1. ¿Bin yaʼiyel ya awaʼiy aba yuʼun te kʼuxat ta yoʼtan te Diose?

TA CHAʼOXPʼALNAX kʼop te jpuk-kʼop Juan ay bin kʼax mukʼ skʼoplal la stsʼibay: «Te Dios jaʼ kʼuxul oʼtanil» (1 Juan 4:8, TNM). Melelnix-a, te Dios la yakʼbotik te jkuxlejaltik, pero jaʼnix jich talem ta stojol te kʼuxul oʼtanil. Kʼuxotik ta yoʼtan te Jehová, ta swenta-abi tseʼelnax koʼtantik sok leknax ya kaʼiy jbatik.

2. 1) Jich bitʼil ya yal Mateo 22:37-40, ¿bin-a te cheb mantalil te kʼax mukʼ skʼoplale? 2) ¿Bin yuʼun te jaʼ wokolniwan ya kaʼiytik schʼuunel te schebal mantalile?

² Te j-abatotik yuʼun Dios ya skʼan ya kakʼtik ta ilel kʼuxul oʼtanil, melel jaʼ jun mantalil (kʼopona Mateo 22:37-40). Te kʼalal ya jnaʼbeytikxan sba te Jehová, maba wokol ya kaʼiytik schʼuunel te sbabial mantalile, melel toj stukel lek yoʼtan sok ya yakʼ ta ilel te ay jkʼoplaltik ta yoʼtane. Pero jaʼ wokolniwan ya kaʼiytik schʼuunel te schebal mantalile. ¿Binwan yuʼun? Melel te kermanotaktik jmulawiletik-euk, ayniwan bin ya yalik o ya spasik te ma lek ya kaʼiy jbatik yuʼun o te kʼux ya kaʼiytike. Jaʼ yuʼun te Jehová la yakʼ ta tsʼibayel ta Biblia bin-utʼil sok bin yuʼun mukʼ skʼoplal te ya kakʼtik ta ilel skʼuxul koʼtantik, jtul te machʼa la yakʼbey stsʼibaye jaʼ te Juan (1 Juan 3:11, 12).

3. ¿Bin-a te bayal buelta la yalbey skʼoplal te Juane?

³ Ta libroetik te ay ta Biblia te la stsʼibay te Juane, bayal buelta la yalbey skʼoplal te ya skʼan ya kakʼtik ta ilel skʼuxul koʼtantik te j-abatotik yuʼun Jehová. Ta Ebanjelio te la stsʼibay te Juane, bayal buelta la yalbey skʼoplal te kʼuxul oʼtanil, ma jichuk stukel te ta yantik Ebanjelioetike. Ayix 100 yaʼbilal-a te kʼalal la stsʼibay te Ebanjelio sok te oxeb kartaetike. Tey la yakʼ ta naʼel-a te jaʼ ya skʼan ya stij koʼtantik te kʼuxul oʼtanil ta spasel spisil te bin ya jpastike  (1 Juan 4:10, 11). Pero te jpuk-kʼop Juan jaʼnix jich wokol la yaʼiy yakʼel ta ilel kʼuxul oʼtanil ta sjajchibal.

4. Chola kaʼiytik banti ma la yakʼ ta ilel skʼuxul yoʼtan te Juane.

⁴ Te kʼalal keremto-a te Juan, ma spisiluk-ora la yakʼ ta ilel skʼuxul yoʼtan. Ta jun buelta te Jesús sok te jnopojeletik yuʼun bajtik ta Jerusalén, kʼotik ta jun chʼin pueblo ta Samaria te banti te ants winiketik maba la yakʼik ta ilel slekil yoʼtanik ta stojol te Jesús sok te jnopojeletik yuʼune. ¿Bin la yal yuʼun te Juane? La skʼan te yakuk xko tal kʼajkʼ ta chʼulchan sok te yakuk slajin te machʼatik tey ayik-ae (Luc. 9:52-56). Ta yan buelta, maba la yichʼ ta wenta te yantik jpuk-kʼopetike. Te Juan sok te Santiago, jich yilel te la yalbeyik te smamaik te akʼa skʼanbey te Jesús te yakuk xnajkajik ta xujkʼ ta Wentainel. Kʼalal la snaʼik stojol te yantik jpuk-kʼopetik, bayal ilinik yuʼun (Mat. 20:20, 21, 24). Manchukme ay banti chʼay te Juane, kʼux aʼiybil yuʼun te Jesús (Juan 21:7).

5. ¿Bintik ya jnoptik ta artikulo ini?

⁵ Ta artikulo ini ya kiltik te ejemplo yuʼun te Juan sok cheʼoxeb te bintik la stsʼibay ta swenta te kʼuxul oʼtanil. Ya jnoptik bitʼil ya kakʼtik ta ilel skʼuxul koʼtantik ta stojol te ermanoetik sok ya jnoptik bin ya xjuʼ ya spasik te jolaletik ta na yuʼun ya yakʼik ta ilel te kʼux ta yoʼtanik te sfamiliaike.

6. ¿Bin-utʼil yakʼoj ta ilel te Jehová te kʼuxotik ta yoʼtane?

⁶ Te kʼalal ay machʼa kʼux ta koʼtantike, ma tikʼuk-a te yanax kalbeytike, ya skʼan ya xchiknaj ta ilel ta swenta te bin ya jpastik ta stojole (paja sok Santiago 2:17, 26). Te Jehová kʼuxotik ta yoʼtan (1 Juan 4:19). Jaʼ yuʼun la yakʼ jilel tʼujbil kʼopetik ta Biblia ta jtojoltik (Sal. 25:10; Rom. 8:38, 39). Pero ma jaʼuknax ya yalbotik te kʼuxotik ta yoʼtane, jaʼnix jich ay bin ya spas ta jtojoltik. Te Juan jich la stsʼibay: «Hich la yacʼ ta ilel te cʼuxotic ta yoʼtan te Dios, ha te la sticon tal ta bahlumilal te hip jtuhl Snichʼan scuenta yuʼun ya xcuxajotic ta scuenta» (1 Juan 4:9). Te Jehová la yakʼ kʼaxuk swokol te sNichʼan sok te laj ta jtojoltik (Juan 3:16). Jaʼ yuʼun ya schʼuun koʼtantik te yuʼun-nix kʼuxotik ta yoʼtan-ae.

7. ¿Bin-uʼtil yakʼoj ta ilel te kʼuxotik ta yoʼtan te Jesuse?

⁷ Te Jesús jaʼnix jich la yalbey te jnopojeletik te kʼux ta yoʼtane (Juan 13:1; 15:15). Pero ma jaʼuknax la yal jaʼnix jich la yakʼ ta ilel te skʼuxul yoʼtan ta stojolik  soknix ta jtojoltik. Jich la yal: «Mayuc machʼa cʼax hich ay scʼuxul yoʼtan a te bin utʼil te machʼa ya yacʼ scuxlejal ta scuenta te yamigo» (Juan 15:13). Kʼalal ya jnop ta koʼtantik te bin spasoj ta jtojoltik te Jehová sok te Jesús, ¿bin ya stij koʼtantik ta spasel?

8. ¿Bin ya stij koʼtantik ta spasel te bin ya yal 1 Juan 3:18?

⁸ Ya kakʼtik ta ilel te kʼux ta koʼtantik te Jehová sok te Jesús kʼalal ya jchʼuuntik te bin ya yalik (Juan 14:15; 1 Juan 5:3). Te Jesús la yal ta mantal te talel kʼaxeluk kʼux ya kaʼiy jbatik (Juan 13:34, 35). Te skʼuxul koʼtantik ta stojol te ermanoetik ma jaʼuknax ya kalbeytik, jaʼnix jich ya kakʼbeytik yil (kʼopona 1 Juan 3:18). Jaʼ yuʼun, ¿bin-utʼil ya kakʼtik ta ilel?

9. ¿Bin-utʼil la yakʼ ta ilel skʼuxul yoʼtan te Juan?

⁹ Te lajuk skʼan te Juane, jil ta aʼtel sok stat ta stsakel chay yuʼun jich ya staxan stakʼin-a te jichuke. Pero ma jichuk la spas, la stuuntes te skuxlejal ta skoltayel te ants winiketik ta snopbeyel skʼop te Jehová sok te Jesús. Ay kʼax swokol ta spasel-abi. La yichʼ kontrainel sok ta slajibal te sbabial siglo te kʼalal ayix yaʼbilal-a, la yichʼ ikʼel bael ta chukel (Hech. 3:1; 4:1-3; 5:18; Apoc. 1:9). Te kʼalal jich yak ta kʼaxel ta stojol-ae, la yakʼ ta ilel te ay skʼoplal ta yoʼtan te yantike. Jich bitʼil te kʼalal ay ta Patmos te jaʼ jsejp kʼinal te ay ta yolil mar, la stsʼibay te libro yuʼun Apocalipsis sok la stikun ta stojol te kongregasionetik, yuʼun jich ya snaʼik te bin ya xkʼot ta pasel ta pajel chaʼbej (Apoc. 1:1). Ta patil te kʼalal lokʼemix ta chukel ta Patmos, la stsʼibay te skuxlejal sok te aʼtelil la spas ta Balumilal te Jesús. Jaʼnix jich la stsʼibay oxeb karta ta stojol te yermanotak yuʼun ya yakʼtiklanbey smukʼul yoʼtan sok yip yoʼtan. ¿Bin-utʼil ya jnopbeytik stalel te Juan?

10. ¿Bin ya jpastik yuʼun ya kakʼbeytik yil te kʼux ta koʼtantik te ants winiketik?

¹⁰ Ta swenta te bin ya jpastik ta jkuxlejaltik ya kakʼtik ta ilel te kʼux ta koʼtantik te ants winiketik. Te balumilal yuʼun te Satanás jaʼ ya skʼan te ya kakʼ jtiempotik sok kiptik ta stael jkʼulejaltik sok te ya kichʼtik naʼbeyel jbatike. Ay ermanoetik ta swolol Balumilal te baem ta yoʼtanik scholel te lek yachʼil kʼop sok skoltayel te ants winiketik yuʼun ya xnoptsajik ta stojol te Jehová. Sok ay chaʼoxtul ermanoetik te ya x-abatinik ta tiempo kompleto.

11. ¿Bin-utʼil ya yakʼik ta ilel te ermanoetik te kʼux ta yoʼtanik te Jehová sok te yermanotakik?

¹¹ Bayal ermanoetik sjunal kʼajkʼal ya x-aʼtejik yuʼun ya sleik te bin ya xtuun yuʼun te sfamiliaik. Manchukme jich ya spasik, ya skoltayik te organisasion te ban kʼalal ya xjuʼ yuʼunik. Ay machʼatik ya xkoltaywanik te banti ya xkʼax wokolil ta skaj tulan yikʼal jaʼal, nijkel o yan wokolil, ay ya x-aʼtejik ta konstruksion sok jpisiltik ya xjuʼ ya yakʼik majtan takʼin. Jich ya yakʼik ta ilel skʼuxul yoʼtanik ta stojol Dios sok ta stojol te spatxujkike. Jaʼnix jich ta jujun semana ya kakʼtik ta ilel te skʼuxul koʼtantik ta stojol te ermanoetik, kʼalal ya xbootik ta tsoblej manchukme lujbenotik, kʼalal ya kakʼ jkomentariotik manchukme ya xnijk koʼtantik sok te ya jpastik tulan ta yakʼbeyel smukʼul yoʼtan te yantik kʼalal mato xjajch sok te kʼalal ya xlaj te tsoblej manchukme ay jwokoltik-euk (Heb. 10:24, 25). Kʼax tseʼel koʼtantik  ta stojol te kermanotaktik kʼalal jich ya spasik.

12. ¿Binxan-utʼil la yakʼ ta ilel skʼuxul yoʼtan te Juan ta stojol te yermanotak?

¹² Te Juan la yakʼ ta ilel te kʼux ta yoʼtan te yermanotak kʼalal la yutsilkʼoptay, pero jaʼnix jich te kʼalal la yaltiklanbey konsejo. Jich bitʼil te kartaetik te la stsʼibay, la yaltiklanbey tʼujbil kʼopetik ta swenta te schʼuunel yoʼtanik sok te lek yaʼtelik, pero jaʼnix jich la yaltiklanbey ta jamal te bin ma skʼan ya spasike (1 Juan 1:8-2:1, 13, 14). Jich bitʼil la spas te Juan, jaʼnix jich ya xjuʼ ya kutsilkʼoptaytik te kermanotaktik te kʼalal ay bin lek ya spasike. Pero teme ya kiltik te ay machʼa ay bin chopol ya xkaj spas o yak ta jelonel stalel, ya kakʼtik ta ilel te kʼux ta koʼtantik kʼalal sok yutsil koʼtantik ya kalbeytik ta jamal te bin yak ta spasele. Ya skʼan te ma xiwotik ta yalel, melel te Biblia ya yal te machʼa yamigo sbaik talel kʼaxel ya stojobtes sbaik (Prov. 27:17).

13. ¿Bin-a te ma skʼan ya jpastike?

¹³ Jaʼnix jich ya kakʼtik ta ilel te kʼux ta koʼtantik te kermanotaktik te kʼalal maba ya jkʼej ta koʼtantik te banti ya xchʼayike. Manchuk ya x-ilinotik ta ora te kʼalal ay bin ya kichʼtik albeyele. Jnop kaʼiytik te bin kʼot ta pasel te kʼalal nopol ya xlajix-a te Jesuse. Te Jesús la yalbey te jnopojeletik yuʼun te jaʼnax ya sta skuxlejalik ta sbajtelkʼinal teme ya sweʼbeyik te sbakʼetal sok ya yuchʼbeyik te schʼichʼel (Juan 6:53-57). Bayal machʼatik te ma lek kʼot ta yoʼtanik jaʼ yuʼun la yijkitayik. Pero te machʼatik smelelil yamigotak, jich bitʼil te Juan, maba la yijkitayik te Jesús. Manchukme maba kʼot ta yoʼtanik-euk te bin la yal te Jesús, maba ilinik sok maba la snopik te chopol te bin la yale. Ay smukʼul yoʼtanik ta stojol, melel snaʼojik te ma spas lot stukel (Juan 6:60, 66-69). Mukʼ skʼoplal te manchuk ya x-ilinotik ta ora ta swenta te bin ya yalik te kermanotaktik, manchuk ya jnoptik te la yalik sok schopolil yoʼtanik (Prov. 18:13; Ecl. 7:9).

14. ¿Bin yuʼun ma skʼan ya jlab oʼtantaytik te kermanotaktike?

¹⁴ Te Juan jaʼnix jich la yal te manchuk ay slab koʼtantik ta stojol te kermanotaktik. Teme maba ya jchʼuuntik te bin la yale, ya xjuʼ ya kakʼ jbatik ta tuuntesel yuʼun te Satanás (1 Juan 2:11; 3:15). Jich  kʼot ta pasel ta slajibal te sbabial siglo. Te Satanás la yakʼ te ya slab oʼtantay sbaik te j-abatetik yuʼun Dios. Kʼalal te Juan la stsʼibay te kartaetik yuʼune, ay machʼatik ochemik ta kongregasion te jich stalelik bitʼil te Satanás. Jich bitʼil te Diótrefes te yak ta xatel jun kongregasion. Jkʼaxel ma la yichʼtiklan ta mukʼ te superintendenteetik te ya yichʼik tikunel bael ta kongregasion yuʼun te kuerpo gobernante. La skʼan la slokʼeslan ta kongregasion te ermanoetik te ya yotses ta snaik te machʼatik maba lek ya yil te Diótrefes kʼaxto la stoy sba (3 Juan 9, 10). Te Satanás jichnix yak ta spasel ta ora ini, ya sle bin-utʼil ya xatotik. Mame ayuk bin-ora ya skʼan ya jlab oʼtantaytik te kermanotaktike.

15. ¿Bin-a te mukʼ skʼoplal ya skʼan ya spasik te jolaletik ta na?

¹⁵ Jtul jolal ta na, ya yakʼ ta ilel te kʼux ta yoʼtan te sfamilia te kʼalal ya yakʼbey te bintik ya xtuun yuʼune (1 Tim. 5:8). Pero te bin mukʼxan skʼoplal ya skʼan ya spase, jaʼ te ya skanantaybey te schʼuunel yoʼtan te sfamilia (Mat. 5:3). Kiltik te ejemplo yuʼun te Jesús. Ta Ebanjelio yuʼun Juan ya yal te kʼalal jipil ta teʼ-a te Jesuse, tey ayik-euk-a te Juan sok te María te smama te Jesús. Manchukme yak ta kʼaxel tulan swokol-a te Jesús, la yalbey te Juan te akʼa kanantaybotuk te smama (Juan 19:26, 27). Te María ay yantik yalatak te ya x-akʼbot te bintik ya xtuun yuʼune, pero jich yilel te maʼyuk jtuluk te ochem ta jnopojel yuʼun te Jesús. Jaʼ yuʼun te Jesús la sle bin-utʼil ya yichʼ kanantayel te smama ma jaʼuknax ta swenta te bin ya xtuun yuʼune jaʼnix jich ta swenta te schʼuunel yoʼtan.

16. ¿Bin ay ta swenta spasel-a te Juan?

¹⁶ Te Juan bayal bintik ay ta swenta spasel-a. Te bitʼil jaʼ jpuk-kʼope, ya skʼan ya yakʼ ta ilel lekil ejemplo ta scholel skʼop Dios. Jaʼnix jich ayniwan yinam-a, jaʼ yuʼun ya skʼan ya x-aʼtej yuʼun ya sle te bin ya xtuun yuʼunik, pero jaʼnix jich ya skʼan ya skanantaybey te schʼuunel yoʼtanik (1 Cor. 9:5). ¿Bin ya xjuʼ ya snopik te jolaletik ta na?

17. ¿Bin yuʼun mukʼ skʼoplal te ya skanantaybeyik schʼuunel yoʼtan sfamiliaik te jolaletik ta na?

¹⁷ Te jolaletik ta na jaʼnix jich bayalniwan bin mukʼ skʼoplal ay ta swentaik spasel. Jich bitʼil te tulan ya x-aʼtejik yuʼun  jich ya yichʼ albeyel yutsil skʼoplal te Jehová (Efes. 6:5, 6; Tito 2:9, 10). Jaʼnix jich ayniwan yaʼtelik ta kongregasion, ya yakʼbeyik smukʼul yoʼtan sok ya skanantayik te ermanoetik sok jaʼ lekil ejemploetik ta scholel skʼop Dios. Pero jaʼnix jich ay swenta snopel te Biblia sok te yinam sok te snichʼnab ta spisil-ora. Te sfamilia te ermanoetik-abi ya yalik bayal wokol yuʼun te ya xkanantayotik, ya x-akʼbotik te bin ya xtuun yuʼunik, tseʼel yoʼtanik sok ya xtijbot yoʼtanik ta abatinel ta stojol te Jehová (Efes. 5:28, 29; 6:4).

18. ¿Bin snaʼoj-a te Juan?

¹⁸ Te Juan bayal jaʼbil kuxaj sok bayal bintik kʼax ta stojol. La sitintay tulan wokoliletik te ya xjuʼ ya xchebajtesbot yoʼtan yuʼun. Pero spisil-ora la spas tulan yuʼun ya schʼuunbey smantal te Jesús, jich bitʼil te kʼuxuk ta yoʼtan te yermanotak. Jaʼ yuʼun snaʼoj-a te kʼux aʼiybil yuʼun te Jehová sok te Jesús sok te ya x-akʼbot yip ta sitintayel biluk wokolil (Juan 14:15-17; 15:10; 1 Juan 4:16). Ni jaʼuk te Satanás ni te balumilal yuʼun, ma juʼ yuʼunik skomel te Juan yuʼun ya yakʼbey snaʼ sok ya yakʼbey yil skʼuxul yoʼtan te yermanotak.

19. ¿Bin ya stij koʼtantik ta spasel te bin ya yal 1 Juan 4:7, sok bin yuʼun?

¹⁹ Jichnix bitʼil ta skʼajkʼalel te Juan, kuxinemotik ta balumilal te jaʼ wentainbil yuʼun te Satanase sok te nojel ta lab-oʼtanil (1 Juan 3:1, 10). Te bin ya skʼan te Satanás, jaʼ te ma kʼuxuk ya kaʼiytik te kermanotaktik, pero mame kakʼtik te ya spas te bin ya skʼan yoʼtan ta jtojoltik. Jaʼ yuʼun kalbeytik sok kakʼbeytik yil te kermanotaktik te kʼux ta koʼtantik. Teme jich ya jpastike yame jtatik stseʼelil koʼtantik yuʼun te ayotik ta sfamilia te Jehová (kʼopona 1 Juan 4:7).