Ayinon ta 1955 sok ay chaʼtul jbankiltak. Chʼion ta stsʼeel sur yuʼun Finlandia, ta ora ini jaʼix te Vantaa.

Te jmama la yichʼ jaʼ bitʼil testigo yuʼun Jehová te kʼalal mato ayinemon-a. Manchukme jich-abi, te jpapa maba la smulan te jich la spase sok la yalbotik te manchuk ya jnoptik te Biblia sok te manchuk ya xbootik ta tsoblejetik. Jaʼ yuʼun, te kʼalal maʼyuk ta jnatik-a te jpapa, te jmamae ya snojptesotik ta swenta te Jehová.

Ta jchʼinilto jajch jpasbey yaʼtel te Jehová. Te kʼalal aytonax jukeb kaʼbilal-a, te jmaestra ilin ta skaj te ma la jkʼan sweʼel te verilättyjä (te jaʼ jun arepa te ya sweʼik ta Finlandia te yichʼoj chʼichʼ). Ta jun skʼab la sjambon te kee sok te yan skʼabe la stenbon ochel ta ke. Pero juʼ la jlokʼesbey te skʼabe.

Kʼalal ayix 12 kaʼbilal-a, laj te jpapa. Jaʼ yuʼun ta patil juʼ boonix ta sNail Tsoblej. Kʼax leknax ya yilon te hermanoetik, jaʼ la stijbon koʼtan-abi yuʼun ya xchʼixan te schʼuunel koʼtan. Jajch jkʼopon ta jujun kʼajkʼal te Biblia sok ta skʼoponel te publicacionetik kuʼuntik. Jaʼ la skoltayon-abi yuʼun ya kichʼ jaʼ te kʼalal 14 kaʼbilal-a, ta 8 yuʼun agosto ta 1969.

Te kʼalal lokʼon ta escuela, ochon ta precursor regular. Cheʼoxeb semana ta patil,  boon ta scholel skʼop Dios ta Pielavesi, te jaʼ jun lum te ay ta stsʼeel te Finlandia.

Ta Pielavesi la jnaʼbey sba te Sirkka, te jaʼ kinamix ta ora ini. Te bin la jmulanbeye jaʼ te ay spekʼelil yoʼtan sok te tulan schʼuunel yoʼtan, melel ma stoy sba sok ma smulan te ay bayal sbiluke. Ta jchebaltiknax ya jkʼantik te ya x-abatinotik ta stojol te Jehová sok ya jkʼan ya jchʼuuntik spasel biluk aʼtelil te ya kichʼtik akʼbeyel. Nujpunotik ta 23 yuʼun marzo ta 1974. Te kʼalal nujpunotike ma bootik ta paxial, bootik ta Karttula, te banti ya skʼanikxan jcholkʼopetik.

Te kʼalal nujpunotike, te Jehová yakʼoj kiltik te jaʼ ya yakʼbotik te bin ya xtuun kuʼuntik teme jaʼ nail ya kakʼtik te Wentainel yuʼune (Mat. 6:33). Ta Karttula, maʼyuk jcarrotik-a. Jaʼ yuʼun ya jtuuntestik jun bicicleta. Pero, ta yorail sik ma xjuʼ te ya jtuuntestike. Jaʼnix jich, kʼax namal te ban ya xbootik ta scholel skʼop Dios jaʼ yuʼun ya xtuun kuʼuntik jun carro, pero maʼyuk jtakʼintik yuʼun ya jmantik.

Ta jun buelta tal yulaʼtayotik te jbankil, la yalbotik te ya xjuʼ ya kichʼbeytik jilel te scarroe. Maba la jtojtik, jaʼnax te ya kotsesbeytik sgasolinaul. ¡Jich la jtatik te jcarrotik!

Te Jehová la yakʼbotik kiltik te jaʼ ya yakʼbotik te bin ya xtuun kuʼuntike. Te bin ya skʼan ya jpastike jaʼ te jaʼ nail ya kakʼtik te Wentainel yuʼune.

Ta 1978 te kʼalal ayotik ta Escuela yuʼun Precursor, te hermano Raimo Kuokkanen a te jaʼ instructor, la stij koʼtantik yuʼun ya jnojestik te solicitud ta swenta te Escuela yuʼun Galaad. Jaʼ yuʼun jajchotik ta snopel te inglés. Pero maba juʼix te la jtikuntik, melel ta 1980 la kichʼtik ikʼel ta Betel ta Finlandia. Ta yorail-abi, te betelitaetik ma xjuʼ ya snojesik te solicitud yuʼun ay machʼa ya xbajt ta Galaad. Jaʼ ya jkʼantik-a te ya x-abatinotik ta stojol te Jehová te banti ya skʼane, ma jaʼuk te banti ya jkʼantik te joʼotike. Jaʼ yuʼun la jchʼuuntik te ikʼel. Pero yakotikto ta snopel inglés teme ay bin-ora la kichʼtik albeyel te yakuk jnojestik te solicitud yuʼun te Escuela yuʼun Galaad.

 Cheʼoxeb jaʼbil ta patil, te Cuerpo Gobernante la yal te ya xjuʼ ya snojesik jun solicitud yuʼun ya xjuʼ ya xbajtik ta Escuela yuʼun Galaad te betelitaetik. Jaʼ yuʼun oranax la jnojestik jun solicitud. Pero yame jmulantik-a te ayotik ta Betele, pero te bitʼil ya jkʼan ya xbootik ta koltaywanej te banti ya skʼanikxan koltayel te hermanoetik, la jnojestik te solicitud. La kichʼtik ikʼel ta clase 79 yuʼun Galaad, sok la jpas jbatik graduar ta septiembre ta 1985. Sok la kichʼtik tikunel ta Colombia.

Te kʼalal kʼootik ta Colombia, la kichʼtik tikunel ta aʼtel ta Betel. La jpas tulan te ban kʼalal juʼ kuʼun swenta lek ya jpas te kaʼtel, pero te kʼalal kʼax jun jaʼbil la jta ta nopel te jaʼ lek te ya kichʼ jelontesbeyel te asignación kuʼune. Jaʼ te sbabial sok te slajibal buelta te jich la jpase. Tey-abi la kichʼtik tikunel bitʼil misionero ta Neiva, ta Huila.

Spisil-ora jmulanoj te scholel skʼop Dios. Ta Finlandia, te kʼalal mato ayuk kinam-a sok ayon ta precursor-a, ay baeltik te ya jchol skʼop Dios ta sab jaʼto ta ajkʼabal. Sok te kʼalal nujpunelonto sok-a te Sirkka jaʼnix jich ya jcholtik skʼop Dios ta sjunal kʼajkʼal. Te kʼalal ya xbootik ta territorioetik te namal ayike, ay baeltik ya xwayotik ta carro. Jich maba ya sujtotikix bael ta jnatik sok ta yan kʼajkʼal teynix ya jachtik-a te scholel skʼop Diose.

Bayal la yakʼ sbujtsʼ koʼtantik yan buelta te la jcholtik skʼop Dios, melel jichnix kʼayemotik ta spasel-a. Te congregación te banti abatinotik jajch ta chʼiel, sok te hermanoetik ta Colombia ya x-ichʼawanik ta mukʼ, tʼujbilnax stalelik sok ya snaʼik yalel wokol.

Ay chaʼoxchajp puebloetik te banti maʼyuk ni jtuluk Testigo. Pero ta skaj te guerra tey ta lugaretik-abi ma xjuʼ ya x-och bael tey-a te machʼa ma jaʼuk slumale. ¿Bin-utʼil ya xjuʼ ya jcholtikix skʼop Dios tey-a? Ya jnopilan te bin ya xjuʼ ya yichʼ pasele. La jkʼopon te Jehová yuʼun ayuk machʼa ya x-och ta Testigo tey ta lugar-abi. Jaʼnix jich la jkʼanbey te Jehová te kʼalal ya yichʼ jaʼ te hermano-abi, te yakuk xchʼi te schʼuunel yoʼtan sok te ya skʼan ya sujt bael tey-a swenta ya schol skʼop Dios. Kʼax lek la kil te jichuk ya xkʼot ta pasele, pero te Jehová yan-a te bin snopoj ya spase.

Ta patil bael jajch kakʼbey nojptesel ta Biblia jtul winik te Fernando González sbiil, te kuxin ta Algeciras, te chʼin pueblo te banti maʼyuk Testigoetik. Jujun semana ya xbajt ta aʼtel ta Neiva, te kʼaxem ta 50 kilómetro sbelal. Ya schajpan sba ta lek te kʼalal ya jnoptik te Biblia, sok oranax jajch ta bael ta tsoblejetik. Jaʼnix jich, ta sbabial semana, jajch stsob bayal ants winiketik ta slumal yuʼun ya yakʼbey snop te bin yak ta snopele.

Wakeb u ta patil, te Fernando la yichʼ jaʼ ta enero ta 1990, sok oranax och ta precursor regular. Te bitʼil ayix jtul Testigo ta Algeciras, te Betel la stikun bael precursor especialetik tey-a. Sok ta febrero 1992 la yichʼ jachel jun congregación.

Pero te Fernando maba jil ta scholel skʼop Dios ta Algeciras. Te kʼalal nujpun sok te yinam,  te Olga sbiil, bajtik ta yan pueblo te banti maʼyuk Testigoetik, ta San Vicente del Caguán. Tey koltaywanik ta sjachel yan congregación, sok ta 2002 la yichʼik ikʼel yuʼun ya x-aʼtejik ta circuito, sok tey yakikto ta abatinel-a.

Te bin kʼax ta jtojole la yakʼbon jnop te kʼax mukʼ skʼoplal te jamal ya kalbeytik te Jehová te bin ya jkʼantik ta swenta te asignación kuʼuntike. Te Jehová ya xjuʼ ya spas te bin ma xjuʼ kuʼuntik spasel te joʼotike, melel jaʼ ya yakʼ xchʼi te awal tsʼunubile (Mat. 9:38).

Ta 1990 la kichʼ kaʼtel ta superintendente yuʼun circuito, te banti nail la kichʼtik tikunel jaʼ ta Bogotá. Te Sirkka sok te joʼon jichotik te bitʼil te yantik ants winiketik, maʼyuk bin bayal ya jnaʼtik spasel. Jaʼnix jich, ma kʼayemotik ta kuxinel ta jun mukʼul lum. Jaʼ yuʼun la jxiʼtik jtebuk te asignación la kichʼtike. Pero te Jehová la skʼotes ta pasel te bin ya yal te Filipenses 2:13: «Te Diose jaʼnix ya yakʼbeyex awipik swenta ayuk ta awoʼtanik te ya akʼan ya apasik sok te yakuk xjuʼ awuʼunik spasel te bintik lek ya yile».

Ta patil la kichʼtik tikunel bael ta circuito yuʼun Medellín, te lugar te la kalbeytik skʼoplal ta sjajchibal. Tey-a te ants winiketik kʼayemikix ta yilel-a te ay j-utsʼinwanejetik ta calle, jaʼ yuʼun ma xiwikix. Yato xjul ta koʼtan te jun buelta ayon ta yakʼel-a te nojptesel ta Biblia, te kʼalal jajch te tujkʼaywanej kʼan jpajkan jba ta oranax ta piso, pero te machʼa yak jnojptesbel ta Biblia maba la yijkitay skʼoponel te slibro jich yilel te maʼyuk bin yak ta kʼoel ta pasele. Te kʼalal laj yoʼtane, la yalbon te ya xlokʼ bael jtsʼinuk. Ta patil bael, yikʼoj kʼoel chaʼtul chʼin alaletik sok jich yilel te maʼyuk bin kʼoem ta pasel, la yalbon: «Pasa perdón, kʼot kikʼ talel te jnichʼnabe».

Ma jaʼuknax te bin kʼax ta jtojoltike. Ta jun buelta te kʼalal yakotik ta scholel skʼop Dios ta jujun na, repentanax tal te kinam ta animal sok la kil te sakuben te sit yelaw. La yalbon te ay machʼa kʼan tujkʼayotuk yuʼun, jaʼnix jich xiwon-euk. Pero ta patil la kaʼiytik te ma jaʼuk yak ta tujkʼayele, jaʼ yak ta tujkʼayel jtul winik te yak ta kʼaxel ta stsʼeel-ae.

Ta patil kʼayotik ta yilel te bin ya spasik te chopol ants winiketike. Chamnax koʼtantik yuʼun te ya xkujch yuʼunik te hermanoetik spisil-abi. Kʼot ta koʼtantik teme jaʼ yakik ta koltayel yuʼun te Jehová, jaʼnix jich ya skoltayotik-euk. Spisil-ora la jchʼuuntik te consejoetik yuʼun te ancianoetik, la jkanantay jbatik sok la kakʼtik te ya skanantayotik te Jehová.

Pero, aynix baeltik maba kʼax chopoluk-a te bin ya xkʼot ta pasel jich te bitʼil jnopojkotik-ae. Yato xjul ta koʼtan te kʼalal ayotik ta yulaʼtayel jtul ants la kaʼiy te jich yaʼiyel te ay chaʼtul antsetik te yak yutbel sbaik. Maba ya jkʼan ya kaʼiy-a te bin yak ta kʼoel ta pasele, pero te yajwal te na la yal te yakuk kile. ¡La kil te jaʼ chaʼkojt loroetik te yakik ta skʼayinbeyel stalel te machʼatik kuxinemik ta stsʼeelike!

Ta 1997 la kichʼ ikʼel bitʼil instructor yuʼun te Escuela de Entrenamiento Ministerial. b Spisil-ora jmulanoj-a te ya xboon ta escuelaetik, pero maʼyuk bin-ora la jnop te ya xnojpteswanone.

Ta patil ochon ta superintendente yuʼun distrito. Pero, te kʼalal laj skʼoplale, chaʼ ochon ta superintendente yuʼun circuito. Kʼaxemix ta 30 jaʼbil te ayon ta superintendente yuʼun circuito sok ta instructor. Te aʼteliletik-abi yakʼoj te ya jmulan bayal bendicionetik, pero aynix jtaoj wokol. ¿Bin yuʼun te jich ya kale?

Ya jnaʼ te tulan te jtalele. Jaʼ-abi skoltayojon yuʼun ya jsitintay tulan wokoliletik, pero jaʼnix jich yakʼoj te tulan ya xtojobteswanon ta congregacionetik. Jich bitʼil te ay baeltik te tulan ya kalbey te hermanoetik te ya skʼan ya yakʼik ta ilel kʼuxul oʼtanil sok te yakuk xkʼot ta yoʼtanik te bin yaʼiyel ya yaʼiy sbaik te yantike. Kʼot ta koʼtan te maʼyuk kuʼun te taleliletik-abi (Rom. 7:​21-23).

Ay baeltik te kʼax ma lek kaʼiyoj jba ta skaj te bintik maba lek ya jpase (Rom. 7:24). Jun buelta kʼax maba lek la kaʼiy jba te la kalbey te Jehová te jaʼ lek te ya xlokʼon ta misionero sok te ya sujton bael ta Finlandia. Pero ta yorailnix-abi ay bin la kaʼiy ta tsoblej te la yakʼ schʼuun koʼtan te ya skʼan ya xjilon ta asignación kuʼun sok te ya jlekubtes te jtalele. Maʼyuk bin-ora ya xchʼay ta koʼtan te bin-utʼil la sutbon te jkʼop te Jehová. Jaʼnix jich ya kalbey bayal wokol, melel skoltayojon sok skʼuxul yoʼtan ta slekubtesel te jtalele.

Te Sirkka sok te joʼon ya kalbeykotik bayal wokol te Jehová te bitʼil la yakʼ te abatinonkotik bayal jaʼbil ta stojol ta tiempo completo. Jaʼnix jich, ya kalbey wokol te Jehová yuʼun te la yakʼbon te kinam te yakʼojbon kil te skʼuxul yoʼtan sok te bayal skoltayojon.

Nopolix ya jta 70 kaʼbilal, jaʼ yuʼun nopol ya kijkitayix te aʼtelil ta instructor sok ta superintendente yuʼun circuito. Pero jaʼ-abi maba ya yakʼbon jmel koʼtan, melel schʼuunoj koʼtan te ma puersauk te mukʼ te kaʼteltik yuʼun ya kichʼtik ta mukʼ te Jehová. Te bin mukʼxan skʼoplale, jaʼ te ya kichʼtik ta mukʼ sok spekʼelil koʼtantik sok te ya kalbeytik yutsil skʼoplal sok spisil koʼtantik sok te ya kalbeytik wokole (Miq. 6:8; Mar. 12:​32-34).

Te jaʼbiletik kuxinemon tale, jmulanoj spasel te bayal tʼujbil asignacionetik. Pero la jta ta ilel te ma yuʼunuk joʼonxan lekon te bitʼil te yantik o te yuʼun ay bin ya jnaʼxan spasele. Jaʼ yakʼojbon spisil te Jehová ta swentanax te skʼuxul yoʼtan. Te manchuk ya skoltayon te Jehová, maʼyuk bin-ora juʼ kuʼun spasel te kaʼtel te la yakʼbon te jichuke. Ya xjuʼ ya kal te yuʼel te Dios skoltayojon te banti ya xchʼayone (2 Cor. 12:9).