Ta artículo-abi la jnoptik te kʼop jajchem, tey ochem skʼoplal spisil te ants winiketik sok te chʼul-abatetike: te ya yichʼ chʼultesel te sbiil te Jehová. Ta swenta te jaʼnax ajwalil stukel te Jehová —ya skʼan ya yal te jaʼnax ya xwentainwan stukele— sok jaʼ jun te bin smakoj skʼoplal te kʼop jajcheme. Yanxan te bin smakoj skʼoplal te kʼop jajcheme, jaʼ teme ay machʼa jun yoʼtan ya yakʼ sba ta stojol te Jehová o maʼuk.

¿Pero bin yuʼun ya kaltik te jaʼ mukʼxan skʼoplal te sbiil te Jehová sok te ya yichʼ chʼultesele? Kiltik oxchajp te bin yuʼune.

Te sbabial, ta tsumbil kʼinal Edén, te Satanás la sbolkʼoptaybey te sbiil te Jehová. Te bin jojkʼoybot te Eva yuʼun te Satanás, la yakʼ ta naʼel te malaj ayuk slekil yoʼtan te Dios sok te kʼaxlaj wokol ta pasel te mantaliletik akʼbotike. Ta patil, te Satanás la yal te ma smeleliluk te bin la yal te Jehová, jich la yakʼ ta naʼel te jaʼ jpaslot, kʼalal la sbolkʼoptay te sbiil te Jehová. Jich kʼatpʼuj ta jleaw ta kʼop te Satanás (Juan 8:44). Kʼalal te Eva la schʼuun te lotil la yal te Satanase, la skʼaxuntay te mantaliletik yuʼun te Jehová, sok la skontrain te bitʼil jaʼnax ajwalil stukel (Gén. 3:1-6). Ta ora ini, te Satanás yak ta sbolkʼoptayel te sbiil te Dios te kʼalal ya yal lotiletik ta swenta te Jehová. Ayniwan machʼatik ya schʼuunik te lotiletik-abi, te ya skʼaxuntayik te smantal te Jehová. Te j-abatetik yuʼun Dios ma stojiluk ya yilik te la yichʼ bolkʼoptayel te sbiil te Jehová. Jaʼ ta swenta-abi, te ay wokoliletik sok te bintik chopol ya yichʼ pasel ta balumilal.

Schebal, yuʼun ya sta slekilalik spisil te bintik pastiklanbil, te Jehová yakʼoj ta yoʼtan te ya schʼultes ta jkʼaxel te sbiile. Jaʼ te bin kʼax mukʼ skʼoplal ta yoʼtan te Jehová. Jaʼ yuʼun, jich ya yal: «Ya jchʼultes te jmucʼul bihil» (Ezeq. 36:23). Kʼalal nojpteswan ta skʼoponel Dios te Jesús, jich la yal: «Akʼa yichʼ chʼultesel te abiile». Jich la yakʼ ta naʼel te bin mukʼ skʼoplal ya skʼan ya kaltik kʼalal ya jkʼopontik te Jehová (Mat. 6:9). Te Biblia bayal buelta ya yal te mukʼ skʼoplal te ya yichʼ albeyel yutsil skʼoplal te sbiil te Jehová. Kiltik cheʼoxebuk ejemplo. «¡Halbeyahic yutsil scʼoblal te sbihil Jehová hich te bin utʼil ya scʼan!» (1 Crón. 16:29; Sal. 96:8). «Cʼayojtaybeyahic yutsilal te sbihile» (Sal. 66:2). «Ya jtoybat yutsil scʼoblal abihil ta spisil ora» (Sal. 86:12). Jaʼnix jich, ta jun buelta te kʼalal kʼopoj tal te Jehová kʼalalto ta chʼulchan te kʼalal ay ta templo-a te Jesús, jich la yalbey te sTate: «Akʼa ta ichʼel ta mukʼ te abiile». Te Jehová jich la sut: «Kakʼojix ta ichʼel ta mukʼ sok ya kakʼxan ta ichʼel ta mukʼ» (Juan 12:28). a

Yoxebal, te skʼanojel yoʼtan te Jehová jaʼ te ya yichʼ albeyel yutsil skʼoplal te sbiil ta sbajtelkʼinal. Jnop kaʼiytik ta swenta te sbiil te Jehová te kʼalal kʼaxemix-a te Wentainel yuʼun Cristo ta jmil jaʼbil, te kʼalal kʼaxix-a te slajibal prueba. Te kʼop jajchem ta swenta te sbiil te Jehová, ¿binwan ya snopik te ants winiketik sok te chʼul-abatetik? Yuʼun ya jnaʼtik-a, kilbeytik cheb skʼoplal te bin yuʼun jajchem te kʼope: jaʼ te junuk koʼtantik ta stojol  te Jehová sok te jaʼnax Ajwalil stukel ta chʼulchan sok ta Balumilal. Jaʼnix jich, maʼyuk machʼa ya yichʼ akʼel ta prueba teme jun yoʼtan ta stojol te Jehová. ¿Bin yuʼun? Melel spisil te ants winiketik tojikix sok kʼaxemix-a te slajibal prueba. Jaʼnix jich ya xjuʼ ya xkuxinik ta sbajtelkʼinal. Pero, ¿bin ya xjuʼ ya kaltik ta swenta te jaʼnax ajwalil stukel ta chʼulchan sok ta balumilal te Jehová? Ta swenta-abi, jun-nax te bin ya jnoptik. ¿Bin yuʼun? Melel la yichʼix naʼel-a te jaʼnax lekil ajwalil te Jehová. Spisil te ants winiketik sok te chʼul-abatetik, ya yichʼik ta mukʼ sok spisil yoʼtanik. Pero, ¿bin ya xkʼot ta pasel ta swenta te sbiil te Jehová?

Te sbiil te Jehová jkʼaxel ya yichʼ chʼultesbeyel skʼoplal, sok maʼyukix bin ya xbolobtesbot skʼoplal yuʼun. Te j-abatetik yuʼun te Dios ta chʼulchan sok ta Balumilal, kʼax mukʼ skʼoplal ta yoʼtanik te sbiil te Jehová. ¿Bin yuʼun? Melel jaʼ la yilik te bayalxan bin ya spas te Jehová. Jich bitʼil te pekʼel yoʼtan te Jesús, spisil ya xchaʼyakʼbey ta skʼab te sTat «swenta jaʼ yuʼun Dios ya xkʼot spisil te bintik aye» (1 Cor. 15:28). Ta patil, te machʼatik ya xkuxinik liʼ ta Balumilal «ya smulanbeyik yutsilal te libre ya xjilik te yal snichʼnab te Diose» (Rom. 8:21). Jich ya xkʼot ta pasel te skʼanojel yoʼtan yuʼun te Jehová, te jun-nax ya xkʼot te sfamilia te machʼatik ayik ta chʼulchan sok ta Balumilal (Efes. 1:10).

¿Bin yaʼiyel ya xbajt yaʼiy sba te sfamilia te Jehová te kʼalal ya xkʼot ta pasel spisil ini? Ta chʼulchan sok ta Balumilal, jpisiltik ya jkʼantik yalbeyel yutsil skʼoplal te schʼul biil te Jehová. Te David jich la stsʼibay: «Bayel me yutsil te Jehová Dios […]. ¡Bayel me yutsil te sbihil sbahtel qʼuinal!» (Sal. 72:18, 19). Ta sbajtelkʼinal ay bin yachʼil ya xbajt jnoptik yuʼun ya kalbeytik yutsil skʼoplal te sbiil te Jehová.

Te sbiil te Jehová ya yakʼ ta naʼel te taleliletik yuʼune. Jaʼ yuʼun kʼalal ya jnoptik ta swenta te sbiil, ya xtal ta koʼtantik te skʼuxul yoʼtane (1 Juan 4:8). Spisil-ora ya xbajt juluk ta koʼtantik te la spasotik ta swenta skʼuxul yoʼtan te Jehová, te la yakʼ te stojol kolel ta swenta skʼuxul yoʼtan sok te jaʼ tijbot yoʼtan yuʼun te kʼuxul oʼtanil yuʼun ya yakʼ kiltik te jaʼ tojil ajwalil stukele. Sok ya kiltik bin-utʼil ya xbajt yakʼ ta ilel te skʼuxul yoʼtan te Jehová ta stojol te bintik spasoje. Ta sbajtelkʼinal ay bin ya xbajt stij koʼtantik yuʼun ya xnoptsajotikxan ta stojol te jTatik te ay ta chʼulchan sok te ya jkʼayojtaybeytik yutsil skʼoplal te schʼul biile (Sal. 73:28).