TA Jerusalén ay jun ton te ya scholbey skʼoplal te bin la yichʼ pasel ta jaʼbil 700 sok 600 te kʼalal mato talem-a te Cristo. Te ton-abi la yichʼ tael ta schʼenal mukenal te maba namal yiloj sba sok te mukʼul lum Hebrón (Israel). Te jich ya yal tey-a: «Bolobenuk skʼoplal te Hagaf te snichʼan Hagav ta swenta te Yahweh Sabaot». ¿Bin-utʼil ya skoltaybey skʼoplal te Biblia ta swenta te bin la yichʼ taele? Te sbiil te Dios te jaʼ Jehová ta ebreo kʼop ya yichʼ tsʼibayel sok te letraetik ini YHWH, ya snaʼbeyik sba ta namey kʼinal te biilil-abi sok bayal ya stuuntesik te ants winiketik. Ay tabil yantik chʼenetik te ya stuuntesik yuʼun ya stsob sbaik-a o ya snakʼ sbaik tey-a, stsʼibayojik ta pajkʼ te sbiil te Dios sok yantikxan biililetik yuʼun te Diose.

Te Rachel Nabulsi te ay ta Unibersidad yuʼun Georgia, jich la yal ta swenta te bin la yichʼ taele: «Te bitʼil ya yichʼ tuuntesel spisil-ora te biilil YHWH kʼax mukʼ skʼoplal [...]. Te tekstoetik sok te bintik tsʼibaybil jilel, ya yakʼ ta ilel te kʼax mukʼ skʼoplal ta yoʼtanik te ants winiketik ta Israel sok Judá te biilil YHWH». Jaʼ-abi ya skoltaybey skʼoplal te bin yal te Biblia te bayal ta mil ya xchiknaj te sbiil te Dios te jich tsʼibaybil ta ebreo YHWH. Kʼalal ya stsʼibay sbiil te ants winiketik jaʼnix jich ya stsʼibayik tey-a te sbiil te Diose.

Te kʼopil Yahweh Sabaot te la yichʼ tsʼibayel jilel ta ton te la yichʼix alele, ya skʼan ya yal: «Jehová te swentainej spisil». Jich yilel te sbiil te Dios sok te kʼopil «Jehová te swentainej spisil», kʼayemik ta stuuntesel ta namey kʼinal. Ta Biblia bayal buelta ya yichʼ tuuntesel te kʼopil «Jehová te swentainej spisil» ya chiknaj 283 buelta ta Eskrituras Ebreas, jteb ma spisiluk ya jtatik ta libro yuʼun Isaías, Jeremías sok Zacarías.