teme jaʼ ya xbajt ta koʼtantik te skʼuxul yoʼtan te Jehová sok teme kʼux ta koʼtantik te jpatxujktike (kʼopona Mateo 22:​37-39). Kʼax tseʼel yoʼtan te Jehová te kʼalal ya yil te ya jcholtik te skʼop Dios, sok tseʼel yoʼtan ya yaʼiy sba te ants winiketik te ya xjajch snopik te Bibliae. Sok mame xchʼay ta awoʼtan te yame sta skolelik te machʼatik ya yaʼiyik te skʼop Dios (Juan 6:40; 1 Tim. 4:16).

16. ¿Bin-utʼil ya xjuʼ ya jmulantik te scholel skʼop Dios, manchukme ma xjuʼ ya xlokʼotik ta jnatik? Ala junuk ejemplo.

¹⁶ Teme ma xjuʼ ya xlokʼat ta anae, jaʼuk ya xbajt ta awoʼtan te ban kʼalal ya xjuʼ awuʼun swenta ya awakʼbey yil te skʼuxul awoʼtan te Jehová sok ta stojol te apatxujke. Ta yorail te tulan chamel COVID-19, te Samuel sok te Dania maba juʼ lokʼ ta snaik. Ta yorail-abi la scholik skʼop Dios ta teléfono, la stsʼibayik cartaetik sok la yakʼik nojptesel ta Biblia ta Zoom. Jaʼnix jich, te Samuel la schol skʼop Dios ta clínica te banti ya yichʼ poxtayel ta skaj te cáncer. Jich ya yal: «Te wokoliletik ya slujbtesotik, ya yutsʼin jpensartik sok ya schebajtes koʼtantik ta swenta te skʼop Dios. Jaʼ yuʼun ya xtuun kuʼuntik te tseʼelil oʼtanil ya yakʼ te ya kichʼtik ta mukʼ te Jehová». Jaʼnix jich, te Dania yal sok maba juʼ sjajchel ta swayib oxeb u. Jaʼnix jich la stuuntes wakeb u silla de ruedas. Jich ya yal: «La jpas spisil te ban kʼalal ya xjuʼ kuʼun. La jcholbey skʼop Dios jtul enfermera te la yulaʼtayon sok ya jcholbey skʼop Dios te machʼatik ya xtal yakʼbonik jilel te jbiluk ta jna. Jaʼnix jich la jcholbey skʼop Dios jtul representante yuʼun te hospital». Melelnix-a te Samuel sok te Dania maʼyuk bin bayal ya xjuʼ ya spasik ta skaj te bitʼil ayike, pero tseʼel yoʼtanik, melel la spasik te ban kʼalal juʼ yuʼunike.

17. ¿Bin ya skʼan ya jpastik yuʼun ya jnaʼtik stuuntesel ta lek te bin la yal te artículo ini?

¹⁷ Te bintik la jnoptik ta artículo ini, lek ya xlokʼ kuʼuntik teme spisil ya jkʼotestik ta pasel te bin la jnoptike. Jich kʼoem te bin-utʼil te spoxil jun weʼelil. Te kʼalal lek ya yichʼ tuuntesele, bujtsʼan ya xlokʼ te weʼelile. Teme ya jpastik spisil te bintik la kiltikixe, leknax te bintik ya jnoptik sok ya jmulantikxan te scholel skʼop Dios.