1. ¿Bitʼil ya kichʼtik ta mukʼ te Jehová, sok bin ya skʼan ya jpastik?

 TA KʼAJKʼAL ini ta Balumilal ay jun nichimal kʼinal te bayal bin ya yichʼ pasel tey-a. Tey kuxinemik bayal millón ta tul ants winiketik te ya smulanik te smelelil lamalkʼinal sok yakʼoj ta yoʼtanik te maba ya yijkitayike. Jaʼnix jich ya skʼanik te yakuk xjokinotik yuʼun bayal ta tul ants winiketik. ¿Bin-a te yakotik ta yalbeyel skʼoplale? Jaʼ te bitʼil ya kichʼtik ta mukʼ te Jehová te jich kʼoem bin-utʼil jun nichimal kʼinal banti ya jmulantik yamigoinel te Jehová sok te ants winiketik te ya yichʼik ta mukʼ te Diose.

2. ¿Bin yuʼun chamnax koʼtantik yuʼun te bitʼil ya kichʼtik ta mukʼ te Diose?

² Manchukme chamnax koʼtantik yuʼun, te Jehová yakʼoj te jich ya kichʼtik ta mukʼ ta yolil te chopol balumilal ini (1 Juan 5:19; Apoc. 12:12). Te Jehová ya snaʼ te ya xjuʼ ya yutsʼinotik te balumilal yuʼun te Satanás. Te bitʼil kʼuxotik ta yoʼtan, yakʼojotik ta jun lugar te banti ya xjuʼ ya xchʼi te schʼuunel koʼtantike. Te Biblia ya yal te nichimal kʼinal-abi, «ha ahnibal» sok jich bitʼil «tsʼumbil nichimetic te aʼbibil yaʼlel» (Is. 4:6; 58:11). Ta swenta te bendición yuʼun te Jehová, te machʼatik nainemik ta nichimal kʼinal-abi tseʼel yoʼtanik sok jun yoʼtanik, manchukme ayotikix ta slajibal kʼajkʼal (Is. 54:14; 2 Tim. 3:1).

3. ¿Bin-ora kʼot ta pasel te kʼopetik te ya yal te capítulo 65 yuʼun Isaías?

³ Ta capítulo 65 yuʼun te Isaías, te Jehová la yal te bitʼil ya xkʼot te jkuxlejaltik ta swenta te bitʼil ya kichʼtik ta mukʼe. Te kʼopetik te la yal te j-alwanej kʼot ta pasel ta jaʼbil 537 te mato jaʼuk jkʼajkʼaleltik-a. Ta yorail-abi, te judioetik te la sujtes yoʼtanik lokʼik talel ta chukel ta Babilonia sok sujtik bael ta slumalik. Ta swenta te bendición yuʼun te Jehová sok te koltayel la yakʼe, la schaʼpasik te Jerusalén te jinem-ae sok la skʼatpʼunik ta jun tʼujbil lum. Jaʼnix jich la schaʼpasik te templo  yuʼun tey ya yichʼik ta mukʼ-a te Jehová te israeletik (Is. 51:11; Zac. 8:3).

4. ¿Bin-utʼil yak ta kʼoel ta pasel ta jkʼajkʼaleltik te kʼopetik te ya yal te capítulo 65 yuʼun Isaías?

⁴ Te schebal te bin-utʼil kʼot ta pasel te bin la yal te Isaías, jajch ta 1919, kʼalal la yichʼ lokʼesel ta Mukʼul Babilonia te j-abatetik yuʼun te Jehová. Teyto tal-abi, te bitʼil ya kichʼtik ta mukʼ te Dios pujkem bael ta swolol Balumilal. Sok stseʼelil yoʼtanik, te machʼatik ya yalbeyik skʼoplal te Wentainel la sjachik bayal congregacionetik. Bayal ants winiketik te bayal ya x-ilinik-a sok ma lek-a te bintik ya spasike, chʼiem te schʼuunel yoʼtanik sok slapojikix «te yachʼil talelil te jich pasbil te bin-utʼil ya skʼan yoʼtan te Diose» (Efes. 4:24). Melelnix-a, bayal te bendicionetik te la yalbey skʼoplal te Isaías ya xkʼot ta pasel ta achʼ balumilal. Pero, ta ora ini bayal bendicionetik yakotik ta smulanel. Kiltik bin lekilal ya jtatik yuʼun te ya kichʼtik ta mukʼ sok slamalil koʼtantik te Dios sok te bin yuʼun te ma skʼan ya kijkitaytike.

TE BENDICIONETIK YA YICHʼ TAEL

5. Jich bitʼil ya yal Isaías 65:​13, ¿bin bendicionetik ya jmulantik ta nichimal kʼinal?

⁵ Leknax ya kaʼiy jbatik. Cham-oʼtantik sba te bin-utʼil te Isaías la yal te maba pajaluk te kuxinel ta yutil sok ta spat te nichimal kʼinal te jaʼ te bin-utʼil ya kichʼtik ta mukʼ te Diose (kʼopona Isaías 65:13). Te Jehová ya yakʼbey te bin ya xtuun yuʼunik ta swenta te schʼuunel yoʼtanik te j-abatetik yuʼune. Ya yakʼbotik te schʼul espíritu, te sKʼop sok bayal weʼelil ta swenta te schʼuunel koʼtantik yuʼun jich ya xweʼotik, x-uchʼotik sok tseʼel koʼtantik (paja awil sok Apocalipsis 22:17). Yan stukel te machʼatik maba ayik ta nichimal kʼinal-abi ya xkʼaxik ta «wiʼnal», «taquintiʼil» sok «qʼuexlal». Maba makʼlinbilik ta swenta te schʼuunel yoʼtanike (Amós 8:11).

6. ¿Bintik weʼeliletik ya yalbey skʼoplal te Joel 2:​21-24, bin ya skʼan ya yal, sok bin-utʼil ya skoltayotik?

⁶ Ta jun albilkʼop te j-alwanej Joel la yal te Jehová ya yakʼbey te bin mero ya xtuun yuʼun te j-abatetik yuʼune, jich bitʼil te sit awal tsʼunubil, te vino sok te aceite yuʼun olivo (Joel 2:​21-24). Te bin la skʼan la yal te Jehová jaʼ te ya yakʼbey spisil te bin ya xtuun yuʼun te lum yuʼune, tey ochem skʼoplal-euk-a te ya smakʼlin ta swenta te schʼuunel yoʼtanik. ¿Bin-utʼil ya spas ta kʼajkʼal ini? Jaʼ te kʼalal ya yakʼbotik te Biblia, te publicacionetik kuʼuntik, te página kuʼuntik ta Internet, te tsoblejetik sok te mukʼul tsoblejetik. Jich ya xjuʼ jmakʼlin jbatik ta jujun kʼajkʼal sok leknax ya kaʼiy jbatik yuʼun.

7. ¿Bin yuʼun tseʼel koʼtan ya kaʼiy jbatik? (Isaías 65:14).

⁷ Tseʼel koʼtantik. Te j-abatetik yuʼun te Dios ya yalbeyik bayal wokol te Jehová, jaʼ yuʼun ya x-awunik sok stseʼelil yoʼtanik (kʼopona Isaías 65:14). ¿Bin yuʼun te kʼax tseʼel yoʼtanike? Melel ya staik ta sKʼop Dios te bintik smelelil sok te bin yaloj te Jehová te ya xbajt spase. Jaʼnix jich ay bin tʼujbil yakik ta smaliyel te ya yichʼ tael ta swenta te la yakʼ sba ta lajel te Jesús. ¡Kʼax tseʼel yoʼtan ya yaʼiy sbaik te kʼalal ya yalbeyik skʼoplal spisil ini sok te yermanotakike! (Sal. 34:8; 133:​1-3).

8. ¿Bin-a te cheb taleliletik te kʼax ya xchiknaj tey ta nichimal kʼinal yuʼun te Diose?

⁸ Cheb te bin kʼax ya xchiknaj ta nichimal kʼinal te jaʼ te bitʼil ya kichʼtik ta mukʼ te Diose jaʼ te jun-nax ayotik sok te kʼux ya kaʼiy jbatik. Te kʼuxul oʼtanil-abi «ya yakʼ te jun-nax ya xkʼootik» sok ya skoltayotik ta yilel te bin-utʼil ya xkʼot te nichimal kʼinal. Tey-a ya kiltik te kʼuxul oʼtanil sok te jun-nax ayotik maba jichuk te bin-utʼil ay te balumilal ini (Col. 3:14). Jtul hermana ya yal te bin yaʼiyel la yaʼiy sba te kʼalal la snaʼbey sba te testigoetik yuʼun  Jehová: «Ma jnaʼoj-a te bin-utʼil ta tael te tseʼelil oʼtanil, ni jaʼuk sok te jfamilia. Te sbabial buelta la kil te kʼuxul oʼtanil jaʼ sok te Testigoetik». Spisil te machʼa tseʼel yoʼtan ya skʼan ya xkuxin sok te leknax ya yaʼiy sbae ya skʼan ya x-och ta nichimal kʼinal-abi. Chikan te bin ya yal ta jtojoltik te balumilal ini, ta sit te Jehová sok te sfamilia leknax jkʼoplaltik (Is. 65:15).

9. ¿Bin ya xkʼot ta pasel ta swenta te bin ya yakʼ jwokoltik? (Isaías 65:​16, 17).

⁹ Jun koʼtantik sok maba ya jmel koʼtantik. Te machʼatik ma skʼan ya x-ochik ta nichimal kʼinal te Isaías 65:14 jich ya yal: «Te haʼexe ya xʼawonex yuʼun scʼuxul swocol te awoʼtanic soc ya xʼahcanajex yuʼun pichʼil-oʼtanil». ¿Bin ya xjuʼ ya kaltik ta swenta te j-abatetik yuʼun te Diose? ¿Bin ya xkʼot ta pasel ta swenta te bin ya yakʼ jwokoltike? Te Jehová jamal ya yal «te wocoletic te cʼaxemiquix ya xchʼay ta oʼtanil soc ma ba chicanix ta ilel» (kʼopona Isaías 65:​16, 17). Melel jaʼ ya yakʼ te ya xlaj ta jkʼaxel te wokoliletik sok te kʼunkʼun ya xchʼay bael ta jkʼaxel te bintik la yakʼ jwokoltike.

10. ¿Bin yuʼun ya xjuʼ ya kaltik te jaʼ jun mukʼul bendición te bitʼil ayotik sok te kermanotaktik? (Jaʼnix jich ilawil te foto).

¹⁰ Ta ora ini tseʼelnax koʼtantik te kʼalal ya xbootik ta sNail Tsoblejetik. Te kʼalal tey ayotik-a, maba ya jmel koʼtantik yuʼun te bin yak ta kʼaxel ta jtojoltik. ¿Bin ya xjuʼ ya jpastik yuʼun lamalnax kʼinal ya kaʼiytik ta nichimal kʼinal ini? Jaʼ te yakuk kakʼtik ta ilel te taleliletik yuʼun te sit te chʼul espíritu jich bitʼil te kʼuxul oʼtanil, tseʼel oʼtanil, lamalkʼinal, yutsil oʼtanil sok te manso-oʼtanil (Gál. 5:​22, 23). ¡Jaʼ jun mukʼul bendición te bitʼil ayotik ta organización yuʼun te Dios! Teme ma xkijkitaytik te nichimal kʼinal ini, ya xjuʼ ya kiltik bin-utʼil te Dios ya skʼotes ta pasel te «yachʼil chʼulchan soc yachʼil bahlumilal».

11. ¿Bin yaʼiyel ya skʼan ya kaʼiy jbatik te bitʼil ayotik ta nichimal kʼinal? (Isaías 65:​18, 19).

¹¹ Ya kaltik wokol sok tseʼel koʼtantik. Te Isaías ya scholbey skʼoplal te bin yuʼun ay stseʼelil koʼtantik te j-abatotik yuʼun te Diose. Te nichimal kʼinal te banti ayotik ta kuxinel jaʼ spasoj te Jehovae (kʼopona Isaías 65:​18, 19). Jaʼ yuʼun, te Jehová ya stuuntesotik yuʼun yakuk kalbeytik te ants winiketik yuʼun yakuk xlokʼik ta organización yuʼun te chopol balumilal ini te jich kʼoem te ayik ta jochol takin kʼinal ta swenta te schʼuunel yoʼtanik sok te yakuk x-ochik ta organización yuʼun te Jehová. ¡Kʼax tseʼel koʼtantik yuʼun te ayotik ta smelelil kʼope! Jaʼ yuʼun ya jkʼan ya kalbeytik te yantik te  bendicionetik ya yakʼbotik te Diose (Jer. 31:12).

12. ¿Bin yaʼiyel ya awaʼiy aba te kʼalal ya akʼopon te bin ya yal Isaías 65:​20-24, sok bin yuʼun?

¹² Te machʼatik kuxinemotik ta nichimal kʼinal ya kaltik wokol yuʼun sok tseʼelnax koʼtantik yuʼun te bin ya jmaliytik ta pajel chaʼbej. ¡Nopanax awaʼiy te bin ya xjuʼ ya awil sok te bin ya xjuʼ ya apas ta achʼ balumilal! Te Biblia jich ya yal: «Ma me ayuquix alal te jun cheb nax cʼahcʼal ya xcuxaj, soc ma me ayuquix mamal te ma ba ya stsʼacay yorahil». Sok ya yal te ants winiketik «ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit». Jaʼnix jich, «ma ba tojol nax ya xʼaʼtejic», melel ya x-akʼbotik bendición yuʼun te Jehová. Te Dios ya yal ta jamal te ay swentail ya xkʼot te skuxlejalik, leknax ya xkuxinik sok ya sta stseʼelil yoʼtanik. Melel te kʼalal «ma to xʼawonic a», te Dios snaʼojix-a te bin ya xtuun yuʼunik sok ya yakʼ «nojuc schʼuhtic spisil bintic cuxajtic» (Is. 65:​20-24; Sal. 145:16).

13. ¿Bin-utʼil ya yakʼ ta ilel te Isaías 65:25 ta swenta te bintik ya xbajt spas te Jehová?

¹³ Lamalkʼinal ya kaʼiytik sok jun-nax koʼtantik. Jaʼnax ta swenta te schʼul espíritu te Dios, bayal ants winiketik te bayal ya x-ilinik-a jelonem te skuxlejalik (kʼopona Isaías 65:25). Ya skʼan ya yal-abi te snaʼoj skomel sbaik (Rom. 12:2; Efes. 4:​22-24). Te j-abatotik yuʼun te Dios jmulawilotikto, jaʼ yuʼun aynix te banti ya xchʼayotike. Manchukme jich-abi, te Jehová spasoj jun mukʼul milagro, te junuknax ayik, ayuk skʼuxul yoʼtanik sok lamaluknax kʼinal ya yaʼiyik «spisil te ants winiketike» (Tito 2:11). ¡Jaʼnax te Dios te spisil ya xjuʼ yuʼun ya xjuʼ ya spas-abi!

14. ¿Bin-utʼil kʼot ta pasel ta stojol jtul hermano te bin ya yal Isaías 65:25?

¹⁴ Pero ¿yabal xjuʼ ya xjelon te jtaleltike? Te ejemplo te ya xbajt kilbeytik skʼoplale ya yakʼ ta ilel te ya xjuʼe. Jtul winik te 20 yaʼbilal te ora ya x-ilin sok te kʼax chopol stalel, bayal buelta och ta cárcel ta swenta te la yelkʼan carroetik sok ay yantikxan te bin ma lek la spase. Jaʼnix jich, spisil-ora ya yaʼiy pleito. Kʼalal la yaʼiy ta sbabial buelta te bin ya yakʼ ta nopel te Biblia sok te kʼalal och ta bael ta tsoblejetik yuʼun te testigoetik yuʼun Jehová, kʼot ta yoʼtan te ay swentail te skuxlejale: jaʼ te yakuk x-och ta nichimal kʼinal. Te kʼalal la yichʼ jaʼe, bayal buelta la snop te kʼot ta pasel ta skuxlejal te bin ya yal te Isaías 65:25. Te jich kʼoem-a te bitʼil te choj te ora ya x-ilin, pero te la sta slamalil yoʼtan jich bitʼil jkojt alal tuminchij.

15. ¿Bin yuʼun ya jkʼan ya jkoltaytik te yantik yuʼun ya x-ochik ta nichimal kʼinal te banti ya kichʼtik ta mukʼ te Dios, sok bitʼil ya xjuʼ ya jpastik?

¹⁵ Te Isaías 65:13 ya yal: «Hich ya yal te cajwaltic Jehová». Sok te versículo 25 jich ya yalxan: «xchi te Jehová». Spisil-ora ya xkʼot ta pasel te bin ya yal (Is. 55:​10, 11). Smelelil te ay te nichimal kʼinal ini, melel spisil te bin ya yal te Jehová kʼoem ta pasel. Yakʼojbotik bayal kermanotaktik te banti jun koʼtantik sok ay lamalkʼinal ya kaʼiytik, manchukme kuxinemotik ta jun chopol balumilal (Sal. 72:7). Jaʼ yuʼun-abi, ya jkʼan ya jkoltaytik bayal ants winiketik yuʼun ya x-ochik ta organización yuʼun te Dios. ¿Bin-utʼil ya jpastik? Jaʼ te kʼalal ya xbajt koʼtantik ta yotsesel jnopojeletik (Mat. 28:​19, 20).

¿BIN UTʼIL YA XJUʼ YA KIKʼTIK OCHEL TE ANTS WINIKETIK TA NICHIMAL KʼINAL?

16. ¿Bin ya x-ikʼbot yoʼtan te ants winiketik yuʼun ya x-ochik talel ta nichimal kʼinal?

¹⁶ Jpisiltik ay bin ya xjuʼ ya jpastik yuʼun bayalxan ants winiketik ya smulanik ochel ta nichimal kʼinal. ¿Bin-utʼil? Jaʼ te kʼalal ya jkʼayinbeytik stalel te Jehová. Te Jehová maba ya suj te ants winiketik, te bin ya  spase jaʼ te sok yutsil yoʼtan ya yikʼ tal ta stojol (Jer. 31:3; Juan 6:44). Te machʼatik ya x-och snaʼbeyik sba te Jehová sok te lek yoʼtanik jaʼ ya x-ikʼbot yoʼtanik yuʼun te tʼujbil taleliletik yuʼun te Jehovae. ¿Bin ya xjuʼ ya jpastik yuʼun ya x-ikʼbot yoʼtan te ants winiketik te jtaleltik sok jich ya skʼan ya x-ochik tal ta nichimal kʼinal?

17. ¿Bin ya xjuʼ ya jpastik yuʼun ya kikʼtik ochel te ants winiketik ta nichimal kʼinal?

¹⁷ Jun te bin-utʼil ya kikʼtik tal te ants winiketik ta nichimal kʼinal jaʼ te kʼuxuk ta koʼtantik sok te lekuk ya kil jbatik sok te kermanotaktik. Ya jkʼantik te machʼatik ya xbajtik ta tsoblejetik, jaʼnix jich ya yalik te bin-utʼil la yalik te machʼatik kʼotik ta tsoblej ta Corinto: «Ta melel, yuʼun-nix ay ta awolilik-a te Diose» (1 Cor. 14:​24, 25; Zac. 8:23). Jaʼ yuʼun, kʼax mukʼ skʼoplal te yakuk jtʼuntik te consejo ini: «Talel kʼaxel lamalukme awoʼtanik» (1 Tes. 5:13).

18. ¿Bin ya xjuʼ ya xtijbot yoʼtan te ants winiketik yuʼun ya x-ochik ta organización yuʼun Dios?

¹⁸ Jaʼnix jich ya skʼan ya jpastik tulan yuʼun spisiluk-ora jichuk ya kiltik te kermanotaktik te bitʼil ya x-ilotik yuʼun te Jehová. Jaʼ yuʼun jaʼ ya xbajt ta koʼtantik yilel te lekil taleliletik yuʼunik ma jaʼuk te ban ya xchʼayike, melel ta pajel chaʼbej ya xlaj skʼoplal. Te skʼuxul koʼtantik ya skoltayotik yuʼun ya jchajpantik teme ay jajchem kʼop sok teme ya jkʼotestik ta pasel te consejo ini: «Talel kʼaxel akʼbeya aba awilik slekil awoʼtanik, kʼuxuk xa awaʼiy abaik sok naʼbeya yoʼbolil abaik, sok pasbeya abaik perdón sok spisil awoʼtanik» (Efes. 4:32). Spisil te machʼatik jich ya skʼan ya x-ilotik yame x-ikʼbot yoʼtanik yuʼun ya x-ochik ta nichimal kʼinal. a

 JILUKOTIK TA NICHIMAL KʼINAL

19. 1) ¿Bin yalojik te machʼa sujtemikix tal ta nichimal kʼinal? (Ilawil te recuadro « Chaʼsujtik tal»). 2) ¿Bin ya skʼan ya jpastik? (Jaʼnix jich ilawil te foto).

¹⁹ ¡Kʼax tʼujbilnax sba te bitʼil ayotik ta nichimal kʼinal ini! Mero leknax ta ilel, melel ay bayalix abatetik yuʼun Dios tey-a. Ya kalbeytik wokol te Dios te bitʼil la yakʼ te nichimal kʼinal ta jtojoltik. Spisil te machʼatik ya skʼan ya sjelontes te stalelik, te ya skʼan te ayuk stseʼelil yoʼtanik, te lamaluk kʼinal ya yaʼiyik sok te junuk yoʼtanik ya skʼan ya x-ochik tey-a sok te manchuk ya yijkitayik. Pero ya skʼan ya jkanantay jbatik, melel te Satanás ya skʼan ya sloʼlayotik sok te yakuk snamajtesotik ta tʼujbil nichimal kʼinal ini (1 Ped. 5:8; Apoc. 12:9). Ma xkakʼtik te ya stsalotik te Pukuje. Ya skʼan ya jpastik tulan te bantito kʼalal ya xjuʼ kuʼuntik yuʼun ya jkanantaytik te stʼujbilal, te slekilal sok te slamalil kʼinal yuʼun te nichimal kʼinale.