ARTÍCULO YUʼUN ESTUDIO 4
¿Bin swentail te ya xkʼootik ta Conmemoración?
«Pasahic ta scuenta jnaʼojibal» (LUC. 22:19).
KʼAYOJIL 20 La awakʼ te jip jtul aNichʼan
¿BIN YA KILBEYTIK SKʼOPLAL? *
1, 2. 1) ¿Bin-ora te kʼaxtoxan ya xjul ta koʼtantik te machʼa lajemik kuʼuntik? 2) ¿Bin la yal ta mantal te Jesús kʼalal junxanix ajkʼabal ya skʼan ya xlaj-ae?
KʼALAL ay machʼa ya xlaj kuʼuntik manchukme ya xkʼax bayal tiempo, spisilnanix-ora ya jnaʼulantik-a. Kʼaxtoxan ya jnaʼtik-a kʼalal ya xlokʼ jujun jaʼbil te slajele.
2 Ta jujun jaʼbil, bayal ants winiketik ta swolol Balumilal ya jtsob jbatik ta spasel te Snaʼojibal slajel te Jesucristo (1 Ped. 1:8). Jich ya jpasulantik swenta ya jultes ta koʼtantik te la yakʼ sba ta lajel yuʼun ya jta jkoleltik (Mat. 20:28). Te Jesús la yalbey te jnopojeletik te yakuk spasulanik te snaʼojibal slajele. Te kʼalal junxanix ajkʼabal ya skʼan ya xlaj-ae, jich la yal ta mantal: «Pasahic ta scuenta jnaʼojibal» (Luc. 22:19).
3. ¿Bin ya kilbeytik skʼoplal ta artículo ini?
3 Bayal machʼatik ya xbajtik ta Conmemoración. Ta tsoblej-abi, maʼyuk yipal te machʼatik ya xbajtik ta chʼulchan, jaʼ bayalxan te machʼatik ya xkuxinik liʼ ta Balumilal. Ta artículo ini, ya kiltik bin yuʼun ay ta yoʼtanik spasel ta jujun jaʼbil te Conmemoración te cheb grupo-abi. Jaʼnix jich ya kilbeytik skʼoplal bin lekilal ya jtatik teme tey ayotik-ae. Ta nail ya kiltik bin yuʼun ya xkʼotik te machʼatik tsabilik te ya xbajtik ta chʼulchan.
¿BIN YUʼUN YA XKʼOTIK TE MACHʼATIK YA XBAJTIK TA CHʼULCHAN?
4. ¿Bin yuʼun ya sweʼik te pan sok ya yuchʼik te vino ta Conmemoración te machʼatik ya xbajtik ta chʼulchan?
4 Te bin yuʼun ya xkʼotik ta Conmemoración te machʼatik ya xbajtik ta chʼulchan, jaʼ ta swenta te ya sweʼik te pan sok ya yuchʼik te vino. ¿Bin yuʼun te jich ya spasike? Yuʼun ya jnaʼbeytik sujtib, jultes ta koʼtantik te bin la spas te Jesús te kʼalal junxanix ajkʼabal ya skʼan ya xlaj-ae. Kʼalal laj yoʼtanik ta spasel te kʼin Pascua, te Jesús la yal ta mantal te yakuk yichʼ pasel te Weʼel Uchʼel yuʼun Kajwaltik. La skʼases te pan sok te vino ta stojol te 11 ta tul jpuk-kʼopetik sok la yaltiklanbey te ya xweʼ uchʼik. La yalbey skʼoplal te yachʼil chapbil kʼop sok te chapbil kʼop yuʼun te Wentainel (Luc. 22:19, 20, 28-30). * Te chapbil kʼop-abi, la yakʼ te ya x-ochik ta ajwalil sok sacerdote ta chʼulchan te jpuk-kʼopetik sok yantik j-abatetik yuʼun Dios (Apoc. 5:10; 14:1). Te machʼatik ya xbajtik ta chʼulchan te ayikto ta Balumilal tey ochem skʼoplalik-a ta cheb chapbil kʼop, jaʼ yuʼun jaʼnax ya xjuʼ ya sweʼik te pan sok ya yuchʼik te vino ta Conmemoración.
5. ¿Bin snaʼojik te machʼatik ya xbajtik ta chʼulchan ta swenta te bin yakik ta smaliyele?
5 Yan te bin swentail te ya xkʼotik ta Conmemoración te machʼatik ya xbajtik ta chʼulchan, yuʼun jich ya snopilan ta yoʼtanik-a te bin yakik ta smaliyel. Te Jehová yakʼtiklanojbey mukʼul majtanil: jaʼ te ya xkuxinik ta sbajtelkʼinal ta chʼulchan, te jun-nax ya x-abatinik sok te Jesús sok te sjoʼtakik, jaʼnix jich ya x-ayinik ta stojol te Jehová (1 Cor. 15:51-53; 1 Juan 3:2). Te machʼatik tsabilik yuʼun ya xbajtik ta chʼulchan snaʼojik te ikʼbilik yuʼun Jehová, yuʼun ya smulanik spasel te aʼtelile. Swenta ya xbajtik ta chʼulchan ya skʼan te jun yoʼtanik ta stojol Jehová jaʼto teme lajike (2 Tim. 4:7, 8). Tseʼelnax yoʼtanik yuʼun te bin ya smaliyik (Tito 2:13). ¿Bin ya kaltik ta stojol te «yantic tuminchijetic»? (Juan 10:16). ¿Bin yuʼun ya xkʼotik ta Conmemoración? Kiltik chaʼoxchajp te bin yuʼune.
¿BIN YUʼUN YA XKʼOTIK TE YANTIK TUMINCHIJETIK?
6. ¿Bin yuʼun ya xkʼotik ta jujun jaʼbil te yantik tuminchijetik ta Conmemoración?
6 Te bin swentail te ya xkʼotik ta Conmemoración te yantik tuminchijetik ma jaʼuk te ya sweʼik te pan sok ya yuchʼik te vino, jaʼnax yuʼun ya yilik. Ta 1938 la yichʼik albeyel ta sbabial buelta te ya xjuʼ ya xbajtik ta Conmemoración te machʼatik ya xkuxinik liʼ ta Balumilal. Te revista La Torre del Vigía te lokʼ ta abril 1938 la yal te jaʼ «lek sok jaʼ stojil te ya xkʼotik ta tsoblej-abi, yuʼun ya yilik te bin ya yichʼ pasele». Jich la yalxan: «Ta yorail-abi, jaʼnix jich tseʼel yoʼtanik-euk». Jich bitʼil te machʼatik ya xbajt yilik nujpunel tseʼelnax yoʼtanik, jichnix te yantik tuminchijetik tseʼelnax yoʼtanik kʼalal ya yilik te ya yichʼ pasel te Conmemoración.
7. ¿Bin yuʼun ya skʼan ya yaʼiyik te yantik tuminchijetik te discurso yuʼun te Conmemoración?
7 Te yantik tuminchijetik, jaʼnix jich ya snopilan ta yoʼtanik te bin ya smaliyike. Ya skʼan ya yaʼiyik te discurso yuʼun Conmemoración, melel jaʼ ya yalbey skʼoplal te Cristo sok te 144,000 te ya x-ochik ta ajwalil soknix te bin ya spasik ta stojol te ants winiketik te jun yoʼtanik ta jmil jaʼbil. Te 144,000 jaʼ ya xwolotik yuʼun te Jesucristo swenta ya xkoltaywanik ta spasel ta Nichimal Kʼinal te Balumilal sok ya xkoltaywanik yuʼun tojil ants winiketik ya xkʼotik te machʼatik ya schʼuunik mantal. Kʼax tseʼel yoʼtanik te machʼatik ya xbajt yilik te Conmemoración sok ya snop ta yoʼtanik te ya xkʼot ta pasel te albilkʼopetik te ay ta Isaías 35:5, 6; 65:21-23 sok Apocalipsis 21:3, 4. Kʼalal ya xtal ta yoʼtanik te ya yil te sfamiliaik ta achʼ balumilal, ya stsakxan yip te smukʼul yoʼtanik sok junxan yoʼtanik ya x-abatinik ta stojol te Jehová (Mat. 24:13; Gál. 6:9).
8. ¿Binxan yuʼun te ya xkʼotik te yantik tuminchijetik ta Conmemoración?
8 Yanxan te bin yuʼun ya xkʼotik ta Conmemoración te yantik tuminchijetik, jaʼ ta swenta te ya skʼan ya yakʼik ta ilel skʼuxul yoʼtanik sok ya skoltayik te machʼatik ya xbajtik ta chʼulchan. Te sKʼop Dios la yalbey skʼoplal te jun-nax ya x-aʼtejik te machʼatik ya xbajtik ta chʼulchan sok te machʼatik ya xkuxinik liʼ ta Balumilal. Kiltik cheʼoxeb albilkʼopetik te jich ya yakʼ ta naʼele.
9. Jich bitʼil ya yal te albilkʼop te ay ta Zacarías 8:23, ¿bin yaʼiyel ya yaʼiy sbaik te yantik tuminchijetik ta stojol te machʼatik ya xbajtik ta chʼulchan?
9 (Kʼopona Zacarías 8:23). Te albilkʼop-abi, ya yakʼ ta ilel te bin yaʼiyel ya yaʼiy sbaik te yantik tuminchijetik ta stojol te yermanotak te ya xbajtik ta chʼulchan. Kʼalal ya yal te kʼopil «jtuhl judio» sok «te haʼexe» jaʼnix ya yalbey skʼoplal te machʼatik ya xbajtik ta chʼulchan (Rom. 2:28, 29). Te «lajuntuhl jyanlumetic te bayel ta chahp scʼopic», jaʼ skʼoplal te yantik tuminchijetik. Tulan ya stsakbeyik «stiʼil scʼuʼ jtuhl judio» o te machʼatik ya xbajtik ta chʼulchan —te jaʼ ya skʼan ya yal te jun yoʼtanik ta stojol— sok te jun-nax ya yichʼik ta mukʼ te Jehová. Jich yuʼun, kʼalal ya xjokinwanik te yantik tuminchijetik ta spasel te Conmemoración, ya yakʼik ta ilel te jun-nax ayik sok te machʼatik tsabilik te ya xbajtik ta chʼulchan.
10. ¿Bin spasoj te Jehová swenta ya xkʼot ta pasel te albilkʼop te ay ta Ezequiel 37:15-19, 24, 25?
10 (Kʼopona Ezequiel 37:15-19, 24, 25). Te Jehová skʼotesoj ta pasel te albilkʼop-abi, te jun-nax ya x-aʼtejik te machʼatik ya xbajtik ta chʼulchan sok te yantik tuminchijetik. Te albilkʼop ya yalbey skʼoplal te chaʼchʼix teʼetik. Te machʼatik ya xbajtik ta chʼulchan, jich kʼoemik bitʼil «teʼ yuʼun Judá» (te tsʼumbalil te banti ya yichʼ tsael te ajwaliletik ta Israel). Sok te machʼatik ya xkuxinik liʼ ta Balumilal, jich kʼoemik bitʼil «teʼ yuʼun Efraín». * Te Jehová jun-nax ya stsob te cheb grupoetik-abi swenta «junax teʼ ya xcʼoht». Jaʼ ya skʼan ya yal te jun-nax ya x-abatinik ta stojol te Ajwalil, Cristo Jesús. Ta jujun jaʼbil, jun-nax ya stsob sbaik ta spasel te Conmemoración te machʼatik ya xbajtik ta chʼulchan sok te yantik tuminchijetik, jich «jtsohb nax ya xcʼohtic soc jtuhl nax jcanan yuʼunic» (Juan 10:16).
11. Jich bitʼil ya yal te Mateo 25:31-36, 40, ¿bin-utʼil te «tuminchijetic» ya skoltayik te yermanotak te Cristo?
11 (Kʼopona Mateo 25:31-36, 40). Te «tuminchijetic» la yalbey skʼoplal te Jesús ta lokʼombakʼop, jaʼik te ants winiketik te toj yoʼtanik te yakik ta kuxinel ta slajibal kʼajkʼal sok te ya xkuxinik liʼ ta Balumilal, te jaʼ skʼoplal te yantik tuminchijetik. Jun yoʼtan ya x-aʼtejik sok te yermanotak te Cristo ta spasel te mukʼul aʼtelil: te scholel skʼop Dios ta swolol Balumilal sok te ya yakʼik nojptesel ta Biblia (Mat. 24:14; 28:19, 20).
12, 13. ¿Bin-utʼil te yantik tuminchijetik ya skoltayikxan te yermanotak te Cristo?
12 Ta jujun jaʼbil te kʼalal nopol ya xkʼotix yorail te Conmemoración, te yantik tuminchijetik ya yakʼik ta ilel te ya skoltayik te yermanotak te Cristo. ¿Bin-utʼil? Jaʼ te ya spasik tulan ta yikʼel te ants winiketik yuʼun ya xjokinotik ta skʼajkʼalel-abi (ilawil te recuadro « Te bintik ya xjuʼ ya apas ta yorail te Conmemoración»). Te jayeb congregacionetik ay ta swolol Balumilal, ya spasik te Conmemoración manchukme ay congregacionetik te maʼyuk machʼa tsabil yuʼun ya xbajt ta chʼulchan. Te yantik tuminchijetik tseʼel yoʼtanik ya skoltayik te yermanotak te Cristo. Kʼoem ta yoʼtanik te kʼalal ya skoltayik te machʼatik ya xbajtik ta chʼulchan, jich kʼoem te jaʼ yakik ta skoltayel te Jesús (Mat. 25:37-40).
13 Chikan te bin ya jmaliytik ta pajel chaʼbej teme ya xkuxinotik ta chʼulchan o ta Balumilal, ¿bin yuʼun te ya xkʼootik ta Conmemoración?
¿BIN YUʼUN JPISILTIK YA XKʼOOTIK?
14. ¿Bin-utʼil yakʼojik ta ilel te Jehová sok te Jesús te skʼuxul yoʼtan ta jtojoltik?
14 Ya kaltik wokol ta swenta te skʼuxul yoʼtan te Jehová sok te Jesús. Bayal te bin-utʼil yakʼojbotik kiltik te skʼuxul yoʼtan te Jehová. Pero te bin-utʼil yakʼojxan ta ilele, jaʼ te la stikun tal ta lajel ta jtojoltik te jip jtul sNichʼane (Juan 3:16). Jaʼnix jich te Jesús la yakʼ ta ilel te skʼuxul yoʼtan ta jtojoltik kʼalal jun yoʼtan la yakʼ sba ta lajel (Juan 15:13). Melel ma xjuʼ ya jtojbeytik spisil te bin spasojik ta jtojoltik, pero ya xjuʼ ya kakʼtik ta ilel te ya kaltik wokol ta swenta te bitʼil ya xkuxinotik (Col. 3:15). Kʼalal ya xkʼootik ta Conmemoración, jich ya kakʼtik ta ilel te ya kaltik wokol yuʼun te skʼuxul yoʼtanik ta jtojoltik soknix te kʼux ta koʼtantik-euk.
15. ¿Bin yuʼun ya yalik wokol ta swenta te stojol kolel te machʼatik ya xbajtik ta chʼulchan sok te yantik tuminchijetik?
15 Ya kaltik wokol ta swenta te la yakʼ sba ta lajel te Jesús (Mat. 20:28). Te machʼatik ya xbajtik ta chʼulchan, mukʼ skʼoplal ta yoʼtanik te stojol kolel, melel jich ya xkʼot ta pasel te bin ya smaliyike. Te bitʼil ay schʼuunel yoʼtanik ta swenta te laj te Cristo, toj ya x-ilotik yuʼun te Jehová sok jich ya xkʼotik bitʼil yal snichʼnab (Rom. 5:1; 8:15-17, 23). Te yantik tuminchijetik, jaʼnix jich mukʼ skʼoplal ta yoʼtanik te stojol kolel, melel teme ya yakʼ schʼuunel yoʼtanik ta swenta te laj te Cristo, ya xjuʼ te lek ya x-ilotik yuʼun te Dios, te ya x-abatinik ta stojol sok te ya xkolik jilel ta yorail «te tulan utsʼinel» (Apoc. 7:13-15). Kʼalal ya xkʼotik ta jujun jaʼbil ta Conmemoración te cheb grupoetik-abi, jich ya yalik wokol ta swenta te stojol kolele.
16. ¿Binxan yuʼun te ya xkʼootik ta Conmemoración?
16 Ya jchʼuunbeytik smantal te Jesús. Chikan te bin ya jmaliytik ta pajel chaʼbej, jpisiltik mukʼ skʼoplal ta koʼtantik te mantalil la yakʼ te Jesús te ya yichʼ pasel te Conmemoración kʼalal jich la yal: «Pasahic ta scuenta jnaʼojibal» (1 Cor. 11:23, 24).
¿BIN LEKILAL YA JTATIK TA JPISILTIK TEME TEY AYOTIK-AE?
17. ¿Bin yuʼun ya xnoptsajotikxan ta stojol te Jehová kʼalal ya xkʼootik ta Conmemoración?
17 Te nopolxan ya kaʼiy jbatik ta stojol te Jehová (Sant. 4:8). Jich bitʼil la kiltikixe, kʼalal ya xkʼootik ta Conmemoración jich ya jnopilan ta koʼtantik te bin ya yakʼbotik te Jehová ta pajel chaʼbej sok te bin-utʼil yakʼoj ta ilel skʼuxul yoʼtan ta jtojoltik (Jer. 29:11; 1 Juan 4:8-10). Schʼuunej ta lek koʼtantik te ya xkʼot ta pasel te bin ya jmaliytik sok te maʼyuk bin-ora ya xlaj te skʼuxul yoʼtan. Kʼalal ya jnopilan ta koʼtantik spisil-abi, kʼux-xan ta koʼtantik te Jehová sok nopolxan ya kaʼiy jbatik ta stojol (Rom. 8:38, 39).
18. ¿Bin-utʼil ya skoltayotik teme ya jnopilan ta koʼtantik te ejemplo yuʼun te Jesús?
18 Ya stij koʼtantik ta stʼunbeyel te ejemplo yuʼun te Jesús (1 Ped. 2:21). Kʼalal nopol ya xkʼotix te skʼajkʼalel te Conmemoración, ya jkʼopontik relatoetik ta Biblia ta swenta te slajibal semana ay ta Balumilal te Jesús, te bitʼil laj sok te schaʼkuxajel. Te discurso te ya xkʼax ta Conmemoración, ya sjultes ta koʼtantik te skʼuxul yoʼtan te Jesús ta jtojoltik (Efes. 5:2; 1 Juan 3:16). Kʼalal ya jkʼopontik ta swenta te bitʼil la yakʼ sba ta lajel te Jesús sok te ya jnopilan ta koʼtantik, jaʼ ya stij koʼtantik yuʼun ya jpastik «hich te bin utʼil» la spase (1 Juan 2:6).
19. ¿Bin ya skʼan ya jpastik yuʼun ya x-ayinotik ta skʼuxul yoʼtan te Dios?
19 Jich junxan koʼtantik ya x-ayinotik ta skʼuxul yoʼtan te Dios (Jud. 20, 21). Kʼalal ya jpastik tulan ta schʼuunbeyel te smantal, jich ya jchʼultesbeytik te sbiil, ya jtseʼentesbeytik yoʼtan sok ya x-ayinotik ta skʼuxul yoʼtan te Jehová (Prov. 27:11; Mat. 6:9; 1 Juan 5:3). Kʼalal ya xkʼootik ta Conmemoración ya yakʼbotikxan yip koʼtantik yuʼun jich ya kalbeytik ta jujun kʼajkʼal te Jehová ta swenta te bin ya jpastike: «¡Ya jkʼan te spisil-ora ya kamigoinat!».
20. ¿Bin yuʼun bayal skʼoplal ta koʼtantik te ya xkʼootik ta Conmemoración?
20 Chikan teme ya xkuxinotik ta chʼulchan o ta Balumilal, pero bayal skʼoplal ta koʼtantik te ya xkʼootik ta jujun jaʼbil ta Conmemoración. Jujun buelta te ya yichʼ pasele, ya xjul ta koʼtantik te machʼa laj te kʼux ta koʼtantik: jaʼ te Jesucristo. Jaʼnix jich, ya xjul ta koʼtantik te machʼa la yakʼ ta ilel te skʼuxul yoʼtan ta jtojoltik: jaʼ te Jehová te la yakʼ te jip jtul sNichʼan swenta ya jta jkoleltik. Ta jaʼbil ini, te Conmemoración ya yichʼ pasel ta viernes 15 yuʼun abril 2022. Kʼux ta koʼtantik te Jehová sok te sNichʼan. Jaʼ yuʼun, ta snaʼojibal slajel te Jesús jaʼ mukʼxan skʼoplal te tey ayukotik-ae.
KʼAYOJIL 16 Kalbeytik yutsilal te Dios yuʼun te sNichʼane
^ parr. 5 Chikan teme ya xkuxinotik ta chʼulchan o ta Nichimal Kʼinal liʼ ta Balumilal, ta jujun jaʼbil jpisiltik ya jkʼantik te ya xbootik ta Conmemoración. Ta artículo ini, ya kiltik bin ya yakʼ jnoptik te Biblia ta swenta te ya xkʼootik ta Conmemoración sok bin lekilal ya jtatik yuʼun.
^ parr. 4 Yame ataxan información ta swenta te yachʼil chapbil kʼop sok te chapbil kʼop yuʼun te Wentainel ta artículo «Llegarán a ser ‹un reino de sacerdotes›», te lokʼ ta revista La Atalaya 15 yuʼun octubre 2014, página 15 kʼalal ta 17.
^ parr. 10 Ya ataxan información ta swenta te albilkʼop te ya yalbey skʼoplal te chaʼchʼix teʼ te ay ta capítulo 37 yuʼun te Ezequiel ta libro La adoración pura de Jehová: ¡por fin restaurada!, página 130 kʼalal ta 135, párrafo 3 kʼalal ta 17.
