ARTIKULO YUʼUN ESTUDIO 34
Jpisiltik mukʼ jkʼoplaltik ta kongregasion
«Hich te bin utʼil bayel ta chahp bintic ay ta baqʼuet, pero junax ay; aunque bayel ta chahp, pero junax baqʼuet ay; hich nix ay te Cristo» (1 COR. 12:12).
KʼAYOJIL 101 Jun-nax akʼa abatinukotik ta stojol Jehová
¿BIN YA KILBEYTIK SKʼOPLAL? *
1. ¿Bin yaʼiyel ya kaʼiy jbatik yuʼun te ayotik ta kongregasion yuʼun te Jehovae?
TSEʼEL KOʼTANTIK yuʼun te ayotik ta kongregasion yuʼun te Jehovae. Ay lamalkʼinal tey-a, ay tseʼel-oʼtanil sok jun-nax ya kichʼtik ta mukʼ te Jehová. Pero ¿bin aʼtelil ay ta jwentatik ta jujuntul ta kongregasion?
2. ¿Bin ejemplo la stuuntes te jpuk-kʼop Pablo ta kartaetik te la stsʼibaye?
2 Te jpuk-kʼop Pablo la stuuntes jun ejemplo ta kartaetik te la stsʼibaye, te ejemplo-abi ya yakʼ jnoptik bin kaʼteltik ta jujuntul ta kongregasion. La yal te jich kʼoem bitʼil bakʼetalil te kongregasione. Jich yuʼun te ermanoetik te ayik ta kongregasion, jaʼ pajalik sok te bintik ay ta bakʼetalile (Rom. 12:4-8; 1 Cor. 12:12-27; Efes. 4:16).
3. ¿Bin ya kilbeytik skʼoplal ta artikulo ini?
3 Ta artikulo ini ya kiltik oxeb te bin ya yakʼ jnoptik te ejemplo la yakʼ te Pabloe. Sbabial, jpisiltik ya xjuʼ ya x-aʼtejotik ta kongregasion. * Schebal, ya kiltik bin ya xjuʼ ya jpastik teme jich ya kaʼiytik te maniwan ya xtuunotik ta kongregasion. Yoxebal, ya kiltik bin yuʼun ya skʼan te jaʼuk ya xbajt ta koʼtantik spasel te aʼtelil ya yakʼbotik te Jehovae.
JPISILTIK MUKʼ JKʼOPLALTIK TA KONGREGASION
4. ¿Bin ya yakʼ jnoptik te bin ya yal Romanos 12:4, 5?
4 Te sbabial bin ya jnoptik ta swenta te ejemplo te la yakʼ te Pabloe, jaʼ te jpisiltik ay bin ya xjuʼ ya jpastik ta kongregasion. Ta ejemplo te la stuuntes te Pablo, nail jich la yal: «Hich te bin utʼil ay bayel ta chahp te ay ta jbaqʼuetaltic, pero ma junuc nax yaʼtelic ta spisilic, ha nix hichotic, aunque tsobolotic, junax jbaqʼuetaltic ta scuenta Cristo, junax cʼohemotic» (Rom. 12:4, 5). Te bin la skʼan la yakʼ ta nopel te Pabloe, jaʼ te yanyantik-a te bin ya xjuʼ ya jpastik, pero jpisiltik mukʼ jkʼoplaltik ta kongregasion.
Jpisiltik mukʼ jkʼoplaltik ta kongregasion. (Ilawil te parrafo 5 kʼalal ta 12). *
5. ¿Machʼatik yakʼojbey yaʼtel te Jehová swenta ya skoltay te ermanoetike?
5 Te kʼalal ya kaʼiytik te ay machʼatik ay yaʼtelik ta kongregasion, jaʼniwan ya xtal ta koʼtantik te machʼatik ya xwentainwanike (1 Tes. 5:12; Heb. 13:17). Te Jehová ya stuuntes te Cristo swenta ya yakʼbey yaʼtel ta kongregasion chaʼoxtul winiketik (Efes. 4:8). Jich bitʼil te Kuerpo Gobernante sok te machʼatik ya xkoltayotik yuʼune, te Komite yuʼun Sukursal, te superintendenteetik yuʼun sirkuito, te machʼatik ya xpʼijubteswanik ta eskuelaetik, te ansianoetik sok te sierbo ministerialetik. Spisilik te ermanoetik-abi akʼbil yaʼtelik ta swenta te chʼul espiritu swenta ya skoltayik te ermanoetik sok ya smukʼubtesbeyik yoʼtan (1 Ped. 5:2, 3).
6. Jich bitʼil ya yal 1 Tesalonicenses 2:6-8, ¿bin ya spasik te ermanoetik te yichʼoj yaʼtelik ta swenta te chʼul espiritue?
6 Te ermanoetik ya yichʼ akʼbeyel yaʼtelik ta swenta te chʼul espiritue. Te yaʼtel te kok jkʼabtik ya xtuun ta spisil jbakʼetaltik, jichnix te yaʼtel ya spasik te ermanoetik ya xtuun yuʼunik spisilik ta kongregasion. Ma jaʼuk ya skʼanik te ya x-ichʼotik ta mukʼe, ya spasik tulan yuʼun ya smukʼubtesbeyik yoʼtan te yermanotakike (kʼopona 1 Tesalonicenses 2:6-8). Ya kalbeytik wokol te Jehová, melel te ermanoetik ini tulan te schʼuunel yoʼtanike sok jaʼ mukʼ skʼoplal ta yoʼtanik skoltayel te yantike.
7. ¿Bin bendision ya staik te prekursoretik sok te misioneroetike?
7 Ta jkongregasiontik ayniwan misioneroetik, prekursor espesial o prekursor regular. Ta swolol Balumilal ay ermanoetik sok ermanaetik te ya scholik skʼop Dios bayal oraetik ta jujun u. Jich bayal machʼatik skoltayojik yuʼun ya x-ochik ta jnopojel yuʼun Cristo. Ayniwan maʼyuk bayal bin ay yuʼunik te ermanoetik-abi, pero te Jehová yakʼojbey bayal bendision ta skuxlejalik (Mar. 10:29, 30). Tseʼel koʼtantik yuʼun te ayik ta jkongregasiontike.
8. ¿Bin yuʼun mukʼ skʼoplal ta sit Jehová spisil te publikadoretike?
8 ¿Jaʼnaxbal mukʼ skʼoplalik te ermanoetik te yichʼoj yaʼtelik ta kongregasion sok te ermanoetik te ya x-abatinik ta tiempo kompleto? Maʼuk. Spisil te publikadoretik mukʼ skʼoplalik ta sit te Jehová sok ta kongregasion (Rom. 10:15; 1 Cor. 3:6-9). Te aʼtelil te kʼax mukʼ skʼoplal ya spas te kongregasione, jaʼ te ya yotsesik jnopojeletik yuʼun Cristo (Mat. 28:19, 20; 1 Tim. 2:4). Jaʼ yuʼun mukʼ skʼoplalik spisil te publikadoretik ta kongregasion, chikan teme yichʼojikix jaʼ o maʼuk, melel yakik ta spasel tulan ta yotsesel jnopojeletik (Mat. 24:14).
9. ¿Bin yuʼun mukʼ skʼoplal ya kiltik te ermanaetike?
9 ¿Jaxan te ermanaetike? Jaʼnix jich ya xtuuntesotik yuʼun Jehová ta kongregasion. Te Jehová mukʼ skʼoplal ya yil te inamiletik, te mamailetik, te meʼba antsetik, sok te ermanaetik te ma nujpunemik te jun yoʼtan yakik ta abatinel ta stojol te Jehovae. Ta Biblia ay bayal ejemploetik yuʼun antsetik te la yakʼbeyik stseʼelil yoʼtan te Jehová, melel la yakʼik ta ilel spʼijil yoʼtanik, schʼuunel yoʼtanik, stseʼelil yoʼtanik, yip yoʼtanik sok slekil yoʼtanik (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Ta jujun kongregasion ay ermanaetik te ya yakʼik ta ilel te jich stalelike, jaʼ yuʼun ya kalbeytik wokol te Jehovae.
10. ¿Bin yuʼun mukʼ skʼoplal ya kiltik te ermanoetik te ayix yaʼbilalike?
10 Jaʼnix jich ya yakʼ stseʼelil koʼtantik te ay ermanoetik ta jkongregasiontik te ayix yaʼbilalike. Ay chaʼoxtulik te bayalix jaʼbil yakik ta abatinel ta stojol te Jehovae sok ay yantik te achʼtonax yochelike. Ayniwan swokolik ta skaj te ayix yaʼbilalike sok maniwan bayal bin ya xjuʼ ya spasikix ta kongregasion sok ta scholel skʼop Dios. Manchukme jich-abi, ya spasik tulan ta scholel skʼop Dios, ya yakʼbeyik smukʼul yoʼtan te ermanoetik sok ya spʼijubtesik. ¡Bayal bin ya yakʼbotik jnoptik! Mukʼ skʼoplalik ta yoʼtan te Jehovae (Prov. 16:31).
11, 12. ¿Bin-utʼil ya yakʼbat smukʼul awoʼtan te achʼix keremetik ta akongregasione?
11 Te achʼix keremetik wokol ya yaʼiyik te yakik ta chʼiel ta balumilal te jaʼ wentainbil yuʼun te Satanase (1 Juan 5:19). Jaʼ yuʼun kʼaxto ya yakʼ smukʼul koʼtantik kʼalal ya yakʼ skomentarioik, ya scholik skʼop Dios sok te ya yakʼik ta naʼel te bin schʼuunejik te kʼalal ya yichʼik tenele. Jaʼex achʼix keremetik, kʼax mukʼ akʼoplalik ta kongregasion (Sal. 8:2).
12 Pero ay chaʼoxtul ermanoetik sok ermanaetik te jich ya yaʼiyik te maniwan ya xtuunik ta kongregasion. ¿Bin ya skoltayotik yuʼun ma jichuk ya kaʼiy jbatik? Kiltik.
JAʼME XA AWIL TE BIN YA ANAʼ SPASELE
13, 14. ¿Bin yuʼun ay machʼatik jich ya yaʼiyik te ma xtuunik ta kongregasion?
13 Te schebal bin ya yakʼ jnaʼtik te ejemplo la stuuntes te Pablo, jaʼ te ay ermanoetik te jich ya yaʼiyik te ma xtuunik ta kongregasion. Te Pablo jich la stsʼibay: «Teme hich ya yal te ocal: Te bin utʼil ma cʼabalucon, ma yuʼunucon te baqʼuet, teme xchihe, ¿yuʼun bal mayuc ta baqʼuet abi? Soc teme hich ya yal te chiquinil: Te bin utʼil ma sitilucon, ma yuʼunucon te baqʼuet, teme xchihe, ¿yuʼun bal mayuc ta baqʼuet abi?» (1 Cor. 12:15, 16). ¿Bin ya yakʼ jnoptik te bin la stsʼibay te Pabloe?
14 Teme ya jpajaltay jbatik sok te yantik ermanoetik, maniwan ayuk jkʼoplal ya kaʼiy jbatik. Ay ermanoetik te ya snaʼik ta lek pʼijubteswanej, ya snaʼik schapel te bin ya yichʼ pasel o ansianoik. Yaniwan jnoptik te ma jichotik bitʼil te ermanoetik-abi. Te kʼalal jich ya jnoptike, ya kakʼtik ta ilel te pekʼel koʼtantike (Filip. 2:3). Pero mame lek te spisil-ora ya jpajaltay jbatik sok te machʼatik bayal bin ya snaʼik spasele, melel ya xjuʼ ya xchebaj koʼtantik yuʼun. Jich bitʼil la yal te Pablo yaniwan xkaj jnoptik te maʼyuk bin yakotik ta spasel ta kongregasion. ¿Bin ya skoltayotik yuʼun ma jichuk ya jnoptik?
15. Ta swenta te bin ya yal 1 Corintios 12:4-11, ¿machʼa ya skʼan ya kalbeytik wokol teme ay bin ya jnaʼtik spasele?
15 Kiltik bin la spas te Jehová ta stojol te jchʼuunjeletik ta sbabial siglo. Ta swenta te chʼul espiritu la yakʼbey yaʼtel te jchʼuunjeletik ta j-alwanej, ta spasel milagro sok yantikxan (kʼopona 1 Corintios 12:4-11). Yanyantik-a te bin la spasike, pero spisilik mukʼ skʼoplalik. Ta ora ini maba ya jpastikix milagro sok maba j-alwanejotik, yanyantik-a te bin ya jnaʼtik spasele, pero jpisiltik mukʼ jkʼoplaltik ya yilotik te Jehovae.
16. ¿Bin la yal te jpuk-kʼop Pablo te ya skʼan ya jpastike?
16 Mame jpajaltay jbatik sok te yantike, jaʼuk ya jpastik te bin la yal te jpuk-kʼop Pabloe: «Jtuhlutuhl acʼa stsahtay bin yilel yaʼtel, hich ya xhuʼ ya yal lec scʼoblal stuquel, ma haʼuc ya spaj yan» (Gál. 6:4).
17. ,¿Bin-utʼil ya skoltayotik teme jaʼ ya kiltik te bin ya jnaʼtik spasele?
17 Teme ta jujuntul ya kiltik te bin ya jnaʼtik spasel jich bitʼil la yal te Pabloe, yaniwan jtatik ta ilel te ay machʼa ma snaʼ spasel te bin ya jnaʼtik te joʼotike. Ayniwan jtul ansiano te wokol ya yaʼiy yakʼel diskurso, pero ya snaʼ skoltayel ta lek te estudianteetik yuʼun ya x-ochik ta j-abatetik yuʼun Jehová. O maniwan ya snaʼ ta lek schapel te bintik ya yichʼ pasele, pero ay skʼuxul yoʼtan, jaʼ yuʼun ay ermanoetik te ya skʼanbeyik koltayel ta swenta te Bibliae. O jaʼniwan jich naʼbil sba yuʼun te ya yikʼ ta weʼel ta sna te ermanoetike (Heb. 13:2, 16). Kʼalal ya jtatik ta ilel bintik-a te ya jnaʼtik spasel ta leke, jaʼme ya yakʼbotik stseʼelil koʼtantik ta kongregasion. Jaʼnix jich yame skoltayotik yuʼun maba ya xtal sbikʼtal koʼtantik ta stojol te ermanoetik teme ay bin ya snaʼik spasel te ma jnaʼtik te joʼotike.
18. ¿Bin ya skoltayotik yuʼun ya jnaʼtik ta lek pʼijubteswanej?
18 Chikan bin kaʼteltik ta kongregasion, jpisiltik ya skʼan ya jpastik tulan ta snopelxan scholel skʼop Dios sok te ya jnaʼtik pʼijubteswanej. Jaʼ yuʼun ya snojptesotik ta lek te organisasion yuʼun te Jehovae. Te tsoblej ya yichʼ pasel ta olil semana ya spʼijubtesotik ta lek ta scholel skʼop Dios. ¿Yakotikbal ta stuuntesel te bin ya yichʼ kʼasesele?
19. ¿Bin ya skʼan ya apas yuʼun ya xbaat ta Eskuela yuʼun Ebanjelisador?
19 Yanxan te banti ya kichʼtik pʼijubtesele, jaʼ ta Eskuela yuʼun Ebanjelisador. Ya xjuʼ ya xbajtik ermanoetik sok ermanaetik te ay yaʼbilalik ta 23 kʼalal ta 65 sok te yakik ta abatinel ta tiempo kompleto. ¿Kʼax wokolbal ya kaʼiytik te ya xbootike? Mame jaʼuk ya jnoptik bin yuʼun te ma xjuʼ ya xbootike, jaʼuk ya jnoptik bin yuʼun te ya jkʼan ya xbootike. Jaʼ yuʼun kakʼbeytik yipal yuʼun ya kichʼtik ikʼel. Yame skoltayotik te Jehovae, sok teme ya jpastik tulan, yame xjuʼ ya xbootik.
JPASTIK TE BIN YA JNAʼTIK SPASEL TA SKOLTAYEL TE YANTIKE
20. ¿Bin la yal te Pablo ta Romanos 12:6-8 sok bin ya yakʼ jnoptik?
20 Te yoxebal bin ya yakʼ jnoptik te ejemplo la yakʼ te Pabloe ay ta Romanos 12:6-8 (kʼopona). Ta bersikuloetik-abi te Pablo la schaʼyalxan te yanyantik-a te bin ya jnaʼtik spasel ta kongregasion. Pero jaʼnix jich la yal te akʼa jtuuntestik te bin ya jnaʼtik spasel ta yakʼbeyel smukʼul yoʼtan te ermanoetike.
21, 22. ¿Bin yaʼiyel la yaʼiy sbaik te Robert sok te Felice, sok bin ya yakʼ jnoptik?
21 Kiltik te bin kʼax ta stojol jtul ansiano te Robert sbiil. * Kʼalal yak ta abatinel ta yan lum-ae, la yichʼ ikʼel ta Betel te ay ta slumale. La yichʼ albeyel te ma yuʼunuk ay bin ma lek la spas, pero te ermano jich la yal: «Bayal la jmel koʼtan sok jich la kaʼiy te ay bin ma la jnaʼ spasele, bayal u te jich la kaʼiy jbae. Ay baeltik la jnop te ma jkʼan ya x-ayinon-nix ta Betel». ¿Bin koltayot te ermanoe? Jich albot yuʼun jtul ansiano: «Te bin la yakʼbat anop te Jehová ta yan asignasion, jaʼme ya xjuʼ ya skoltayat ta ora ini». Te Robert kʼot ta yoʼtan te ma skʼan ya snaʼulan-nix te yan asignasion sok te jaʼuk ya xbajt ta yoʼtan te bin ya xjuʼ ya spas ta ora ini.
22 Te ermano Felice Epíscopo jichnix la yaʼiy sba. Bajtik ta Eskuela yuʼun Galaad sok te yinam ta 1956, ta patil, te ermano och ta superintendente yuʼun sirkuito sok abatinik ta Bolivia. Ta 1964 ayin alal yuʼunik. Te ermano Felice jich la yal: «La jmel koʼtantik te kʼalal la kijkitaykotik te j-asignasiontike. Jamal ya kal te jun jaʼbil jich la kaʼiy jbae. Pero wokolayal te Jehová, ta patil maba la jmelix koʼtan yuʼun sok jun koʼtan la jkanantay te jnichʼane». ¿Jichbal ya kaʼiy jbatik bitʼil te Robert sok te ermano Felice? ¿Ayotikbal ta mel-oʼtan ta skaj te ay la kijkitaytik jun asignasion? Teme jich ya kaʼiy jbatike, jaʼme ya yakʼ stseʼelil koʼtantik teme ya xbajt ta koʼtantik te bin ya xjuʼ ya jpastik ta ora ini ta stojol te Jehová sok ta stojol te kermanotaktike. Pasa te bin ya anaʼ spasel ta skoltayel te yantike. Jichme tseʼel awoʼtan yuʼun te ya awakʼbey smukʼul yoʼtan te ermanoetik ta kongregasion.
23. 1) ¿Bin ya skʼan ya jnoptik? 2) ¿Bin ya kilbeytik skʼoplal ta yan artikulo?
23 Jujuntul mukʼ jkʼoplaltik ya yilotik te Jehovae sok ya skʼan te tseʼeluk koʼtantik ta kongregasion. Teme ya jnoptik bitʼil ya xjuʼ ya kakʼbeytik smukʼul yoʼtan te kermanotaktik sok teme jich ya jpastike, ya jtatik ta ilel te ay kaʼteltik ta kongregasion. Pero ¿bin ya anop ta stojol te yantike? ¿Bin-utʼil ya kakʼtik ta ilel te ay skʼoplal ta koʼtantike? Ya kilbeytik skʼoplal ta yan artikulo.
KʼAYOJIL 84 Ya xkoltaywanotik ta aʼtel
^ parr. 5 Ya jkʼantik te mukʼ jkʼoplaltik ya yilotik te Jehovae, pero yaniwan jojkʼoybey jbatik ¿bin-utʼil ya xjuʼ ya stuunteson te Jehovae? Te artikulo ini ya yakʼ jnoptik te jpisiltik ay bin ya xjuʼ ya jpastik ta kongregasion.
^ parr. 3 TE BIN MUKʼ SKʼOPLAL: Kʼalal ya kaltik te ay kaʼteltik ta kongregasion, jaʼ ya skʼan ya yal te ay bin ya xjuʼ ya jpastik ta jujuntul yuʼun ya kakʼbeytik smukʼul yoʼtan te ermanoetike. Chikan teme ay jtakʼintik o maʼyuk, teme yan jtsʼumbaltik o ma jnaʼtik jun.
^ parr. 21 Ay yichʼoj jelel te biililetike.
^ parr. 63 TE BIN YA XCHIKNAJ TA FOTOE: Oxeb fotoetik ya yakʼ kiltik te kʼalal mato xjajch-a te tsoblej, te kʼalal jajchix-ae sok te kʼalal lajix-a te tsobleje. Sbabial foto: Jtul ansiano ya spatbey yoʼtan jtul winik te ya xkʼot ta tsobleje. Jtul kerem yak ta schajpanel te mikrofono. Jtul ermana yak ta aʼiyej sok yan ermana te ayix yaʼbilale. Schebal foto: Te jchʼieletik sok ermanoetik te ayix yaʼbilalik ya stoy skʼabik yuʼun ya yakʼ skomentarioik te kʼalal yakik ta snopel Te J-ilkʼinal ta toyol. Yoxebal foto: Jtul ermano sok yinam yakik ta spasel limpiesa ta sNail Tsoblej. Jtul ermana ya skoltay te schʼin achʼix yuʼun ya yotses te sdonasion. Jtul ermano ya yakʼbey smukʼul yoʼtan jtul ermana te ayix yaʼbilale.
